Kunngi Salomon silatooq

SALOMON suli 20-nik ukioqalernani kunnginngorpoq. Jehova asavaa, ataatamilu Davidip siunnersuutai ajunngitsut malippai. Jehovap Salomon iluaraa, taamaattumik unnuat ilaanni sinnattortillugu oqarfigaa: ’Salomon-iaa! Sumik uannut tuneqquit, taava tunniutissavara?’

Salomonip akivaa: ’Jehova Guutiga, inuusuttuinnaavunga qanorlu naalakkersuinissara nalullugu. Ilisimassummik tuninnga innuttannik eqqortumik naalakkersuisinnaaqqullunga.’

Salomonip qinnutigisaa Jehovap iluaraa. Taamaattumik oqarpoq: ’Ilisimassummik qinnuteqaravit inuummersornissaq pisuussutilluunniit qinnutiginagit, ilisimassummik inuusimasut kikkulluunniit ilisimassusiannit annerusumik tuniumaarpakkit. Aammattaarli qinnutiginngisannik tuniumaarpakkit, pisuussutinik naalannaammillu.’

Kinguninnguagut arnat marluk Salomonimut ornigupput annertuumik ajornartorsiuteqarlutik. ’Arnaq una uangalu illumi ataatsimi najugaqarpugut,’ aappaa nassuiaavoq. ’Uanga nukappiaqqamik ernivunga, ullullu marluk qaangiuttut taannattaaq nukappiaqqamik ernivoq. Taava unnuat ilaanni taassuma naalungiarsuutaa toquvoq. Uangali sinitsillunga, qitornani toqungasoq saninnut ilisimavaa uangalu qitornara tigullugu. Iterama meerarlu toqungasoq qiviarlugu, paasivara qitornarinngikkiga.’

Taava aappaa oqarpoq: ’Naagga! Meeraq uumasoq uanga pigaara, toqungasorlu taassuma pigaa!’ Arnaq siulleq akivoq: ’Naagga! Meeraq toqungasoq illit pigaat, inuusorlu uanga pigaara!’ Taamatut arnat oqqapput. Salomon qanoq iliorniassava?

Panamik aallersitsivoq oqarlunilu: ’Naalungiaq inuusoq marlunngorlugu avissiuk, arnallu tamaasa immikkut affaanik tunillugit.’

’Naagga!’ anaanavik torlorpoq. ’Naalungiaq toqoqinagu. Aappannut tunniussiuk!’ Aappaali oqarpoq: ’Arlaannattaluunniit pissanngilaa; marlunngorlugu aviinnarsiuk.’

Salomon akuliuppoq: ’Meeraq toqoqinagu! Arnamut siullermut tunniuguk. Taanna anaanavigaa.’ Salomonip tamanna nalunngilaa, anaanaviup meeraq ima asatigimmagu aapparminut tunniunneqarnissaa piumanerullugu toqunneqarnissaaninngarnit. Salomonip ajornartorsiut qanoq aaqqitsikkaa tusaramikku inuit nuannaarput taama silatutigisumik kunngeqaramik.

Salomon naalakkersuisuutillugu Guutip inuit pilluaqquai karrerpassuit, viinnissarpassuit, fiigerpassuit nerisassarpassuillu allat naatillugit. Inuit atisarissaarput illunilu pitsaasuni najugaqarlutik. Inuit tamarmik ajunngitsorpassuarnik naammattorsuarnik peqarput.