Inuusuttut aperipput:

Atuarfimmi ingerlalluarnerusinnaavunga?

„Angajoqqaama karakteerikka pingaarteqaat. ’Matematikkimi misilitsikkassi qasserpit? Tuluttut qasserpit?’ Uuminaqaat!“ — Sam 13-inik ukiulik.

SAM kisimi taamatut annikilliortitaanngilaq. „Could Do Better“-mik atuakkiortut ima allapput: „Angajoqqaat meeqqaminnik atuarfimmi sapinngisartik tamaat iliuuseqarsorinnittut suli naammattoorsimanngilavut.“ Inuusuttorpassuilli Samitulli misigipput angajoqqaamik pikkorinnerulertinniarlutik tativallaaraatik — immaqa allaat allat qaangeqqullugit. Atuarfimmi inuusuttut suli tatineqarnerusinnaapput. „Ilinniartitsisut erinitsajavallaaqaat,“ inuusuttuaraq ajuusaarpoq. „Oqaatsitik ingerlaannaq eqqaamasinnaaqquaat, taamaanngikkaanni sianiitsutut misigititsisarput. Taamaattumik eqqaamanninniarnissaraluunniit kajumiginngilara.“

Inuusuttut angajoqqaamik ilinniartitsisumillu ilimagisaannik naammassinninngitsut isornartorsiorneqarajupput. Atuartoqanngilarli atuarfimmi sutigut tamatigut tamaviaartumik. Sooq? Soqutiginarpoq eqiasunneq ilikkarumaataartarnerluunniit tamatumunnga pissutaajuaannanngimmata.a

Sooq ilaat tamaviaarneq ajortut

Ilumoorpoq inuusuttut ilaasa ilinniagassat tungaasigut pisariaqavissuinnaat suliarisarmatigik. „Atuakkamik quppiinngingajallunga misilitsinninni angusisinnaaguma, taamaaliussaanga,“ Herman 15-inik ukiulik nassuerpoq. Tamannali isumaqanngilaq atuarfimmi ilinniartitaaneq suusupagigaat. Immaqa imaaginnarpoq fagi aalajangersimasoq soqutiginngikkaat. Aamma ilaasa ilinniakkatik sumut atussallugit takusinnaaneq ajorpaat. Reuben 17-inik ukiulik oqarpoq: „Isumaqavippunga ilinniakkatta ilaat atuarunnaarutta atoqqinngisaannassagivut.“ Atuarfimmi ingerlanerliorneq soqutiginninnginnermut piumassuseqannginnermullu atassuteqarluarsinnaavoq.

Allamik aamma pissuteqarpoq. Isumaqaruit ilinniartitsineq sukkavallaartoq nikallorsinnaavutit. Arriippallaarpat qasunarissavat. Ilagisartakkat tatisinerata atuarfimmi qanoq ingerlaneq sunnersinnaavaa. Atuakkami Kids Who Underachieve-mi nassuiarneqarpoq: „Meeraq poqersoq atuagarsullaqqissoq eqimattanit atuagarsullaqqinngitsunit akuerineqarusukkuni ilinniagassaminik peqqissaarussisariaqanngitsutut misigisinnaavoq. Inuusuttuaraq ajuusaarluni oqaluttuarpoq klassini minnerniikkallarami ilinniarluartarami allat sinngallutik qinngasaartaraanni. Taamaattumik meeqqat inuusuttuaqqallu Ussatit 14:17-imi Ny Verden-nutsikkami allassimasoq misigisarsinnaavaat: „Angut eqqarsarsinnaassuseqartoq uumissorneqartarpoq.“

Ilaannikkut atuartut ilaasa atuarfimmi ingerlanerliornerisa pissutaat aamma itinerusarpoq. Ajoraluartumik inuusuttut ilaat imminut isiginerlullutik peroriartortarput. Taamaattoqarsinnaavoq meeraq ima taagorneqartuaannaruni: ’sianiik’, ’naloq’ imaluunniit ’eqiasuk’. Ajoraluartumik taaguutit taamaattut siulittuutinngorsinnaapput nammineq eqquutsitat. Nakorsaq oqarsimavoq: „Poqiitsuunerarneqaruit namminerlu upperigukku, poqiitsutut iliussaatit.“

Angajoqqaappit ilinniartitsisuillu taamatut tusangiasaarisarnertik ajunngitsumik isumaqartikkajuppaat. Taamaakkaluartoq piumaffigineqarpallaarlutit misigisinnaavutit. Illit taama misigiguit qularutigissanngilat angajoqqaappit ilinniartitsisuillu puffassaanngikkaatsit. Qularnanngilaq piginnaanivit atorluarnissaat kissaatigiinnaraat. Immaqali pakatsisikkumannginnermik isumakuluutigisinnaavat. Nikalloqinalli. Atuarfimmi ingerlalluarnerulersinnaavutit.

Piumassuseqarit

Alloriarneq siulleq tassaavoq piumassuseqalerneq. Taamaalissaguit ilinniakkavit siunertaa takusinnaasariaqarpat. Biibilimi allassimavoq: ’Issumik assallatserisoq neriulluni assallatserissaaq, tukkartuisorlu aamma neriulluni pissaaq ilangiiumalluni.’ (1 Korintumiut 9:10) Fagini aalajangersimasuni ’assallatserinissap’ siunertaata atakunissaa ajornaatsuinnanngilaq. Immaqa oqarsinnaavutit: ’Qarasaasianik progammørinngorniarpunga. Taava sooq oqaluttuarisaaneq ilinniassavara?’

Atuarfimmi skemanni fagit ilaat sooq ilinniassanerlugit immaqa massakkorpiaq takusinnaanngilat. Siunissarli ungasinnerusoq eqqarsaatigeriaruk. Assigiinngitsut iluanni tunngaviusumik ilisimasaqarneq silarsuup avatangiisivit paasinerunissaanut iluaqutigisinnaavat. Jehovap nalunaajaasuisa akornanni inuusuttorpassuit ilinniartitaaneq tamatigoortoq ’tamanut tamalaasutut innissaminnut’ iluaqutigisimavaat, inuit assigiinngitsunik tunuliaqutallit Guutip naalagaaffia pillugu oqaluttuunniaraangamikkik naleqqussarsinnaanerusaramik. (1 Korintumiut 9:22) Naak ilinniagassap atorfissakippasikkaluartup ilikkarnissaa iluaqutigissavat. ’Isumatussuseqarnerulissaatit’, siunissamilu atorfissaqartikkumaarpat. — Ussatit 1:1-4.

Piginnaanitit sianiginngisatit atuarfiup qulaajarsinnaavai. Apustili Paulus Timoteusimut allassimavoq: ’Eqqaasinniarpakkit Guutip saammaannermit tunissutaa ikualasunngorteqqullugu.’ (2 Timûtiuse 1:6) Timoteus kristumiut ilagiivini immikkut ittumik kiffartornissamut toqqarneqarsimagunarpoq. Piginnaassusiali Guutimeersoq — ’tunissutisiaa’ — asuliinnassanngikkuni ineriartortinneqartariaqarpoq. Soorunami atuarfimmi piginnaanitit Guutimit toqqaannartumik tunissutaanngillat, soorlu Timoteus tunisissimasoq. Taamaakkaluartoq piginnaatitit — eqqumiitsuliornermut, nipilersornermut, matematikkimut, pinngortitalerinermut allamulluunniit tunngagaluarpata — ilinnut immikkut ittuupput, atuarfimmilu ilinniartitaaneq tamakku paasinissaannut ineriartortinnissaannullu iluaqutigisinnaavat.

Ilinniagassalerilluartarit

Atuarnerit pissarsiffiginerpaassagukku ilinniagassalerilluartarneq atorfissaqartippat. (Naleqqiuguk Filípimiut 3:16) Annertuumik ilinniagassaqaruit piffissamik naammattumik immikkoortitsigit. Unillatsiartarnissannulli nukissaqalersitsisumut piffissaqartarit. Ilinniarneq atuarnermik ilaqarpat atuagassap imarisai paasiniaqqaakkit. Taava kapitalit qulequtaat qulequtaaqqalluunniit tunngavigalugit apeqqusiorit. Taava atuaruk apeqqutiliatit akissutissarsiorlugit. Naggataagut eqqaamasatit naapertorlugit oqaluttuareqqissinnaavat.

Ilinniakkatit nalunngeriikkannut atassusikkit. Assersuutigalugu pinngortitalerineq Guutip ’takussaanngissusiata pissaanerata’ paasilluarnerunissaanut iluaqutigisinnaavat. (Rûmamiut 1:20) Oqaluttarisaanermik ilinniartitaanerup oqaatsit uku ilumoorneri uppernarsarsinnaavai: „[Jehova], nalunngilara inuup ingerlavissani nammineq aalajangigassarinngikkaa, angutillu aalajangigassarinngikkai qanoq ingerlanissani alloriartarnissanilu.“ (Jeremia 10:23) Ilinniarluartaleruit paasissavat ilikkagaqartarneq oqiliartortoq nuannernerulersorlu. Salomon oqarsimavoq: „Silatooq ajornanngitsumik ilisimassuseqalersarpoq.“ — Ussatit 14:6.

Isumalluartuugit

Ilaannikkut atuarfimmi ingerlanerliorneq ikinngutinik pissuteqartarpoq. Ikinngutitit atuarnermik pingaartitsippat atuakkamilluunniit quppiineq ajorpat? Biibilimi ussat imaappoq: „Sianisuunik peqateqartoq ilisimassuseqalersarpoq, silaatsulli ikinngutaa ajortumeertussaasarpoq.“ (Ussatit 13:20) Taamaattumik ikinngutinik qinersininni narrutuujugit. Atuarfiup tungaatigut isumalluartunik ilagisartagaqarit. Qanoq ilillutit karakteeritit pitsaanerulertissinnaanerlugit ilinniartitsisut oqaloqatigiuk. Taava qularnanngitsumik ilinniartitsisuit ikiorniarlutit iliuuseqarnerussaaq.

Pikkoriffeqarnak misigiguit apustili Paulusimut pisimasoq eqqaamajuk. Oqalugiarnermut piginnaanini isornartorsiorneqarmata, akisimavoq: ’Oqaluttarnikkut ilisimaatsorpalukkaluaruma ilisarsinikkut taamaanngilanga.’ (2 Korintumiut 10:10; 11:6) Aap, Paulusip nukittuffigisani pingaartinneruai sanngiiffigisani pinnagit. Illit suut nukittuffigaagit? Tamakku takusinnaanngikkukkit inersimasoq ilinnik ilisarisimannilluartoq oqaloqatigiuk. Ikinngutip taamaattup nukittuffigisannik tikkuussinnaavaatit iluaqutissarsiffigitillugillu.

Ajornartorsioraluarluni siumukarneq

’Tamakku isumaliutigikkit ileqqoralugillu alliartussutsit tamanut malunnarseqqullugu.’ (1 Timûtiuse 4:15) Ataatatut ernerminut oqaluttutut, Paulusip Timoteus ingerlalluareersoq kiffartornerani suli siumukaqqullugu kajumissaarpaa. Immaqa ilaannikkut atuarnerit inoqajuitsukkut ingerlaarnertut misigisinnaavat. Ukiulli atuarfiusut atoruminarnerussapput eqqarsaatigigukku akissarsiassap pinissaanut sukataarneq imminut akilersinnaasoq.

Eqiasuinneq, piumassuseqarneq ilikkagaqarnerlu imminnut atalluinnarput. Assersuuteqarsinnaavugut: Nipilersortartoq takorlooriaruk. Nipilersornini nuannariguniuk nipilersornerorusussaaq. Nipilersornerusaruni pikkorinnerulissaaq nuannaarneralu suli allinerulerluni. Ilisimasaqarneq alliartortillugu ilinniarneq oqinnerujartortarpoq. Taamaattumik atuarfimmi ilinniagassatit nikallussutigeqinagit. Atuarfimmi sukataarit. Pikkorinnerulernissannut iluaqutigisinnaasannik ikinngutinik qinersigit, itsarlu Azarjap kunngi Asamut oqaasii eqqaamakkit: „Nikallussanngilasi. Qanoq iliornersi akissarsissutigiumaarparsi.“ — 2 Israelikkut 15:7. (gE 22/3 98)

[Quppernerup ataani ilanngussaq]

[Qupp. 19-mi assiliartaq]

Qanoq ilillutit karakteeriginnerulersinnaanerlutit ilinniartitsisut oqaloqatigiuk

[Qupp. 20-mi assiliartaq]

Naak fagip atorfissaqarnera takusinnaanngikkaluarlugu ilinniarukku iluaqutigissavat