Alikkutassianik qinersininni mianersorit
Aliikkutassiat meeqqanut qanoq sunniuteqartarpat? Alvin Poussaint, ilinniartitsisoq nakorsarlu ukiuni 30-ni meeqqanut tunngasunik suliaqarsimasoq, isumaqarluinnarpoq meeqqat filmini kinguaassiuutitigut atoqatigiittut nakuusertullu isiginnaarnerisigut isumaqalersartut taamatut ileqqulersorneq nalinginnaasoq. Ulorianartua alla aamma tikkuarpaa: „Takusimavakka meeqqat filminik taamaattunik isiginnaareerlutik annilaangalersimasut saassussiumatoorujussuanngortulluunniit. Meeqqat allat inersimasuni toqqissisimanermik sualuttumik ujartuilersarput, kullutortalerlutik siniffimmiluunniit quisalerlutik.“ Nakorsaq taanna naapertorlugu immikkut ilisimasallit uppernarsarsimavaat pissutsit allat meeqqat taamatut ileqqoqalersissinnaagaat. Assersuutigalugu timikkut naalliutsinneqarsimagunik kinguaassiuutitigulluunniit atornerlunneqarsimagunik sorsuffiusuniluunniit najugaqarunik. Nassuiaavoq: „Arlaannattaluunniit meeraq taamatut misigitikkusunngilaa, taamaakkaluartoq inuunermi piviusumi taakkununnga takutikkusunngilluinnakkatsinnik filmini isiginnaarnissaat akornuserniarneq ajorparput.“
Kristumiut aliikkutassarsiornerminni mianersornissaminnut pissutissaqarluarput, Bibiilimilu najoqqutassiat unioqqutinnginnissaat qulakkeertariaqarpaat. Assersuutigalugu Tussiaat 11:5-imi allassimavoq: „[Jehovap] iluartoq guutiitsorlu misissuiffigai, nakuusernermillu nuannarisaqartoq uumigaa.“ Kristumiulu apustili Paulus allassimavoq: ’Taamaattumik avatisi nunamiusut toqulersissigik: uersaaneq, mingunnartut, illigunneq, pilerissutsit ajortut piumatuunerlu. . . . Tamaasa iperarsigik: ajuallanneq, kamanneq, iluaatsuliorneq, mitallerneq, oqaatsit kanngunartut qanissinnit aninnaveerlugit.’ — Kulorsamiut 3:5, 8.
Taamaattumik angajoqqaat aliikkutassiat meeqqaminnut — imminnullu — qinikkatik ’uinngup suliaanik’ siuarsaannginnissaat eqqumaffigisariaqarpaat. (Galâsiamiut 5:19-21) Aliikkutassiat qinikkamik pitsaassusiat annertussusiallu pillugit mianersortuusariaqarput eqqarsaatigeqqissaartarlugillu. — Evfisumiut 5:15-17. (gE 22/7 98)