Tullermut asanninneq qanoruna pisimava?
INUIT millionilippassuit neriuutaaruteqqallutik pilluaallutillu inuupput, ikiuisinnaasumillu saaffissaqaratik. Arnaq unnerluarpasissumik oqarsimavoq: „Kisimiillunga nerisarpunga, kisimiillunga pisuttuartarpunga, kisimiillunga sinittarpunga imminuinnarlu oqaluuttarlunga.“ Ikittuinnaat piumassuseqarput inoqatitik annikilliortut ikiorniarlugit asannittuliornermikkut assammik isaannissaannut.
Arnaq niuernermik suliaqarsimasoq soraarneq ima oqaluttuarpoq: „Unnuit ilaanni uillarneq eqqanni najugalik matunnut kasuttorpoq kiserliornerarlunilu oqalulerluni. Inussiarnersumik, aammali aalajangersimarpaluttumik, oqarfigaara ulapillunga. Akornusersuinini pillugu utoqqatseriarluni qimaguteqqippoq.“
Arnaq nangilluni oqarpoq: „Imminut kakkageqaanga soqutiginanngitsumik oqaloqateqarnissaq pinngitsoortikkakku. Aqaguani unnukkut ikinngutima ilaat sianerpoq aperalunilu arnaq illup najugaqarfigisama ilaani najugalik ippassaq unnukkut imminorsimasoq ilisarisimaneriga. Eqqoriareersimassavat taannaasoq uillarneq uanga matunnut kasuttorsimasoq.“ Kingorna arnaq niuernermik suliaqarsimasoq oqarpoq tamanna „sakkortuumik ilinniutigisimallugu“.
Nalinginnaasumik ilisimaneqarpoq naalungiarsuit asanninnermik tunineqannginnertik toqussutigisinnaagaat. Meeqqat annerit aamma taama pisinnaapput. Niviarsiaraq pinnersoq 15-inik ukiulik imminortinnani ima allassimavoq: „Asanninneq tassaavoq kiserliorunnaarneq.“
Nalitsinni pisimasoq alianartoq
Ukiualuit matuma siorna atuagassiaq Newsweek allanik nagguilinnik uumissuineq pillugu imatut allaaserisaqarpoq: „’Tullit uumissoruk!’ ukioq manna najoqqutassatut atorneqarsorinarpoq. Bosnia-Hercegovinami, Jugoslaviaasimasumiittumi, naggueqatigiit assigiinngitsut akersuunneranni inuit millioninit amerlanerusut angerlarsimaffimminnit qimaatitaapput, tituusintilikkuutaallu toqutaallutik. Kikkunnit? „Sanilitsinnit,“ niviarsiaraq nunaqarfimminit qimaatitaasimasoq oqarpoq. „Ilisarisimasatsinnit.“
„Eqqisseqatigiilluta inooqatigiissimagaluarpugut,“ nunaqarfimmi Rugandami najugallit hutut tutsillu 3000-it pillugit arnaq oqarpoq. The New York Times-imi ima allassimasoqarpoq: „Illoqarfiup taassuma oqaluttuarisaanera tassa Rwandap oqaluttuassartaa: Hutut tutsillu inooqatigiipput, akunnerminni katittarlutik, kina hutuunersoq tutsiunersorluunniit soqutiginagu imaluunniit nalullugu. Pissutsilli allanngoriasaarput,“ taavalu ’toqoraannersuaqalerpoq’.
Taamatuttaaq Israelimi juutit Arabiamiullu akuleriillutik inooqatigiipput, amerlasuulli uumissoqatigiipput. Ukiuni hundredelinni makkunani silarsuaq tamakkerlugu pissutsit tamakkununnga assingusut atuutilersimapput, assersuutitut taasinnaavavut Irland-avannarlermi, Indiami Pakistanimilu, Malaysiami, Indonesiami USA-milu naggueqatigiit assigiingitsut akornanni.
Allamik nagguilinnik allamillu upperisalinnik uumissuinerit assigiinngitsorpassuit assersuutitut taagorneqarsinnaapput. Inuiaat oqaluttuarisaaneranni aatsaat taama asanninneq amigaataatigaaq.
Kikkut pisuuppat?
Uumissuineq asanninnertulli peroriartornermi ilinniagassaavoq. Erinarsuut ilisimaneqarluartoq ima taallaqarpoq: „Meeraaninnit ilinniagaraat: uumissussallugit ilaquttavit uumissugaat.“ Ullumikkut ingammik uumissuinermik ilinniartinneqartarpugut. Pingaartumik oqaluffeqarfiit ilaasortaminnik asanninnermik takutitsinissamik ilinniartitsinngitsoorsimapput.
Frankrigimi aviisi Le Monde imaattumik allaaserisaqarsimavoq: „Eqqarsaatiginngitsoorneq ajornaqaaq Burundimi Rwandamilu tutsit hutullu imminnut sorsuuttut ajoqersuiartortitanit kristumiunit ataatsimik aallaavilinnik ilinniartinneqarsimasut oqaluffimmillu ataatsimit pisut!“ Aviisimi National Catholic Reporter-imi oqaatigineqartutut Rwandami „nunami najugaqartut 70 procentii katuuliupput“.
Ukiuni hundredelinni makkunani siusinnerusikkut kommunistiussuseq guuteqannginneraasoq nunanut Europap kangianiittunut eqqunneqarsimavoq. Sooq? 1960-imi palasinngorniat ilinniarfianni Pragimiittumi pisortaasoq oqarsimavoq: „Uagununa, uagut kristumiuusugut kisitta, kommunistiussutsimut akisussaasugut. . . . Eqqaamassavarput kommunistit kristumiuusimagaluarmata. Kikkut kukkussutigaat naapertuilluartumik Guuteqartoq taakkua upperinngippassuk?“
Sorsunnersuup aappaata nalaani oqaluffeqarfiit suleqataasimanerat eqqarsaatigiuk. Sorsunneq tamanna pillugu tuluit sakkutuuisa naalagaat Frank Crozier oqarsimavoq: „Inunnik toqutserusulersitsinissamut kristumiut oqaluffeqarfiisut pikkoritsigisoqanngilaq, taakkulu atorluarsimavavut.“ Sorsunnersuup aappaata naaneranit ukiualunnguit qaangiuttut The New York Times-imi ima allassimavoq: „Siornatigut katuullit ilagiinni atorfillit tamatigungajak nunamik sorsunneri tapersorsortaraluarpaat, sorsukkiartortitatik pilluaqqullugit ajugaanissaannillu qinnullugit, sorsuffiup illua’tungaani tamanit malinnaavigineqartumik biskoppit sorsunnerup akerlianik inerneqarnissaa qinnutigigaat.“
Qanoq iliornermini tamani Jesus Kristus asanninnermik takutitsisarpoq, aamma apustili Paulus allappoq: ’Nammineq Guutimit ajoqersorneqarpusi asaqatigeeqqullusi.’ (1 Tásalûníkamiut 4:9) „Kristumiut ilumoortut Jesus Kristusimi qatanngutigiipput,“ Vancouverimi aviisimi The Sun-imi ilanngutassiortoq taama allappoq. „Qaquguluunniit piaaralutik imminnut ajoqusernianngisaannassapput.“
Ersarippoq ullutsinni silarsuarmi asanninnerup amigaataaneranut oqaluffeqarfiit pisooqataalluinnartut. Atuagassiami India Today-imi ilanngutassiami ima allassimasoqarpoq: „Upperisarsiornerup aqqani pinerlunnerit amiilaarnangaartut suliarineqartarsimapput.“ Nalitsinnili inuusut pissusiinut ilisarnaataasoq, tassa allanut soqutigittaatsumik pissuseqarneq, tunngaviusumik pissuteqarpoq.
Sooq asanninneq nillertunngorsimava?
Tamanna pinngortitsisitta akissutissaqartippaa. Taassuma oqaasiani, Biibilimi, ullut inuuffigisavut ’ullussanik kingullernik’ taaneqarput, siulittuutigineqarlunilu ulluni tamakkunani inuit ’asanniuitsuujumaartut’. ’Ullut ajornartut’ tamakku, Biibilimi ’silarsuup matuma naggatissaa’-nik aamma taaneqartut, eqqarsaatigalugit Jesus Kristus siulittuisimavoq ’asanninneq amerlasuuni nillertunngorumaartoq’. — 2 Timûtiuse 3:1-5; Matîuse 24:3, 12.
Ullumikkut asannissuseqannginnersuaq silarsuup matuma ullussaani kingullerni inuunitsinnut takussutissat ilagaat. Qujanartumilli aamma tamanna takussutissaavoq silarsuup guutiitsunik inullip matuma silarsuarmik nutaamik naapertuilluassuseqarfiusumik asanninneq tunngavigalugu aqunneqartumik taarserneqangajalerneranut. — Matîuse 24:3-14; 2 Pîtruse 2:5; 3:7, 13.
Taamatut allanngorneqarnissaa piviusunngussasoq upperissallugu pissutissaqarpa? Silarsuarmi inuit tamarmik asaqatigiillutik eqqisseqatigiillutillu inuuffigisaanni inuunissatsinnut periarfissaqassaagut?