Maniguunneq

SUUGAMI?

Inuit maniguut­tut ataq­qin­nit­tuup­put. Pingaakujun­neq ajor­put im­mik­kul­lu it­tumik pineqar­nis­sar­tik naatsorsuutigineq ajorlugu. Inuup maniguut­tup al­lat qaman­nga pisumik soqutigalugil­lu ilin­niarfigerusut­tar­pai.

Inuk maniguut­toq san­ngiitsutut isigineqar­tar­poq. Taman­nali eq­qun­ngilaq, taas­sumami pisin­naasami kil­leqar­nerinik kuk­kus­sutiminil­lu nas­suerutigin­nis­sin­naanini nukit­tuf­figaa.

SOOQ PINGAARUTEQARPA?

• Maniguun­neq al­lanut at­taveqar­ner­mut iluaqutaavoq. “Ataatsimut isigalugu inuit maniguut­tut ikin­nguteqar­neruler­tar­put,” taama atuak­kami The Narcissism Epidemic-imi al­las­simavoq. Nangil­luni al­las­simavoq inuit taamaat­tut ‘inun­nut al­lanut at­taveqarluar­nerusar­tut’.

• Maniguun­neq meeq­qavit siunis­sami iluaqutigis­savaa. Meeq­qavit maniguun­nermik ilin­niar­nini maan­na inuunermilu kingusin­nerusuk­kut, as­sersuutigalugu sulif­fis­sarsior­nermi, iluaqutigis­savaa. “Ilimanan­ngilaq inuusut­toq im­minut naleqar­tit­torujus­suaq pik­korif­figin­ngisaminik ilisiman­nin­ngitsoq sulif­fis­sarsiorluni oqaloqateqar­nermi ingerlal­luas­sasoq,” taama nakorsaq tar­nil­lu pis­susiinik ilisimatooq Leonard Sax al­lap­poq. “Inuusut­torli sulisus­sarsior­tup oqaaseriniagaanik ilumoorluni soqutigin­nit­toq sulif­fit­taas­sasoq ilimanar­neruvoq.”a

QANOQ ILINNIARTITSISINNAASUTIT

Pingaar­niakujut­tun­ngoq­qunagu ikioruk.

NAJOQ­QUTAS­SIAQ BIIBILIMEER­SOQ: “Im­minut pingaar­tuusorisoq, uf­fa taamaan­nani, taan­na im­minut sal­loqit­tar­poq.” – Galatiamiut 6:3.

• Piviusor­siun­ngit­sunik oqaaseqar­taqinak. Oqariar­taatsit “Takorluuk­katit tamarmik piviusun­ngorsin­naap­put” aam­ma “Sun­ngorsin­naavutil­luun­niit” kajumis­sinar­palus­sin­naap­put, amerlaner­tigul­li ilumoor­neq ajorlutik. Meeq­qavit anguniak­katik piviusorsior­tut tamaviaarlutik anguniarunik­kit iluatsil­luar­nis­saat ilimanar­nerus­saaq.

• Tun­ngaviler­suil­lutit ner­sualaarisarit. Meeq­qat oqarfigiin­nar­taruk­ku ‘kak­kat­toq’ maniguutiler­navian­ngilaq. Iliuusii aalajangersimasut pil­lugit nersualaar­taruk.

• Meeq­qavit inter­netik­kut at­taveqaqatigiit­tar­fin­nik atuinera kil­leqar­tiguk. Inter­netik­kut at­taveqaqatigiit­tarfin­ni inuit qanoq pik­koritsiginer­tik angusar­pas­suatil­lu ersersik­kusut­tar­paat. Taman­na maniguun­nerup akerleril­luin­nar­paa.

• Meeq­qat utoq­qat­sipal­lat­taq­qul­lugu kajumis­saar­taruk. Meeq­qat qanoq kuk­kusimanerminik paasin­nin­nis­saanut nas­suerutigin­nin­nis­saanul­lu ikioruk.

Qujamasoq­qul­lugu kajumis­saaruk.

NAJOQ­QUTAS­SIAQ BIIBILIMEER­SOQ: ‘Qujaniar­taritsi.’ – Kolos­semiut 3:15.

• Pin­ngor­titar­suar­mik qujamasuutigin­nin­neq. Meeq­qat pin­ngor­titarsuaq qujamasuutigisariaqarlugulu inuuniar­nermi qanoq pingaaruteqar­tigisoq paasisariaqar­paat. Anersaar­tor­nis­satsin­nut silaan­naq, imer­nis­satsin­nut imeq nerinis­satsin­nul­lu nerisas­sat pisariaqar­tip­pavut. As­sersuutit taak­ku atorlugit pin­ngor­titarsuup alianaatsor­taanik qujamasuutigin­nin­nis­saanik mianerin­nin­nis­saanil­lu ilin­niar­tiguk.

• Inun­nut qujamasun­neq. Meeq­qat eq­qaasiguk al­lat pik­korif­feqar­nerat pigin­naasaqar­neral­luun­niit pil­lugu sin­ngagisas­san­ngik­kai, taak­kuli qanoq ilin­niarfigisin­naagai ilin­niar­tiguk.

• Qujamasun­ner­mik er­ser­sit­sineq. Meeq­qat qujanermik, oqaasiin­nar­tiguun­ngitsoq kisian­ni aam­ma ilumoorluni qujamasun­nermik, ilin­niar­tiguk. Qujamasun­neq maniguut­tuar­nis­samut iluaqutaavoq.

Ikiuisar­nerup pingaaruteqar­neranik ilin­niar­tik­kit.

NAJOQ­QUTAS­SIAQ BIIBILIMEER­SOQ: “[Makitajuitsuunis­sigut] al­lat ilis­sin­nit an­nerutis­sigit. Tamas­si im­mik­kut nam­mineq iluaqutis­sarsi pin­nagu inoqatis­sis­saaq iluaqutis­saat isumagisiuk.” – Filip­pimiut 2:3, 4.

• Meeq­qat anger­lar­simaf­fim­mi sulias­sit­taruk. Sulias­sin­neq ajoruk­ku suliaqar­nis­samut pingaaruteqar­pal­laar­tutut misigilersin­naavoq. Angerlarsimaf­fim­mi sulias­sat pin­nguan­ngin­nermi siul­liul­lugit isumagineqar­tus­saap­put. Suliaqar­tar­nera al­lat iluaqutigisaraat taman­nalu al­lanit ataq­qineqalis­sutigis­sagaa erseq­qis­saruk.

• Nas­suiaruk al­lanik ikiuineq sooq pit­saasuusoq. Ikiuineq meeq­qavit inersimal­lualis­sutigis­savaa. Taamaat­tumik ikior­neqar­nis­samik pisariaqar­titsisut qanoq ikiorsin­naagai pil­lugu oqaloqatigisaruk. Taamaalioraangal­lu nersualaarlugulu tapersersor­taruk.