Tamanut peqqinneq — anguneqarsinnaavoq!
„NAPPARSIMANNGISAANNARNISSAMIK isuma . . . maannakkut mutiuvoq,“ tyskit atuagassiaanni Focus-mi allassimavoq. Eqqarsaalli tamanna nutaajunngilaq. Inuit pinngortikkamigit napparsimasarnissaat Pinngortitsisup siunertarinngilaa. ‘Akuerineqarsinnaasumik peqqissuunissap’ anguneqarnissaannaa siunetarinngilaa. (Uagut allanneri uingasunngorlugit erseqqissarpavut.) Naamik, Pinngortitsisup kissaatigaa inuit tamarmik naammalluinnartumik peqqissuussasut.
Taavami sooq napparsimalertarpugut? Biibilimi allassimavoq Jehova Guutip siuaasavut siulliit, Adami Evalu, naammalluinartutut pinngortikkai. Guuti pinngortitsereerami, „pinngortitani tamaasa isigai, takuaalu ajunngingaartut“. Adamili Evalu Jehovap aqqutigeqqusaatigoorunnaarnissartik qineramikku ajortuliorput. Ajorti Adamimeersoq toqumik, inuit tamarmik kingornutaannik, kinguneqarpoq. — 1 Mosesi 1:31; Romamiut 5:12.
Jehovalli inuit isumamineersiinnanngilai. Taakkununnga nunarsuarmullu aallaqqaammut siunertani aamma isumakkiinngilaa. Biibili naallugu siunertaminik — imminut naalattut tamaasa naammalluinnartumik peqqissunngorteqqinniarlugit — ilisimatippai. Jiisusi Kristusip, Guutip ernerata, nunarsuarmiikkallarami Guuti napparsimasunik ajorunnaarsitsinissaminut qanoq pissaaneqartiginersoq takutippaa. Jiisusip tappiitsut, pupissut, tusilartut, imermik puittut, noqartartut nukillaarsimasullu ajorunnaarsippai. — Mattæusi 4:23, 24; Lukasi 5:12, 13; 7:22; 14:1-4; Johannesi 9:1-7.
Ungasinngitsukkut Guutip Kunngi missiarsiusoq, Jiisusi Kristusi, inuiannut tunngasunut siulersuileqqussavaa. Naalakkersuinerani Esajap siulittuutaa eqquutissaaq: „Innuttaasoq kinaluunniit oqassanngilaq: ‘Napparsimavunga!’ Inuit tassani najugaqartut ajortiminnik isumakkeerfigineqarput.“ (Esaja 33:24) Tamanna qanoq pissava?
Malugiuk siulittuummi allassimasoq inuit ‘ajortiminnik isumakkeerfigineqassasut’. Nappaammut pissutiviusoq — ajorti kingornussarput — peerneqassaaq. Qanoq? Jiisusip utertitsissutitut pilliutaata nalinga Guutimut naalattunut iluaqutissanngorlugu atorneqassaaq, taamaalillunilu nappaatip toqullu pissutaat peerneqassalluni. Nunarsuarmi sumi tamaani pissutsit paratiiserpalaalissapput. Kristumiu apustili Johannesi allappoq: „Qulliit [Guutip] tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.“ Biibilimi siulittuutit naapertorlugit tamakku ungasinngitsukkut piviusunngussapput. — Saqqummersitat 21:3, 4; Matthæusi kapitali 24; 2 Timotheusi 3:1-5.
Oqimaaqatigiissaarigit
Taamatut pisoqartinnagu inuit millionillit napparsimasassapput. Taamaattumik ilaquttavullu peqqissutsitsinnik eqqarsaatiginninnerput pissusissamisuuginnarpoq.
Kristumiut ilumoortut nakorsaatitigut ilisimatusarnerit pingaartippaat, napparsimalerumanatillu peqqissuujuarniarlutillu silatusaartumik iliuuseqartarlutik. Siunissarli nappaateqarfiunngitsoq Biibilimi neriorsuutigineqartoq tamanna oqimaaqatigiissaarinitsinnut iluaqutigaarput. Kunngi missiarsiusoq inunnut tunngasunik tamakkiisumik aqutsilertinnagu naammalluinartumik peqqissisinnaanngilluinnarpugut. Soorlu takoreeripput nakorsaatitigut ilisimatuussutsip paasisat pissanganarnerpaat atorlugit orpiup nuuaniittut iipilit pitsaanerpaat angusinnaanngikkai — tamanut peqqinneq.
Ungasinngitsukkut anguniagaq „akuerineqarsinnaasumik tamanut peqqissuunissaq“ anguneqassaaq — Naalagaaffiit Peqatigiit, Silarsuarmi peqqinnissakkut suliniaqatigiit, nakorsat, pinngortitamik illersuiniaqatigiit innuttaaqatigiinnilluunniit iluarsaaqqinniartut aqqutiginagit. Jiisusi Kristusip kisimi suliassaraa. Kiisami inuit ‘aniguisitaajumaarput nungujassusermi inussiaataanermit kiffaanngissuseq Guutip qitornaasa naalannarsiffissami pisassaat pigilerlugu’. Nuannerunassusia! — Romamiut 8:21. (gE 8/6 01)
[Qupp. 10-mi assiliartaq assiliartat]
Tamatta Guutip silarsuaani nutaami peqqilluinnalissaagut