Tukkortuugit

SOOQ PINGAARUTEQARTOQ

Tukkortuugaanni – allaat annikitsutigut – nuannaar­nerulersitsisarpoq imminullu tatiginerulersitsilluni. Misissuinerit ersersippaat tunissuteqaraangatta timikkut eqqarsar­taatsikkullu peqqinneruler­tartugut. Assersuutigalugu ernuman­nginneruler­tarpugut, uippakajaan­nginnerusarpugut, aap naqitsineranut iluaqutaasarpoq allaallu timikkut anniarnikin­neruler­tarluta. Aamma sinilluar­nerusin­naavugut.a

Aningaasatigut allatigul­luunniit allanut tunissuteqar­tarutta nammineq pisariaqar­titaqalerutta ikiorneqar­nissarput akueriuminar­tinnerus­savarput. Howard, Tuluit Nunaanni najugalik, ima oqarpoq: “Nuliaralu allanut tunissuteqar­nissamut ikiuinis­samullu periarfis­sarsior­tarpugut. Taamaalior­tarnerput pissutigalugu uagut nammineq ikiorneqar­tariaqaleraangatta allanut nanertuutaasutut misigin­nginnerusarpugut.” Soorunami tukkortuunitsinnut nammineq tunineqarnissaq pissutiginiagarin­ngilarput. Tukkortuusulli pisariaqar­titsiffimmi ikiuisin­naasunik ikinnguteqalertarput.

SUSINNAASUTIT

Pisinnaasat naapertorlugu tunisisarit. Allaat pigisakik­kaluaruit avitseqateqarsin­naavutit, soorlu persuarsiun­ngitsumik neriartoq­qusisin­naavutit. Duncan ilaqutaalu, Ugandami najugallit, piitsuugaluarlutik avitseqateqar­tarnertik nuannaarutigisarpaat. Duncan ima oqarpoq: “Sapaatikkut neriartoq­qusisarpugut. Allanik peqateqar­tarnerput nuannaarutigisarparput.”

Soorunami allanut tunissuteqaraangavit oqimaaqatigiis­saarisassaatit. Tassami allanut ima tunnius­sitigisas­sanngilatit ilaquttavit pisariaqar­titaannut akissaarullutit. – Timuutiusimut 1. 5:8.

Una misiliguk: Immaqa nerisassanut kaffimul­luunniit persuarsiun­ngitsumik qaaqqusaqarsin­naavutit. Pigisat atortarun­naarsimasat ikinngutinnut eqqaamiun­nulluunniit tunniukkukku immaqa iluaqutigalugulu qujamasuutigissavaat.

Allatigut tunissuteqartarit. Tunissutigisin­naasatit pitsaanerpaat aningaasanik akeqanngillat. Assersuutigalugu allat piffissaqarfigigutsigit ikiortarutsigillu takutis­sinnaavarput asallugit. Inussiar­nersumik oqaaseqarneq aamma tunissutaasinnaavoq. Taamaattumik allat asallugillu qanoq pingaar­titsigalugit oqarfigisakkit.

Una misiliguk: Ikinngutit arlaatigut ikioruk – soorlu angerlarsimaffiani iluarsaatas­saqarpat ikiuisin­naavutit, imaluunniit pisinius­sinnaavat. Aamma ikinngutivit ilaat eqqarsaatigalugu paasitin­niarlugu allaffigisinnaavat – allakkatigut imaluunniit SMS-ikkut.

Tukkortuunissamut periarfis­sarsiortaruit nuannaarutis­sarpassuaqassaatit.