Biibili qanoq oqarpa?
Ilumut nunarsuarmi ulersuaqarsimava?
„Uumasullu tamarmik nuliariikkuutaarlutik Noa ornillugu umiarsuarmut ikipput.“ — 1 Moses 7:8, 9.
NOAP ulluini ulersuaqarsimanera pillugu oqaluttuaq amerlasuunit naluneqanngilaq. Amerlanerit meeraanerminniilli ilisimalersimassavaat. Atuakkanik atorniartarfinni ulersuaq pillugu atuakkanik misissuigaanni, paasinarsissaaq ullut taakkua pillugit atuakkiat amerlanerusut meeqqanut atuakkiaasut. Ilaasa immaqa sammisaq tamanna sinnassaatitut oqaluttuaannartut isigisarpaat. Amerlasuut Noamik oqaluttuaq uppernilikkersaarutaannartut oqaluttualiaannartulluunniit Biibilimi allassimasorpassuit taamaaqqataattut isumaqarfigaat.
Biibilimik upperinninnerartut allaat tupaallannartumik ulersuaqarsimanera upperiuminaatsippaat. Katuullit palasiat Edward J. McLean Noa pillugu oqarsimavoq oqaluttuarineqarneratut nassuiarneqartussaanngikkaluartoq, kisiannili „itinerusumik isumassarsiorluni assersuusiaalluni, atuakkiornermi saqqummeeriaasiusoq“.
Ulersuaq pillugu oqaluttuaq itinerusumik isumassarsiorluni assersuusiaannaava allassimaneratut paasineqartussaanngitsoq? Tamanna pillugu Biibili qanoq oqaaseqarpa?
Oqaluttuaq uppernartoq
Mosesip allagaasa siullianni Mosesip nalunaarsugai takoqqaalaariartigik. Eqqoqqissaartumik taasimavaa ukioq suna, qaammat suna ullorlu suna ulersuaq aallartissimanersoq, umiarsuaq qanoq ilisukkut nunassinnersoq, qanoq ilisukkut nuna panivinnersoq. (1 Moses 7:11; 8:4, 13, 14) Naak Moses allakkamini piffissanik eqqoqqissaartunik eqqaasaqartuaannanngikkaluartoq pisimasup matuma uppernarsarpaa Mosesip ulersuaq pisimavissimasutut isigigaa. Biibilimi oqaluttuaq tamanna oqaluttualiarpassuarnit „ilaannigooq“-mik aallartittunit uppernarnerunnginnerpa?
Umiarsuaq assersuutinut ilaavoq. Umiarsuaq Biibilimi eqqaaneqarpoq 133,5 meteritut takitigisoq takissutsip portussutsillu nikingassusaat 10-miit 1-muusoq takissutsillu silissutsillu nikingassusaat 6-miit 1-muusoq. (1 Moses 6:15) Naak Noa umiarsualiortutut inuutissarsiuteqanngikkaluartoq pisimasorlu ukiut 4000-it matuma siornagut pisimagaluartoq umiarsualiaa useqarluarsinnaasutut sananeqarsimavoq. Ullumikkut umiarsualiortut paasisimavaat umiarsuit angissutsimikkut nikingassutaat taaneqartut assinganik angissusillit tassaasut umiarsuit imaannarsuarmi pertujaallutillu imarsiullaqqittut. Biibilip erseqqissumik oqaluttuarinngilaa Noap qanoq sivisutigisumik umiarsuaq sanasimaneraa, kisianni Mosesip allagaasa siullianni eqqartorneqartut malillugit immaqa ukiut 50-60-it sanasimassavaa. (1 Moses 5:32; 7:6) Pissutsit tamakkua Babylonimi Gilgamesj pillugu taalliarpalaartumik oqaluttuamut illua-tungiliuttuuvoq. Taalliarpalaartumik oqaluttuap nassuiaatigaa umiarsuaq aalasarluttuusoq arfinilinnik teqeqqulittut ilusilik sanerai tamarmik 60 meteritut takitigisut. Umiarsuaq taanna taamaallaat ulluni arfineq-marlunni sananeqarsimavoq. Biibilimi ulersuaq pillugu oqaluttuarineqartoq uppernarnerorujussuuvoq Babyloniamiut oqaluttuaaninngarnit.
Mosesip allagaasa siullianni oqaluttuarineqartup saniatigut Biibilimi Noa imaluunniit ulersuaq quleriarluni eqqaaneqarsimavoq. Innersuussutit taakkua Biibilimik allattut allat Ulersuaq pisimasuittut imaluunniit oqaluttualiaannartut isiginnissimanerannik uppernarsaappat?
Oqaluttuarisaanikkut eqqortuunera uppernarsarneqartoq
Biibilimi Israelikkut inuiaqatigiinni kinguaariit marluk nalunaarsorneranni Noa eqqaaneqarsimavoq, kingullermilu Jesus Kristusimut siuaasatut taaneqarluni. (1 Israelikkut 1:4; Lúkarse 3:36) Ezra Lukasilu kinguaariinnik nalunaarsuutinik suliarinnittuusimasut tamarmik oqaluttuarisaanermik ilisimatuujusimapput pikkorissut, aamma tamarmik qularutigisimassanngilaat Noap inuttut ilumut inuusimanera.
Biibilimi Noa inuit oqaluttuarisaanermi malunnaatillit akornanni inissinneqarsimavoq inuttullu naapertuilluartutut upperluartutullu eqqartorneqartarluni. (Hesekiel 14:14, 20; Eprîarit 11:7) Biibilimik allattut inuk oqaluttualiaannaasoq immikkut maligassaalluartutut tikkuassappassuk siunertaqassagaluarpa? Naamik, tamanna Biibilimik atuartartut isumaqalersiinnassagaluarpaat uppertuuneq ajornartuusoq aammalu inuit oqaluttualiaannaasut uppertuusinnaasut. Noa allallu angutit arnallu uppernermik ersersitsisut maligassatut eqqaaneqarput ilumut inuusimagamik uagutsitullu sanngiissuteqarsumasut. — Eprîarit 12:1; naleqqiuguk Jâko 5:17.
Biibilimi innersuussutini allani Noa ulersuarlu Guutip uppinngitsunik piuneerutsitsineranut atatillugu taaneqarsimapput. Assersuutigalugu takoriaruk Lúkarse 17:26, 27-mi Jesusip ulersuarmut innersuussutaa: ’Soorlu Noap ulluini ittoq, taamattaaq inuup ernerata ullussaani ikkumaarpoq. Nerillutillu imerlutillu nuliarlutillu uinipput ulloq taanna Noap umiarsuarmut iserfia tikillugu, taavalu ulersuaq nalliuppoq tamaasa nungutillugit.’
Jesus inunngunngikkallaramili qilammi inuusimagami ulersuaqarnera nammineq takusimavaa. (Juánase 8:58) Ulersuup pisimasuunera oqaluttualiaannaasimagaluarpat Jesusip tikiuffissani asuli takorluugaannartut eqqartorsimassagaluarpaa imaluunniit ilumoornani oqalussimasutut paasitissimassagaluarpoq. Naliliinerit taakkua arlaannaalluunniit Biibilimut naapertuutinngillat. (1 Pîtruse 2:22; 2 Pîtruse 3:3-7) Jesusip nammineq qanoq pisoqarnera takusimavaa, taamaattumillu Biibilimi nunarsuarmi tamarmi ulersuaqarfiusimaneranik oqaluttuaq ilumoortuusoq nalunngilaa. Tamanna qularnanngitsumik kristumiunut nalunaajaataavoq uppernarsaataalluarnerpaaq ulersuup ilumut pisimaneranik. (gE 8/2 97)
[Qupp. 18-mi suminngaanneernera]
L. Chapons/Illustrirte Familien-Bibel nach der deutschen Übersetzung Dr. Martin Luthers