Internetimi tiingasulersaarutit

Silarsuaq tamakkerlugu inuit millionilikkuutaat ullut tamaasa Internet atortarpaat. Amerlasuut niuerfigisarpaat, nutaarsiassat malinnaaffiginiarlugit, silassamik, angalanissamut periarfissanik nunallu allat pillugit paasiniaaffigisarlugu, ilaquttatilluunniit ikinngutitillu nunarsuup ilaani assigiinngitsuniittut attaviginiarlugit atortarlugu — aappallit aappaqanngitsullu tupaallannartumillu meerarpassuit — allarluinnarmut Internet atortarpaat: TINGASULERSAARUTINIK ISIGINNAARMUT.

INTERNETIMI TIINGASULERSAARUTIT nuannarineqangaaramik milliardilikkuutaanik kaaviiartitsiffiulersimapput. Aviisimi The Wall Street Journal-imi allassimavoq: „Web-imi sumiiffimmik iluanaarutaasumik nassaaraanni, ilimanarluinnarpoq niuerniutai imaalu tiingasulersaarutaanerussasut.“

Sooq tinngasulersaarutinik isiginnaarniarlutik Internet atortarneraat aviisimi nassuiarneqarpoq. „Atuisut atuagaarniarfipalaamut qanittumiluunniit videoerniarfiup ilua tungaanut malunnaarsaarlutik iseriartornatik kanngunartunik aliikkutaqarsinnaapput. Internetimik atuisut angerlarsimaffimmiiginnarlutik — allaffimmiiginnarlutilluunniit — tiingasulersaarutit isiginnaarluarsinnaavaat.“

Tiingasulersaarutit meeqqallu

Qarasaasiani tiingasulersaarutinik isiginnaartorpassuit alianaraluartumik meeraapput. Inatsisit naapertorlugit meeqqat atuagassianik tiingasulersaarutinik pisisinnaanngitsut filminilluunniit tiingasulersaarutinik atorsinnaanngitsut namminneq angerlarsimaffimminni qarasaasiap teriaa tuuginnarlugu taamaattunut isersinnaapput. Qinigassarpassuaqarpoq.

Meerarpassuit angajoqqaamik nalusaannik Web-imi sumiiffiit iserfigikulavaat. Aviisimi The Detroit News-imi allassimavoq „meeqqat tallimaagaangata minnerpaamik marluk Web-imi sumiiffimmik attaveqatunilluunniit kiffartuussinermik pisartagaqarlutik naak 85 procentii angajoqqaaminnit taamaalioqqusaanngikkaluarlutik“.

Meeqqat inersimasullu amerlanersaasa tiingasulersaarutinik isiginnaartarnertik isertuunniarsarigaat, tamakkeratilli pisariaqartippaat. Ilaasa aliikkutatut ajoqutaanngitsutut isigaat. Allat meeqqanut ajoqutaanerarneqarnerat isumaqatigaat, isumaqanngillalli inersimasut sulerinersut allat akuliuffigissagaat.

Nunat ilaanni tiingasulersaarutit pillugit assortuussutaasut politikkikkut akersuunnersuanngorsimapput. Oqaaseqarsinnaatitaanermut kiffaanngissuseqartitaanermik sorsuutiginnittut tiingasulersaarutinik illersuisut, ilaqutariinni eriagisassanik illersuerusuttut inerteqqutaalersinniarlugit inatsisartut sunnerniarsaraat.

Iteritsi!-p politikkikkut apeqqutini arlaannaannulluunniit illersuisuunngilaq. Allaaserisat makkua siunertaaraat tiingasulersaarutit ulorianaataannik atuartartutta paasitinnissaat, imminut ilaquttanillu qanoq ililluni illersuisoqarsinnaanersoq siunnersuuteqarnissaq tiingasulersaarutinillu napitissimasunut qimatsiumasunilli Biibilimeersunik siunnersuinissaq.