Josef parnaarussaasoq

JOSEF 17-iinnarnik ukioqarluni Egyptenimukaanneqarpoq. Tassani angummut Potifarimik atilimmut tunineqarpoq. Egyptenimi kunngip, Faraomik taaguutillip, Potifar kiffaraa.

Josefip naalakkani Potifar kiffartuulluarpaa. Josefilu inersimalermat Potifarip pigisani tamaasa taassumunnga akisussaaffigilersippai. Taava suna pillugu Josef parnaarussaava? Potifarip nulia pisuuvoq.

Josef angutinngorpoq pinnersorujussuaq, Potifarillu nuliata innaqatigiumagaluarpaa. Josefilli nalunngilaa tamanna eqqunngitsuliornerusoq, taamaaliorusunngilarlu. Potifarip nulia kamalerpoq. Taava uini angerlarmat salluffigaa oqarluni: ’Josefip ajortorsuup uuma innaateriaraluarpaanga!’ Potifarip nuliani upperaa, Josefilu kamaattorujussuullugu. Taamaattumik parnaarussivimmut pisippaa.

Parnaarussivimmi pisortap sivitsunngitsoq paasivaa Josef ajunngitsuusoq. Taamaattumik parnaarussat allat tamaasa taassumunnga nakkutigeqquai. Kingornagut Faraop immitsisuni iffiortunilu kamaatilerpai parnaarutillugillu. Unnuat ilaanni tamarmik eqqumiitsumik sinnattorput, nassuiarsinnaanagilli. Aqaguani Josefip oqarfigai: ’Sinnattukkassinnik oqaluttuussinga.’ Taava Josefip, Guuti ikiortigalugu, sinnattugaat nassuiarpai.

Immitsisumut Josef oqarpoq: ’Ullut pingasut qaangiutsinnagit parnaarussaajunnaarsinneqarumaarputit, Faraollu immitsisorileqqikkumaarpaatit.’ Taava Josef nangilluni oqarpoq: ’Iperagaaguit Faraomut eqqartorniaringa, maanngaanniillu aninissannut ikiorlunga.’ Iffiortumulli Josef oqarpoq: ’Ullut pingasut qaangiutsinnagit Faraop niaquersikkumaarpaatit.’

Ullut pingasut qaangiummata Josefip oqaasii eqquupput. Faraop iffiortoq niaquersippaa. Immitsisorli parnaarussaajunnaarsinneqarpoq, kunngilu kiffartorfigileqqippaa. Immitsisulli Josef puiorluinnarpaa! Faraomut eqqartunngitsoorpaa, Josefilu parnaarussaajuartariaqarpoq.