Egyptenimut nuuttut

JOSEFIP misigissutsini nunusinnaajunnaarpai. Kiffani tamaasa peqquai inimit aneqqullugit. Qatanngutini kisimeeqatigileramigit Josef qissaserpoq. Qatanngutaasa qanoq tupigusutsigissusiat takorloorsinnaavarput, suna pillugu qiasoq nalugamikku. Kiisami oqarpoq: ’Josefiuvunga. Ataataga suli inuua?’

Qatanngutai tupigusunnermit oqaasissaarupput. Annilaangalerput. Josefili oqarpoq: ’Qaaniaritsi.’ Ornimmanni oqarpoq: ’Qatanngutigaassinga, Egyptenimut tunisarsi.’

Josefip asannittumik oqaluffigiuarpai: ’Immissinnut ajorissanngilasi maanga tunigassinga. Guutimmi Egyptenimut aallartippaanga inuit inuunerat annaateqqullugu. Faraop nunamut tamarmut naalaganngortippaanga. Ataatannullu uterasuaritsi oqaluttuullugulu tamatuminnga. Oqarfigisiuk maanga nooqqullugu najugaqaleqqullugulu.’

Taava Josefip qatanngutini qungasiisigut eqippai tamaasalu kunillugit. Josefip qatanngutai tikissimasut tusaramiuk Faraop Josef oqarfigaa: ’Qamutinik tigusillutik aallarlik ataatartik ilatillu aallugit maangalu uterlutik. Egyptenimi tamarmi nunamik ajunnginnerpaamik tunissavakka.’

Taamaaliorpullu. Maani takusinnaavat Josefip ataatani ilassigaa ilaquttani tamaasa ilagalugit Egyptenimut apuummata.

Jakobip ilaqutai assut amerlisimapput. Egyptenimut nuukkamik katillutik 70-iupput, Jakob qitornaalu erngutaalu ilanngullugit. Taakkununngalu ilaapput nuliaat, immaqalu aamma kiffarpassuaqarput. Tamarmik Egyptenimi nunasipput. Israelikkunnik taagorneqarput, Jakobip aqqa Guutip allanngortimmagu Israelinngortillugu. Israelikkut Guutip innuttarilerpai immikkoorluinnaq ittut, soorlu kingornagut takussagipput.