Inuusuttut aperipput:

Nakerisarsiorneq qanoq qisuariarfigissavara?

„Nukara ukiunik marlunnik uannit nukarleq kisimi sammineqartarpoq. . . . Tamanna naapertuilluarnerunngilaq.“ — Rebecca.a

QATANNGUTIT sammineqarnerujartortillugu immaqa immikkoortitaasutut misiginerujartortarputit. Immaqalu qatannguteqaruit immikkut piginnaanilimmik, annertuumik ajornartorsiortumik imaluunniit angajoqqaattut soqutigisaqarlunilu pissuseqartumik, sammineqalaaginnarnissalluunniit aatsaat ilungersorujussuaqqaarlutit angusinnaasarpat. Tamanna eqqarsaatiginerujartortillugu aliasukkaluttuinnarlutillu kamakkaluttuinnarsinnaavutit.b

Biibilimi ima oqaaqqissaaruteqarpoq: „Kamassimariannguaritsi, kisiannili ajortuliornasi! Nalallusi pilersaarusioriannguaritsi, kisiannili nipangerlusi!“ (Tussiaat 4:5) Narrassimaartilluni kamatsilluniluunniit arlaannik kingorna peqqissimissutigiligassamik oqartooqqajaanartarpoq iliortooqqajaanarluniluunniit. Eqqaajuk Kain, nukkami Abelip Guutimit iluarisaaneranik kamaatiginnissimasoq. Taanna Guutip ima mianersoqqusimavaa: „Ajorti matup killingani qamasar[poq]. Ajortip naalagaaffigiumagaluarpaatit, illilli taassumunnga naalagaassaatit.“ (1 Moses 4:3-16) Kainip misigissutsini ’naalagaaffiginngitsoorpai’, tamannalu ajorluinnartumik kinguneqarpoq!

Soorunami illit Kainitut inuarnialersaanngilatit. Taamaakkaluartorli immikkoortitaaneq misigissutsinik nuanneeqisunik pilersitsisinnaavoq. Taamaattumik aamma ajortip illit matuit killingani qamasinnaavaatit! Soorlu qanoq? Pissutsillu taama ittut qanoq ilillutit ’naalagaaffigisinnaavigit’?

Oqqat paariuk!

Beth 13-inik ukioqarluni misigisimavoq angajoqqaami aqqalussani nuannarinerugaat namminerlu naapertuilluanngitsumik pisaraanni. Beth oqaluttuarpoq: „Anaanagalu immitsinnut nilliaffigaluta oqqattaqaagut, tamannali iluaqutaaneq ajorpoq. Oqaasii tusarnaarneq ajorpakka, taassumalu oqaatsikka tusarnaarneq ajorpai, taamaattumik angusaqarneq ajorpugut.“ Immaqa aamma illit paasisimavat oqqanneq pissutsinik ajornerulersitsiinnartartoq. Evfisumiut 4:31-mi allassimavoq: ’Ajuallatsitsinerit narrannerillu kamannerillu nillianerillu mitallernerillu tamarmik ilissinnit peerlit iluaatsuliornerillu tamaasa ilanngullugit.’

Isummat aninniarukku nilliasariaqanngilatit. Eqqissisimasumik saaffiginninneq kinguneqarluarnerusarpoq. Ussatit 25:15-imi allassimavoq: „Akimarngit ilalaarnikkut allamik isumassarsisinneqartarput, qanorluunniit manngertissimatigigaluartut qanilaartumik oqalunnikkut killinneqarsinnaapput.“ Taamaattumik angajoqqaatit nakerisarsiorsorigukkit pitsaanerussaaq nilliaffiginagillu unnerluutiginngikkukkit. Piffissamut naleqquttumut utaqqigit, taavalu eqqissisimasumik ataqqinnittumillu oqaloqatigikkit. — Naleqqiuguk Ussatit 15:23.

Angajoqqaavit kukkuluttorneri isiginiarpallaarukkit imaluunniit „naapertuilluanngissusiat“ pillugu assuariniaannarukkit, ungasillisiinnarsinnaavatit imminullu illersorniartiinnassallugit. Tamatumunnga taarsiullugu iliuusiisa ilinnut qanoq sunniuteqarsimanerat oqaatigiuk. (’Sumiginnarassinga aliasuttaqaanga.’) Taama periaaseqaruit immaqa tusarnaarnerussavaatsit. Aamma illit ’tusarasuarlutit pigit’. (Jâko 1:19) Imaassinnaavoq angajoqqaatit qatanngutinnik immikkut samminninnissaminnut pissutissaqarluarsimasut. Imaassinnaavoq qatanngutit illit nalusannik ajornartorsiuteqartoq.

Taavami kamattooruit oqaatsinillu annernartunik anitsisoorlutit? Ussatit 25:28-mi „angut imminut naalakkersinnaassuseqanngitsoq“ assersuunneqarpoq ’illoqarfimmut qarmaajakkamut’; angut taamaattoq ajortilittut periartarnerminit ajugaaffigineqariaannaavoq. Illua’tungaanili misigissutsinik nunusinnaaneq nakuussutsimut annertuumut ersiutaavoq! (Ussatit 16:32) Taamaattumik misigissutsivit oqaatiginnginneranni eqqissisaqqaartariaqarputit, imaluunniit allaat aqagumut utaqqillutit. Aamma iluaqutigisinnaavat allamukalaaruit, immaqa pisuttuarlutit imaluunniit eqaarsaalaarlutit. (Ussatit 17:14) Oqqavit paarineratigut annernartumik sianiitsorpallattumilluunniit oqaaseqarnaveersaarsinnaavutit. — Ussatit 10:19; 13:3; 17:27.

Toqqaannanngitsumik naalannginneq

Nakkarfiginaveersaartariaqagaq alla tassaavoq naalanngisaarneq. Mariep 16-inik ukiullip malugisimavaa ilaqutariittut Biibilimik atuaqqissaaqatigiinnerminni aqqalussani akornusersuigaluaraangami naveerneqanngisaannartoq. Nakerisarsiornerusorisani tamanna pakatsissutigalugu atuaqqissaaqatigiinnermut peqataajumajunnaarpoq. Illit naapertuilluanngitsumik pineqarsorigaangavit oqarumajunnaartarpit imaluunniit ’suliumajunnaartarpit’?

Taamaappat paasisariaqarpat taamatut periaaseqarluni naalanngisaarneq Biibilip angajoqqaanik ataqqinninnissamik taakkununngalu naalannissamik peqqussutaanut akerliummat. (Evfisumiut 6:1, 2) Aammattaaq naalanngisaarneq angajoqqaannut attaveqarninnik ajortunngortitsiartussaaq. Ajornartorsiutitit angajoqqaannut oqaloqatigiissutigisarukkit pitsaanerussaaq. Ussatit 24:26-mi ersersinneqarpoq ’peqqusersuitsumik akisartoq’ allanit ataqqineqartartoq. Mariep anaanani oqaloqatigigamiuk paaseqatigiipput, pissutsillu iluarsiartulerput.

Kisimiinniaannalerneq ulorianartoqarpoq

Nakerisarsiornermut qisuariarneq pitsaanngitsoq alla tassa ilaquttanit avinngarusimanialerneq uppinngitsunulluunniit sammeqqusaartalerneq. Cassandra taamatut pisimavoq: „Ilaquttakka ilagiumajunnaarpakka atuarfimmilu ilisarisimalersimasannik silamiunik ikinngusersulerlunga. Allaat angajoqqaama nalusaannik peeraqartarpunga. Taava nuanniilliortorujussuanngorpunga assullu ilerasulerlunga, nalunnginnakku eqqortumik iliornanga. Taamatut inuunera qimakkusukkaluarpara, nalulluinnarparali qanoq ilillunga angajoqqaakka oqaluttuunniassanerlugit.“

Ilaquttanit uppeqatinillu immikkoorniarneq ulorianaateqarpoq — ingammik nikallungatilluni silatusaanngitsumillu ilioriaannaatilluni. Ussatit 18:1-imi ima mianersoqqussuteqarpoq: „Inuk inoqatiminit immikkoorniartuusoq nammineq piumasani malillugu iliortarpoq, saqitsaassisarpoq allat eqqortuusorisaat soqutiginagit.“ Maannakkut taamaatsillutit angajoqqaannut saaffiginninnissat ajornakusoortikkukku kristumiumut Ussatit 17:17-imi eqqartorneqartutut ittumut saaffiginnissinnaavutit: „Ikinngutaasup asannissutsi tamatigut takutittarpaa, eqqarliusorlu erniusimavoq annikilliornermi ikiortissaalluni.“ ’Ikinngutaasoq’ taama ittoq ilagiinnut ilaasut inersimasut akornanni nassaarineqarsinnaasarpoq.

Cassandra pisariaqartitsilluinnarfimmini ’ikinngutaasumik’ nassaarsimavoq. „Nakkutilliisoq angalasartoq ilagiinnut ilaaffigisatsinnut tikeraarmat angajoqqaama kajumissaarpaannga oqaluussiartoqatigeqqullugu. Taanna nulianilu inuppalaartorujussuupput, soqutiginninnermillu annertuumik ersersitsivigaannga. Oqaloqatigilluartorujussuuakka. Misiginngilanga ajorissagaannga. Nalunngilaat kristumiutut peroriartorsimaneq pissutigiinnarlugu naammalluinnartuusoqarneq ajortoq.“ Cassandrap pisariaqartilluinnagaanik kajumissaarillutillu inersimasutut siunnersuuteqarput! — Ussatit 13:20.

Sinnganerup navianaatai

Ussatit 27:4-mi ima mianersoqqussuteqarpoq: „Uumitsanneq amiilaarnaqaaq, kamannerlu kuuttut supisutut ippoq, sinngatuunerlu kia akiorsinnaavaa?“ Qatanngummut qujagisaanerusumut sinnganeq usorunnerlu isumaatsumik iliuuseqassutaasarsimavoq. Arnaq ataaseq ima nassuerpoq: „Meeraagallarama saattuararsuarnik kajortunik nujaqarpunga, qatanngutigalu qaamasunik kusanaqisunik torsusuunik qitia tikillugu takitigisunik nujaqarpoq. Taassuma nujai ataatama oqaaseqarfigilaartuartarpai, ’Rapunzel’-imillu taasarlugu.c Unnuit ilaanni sinitsillugu anaanama qiuutai tigoriarlugit nipaarsaarlunga siniffianukarpunga nujaalu qiorsinnaasakka tamaasa killorlugit.“ — Søskende uden jalousi (Qatanngutigiit sinngagiinngitsut), Adele Faberimit Elaine Mazlishimillu.

Tupinnanngitsumik sinnganeq ’uinngup suliaanut’ ajortunut ilaatillugu Biibilimi eqqaaneqarpoq. (Galâsiamiut 5:19-21; Rûmamiut 1:28-32) ’Sinngaqqajaanerli’ tamatsinni pisarpoq. (Jâko 4:5, NV) Taamaattumik qatanngutit ajortumeerniarlugu eqqarsaateqaruit, naveersinniarlugu, isiginerlugaalersinniarlugu arlaatigulluunniit nikanarsarniarlugu, taava ’sinnganerup matuit killingani qamasimassavaatit naalagaaffigilerniarlutit’!

Misigissutsinik ajortunik taama ittunik toqqortaqaruit qanoq iliortariaqarpit? Siullermik, Guuti anersaavanik qinnuigiuk. Galâsiamiut 5:16-imi allassimavoq: ’Anersaaq najortigalugu saqigitsi, uinngullu pilerissusii naammassinagit.’ (Naleqqiuguk Títuse 3:3-5.) Iluaqutigissavattaaq qatanngutinnut misigissutsit ilumoortut isumaliutigissagukkit. Naak ajuallassimagaluarlutit ilumut oqarsinnaavit qatanngutinnut sunnguamilluunniit asannissuseqarnak? Biibilimi allassimavoq ’asannittoq sinngasarinngitsoq’. (1 Korintumiut 13:4) Taamaattumik misigissutsit sinnganermik pilersitsisinnaasut uninngaviginaveersaakkit. Qatanngutit angajoqqaannit sammineqarnerusarpat tamanna pillugu nuannaaqatiginiarsareriassagit. — Naleqqiuguk Rûmamiunut agdlagkat 12:15.

Aamma ajornartorsiut pillugu angajoqqaannik oqaloqatiginnittarnitit iluaqutaasinnaapput. Paasippassuk sammineqarnerunissat pisariaqartikkit, tamanna qatanngutinnut sinnganinnik qaangiinissannut assut iluaqutaassaaq. Kisianni pissutsit pitsaanerulinngippata qatanngutillu angajoqqaannit qujagineqarnerujuaannarpat? Taamaappat tamanna angajoqqaannut kamaatiginaveersaarlugulu suaartaatiginaveersaarlugulu naalasseriissutiginaveersaaruk. Ikiuiumatussutsimik naalattumillu pissuseqarnermik ineriartortitsiniarsarigit. Pisariaqarpat inersimasumik ilagiinnit kristumiuneersumik tapersersortissarsiorit. Tamanillu pingaarnerpaamik, Jehova Guutimut qanimut attaveqalerniarsarigit. Tussiaasiortup oqaasia eqqaamajuk: „Ataatamami anaanamalu qimakkaluarpannga [Jehovap] ilasiarissavaanga.“ — Tussiaat 27:10. (gE 22/11 97)

[Quppernerup ataani ilanngussat]

[Qupp. 19-mi assiliartaq]

Soqutigineqanngitsutut misiginerit angajoqqaannut oqaatigigukku imaassinnaavoq ajornartorsiut aaqqittoq