Jeftap neriorsuutaa

NERIORSUISIMAVIT kingornalu eqquutinnissaata sapernarnera paasilerlugu? Angutip assilissamiittup tamanna misigaa, tamannalu pillugu aliasuppoq. Tassaavoq Israelimi eqqartuussisoq sapiitsoq Jeftamik atilik.

Jeftap nalaani Israelikkut Jehova pallorfigiunnaarsimavaat. Ajortuliortaleqqissimapput. Taamaattumik Ammonip kinguaavi Jehovap Israelikkunnik ajoqusiitippai. Taava Israelikkut Jehova torlorfigaat: ’Ajortuliorfigaatsigit. Annaatsigut!’

Inuit ajortuliatik peqqissimissutigaat. Peqqissiminertik ersersippaat Jehova pallorfigileqqillugu. Taamaattumillu Jehovap ikioqqilerpai.

Inuit Jefta qinerpaat Ammonip kinguaavinut ajortunut sorsunnermi siulersuisussatut. Jeftap kissaatigeqaa Jehovap akiuunnermi ikiussagaani. Taamaattumik Jehova neriorsorpaa: ’Ammonip kinguaavinut ajugaatikkumma, ajugaanermit angerlarlunga parsiarlunga illunnit anisoq siulleq ilinnut tunniukkumaarpara.’

Jeftap neriorsuutaa Jehovap tusarpaa, ikiorlugulu ajugaatillugu. Jefta angerlarmat, parsiarlugu illumit anisoq siulleq kinaasoq nalunngiliuk? Tassaavoq pania, qitornatuaa. ’Ila, paniga!’ Jefta nillerpoq. ’Aliatsatseqaarma! Jehovamut neriorsuivunga, utertinnerlu saperpara.’

Jeftap neriorsuutaa paasileramiuk siullermik aamma pania aliatsappoq, angunni ikinngutinilu qimattariaqassagamigit. Inuuninili naallugu Jehova kiffartuutissavaa illernartuutiliami Silomiittumi. Taava ataatani oqarfigaa: ’Jehovamut neriorsuisimaguit eqqortittariaqarpat.’

Taamaattumik Jeftap pania Silomut nuuppoq, inuuninilu tamaat Jehova illernartuummi kiffartuuppaa. Ukiut tamaasa ullut sisamat Israelikkut arnartaasa tassani tikeraartarpaat, nuannaarsaqatigiittarlutillu. Inuit Jeftap pania asavaat Jehovamut kiffaalluarmat.