Biibilimi qanoq allassimasoqartoq

“Tassa qilaap nunallu pinngortitaanerisa oqaluttuarisaanerat.” (Mosesimik 1. 2:4) Nunarsuatta pinngortinneqarnera Biibilimi taama nassuiarneqarpoq. Biibilimili allassimasut ilisimatusarnikkut paasisanut naapertuuppat? Assersuuteqariarta.

**Pileqqaarneranni:** Nunarsuaq avataarsualu pinngortinneqarput

Silarsuaq piujuaannarsimava?

Biibili ima aallartippoq: “Pileqqaarneranni Guutip qilak nunalu pinngortippai.” – Mosesimik 1. 1:1.

1950-ikkut siorna ilisimatoorpassuit isumaqarsimapput silarsuaq piujuarsimasoq. Paasisanulli nutaajunerusunut naapertuuttumik ullumikkut ilisimatuut amerlanerit isumaqarput silarsuaq aallartiffeqarsimasoq.

Nunarsuaq aallaqqaammut qanoq isikkoqarpa?

Biibilimi allassimavoq nunarsuaq pinngortinneqarami ‘soqanngitsoq ilisarsaananilu’ nunataalu imermik ulissimalluni. – Mosesimik 1. 1:2, 9.

Tamanna ilisimatuunit isumaqataaffigineqarpoq. Biologi Patrick Shih oqarpoq nunarsuarput aallaqqaammut “ilteqannginnami anersaartorfiusinnaanngitsoq, … nunalu tamarmi naggorluttoq”. Atuagassiami Astronomy-mi ima allassimasoqarpoq: “Misissuinerni nutaajunerusuni paasineqarsimavoq nunarsuaq tamangajammi aallaqqaammut imermik ulissimasoq.”

Silaannarsuaq qanoq allanngoriartorsimava?

Biibilimi ersersinneqarpoq aallaqqaammut silaannarsuaq pujuinnaammat seqineq qaammallu nunarsuarmiit ersinngitsut. Aatsaat kingusinnerusukkut takuneqarluarsinnaalersimapput. – Mosesimik 1. 1:3-5, 14-18.

Biibilimi allassimanngilaq uumassusillit tamarmik ulluni arfinilinni immikkut 24 tiiminik sivisussuseqartuni pinngortinneqartut

Avatangiisit pillugit misissueqqissaartarfimmi ilisimatuut naapertorlugit silaannarsuaq pissutigalugu nunarsuarput aallaqqaammut qaamanikissimavoq. Ima naliliipput: “Nunarsuup pileqqaarnerani nunarsuaq tamakkerlugu metanimik pujorsimavoq.” Piffissalli ingerlanerani “pujoq metaniusoq nungukkiartorsimavoq qilallu tungutsorissiartorluni”. – The Smithsonian Environmental Research Center.

Uumassusillit sorliit siulliullutik piulerpat?

1 Ulloq siulleq: Nunarsuaq qaammariartulerpoq. – Mosesimik 1. 1:3-5

2 Ullut aappaat: Nunarsuarmi tamarmi imermik qalleqqallunilu avataa aalaannaavoq. Imeq aalarlu avissaaqqapput. – Mosesimik 1. 1:6-8

3 Ullut pingajuat: Imarsuaq kiviartorpoq nunalu takussaalerluni. – Mosesimik 1. 1:9-13

4 Ullut sisamaat: Seqineq qaammallu nunarsuarmiit takulluarneqarsinnaalerput. – Mosesimik 1. 1:14-19

5 Ullut tallimaat: Guutip pinngortippai uumasut immamiittut qilammiittullu pissuseqatigiivisa iluanni amerliartorsinnaanngortillugit. – Mosesimik 1. 1:20-23

6 Ullut arfernat: Nunami uumasut assigiinngitsut pinngortinneqarput. Ullullu arfernata naanerani inuit siulliit marluk pinngortinneqarput. – Mosesimik 1. 1:24-31

Biibilimi allassimavoq aalisakkat timmissallu siulliullutik pinngortinneqartut. Taava nunami uumasut kingornalu inuit pinngortinneqarput. (Mosesimik 1. 1:20-27) Ilisimatuut naapertorlugit nunami miluumasut inuillu sioqquterujussuarlugit aalisakkat siulliit piulersimapput.

Biibilimi allassimanngilaq uumassusillit piffissap ingerlanerani allanngorsinnaanngitsut

Biibilimi allassimasut paatsoorneqarsimasut

Inuit ilaat oqartarput Biibilimi allassimasut nalitsinni ilisimatussutsikkut paasisanut naapertuutinngitsut. Taamali isummerneq paatsuuisimanermik pissuteqarajuppoq.

Nunarsuaq avataarsualu ukiunik 6.000-iinnarnik Biibilimi pisoqaatiginerarneqanngilaq. Allassimavoq “pileqqaarneranni” nunarsuaq avataarsualu pinngortinneqartut. (Mosesimik 1. 1:1) Tamanna qangarpiaq pisimanera Biibilimi allassimanngilaq.

Biibilimi allassimanngilaq uumassusillit tamarmik ulluni arfinilinni immikkut 24 tiiminik sivisussuseqartuni pinngortinneqartut. Soorlu kalaallisut oqaaseq “akunneq” nalunaaquttap-akunneranik imaluunniit sivisunerusumik isumaqarsinnaasoq oqaaseq Biibilimi “ullormik” nutserneqartoq piffissanut assigiinngitsunik sivisussusilinnut innersuussutaasinnaavoq. Tassa “ullut” arfinillit Guutip nunarsuarmik uumassusilinnillu pinngortitsiffigisai tamarmik immikkut sivisoorujussuusinnaapput. – Mosesimik 1. 2:2; Hebræerit 4:1, 4.

Biibilimi allassimanngilaq uumassusillit piffissap ingerlanerani allanngorsinnaanngitsut. Biibilimi allassimavoq uumasut “assigiinngitsukkuutaarlugit” pinngortinneqartut. (Mosesimik 1. 1:24, 25) Pineqanngilarli piffissap ingerlanerani uumasut pissuseqatigiit iluanni allanngorsinnaanngitsut. Tassa pissuseqatigiinni ataatsini uumasut assigiinngitsorujussuusinnaapput.

Qanoq isumaqarpit?

Nunarsuup, avataarsuata inuunerullu piulernerat Biibilimi eqqortumik paasiuminartumillu allaatigineqarpoq. Taavami imaassinnaava tamakkuninnga tamanik Pinngortitsisoq aamma eqqortumik Biibilimi allaatigineqartoq? Qinerlerfissiami ima allassimavoq: “Inuunerup tupinnartuliornikkut piulersimanera nalitsinni ilisimatusarnikkut paasisanut akerliunngilaq.” – Encyclopædia Britannica.a

a Inuunerup pinngortitaanera Encyclopædia Britannica-mi ilinniartitsissutigineqanngilaq.