Biibili qanoq oqarpa?
Inuusuttut suna upperissanerlugu namminneq qinissavaat?
MEEQQAT inunngorneranniit inersimasunngornerat tikillugu angajoqqaat taakku sinnerlugit qinersisarput. Angajoqqaat silatuugunik nalussanngilaat qaqugu atukkanut assigiinngitsunut piareersimasariaqarlutik meeqqap iluarisaa soqutigalugu.
Taamaattorli unamminiarnartuusinnaavoq meeqqap qanoq annertutigisumik kiffaanngissuseqarnissaa aalajangissallugu. Ilumoorpoq meeqqat eqqortumik qinersisinnaasut nammineertitaanerlu iluaqutigisinnaagaat, kisianni aamma eqqunngitsumik qinersisinnaapput ajortumik kingunilimmik. — 2 Kunngit 2:23-25; Evfisumiut 6:1-3.
Assersuutigalugu meeqqat amerlanertigut nerisassat inuussutissartaqarluartunit pikkunartortaqanngitsut piumanerusarpaat. Sooq taamaappa? Ukiukikkamik nammineerlutik silatuumik naliliisinnaassuseqarneq ajorput. Angajoqqaat silatuussagunik meeqqatik tamatuminnga namminneq aalajangertissanerpaat, neriullutik meeqqat nalaatsornikkut inuussutissartaqarluartut qinissagaat? Naamik. Akerlianik angajoqqaat meeqqatik sinnerlugit qinersisariaqarput taakkua siunissami iluaqutissaat soqutigalugu.
Taamaattumik angajoqqaat eqqortumik meeqqaminnut nerisassat, atisat, isikkorissuuneq ileqqussallu eqqarsaatigalugit qinersisarput. Upperisarsiornermi? Angajoqqaat aamma tamanna aalajangissavaat?
Aalajangernissaq
Ilaat isumaqassapput angajoqqaat meeqqatik upperisartik pinngitsaaliissutigissanngikkaat. Ukiut 160-t sinnerlugit matuma siorna kristumiuunerartut ilaat isumaqarput „meeqqat upperisarsiornermik ilinniartinneqartariaqanngitsut isumaat upperisamik aalajangersimasumik sunnerneqaqqunagit, imminiiginnartinneqartariaqartulli namminneq qinersisinnaanissaat aammalu qinersiumanissaat tikillugit“.
Isumali tamanna Biibilimi tapersersorneqanngilaq. Biibilimi meeqqat inunngorneranniit upperisamik ajoqersorneqarnissaasa pingaaruteqassusia erseqqissarneqarpoq. Ussatit 22:6-imi allassimavoq: „Inuusuttoq ingerlavissaanik ajoqersuuguk, taava utoqqaliguni tamanna nigussanngilaa.“
Hebriaarit oqaasiat „inuusuttoq“-mik nutserneqartoq pineqaraangat ukiut inunngornermiit inersimasunngulernermut pineqartarput. Piaartumik ajoqersorneqarnerup pingaaruteqarnera pillugu Dr. Joseph M. Hunt USA-mi Illinoisip universitetianeersoq oqarsimavoq: „Ukiuni sisamani tallimaniluunniit siullerni meeqqap ineriartornera sukanerusarpoq sunnertikkuminarnerusarlunilu. . . . Immaqa piginnaassusiisa tunngaviunerusut 20 procentii ineriartortinneqartarput ataatsimik ukioqalernera sioqqullugu, immaqalu affaat sisamanik ukioqalersinnagit.“ Tamatuma uppernarsarpaa unnersuussut isumassarsiarititaasoq Biibilimeersoq, angajoqqaat meeqqat inunngorneranniit silatuumik ajoqersortariaqaraat, Guutip aqqutigeqqusaanik ajoqersorlugit. — 5 Moses 11:18-21.
Biibilip erseqqilluinnartumik angajoqqaat peqquai meeqqatik Jehovamut asanninnermik ilinniaqqullugit. 5 Moses 6:5-7-mi allassimavoq: „[Jehova] Guutit asassavat uummatikkut iluunngarlutit tarnikkullu iluunngarlutit nukitillu tamakkerlugit. Oqaatsit taakku peqqussutillu ullumi ilinnut tunniussakka uummammiugiuassavatit. Qitornannut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ Hebriaarit oqaluutaat „nangeqqittuarpaa“ aamma ’sakkuutit ipissarneqarnerannut’ atorneqarsinnaavoq. Taamaaliussagaanni uteqqiinerit amerlanngitsut naammanngillat, peqqissaartumilli taamaaliortuartariaqarpoq. The New English Bible-mi hebriiarit oqaasiat ’uteqqiineq’-mik nutserneqarpoq. Aap, ’nangeqqiiuarneq’ ataavartumik sunniuteqartoq. — Naleqqiuguk Ussatit 27:17.
Taamaattumik angajoqqaat kristumiuusut meeqqamik kristumiut upperisaannik ajoqersorneqarnissaannik akisussaaffitsik ilumooruttariaqarpaat. Akisussaaffik tamanna meeqqat namminneq qinersisinnerisigut iperaraanni eqqortuliornerussanngilaq. Aamma meeqqat ataatsimiigiaqataatinneqartariaqarput. Taamaalillutik angajoqqaat meeqqat issiaqatigissinnaavaat oqaatigineqartullu paasinissaannut ikiorlugit ilaqutariittullu Biibilip sammineqartarnera tusarnaarlugu peqataaffigalugulu iluaqutigisinnaavaat. — 5 Moses 31:12, 13; Jesaja 48:17-19; 2 Timûtiuse 1:5; 3:15.
Angajoqqaat akisussaaffiat
Meeraq oqarfigineqaraluaruni nerisassat aalajangersimasut inuussutissartaqarluartut nerissagai ima paasisariaqanngilaq meeqqap mamarissagai. Taamaattumik anaanaasoq silatooq pikkunartunik illinnartunillu nerisassiortarpoq meeqqap iluarisinnaasaanik. Soorunamilu meeqqap sapinngisaanik nerisassiortarpoq.
Tamatumunnga assingusumik meeqqap immaqa aallaqqaataani upperisamik ajoqersorneqarneq itigartissavaa, angajoqqaallu paasiniartariaqarpaat sooq nangaasuteqarnersoq. Kisianni Biiibilip peqqussutai ersaripput — angajoqqaat sapinngisamik meeqqat inunngorneranniit ajoqersorniartariaqarpaat. Taamaattumik angajoqqaat silatuujugunik ajoqersuinertik meeqqap iluarisinnaasaanik saqqummiunniassavaat meeqqap paasisinnaasaanut naleqquttunngorsarlugu.
Angajoqqaat asannittut meeqqatik pisariaqartitaat isumagerusuttarpaat, amerlanertigullu angajoqqaat meeqqat pisariaqartitaat allanit tamanit nalunnginnerusarpaat. Taamaattumik Biibili naapertorlugu meeqqanik timikkut anersaakkullu isumaginninnissamik akisussaaffik angajoqqaat tigummivaat — pingaartumik ataataasup. (Evfisumiut 6:4) Angajoqqaat akisussaaffik tamanna sumiginnarsinnaanngilaat allanullu tunniullugu. Naak allanit ikiorneqarnissartik iluaqutigisinnaagaluarlugu ikiorneqarnerup taama ittup angajoqqaat upperisamik ajoqersuinerat taarsersinnaanngilaa. — 1 Timûtiuse 5:8.
Inuup nammineq aalajangertariaqarpaa sumik upperisaqassalluni upperisaqassannginnerluniluunniit. Angajoqqaat kristumiuusut akisussaassuseqarluarlutik meeqqatik inunngorneranniit upperisamik ajoqersortarunikkik najoqqutassiallu peqqinnartut tunngavigalugit eqqarsarnissaannik ilinniartikkunikkik, qularnanngitsumik meeraat kingusinnerusukkut namminneq eqqortumik qinerssisinnaassapput. — 2 Israelikkut 34:1, 2; Ussatit 2:1-9. (gE 8/3 97)
[Qupp. 28-mi suminngaanneernera]
The Doré Bible Illustrations/Dover Publications, Inc.