Biibili qanoq oqarpa?

Sooq kamannitit aqussinnaasariaqarpigit?

AAPPARIINNERAT aallaqqaataaniilli ajortumik ingerlalerpoq. „Uanga maani illumi oqartussaavunga, illit kingusiinnakkut takkuttarnikkut kanngunarsassanngilarma,“ Johnip nuliartaani Ginger appisaluuppaa.a Minutsit 45-it sinnerlugit nilliaffigaa nalaasaarfimmilu issiaannarnissaa piumasaralugu. Kusanaatsumik oqalunneq aappariinneranni nalinginnaalersimavoq. Ajoraluartumik Johnip kamattarnini arriitsumik annertusiartuaartippaa. Matu matorluttarpaa, igaffiup nerrivia tilluartarpaa biilertillutillu aquut ingasattumik tilluartarpaa taamaalillunilu inuit allat inuuneri ulorianartorsiortissinnaasarlugit.

Ajuusaarnaraluartumik nalunngisatsitut taamatut ineriartuaartumik pisoqartarnera akulikippallaarpoq. Angut eqqaasarput pissutissaqarluni taamaaliorsimava imaluunniit aqussinnaanngisaminik iliorsimava? Kamannerit suulluunniit kukkuneruppat? Qanoq ilisukkut kamannerit nununeqarunnaartutut taaneqarsinnaappat? Qanoq ilisukkut ingasaassineqalertarpa?

Kamanneq nununeqarsinnaasoq pissutissaqarsinnaavoq. Assersuutitut taasinnaavarput itsaq Sodomami Gomorramilu illoqarfiit ileqqorluffiuallaalernerat pillugu Guutip pissutissaqartumik kamassimanera. (1 Moses 19:24) Sooq? Illoqarfiit taakku annertuumik nakuuserfiullutillu kanngunartuliorfiusimapput, soorlu tamanna illoqarfiup avataanit aamma ilisimaneqarluartoq. Assersuutigeriartigu, inngilit Loti naapertuilluartoq pulaarmassuk angutit inuusuttut utoqqaallu ataatsimoortorsuullutik aggersimapput pulaat anguseriffigerusullugit. Taama ajortigisumik iliorniarnerat Jehova Guutip pissutissaqartumik kamaatigaa. — 1 Moses 18:20; 19:4, 5, 9.

Jesus Kristus naammalluinnartoq Ataatamisut pissutissaqartumittaaq kamassinnaasimavoq. Jerusalemimi naalaffissuaq Guutimut pallorfiginninnissamut atortussaatitaasimagaluarpoq. Taanna ’illumik qinusarfimmik taaneqaqquaa’, inuit Guutimut pilliivigisinnaasaat aamma aqqutissaminnik ilitsersorneqarfigisinnaasaat ajortiminnillu isumakkeerfigineqarfigisinnaasaat. Naalaffimmi inuit Jehova oqaloqatigisinnaavaallusooq. Taamaattorli Jesusip nalaani upperisarsiornikkut siuttut naalaffik ’niuertarfinngortillugulu’ ’ujajaaffinngortippaat’. (Matîuse 21:12, 13; Juánase 2:14-17) Uumasunik pilliinermi atugassanik tuniniaanertik namminneq iluanaarutigisarpaat. Allatut oqaatigalugu uumasuutit paarisatik suutaaruttarpaat. Taamaalilluni Guutip ernera eqqorluinnartumik pissutissaqarsimavoq peqquserluttut Ataatami illuanit anisikkamigit. Jesus paasinarluartumik kamassimavoq!

Inuit naammalluinnanngitsut kamakkaangata

Inuit naammalluinnanngitsut aamma peqquteqartumik kamaammersinnaasarput. Eqqarsaatigeriaruk Mosesip qanoq misigisaqarsimanera. Israelikkut tupinnartuliornikkut Egyptenimit aniguisitaasimapput. Jehovap guutipilunnik ajorsartitsinermigut perlunnillu qulinik takutitsinermigut Egyptenimiunut maluginiarnartumik pissaanini takutippaa. Juutit Immap Aappalaartup avinneratigut qimaaffissarsivai. Kingorna Sinajip qaqqaanut ingerlatinneqarput tassanilu inuiattut aaqqissuunneqarlutik. Moses aallartitatut Guutip inatsisai aallugit qaqqamut majuarpoq. Inatsisit allat tamaasa ilanngullugit, Jehovap inatsisit qulit ’Guutip assaanik allanneqartut’ ujaraasut Mosesimut tunniuppai. Taavali Mosesip aterami suna takuaa? Inuit nersutaasaliamut kuultiusumut guutipilussiulersimasut! Sapaatit-akunnerini arlaqanngitsuni kingullerni misigisimasatik puigulertorsimaqaat! Pissutissaqartumik Moses „kamangaalerpoq“. Tigumiani ujaqqat allaffissiat sequmippai nersuteeraasaliarlu aamma ilanngullugu aserorterlugu. — 2 Moses 31:18; 32:16, 19, 20.

Kingusinnerusukkut Moses kamattoorpoq inuit imermik amigaateqarnertik pillugu naammagittaalliuinnalermata. Puffassimalluni naammagittartuunini kamagittartuuninilu tusaamaneqaatigisani sivikitsumik puigorpai. Tamanna kukkunermik angisuumik kinguneqarpoq. Jehovap Israelikkunnik pilersuisuunera saqqummiunniarunnaarlugu, Moses sukannersumik oqalulerpoq qatanngummi Aronip namminerlu malugineqarnissartik pinerullugu. Tamanna pillugu Guutip Mosesip perorsaatissinneqarnissaa pisariaqalersoraa. Nunamut neriorsuutigisaasumut nunasisinnaajunnaarsippaa. Meribami pisimasup tamatuma kingorna Mosesip kamattooqqissimaneranik allassimasoqanngilaq. Pisimasoq tamanna ilinniutigisimagunarpaa. — 4 Moses 20:1-12; 5 Moses 34:4; Tussiaat 106:32, 33.

Tamanna eqqarsaatigalugu Guuti inullu assigiinngissuteqarput. Jehovap ’kamannini nunusinnaavaa’ eqqorluartumillu oqaatigineqarluni „kamajasuunngitsoq“, asanninneq, kamannerunngitsoq, pissutsimi malunnarnerpaartarimmassuk. Kamannera tamatigut naapertuilluartuusarpoq, tamatigut pissutissaqartarpoq tamatigullu nunusinnaassuseqartarluni. (2 Moses 34:6; Jesaja 48:9; 1 Juánase 4:8) Jesus Kristusip naammalluinnartuusup kamannerminik nununissamut sapinnginnini takutittuartarsimavaa; allaatigineqarsimavorlumi ’makitajuitsuusoq’. (Matîuse 11:29) Akerlianik angutit naammalluinnanngitsut kamannerminnik Mosesitulli nununissaminnik ajornartorsiuteqartarsimapput.

Aamma inuit kamannerup kingunerisinnaasai annerusumik eqqarsaatiginngitsoorsinnaasarpaat. Kamannermik nunusinnaajunnaarneq pitsaanngitsumik akeqarsinnaasarpoq. Assersuutigalugu qanoq kinguneqarsinnaava uisup nuliaminut kamattoorluni iigaq tilluppagu putullugulu? Pigisamik aseruinermik kinguneqassaaq. Uisoq assammigut annersimassaaq. Kisianni aamma suli allamik aseruisinnaavoq. Kamanneq nuliaasup uiminut asanninneranut ataqqinninneranullu qanoq sunniuteqassavamitaava? Ullut arlaqanngitsut ingerlaneranni iigaq aaqqinneqarsinnaavoq, uisullu assaa sapaatip-akunnialuit ingerlaneranni aaqqissinnaalluni; kisianni nuliami tatiginninnera ataqqinninneralu qanoq pilertortigisumik utertissinnaassavaa?

Aammali Biibili inunnik kamannerminnik nunusinnaajunnaarnermik kingunerisaanik erloqinartorsiortunik assersuutinik imaqarpoq. Ilamerngi eqqaariartigik. Kain qatanngunni Abel toqukkamiuk qimaatitaavoq. Simeon Levilu angutinik Sikemimiunik toqoraasimanertik pillugu ataataminnit perloqqusaapput. Jehovap Ussia pupissunngortippaa palasinit imminik ilungersortumik oqaassiniartunik kamaasserujussuarnera pillugu. Jonas ’kamammat’ Jehovap naveerpaa. Taaneqartut tamarmik kamannermik kinguneri atortariaqarsimavaat. — 1 Moses 4:5, 8-16; 34:25-30; 49:5-7; 2 Israelikkut 26:19; Jona 4:1-11.

Kristumiut akisussaassuseqarput

Ullumikkuttaaq kristumiut suliatik pillugit Guutimut ilaatigullu uppeqatiminnut akisussaassuseqarput. Tamanna erseqqilluarpoq griikerit oqaasiinik kamannermik isumaqartunik Biibilip atuineratigut. Oqaatsini marlunni taakkunani atukulaneqarnerpaaq tassaavoq orgeʹ. Amerlanertigut ’kamannermik’ nutserneqartarpoq eqqarsaallu imarisaa tassaalluni piaaraluni kamanneq, allaallu isumaliutigilluareerlugu kamanneq amerlasuutigullu akiniaarusussutsimik akulik. Taamaattumik Paulusip Romami kristumiut ima kajumissaarsimavai: ’Nammineq akiniaaqinasi, asasakka, kamannerli [orgeʹ] assaarsiuk, allassimammat: „Akiniut unga pigaara, uanga akiliiumaarpunga,“ oqarpoq Jehova.’ Kajumissaarneqanngillat qatanngutiminnik iluaaginnittassasut, kisianni ’ajortumut ajunngitsoq sakkugalugu ajugaasassasut’. — Rûmamiut 12:19, 21.

Oqaaseq alla atorneqartoq tassaavoq thymosʹ. Oqaaseq nagguiusoq ’isumaqavippoq silaannaap, immap, nunap, uumasut, imaluunniit inuit sakkortuumik aalassannerat’. Taamaattumik oqaaseq assigiinngitsunik nassuiarneqartarpoq, soorlu „uumissuisorujussuanngorpoq“, „kissaammerujussuarpoq, isumami oqimaaqatigiissuseq aserorlugu, aammalu angerlarsimaffimmi aamma avataani saqitsaannermik eqqissiviilliornermillu pilersitsilluni“. Soorlu qaqqaq ilimagineqarani anitsisinnaasartoq arsallu, ujaqqallu lavallu kissartut suppussinnaallugit, ajoqusiilluni, aseruatiterilluni toqutsillunilu, taamatuttaaq issinnaavoq angut arnarluunniit kamassaminik nunusinnaanngitsoq. Oqaatsip thymosʹ-ip qasseersiutaa Galâsiamiut 5:20-mi atorneqarpoq. Tassani Paulusip ’kamannerit’ taavai (ataasersiutinngortillugu kalaallisuunngortinneqarsimavoq) ’uinngup suliai’-nut (versi 19) ilaasut, soorlu uersaaneq, mingunnartuliorneq kanngunartuliornerlu, eqqartoramigit. Johnip, aallaqqaataani eqqartorneqartup, pissusilersuutigisartagai ’kamannernut’ assersuutissaalluarput.

Taamaattumik ilagiit kristumiut ilartik inummut allamut allalluunniit pigisaanut peqqarniitsulioqattaaginnarpat qanoq isigissavaat? Kamanneq nununeqanngitsoq aserorsaataavoq nakuusernermillu kinguneqariaannaalluni. Taamaattumik Jesus pissutissaqarluarluni ima oqarsimavoq: ’Uangali oqarfigaassi: Kinaluunniit qatanngumminut patsiseqarani kamattoq eqqartuussummik pillagassaavoq.’ (Matîuse 5:21, 22) Uiusut ima unnersuunneqarput: ’Nuliasi asaniarsigik, ajuallaffigeqinasigillu.’ ’Kamajasooq’ ilagiinni nakkutilliisuunissamut piukkunnanngilaq. Kamannerminimmi nunusaqarsinnaanngitsoq kinaluunniit ilagiinni maligassaasutut isigineqartariaqanngilaq. (Kulorsamiut 3:19; Títuse 1:7; 1 Timûtiuse 2:8) Assigiinngitsut eqqarsaatigeqqissaarluarneqareerpata, soorlu inuup isiginnittaasia, pissusilersoriaasia allallu inuunerannik peqqissusiannillu ulorianartorsiortitsineq, inuk kamarujussuartarnerminik nunusinnaanngitsoq ilagiinnut ilaasortaajunnaarsinneqarsinnaavoq — tamannalu avaanngunartuuvoq.

Johnip eqqartorneqareersup misigissutsini aqussinnaalersimavai? Pissutsini allanngortissimavaa taamaalillunilu ajutoornissaraluani pinngitsoortillugu? Ajoraluartumik nilliasarnersua suaartartarnersualu ingasatsikkiartorsimapput, allaallu ajattaasalerluni. Ilaanni nuliani tikiminik toortangaaramiuk tikini pillutsissimavaa. John patissigaangami kingorna takuneqarsinnaasukkut patissinaveersaartarpoq, ileqqunilu toqqortorniarsarisarpaa. Taava isimmittaasalerpoq, tilluaasalerluni, nujaartuisalerluni sulilu ajornerusunik. Maanna Ginger Johnimit averuseqqavoq.

Tamakku tamaasa pinngitsoortissimasinnaassagaluarpai allarpassuit assigalugit kamannermi nununissaa ilikkarsimasuuguniuk. Taamaattumik pingaartorujussuuvoq Jesus Kristusip maligassiaa naammalluinnartoq malinniassallugu. Taanna killeqanngitsumik kamanngisaannarpoq. Kamannera tamatigut naapertuilluartuusarpoq; ingasaassinngisaannarpoq. Paulusip silatuumik ima siunnersorpaatigut: ’Kamatsillusi ajortulinnginniaritsi; seqineq tarrisinaveersiuk narrutsassimanissinni.’ (Evfisumiut 4:26) Inuttut piginnaasatta killeqarnerat siaruartikkatsinnillu katersuiumaarnerput maniguulluta miserratiginagu kamannerup nununissaanut pissutissaqarluarpugut. (gE 8/6 97)

[Quppernerup ataani ilanngussaq]

[Qupp. 15-mi suminngaanneernera]

Saulip David toqunniaraa/The Doré Bible Illustrations/Dover Publications, Inc.