Angajooqqaannit qimagaavunga, Guutimilli asaneqarlunga

OQALUTTUARTOQ BERNADETTE FINN

Sisamangajannik ukioqarpunga qatanngutikka pingasut ilagalugit arnat mattuffiannut inissinneqaratta. Birdie 12-inik, Phyllis 8-nik Annamayilu 7-inik ukioqarlutik eqqaamavaat angajoqqaakka maqaasillugit sapaatit-akunnerini arlalinni silaarutaasarlunga kamallunga suaartarikka. Sooq tassunga qimanneqarpugut?

ILAQUTARIISSUARNI katuullini 1936-mi maajip 28-ani inunngorpunga, najugaqarlutalu illunnguami Duncormickimiittumi, County Wexfordimi, Irlandimi. Meeqqat arfineq-pingajoraannga qatanngutikkalu arfineq-marluk siniffik ataaseq tamakkiupparput. Qatanngutikka nukappiaraq niviarsiararlu kingulikka amusarissap amusartuini sinittarput.

Ataatarput naasorissaasut nunaataanni sulisuuvoq suleruloortartoq. Akissarsiakippoq taamaattumillu nerisassakilliortarpugut. Anaanama qaqutiguinnaq qatanngutikka angajulliit atuarfimmi nerisassaannik taquartittarpai. Pissutsit atukkavut piitsuussutsip Irlandimi atugaangaartup ilagiillu katuullit asattuussinngivinnerisa toqqaannartumik kingunerai.

Akuttoqatigiimmik naalagiartarpugut, anaanamali anersaakkut ittumik oqariartuutit soqutigisarinngivippai. Kisianni qatanngutima arnat eqqaamavaat upperisarsiornermut tunngasunik atuagassianik ikumatitsiviup sioraani issiatilluni atuartoq takusimallugu. Aammami atuarsimasami ilaanik oqaluttuunniaraluarpaatigut.

„Naak anaanaga?”

Mattuffimmukaanneqarnera ulloq taanna puiunngisaannarpara. Arnaq mattuttoq ilungersorlutik oqaloqatigalugu angajoqqaakka silarlermi qiqarput. Niviarsiaqqat allat ilai pinnguaqatigilerpakka, qujanartumik naluara suna oqaloqatigiissutigineqarnersoq. Tassanngaannaq eqqara qinilerpara annilaarutigeqisannillu paasillugu anaanaga ataatagalu takussaajunnaarsimasut. „Naak anaanaga?” sapinngisara tamaat suaartarpunga. Soorlu aallaqaataani eqqaaneqartoq sapaatip–akunneri arlallit suaartaannavippunga.

Qatanngitikka pingasut tuppallersaatigeqaakka, kisianni mattuffiup immikkoortortaani allami najugaqarput, taamaattumillu atassuteqarfigivallaanngilakka. Uagutsinnit nukarlernit nalunaaquttap-akunnerini marlunni makitanerusinnaammata, innarnissaasa tungaannut eqqumasarpunga. Taava malugitinnaveersaarlunga makittarpunga qatanngutimalu aalateriffiginiassammannga majuartarfiit qulliit ilaanniittarlunga. Tassaasarpoq ullormut pisut pingaarnersaat.

Angajoqqaaminnut meeqqat atassuteqarnissaat mattuffimmi soqutigineqartunganngilaq, taamaammat angajoqqaavut qaqutigut takusarpavut. Tamanna naalliuutigeqaara. Angajoqqaama pulaaraatigut eqqaamasinnaasatuanni, orninngilakka taakkuattaaq orninngilaannga. Taamaattoq pulaarnerisa ilaat allat ikittunnguit angajuma eqqaamasinnaavaat.

Piffisap ingerlanerani mattuffik ilaquttattut, angerlarsimaffittut, silarsuattut isigilerpara. Tassaniiffinni ukiuni aqqaneq-marlunni, marloriaannarlunga sapiiserlunga anivunga. Eqqatsinnut qanittumut asiarnerit taakku pissanganaqaat orpiit uumasullu takugatsigit. Niviarsiaraasugut biilinik, bussinik niuertarfinnilluunniit takunngisaannarpugut, palasilu eqqaassanngikkaanni angutinik qaqutigut takusarpugut.

Mattuffimmi inuuneq

Arnat mattuffianni inuuneq ajunngitsortaqarpoq, aammali ajortortarpassuaqarluni. Mattuttup arnap inuusuttup pitsaasorujussuup sapinngisani tamaat Guuti pillugu ilinniartittarpaatigut. Oqaluttuuppaatigut Guuti ataataasoq asannittoq. Tusagara nuannaarutigaara, tusarniariarlugulu aalajangerpunga Guuti uanga ataatattut isiginiarlugu, uanga ataatannit asanninnerullunilu inussiarnernerummat. Taamanerniilli paasiuminartunik meerarpaluttunillu Guutimut qinujuartarpunga. Mattuttup arnap inuusuttup taassuma mattuffik qimammagu maqaasivara.

Qujamasuutigeqisannik pitsaasumik tunngaviusumik atuartinneqarpunga. Kisianni „niviarsiaqqat ullukkut takkuttartut”, taama taaneqartaramik, suli eqqaamavakka. Niviarsiaqqat taakkua atuartinneqassallutik mattuffimmut takkukkaangamik immikkut pineqartarput. Ilaqutariinnit pigissaartuneersuupput, takkukkaangatalu ini atuartitsiviusoq uagut qimattariaqartarparput. Angajoqqaaqannginnerput mattuttut arnat eqqaasitsissutigiuarpaat, tamannalu eqqaamassagipput.

Mattuffimmi malittarisassarpassuaqarpoq. Ilaat isumatuujupput, amerlanersattalu paasilluarsinnaavaat sooq atorfissaqartinneqartut. Assersuutigalugu ileqqussatigut, pissusissatigut allarpassuarnillu iluaqutaasunik ilinniartinneqartarpugut. Tamakku puiunngisaannarpakka, inuuninnilu iluaqutigaakka. Malittarisassalli ilaat pingaaruteqanngillat naapertuilluarpasigatillu, allallu paatsiveerunnarput ajoqusiisarlutillu. Assersuutigalugu siniffimmut quisoq imaluunniit unnuap ingerlanerani quiartorusuttoq pillarneqartarpoq.

Ullut ilaanni majuartarfikkut qummukartillunga, niviarsiaraq ingiaqatiga oqaluutilerpara. Mattuttup arnap qaaqquaanga, niviarsiaraq oqaluukkakku pillarneqarpunga. Pillaatisiaraara Irlandip ukiuunera nilleqisoq tamaat annoraara aasarsiut kisiat atussagiga. Nivisarsiaraavunga peqqiitsoq issanngukkulallunilu toqqusaamigut qinersinik aseruuttoortartoq. Napparsimasorujussuanngorpunga niviarsiaqqatulli allarpassuartulli mattuffimmiittutut tuberkuloseqalerlunga. Sinittarfimmilu immikkoortumi inissinneqarpugut, nakorsamilli passunneqarata. Niviarsiaqqat ilaat toqupput, taakkua ilagaat niviarsiaraq ikinngutiginerpaasara.

Malittarisassanik unioqqutitsinerit annikitsut pillugit ilagut unatarneqartarput. Ullut ilaanni atuartut tamarmik katersuussimatillugit, nalunaaquttap-akunneri marluk sinnerlugit mattuttumit arnamit niviarsiaraq unatarneqartoq isiginnaartariaqarparput. Tamatta qiavugut. Ilumoortumik oqassagaanni mattutut arnat tamarmik taama peqqarniitsiginngillat. Sulili paasisinnaanngilara meeqqanut imminut illersorsinnaanngitsunut taama ajortigisoqarsinnaammat. Tamanna paasisinnaanngisaannarpara.

Piffissap ingerlanerani Birdie Phyllisilu mattuffimmit aallarput, uagulli Annamayilu mattuffimmiiginnartariaqarpugut. Immitsinnut pinngitsoorsinnaanngilagut. Annamayip oqaluttuanik tuppallersartarpaanga qanoq angajoqqaatta ullut ilaanni takkukkumaarnerannik mattuffimmiillu aallarukkumaaraatigut mattuttunillu arnanit naneneqanngisaannartussangorluta arlaannukaakkumaaraatigut. Annamayip mattufik qimammagu artorsaqaanga. Suli ukiut pingasut tassaniippunga.

Mattuffimmiinnani inuuneq

Mattuffik 16-inik ukioqarlunga qimakkakku uannut annilaarnartuuvoq. Mattuffiup avataani silarsuarmi pissutsit atuuttut ilisimasaqarfiginngilluinnarpakka, suulllu tamarmik uannut paatsiveerunnaqaat. Bussimut ikigama billettisissasunga oqarfigineqarpunga, billettili sunaasoq nalulluinnarpara. Aningaasaateqannginnamalu bussinit niutinneqapallappunga ornitannullu pisuinnartariaqarlunga. Piffissami allami bussinut ilaassamaartunga bussit takkuttinngitsoorput. Bussit unittarfianni utaqqinissara nalugakku.

Sapiitsuusaarlungalu nukittuujusaarlunga nammineersinnaaneq ilikkariartuaarpara. Piumasaqarfiuallaanngitsumik suliffissamik iluatsitillunga nassaarpunga, qaammatialunnguaannaalli sulereerlunga angerlarsimaffitsinnut anaanaga tikeraarniarlugu aalajangerpunga. Tassani qatanngutima ilaat nukarliit siullerpaamik naapippakka. Taamanikkut angutinik arnanillu 14-inik qatannguteqarpunga. Taakkunani najugaqarnissannut inissaqanngimmat, qatanngutinnut Annamyimut Walesimi najugalimmut nuunnissara angajoqqaama isumagaat. Ataatama tassunnaqatigaanga, apuutiinnarlungali angerlarluni aallarpoq.

Inuussutissaqanngingajappunga qanorli ilillunga pinerpoq uumaannarpunga. 1953-imi Maria Legionenimut ilanngullunga Londonimut nuuppunga, katuullit mattuttoqatigiivinut ilanngutivinngikkaluarlutik ajunngitsuliornermik suliaqartunut. Tassanili sulineq pakatsinaqaaq, ilimagisimagaluarparami aamma anersaakkut ittut sammineqartassasut. Anersaakkut ittunut tunngassuteqartut oqaluuserissallugit nuannareqaara, Maria Legionenimiinnerali suliassanut nalinginnaasunut tunngassuteqarneruvoq, anersaakkullu ittut oqaloqatigiissutiginissaat piffissaqarfigineqanngisaannarunarpoq.

Londonimi najugaqartillunga Patrick naapippara, qatanngutima angutit ikinngutaasa ilaat. Nuannariilerpugut 1961-imilu katilluta. Qitornavut angajulliit marluk Angela Stephenilu, Tuluit Nunaanni inunngorput, 1967-imilu Australiamut nunasiartorpugut, tassani qitornatta pingajuat, Andrew, inunngorpoq. Nunaannarmi illoqarfissuarmi Bombalami New South Walesimiittumi nunassippugut.

Kiisami anersaakkut nerivunga

Austaliamut tikinnitta kinguninngua angummit inuusuttumit Bill Lloydimik atilimmik Biibili pillugu oqaloqatiginninniartumik Bombalami pulaarneqarpugut. Biibiliminngaanit toqqaannartumik apeqqutikka akineqarmata nuannaangaarpunga. Kisianni naak paasigaluarlugu Billip sallusuissut oqaluussissutigigaa, Biibilimit paasisaqarnerorusullunga aninnginniassammallu oqallittorujussuuvugut. Kingusinnerusukkut Billip Biibilimik atuagassianillu atuarsinnaasannik tunivaanga.

Atuagassiat atuarnerat nuannareqaara, uissuummeqaangali paasigakku atuagassianik naqiterisitsisut ataasiullunilu pingasuussuseq upperinngikkaat. Taamaattumik Patrickip atuassagaluarunigit uppernera aserorneqaqinammat atuagassiat toqqorpakka. Aalajangerpunga Bill pulaaqqippat utertinniarlugit, takkukkamili takutippaa Guutip pingasuuneranik ajoqersuut, Biibilimi ajoqersuummut toqqaannartumik akerliusoq. Erniinnarlu takusinnaalerpara Jiisusi Guutip ernerigaa, Jehova Guutimit ataataminit pinngortitaasimasoq – tassa aallartiffeqarsimasoq –Ataatarlu Jiisusimit annerusoq. — Mattæusi 16:16; Johannesi 14:28; Kolossemiut 1:15; Saqqummersitat 3:14.

Paasilertorpara katuullitut ilinniakkakka allat eqqunngitsuusut. Soorlu Biibilimi ajoqersuutigineqanngilaq toqusuitsumik tarneqartugut imaluunniit ikualasumik anniarfeqartoq. (Oqaluussisartup oqaasii 9:5,10; Ezekieli 18.4) Paasillugu assorsuaq eqqissiallaataavoq! Ataataq qangali asasara ilisimanngisaannarsimasarali kiisami nanigakku nuannaarnermik ullut arlaanni igaffimmi qitippunga. Anersaakkut kaakkunnaariartuaarpunga. Nuannaarutigeqisannittaaq Patrickip upperisartaara uattulli qiimatsaatigitigaa.

Temorami nunaannarmi illoqarfissuarmi Jehovap Nalunaajasuisa ataatsimeersuarnissaannut Billip qaaqquaatigut. Naak najuuffiginiarlugu sivisuumik biilertariaqaraluarluta, qaaqquneqarnerput nuannaarutigaarput tallimanngornermilu ualikkut Temoramut apuulluta. Arfininngornermi ullaap tungaa illumiit–illumut oqaluussillutik angalaalertinnatik inimi ataatsimeersuarfiusussami eqimattakkaat arlallit katersuupput. Oqaluusseqataanissatsinnut Patrickilu qilanaarpugut, taamaaliornissarpummi marluulluta qangali kajungerisimagatsigu. Billili oqarpoq marluulluta suli pujortartaratta oqaluusseqataasinnaanngitsugut. Billili animmat eqimattakkaanut allanut ilannguppugut. Isumaqarput Jehovamut Nalunaajaasuusugut taamaattumik ilaatippaatigut.

Nutaarsiassamik nuannersumik oqaluusseqataarusuttunut Biibilimi piumasaqaatigineqartut suuneri ilikkalertorpavut. (Mattæusi 24:14) Pujortartarunnaarpugut 1968-imilu oktobarimi Jehovamut tunniulluinnarnerput takutillugu imermi kuisilluta.

Uppernermi misilinneqarnerit

Jehovamut qaninnerulernitsigut Biibilimillu ilisimasaqarnerulernitsigut, Guutip neriorsuutaanik upperisaqarnerput aalajaallilluinnarpoq. Kingusinnerusukkut Canberrami Australiami illoqarfiit pingaarnersaanni Jehovap Nalunaajaasuisa ilagiivini Patrick utoqqaanertanngortinneqarpoq. Sapinngisatsinnik qitornavut ‘[Jehovamit] oqaaqqissaarlugit’ perorsarpavut unamminiarnartullu inuusuttuaqqanik perorsaanermut atassuteqarajuttut anigorlugit. – Efesosimiut 6:4.

Aliasuutigeqisatsinnik ernerput Stephen 18-inik ukioqarluni biilerluni ajunaarpoq. Aliasukkaluarluta Stephenip Jehovamut kiffartortunngorsimanerata eqqarsaatiginera tuppallersaatigeqaarput. Jehovap iliverniittut makitippagit takoqqinnissaa qilanaaraarput. (Johannesi 5:28, 29) Ukioq ataaseq qaangiuttoq 1983-imi, piffissaq tamaat kiffartornermi panipput Angela ilaliuffigaara, sulilu taamatut kiffartorlunga. Neriuutitsinnik Biibilimik tunngaveqartumik allanik oqaluttuussisarnerma inuunermik ajunngitsumik isiginnittaaseqaannarnissannut iluaquserpaanga uummatinnilu anniaatiga atoruminarsisillugu. Qanittukkut paasigakku qatanngutiga Annamay Walesimi Jehovap Nalunaajaasuinit Biibilimik atuaqqissaaqatigineqartalersimasoq oqaatigisassaanngitsumik nuannaarpunga.

1984-imi Patrick taamanikkut ilisimasaqarfigineqarpianngitsumik nappaateqalerpoq. Kingusinnerusukkut paasineqarpoq nakorsarneqarsinnaanngitsumik qasoqqanermik nappaateqartoq. Naggataatigut suliunnaaginnartariaqarpoq utoqqaanertaajunnaarlunilu. Ullumikkut qujanartumik ajunnginneruvoq ilagiinnilu kiffartortunngortinneqaqqilluni.

Meeraaninni misigisakka ilinniarfigaakka soorlu piginnaanerit imminut naalakkersinnaaneq imminullu tunniusimaneq. Ilikkarpakkattaaq pilimanianngitsumik inuuneq immannguarlu pigisaqarnerup naammaginissaa. Paasisinnaanngisaannarparali uagut niviarsiaqqat sisamaalluta mattuffimmukartinneqqarnerput meeqqallu allat aqqanillit angerlarsimatiinnarneqarnerat. Imminut tuppallersartarpunga eqqarsarlunga angajoqqaakka, ukiualuit matuma siornatigut toqusut, pissutsit atukkatik naapertorlugit iliorsimanerat qaqugumulluunniit paasilluarsinnaagunanngisannik. Pissutsit artornartuusimapput pinngitsoorani artornartunik aalajangiiffiusartut. Taamaakkaluartoq inuunermut tunissutaasumut angajoqqaakka qujamasuffigaakka sapinngisartik naapertorlugu isumagisimammannga. Tamanillu pingaarnerusumik ataatatut isumaginninneranut Jehova qutsavigaara. (gE 22/6 01)

[Qupp. 29-mi assiliartaq]

Katernaajullutaa

[Qupp. 30-mi assiliartaq]

Qitornavut mikigallarmata

[Qupp. 30-mi assiliartaq]

Patrick uangalu ullumikkut