Inuusuttut aperipput:

Mitaatigineqaruma qanoq iliorsinnaavunga?

INUUSUTTUT kammalaatiminnit allaanerusumik ileqqoqarlutillu atisalersortartut ingasattumik mitaatigineqarsinnaasarput. Aamma inuusuttut kristumiut ilutiminnit allaanerulluinnartunik ileqqoqartaramik taamaaliorfigineqartarput. Jesusimi ajoqersukkani ilumoortut pillugit oqarsimannginnerpa: ’Uanga qinugigaminnga ilississaaq qinugiumaarpaasi.’ — Juánase 15:20.

Jehovap nalunaajaasuisa inuusuttut tamanna qanoq misigisarpaat? Ilaat illaruaatigineqartarput nalliuttorsiornerit aalajangersimasut peqataaffigiumannginnamikkik; allat isornartorsiorneqartarput erfalasumik ilassinneqataajumaneq ajoramik. Amerlasuut allaat inukkutigineqartarput ikiaroorneq ajoramik, peqqusersuitsuugamik Biibilimilu ileqqussatigut najoqqutassiat maleruartaramikkik.

Pissutsilli tamakku nutaajunngillat. Apustili Peterip kristumiut ukiuni hundredelinni siullerni inuusut ima allaffigai: ’[Guutimik nalusut] tupigusullutillu mitallersarput, . . . qussalaatsuliortut ingiallussaarassigik.’ (1 Pîtruse 4:4) Nutsikkani allani allassimavoq ’oqalorujuuttaraasi’ (Knox), imaluunniit ’ajuallatsittaraasi’. — Today’s English Version.

Illit upperisat pillugu mitaatigineqarsimaguit, sapiillisinnaavutit eqqarsaatigigukku kristumiut itsaq inuusut aamma taama iliorfigineqartarsimasut. Isumalluarsinnaavutillu upperisat pissutigalugu mitaatigineqarnerup iliuuseqarfiginissaa ilikkarsinnaagakku.

Sooq mitaatiginnittut

Suna pillugu ilaasa imminnit allaanerusumik upperisallit ileqqullillu mitaatigisarpaat? Ilaannikkut allanik mitaatiginnittut tassaagajupput imminnut tatiginngitsut, soorluttaaq inupiluit taamaakkajuttut. Immaqa kammalaatiminnut pingaakujunniutigalugu mitaatigaatsit. Kisimeeqatigigukkilli ikittuinnaat ammasumik isornartorsiussallutit piumassuseqarlutillu sapiissuseqassagunarput.

Soorluli Peter allassimasoq mitaatiginnittut ilaasa ’tupigusuutigaat’ taakkunannga allaanerugavit. Allatut ileqqoqarnerit tupigusuutigaat. Jehovamut nalunaajaasuuguit immaqa eqqumiitsutut isigaat nalliuttorsiornernut aalajangersimasunut peqataaneq ajoravit. Immaqa allaat assortuisunit Jehovap Nalunaajaasui pillugit eqqunngitsumik paasitinneqarsimapput.

Pissutaasorli sunaagaluarpalluunniit sualuttumik mitaatigineqarsimaguit qularnanngitsumik ussammi Biibilimeersumi matumani oqaatigineqartumut isumaqataassaatit: „Eqqarsariaqqaarnani oqaaserisat panatut kapisisarput.“ (Ussatit 12:18) Eqqaamajulli taama oqaaseqartut illit inuttut ajorigunanngikkaatsit. Allassimaffimmili eqqaaneqartutut ’eqqarsariaqqaarnatik oqalupput’.

Mitaatiginninnerli ’panatut kapisisarnertut’ ippoq. Tusangianartorpassuit tusarumanagit immaqa upperisavit akerlianik iliorusulersinnaavutit. Upperisat pillugu mitaatigineqaruit qanoq iliorsinnaavit?

Imminut illersorit

Apustili Peterip kristumiut ima siunnersorpai: ’Piareertuinnaritsi kikkunnulluunniit neriuutissaq ilissinniittoq pillugu ilissinnik nassueqqusisunut illersuutissaqarniarlusi, kisianni piuaallusi mianerinnillusilu.’ (1 Pîtruse 3:15) Upperisat illersorniarsinnaassagukku eqqorluartumik ilisimasaqartariaqarputit upperisavillu tunngavia paasisariaqarlugu.

Aamma ’mianerinnillutit’, tassa ataqqinnillutit imaluunniit The Bible in Basic English-imi allassimasutut ’pingaarniarnak’ oqarnissat ilikkartariaqarpat. Biibili tassanilu ajoqersuutigineqartut pillugit ilisimasavit allanit pitsaanerusutut misigilersittariaqanngilaatsit. Akerlianilli apustili Paulusitut isumaqarfiginnittariaqarputit, taanna kiffartornini pillugu ima allassimammat: ’Tamanut kiffaatippunga amerlanerit ilataariumallugit.’ — 1 Korintumiut 9:19.

Paasigukku upperisavit illersornissaanut nangaassuteqarlutit isumatsassanngilatit. Jehovap nalunaajaasuisa inuusuttut ilarpassui aamma taama misigisarsimapput. Jamal ima oqarpoq: „Atuartuugallarama nalugaluarpara sooq nalliuttorsiornernut erfalasumik ilassinninnermut peqataasannginerlunga, imaluunniit sooq illumit illumut oqaluussisarlunga allat qanoq nassuiaatissanerlugit.“ Suup ikiorpaa? „Ataatama ikiortuarpaanga tamakkuninnga nassuiaasinnaalernissama tungaanut, tamatumalu suut tamaasa allanngortippai.“ Upperisavit allanut nassuiarnissaa artornartikkukku immaqa angajoqqaavit imaluunniit ilagiinniittut ilaata ikiorsinnaavaatsit Guuti pillugu ilisarsineq ’siunersisinnaanngoqqullugu’. — Evfisumiut 3:17-19.

Niviarsiaraq 16-inik ukiulik Jehovamut nalunaajaasuusoq nammineq Biibilimik atuaqqissaarnermut pilersaaruteqarnermigut atuarfimmi upperisami ammasumik eqqartornissaanut sapiissuseqalersimavoq. „Siornatigut atuaqatima mitaatigisarpaannga Jehovamut nalunaajaanera pillugu nalusorsimavaralu qanoq oqassanerlunga,“ nassuerpoq. „Maanna piffissaq tamaat oqaluussisartunngorsimavunga taamaattumillu Biibilimi atuarnerusalerlunga. Tamatumalu kingunerisimavaa maannakkut akilluarsinnaalersimanera. Atuaqatima upperisannik oqaloqatiginissaat ajornannginneruteqaara Napasuliaq Alapernaarsuiffik-up Iteritsi!-llu normui nutaat atuartuaannarakkit.“

Soorunami pissutsit assigiinneq ajorput. Taamaattumik akissutit aamma assigiinngitsuusariaqarput. Inussiarniitsumilli oqarfigineqaraluaruit ’ajortumik iliortoq ajortumik’ akinissaa eqqortunngunngisaannassaaq. (Rûmamiut 12:17-21) Annernartumik akiguit quiasaaraluaruilluunniit ajortoq ajornerulersiinnarsinnaavat immaqalu tusangianartunik amerlanerusunik eqqorneqaannassallutit. Taamaattumik ilaasa paasisimavaat sumiginnaaneq ajunnginnerusoq.

Ilaannikkut inussiarnersumik quianartumik oqaaseqarniaannartoqaraangat ’kamaammernani’ illaqataaneq ajunnginnerusarpoq. (Nalunaajaasup oqaasii 7:9) Mitaatiginnittup paasiguniuk oqaatsini sunniuteqarpianngitsut, immaqa isumakkiissavaatit. — Naleqqiuguk Ussatit 24:29; 1 Pîtruse 2:23.

Akiuiniarit

Ilaannikkulli pisoqartarpoq naatsumik periaaserissumillu upperisavit nassuiarnissaanut periarfissiisumik. Niviarsiaqqap 13-inik ukiullip tamanna misilippaa, taamaaliorneralu kinguneqarluarpoq. Ima oqaluttuarpoq: „Ini atuarfigisarput ornitsillugu atuartut arlallit Jehovap Nalunaajaasui mitaatigilerpaat. Imminut illersorusuummeraluarpunga, atuartulli tamarmik ataaseq kisimi pinnani illarlutik qimagupput.“ Ima nangippoq: „Niviarsiaqqap Jaimeemik atillip ornippaanga oqarlunilu atuagaq pâratîsime nuname nâgssáungitsumik inûsínauvutit pigalugu.a Naangajallugu atuarsimavaa upperisatsinnillu paasisaqarnerorusulluni. Jaimee Biibilimik atuaqqissaaqatigisalerpara.“ Misigisap tamatuma oqaluussisartoq inuusuttoq sapiissuseqalersippaa inuusuttut allat oqaluunnissaannut. „Atuaqatima ilaat sisamat soqutiginnippasittut pulaartarpakka. Qularinngilaralu erniinnaq Biibilimik atuaqqissaaqatigilersinnaallugit,“ oqarpoq.

Ukiualuit matuma siorna Liberiami Afrikamiittumi atuartoq assingusumik misigisaqarpoq. Inuiaqatigiilerinermi ilinniartinneqartillutik ataqqinnilluni oqaluttuarpoq Jehovap nalunaajaasuisa ilaattut pinngortitsineq upperigini pinngoriartuaarsimanerlu upperinagu. Siullermik atuaqatai amerlanerit isorinninniaapput. Ilinniartitsisulli periarfissippaa atuaqatiminut upperisaminik nassuiaanissaanut, tamatumalu kingorna ilinniartitsisup atuagaq Livet — hvordan er det kommet her? Ved en udvikling eller en skabelse?b pivaa.

Atuagaq atuareeramiuk ilinniartitsisup atuartut oqarfigai: „Atuagaq una tupinnaqaaq. Tassaavoq pinngortitsineq pillugu atuakkat ilisimatuussutsimut tunngasut atuarsimasama pitsaanerpaat ilaat.“ Ilinniartitsisoq nangilluni oqarpoq ukiumi atuarfiusumi tulliuttumi pinngortitsineq pillugu atuagaq taanna klassip atuagassaanut ilinniummut aappiullugu atussallugu, atuartullu oqaluussisartumit inuusuttumit atuakkamik pissarsinissaannik kajumissaarlugit. Atuakkat qulillit arlallit tunniunneqarput, atuartullu amerlasuut Jehovap Nalunaajaasui pillugit isumartik allanngortippaat.

Upperneq misilinneqartoq sanngisuujuvoq

Ilaannikkut immaqa artornartissinnaavat aalajangerfigisat Biibilimik tunngaveqartoq amerlasuut isumaqatiginngimmassuk paasiumanngimmassulluunniit. (Naleqqiuguk Tussiaat 3:2, 3) Taamaattumik uppeqativit akornanni ikinngutissarsiornissat silatusaarnerussaaq. (Ussatit 27:17) Qanorli iliussavit atuarfinni eqqaamiussinniluunniit inuusuttunik Jehovamut nalunaajaasoqanngippat?

Taamaappat eqqaamajuk ikinngutigisinnaasat pitsaanerpaaq tassaasoq Jehova Guuti, taassumalu annertoqqusersinnaagaatit. Ukiuni tuusintilikkuutaani Satan Diaavulumit mitaatigineqarsimavoq. Taamaattumik qularissanngilat upperisat aalajangiusimagaangakku Jehovap uummataa nuannaartittarit. Taamaalioraangavit ’mitallersiminut Satanimut akissutitut’ atortarpaatit. — Ussatit 27:11.

Tupigusuutigissanngilarput uppernerput ilaannikkut misilinneqartarmat. (2 Timûtiuse 3:12) Apustili Peterip qularnaatsumik erseqqissarpaa uppernerput misiligaalluartoq ’guultimit innikkut misiligaasaraluarluni nungujasumit akisunerungaartoq’. (1 Pîtruse 1:7) Uppernerit mitaatigineqaraangat uppernerpit nakussatsinneqarnissaanut nikallujuinnermi ersersitsinissannut periarfissatut isigissaruk. Apustili Paulus allassimavoq ’nikallujuinneq misiligaalluarnartartoq’. (Rûmamiut 5:3-5) Aap, Jehovamit iluarisaajumaneq upperisarput pillugu mitaatigineqarnerup anigorniarnissaanut kajumissaataalluarpoq. (gE 22/6 99)

[Quppernerup ataani ilanngussat]

[Qupp. 28-mi assiliartaq]

Upperisat illersorsinnaaviuk?