Dronningi ajortoq Jesabel

KUNNGI Jeroboam toqoreermat kunngit naggueqatigiit qulit naalagaaffianni avannarlermi Israelimi naalakkersuisut tamarmik ajortuupput. Kunngi Akab tamanit ajornerpaavoq. Suna pissutaasoq nalunngiliuk? Nulia, dronningi ajortoq Jesabel, ingammik pissutaavoq.

Jesabel Israelikkuunngilaq. Zidonip kunngiata panigaa. Guutipiluk Ba’al guutisiorfigisarpaa, Akabilu Israelikkorpassuillu Ba’alisiulersillugit. Jesabelip Jehova uumigaa pruffiitiisalu ilarpassui toqutillugit. Allat qaarusunni toqqortariaqarput toqunneqarumanatik. Jesabel piumasaqaraangami allaat inummik toqutseriaannaasarpoq piumasani piniarlugu.

Ullut ilaanni kunngi Akab nuannaanngeqaaq. Taava Jesabelip aperaa: ’Sooq ullumi nuannaanngeqaat?’

’Nabot pillugu,’ Akab akivoq. ’Naatsiivia viinnequtilik pisiariumagalurakku tuniumannginnamiuk.’

’Ernumanak,’ Jesabel oqarpoq. ’Pissaqqaarpat.’

Taava illoqarfimmi Nabotip najugaani pisortaatitat Jesabelip allakkanik allaffigai. ’Inupiluit oqartissigik Nabot Guutimik kunngimillu perloqqusisimanerarlugu,’ allappoq. ’Taava Nabot illoqarfimmit anisissiuk ujaqqanillu milloorlugu, toqullugulu.’

Nabot toqusoq tusaramiuk, Jesabelip Akab oqarfigaa: ’Naatsiivia viinnequtilik tiguniaruk.’ Taama ajortigisumik iliorami Jesabel pillarneqartariaqannginnerpa?

Kinguningaatsiaagut Jehovap Jehu aallartippaa Jesabel pillaqqullugu. Jehu aggilersoq Jesabelip tusaramiuk isini qalipappai pinnerumaqigami. Jehuli tikiukkami Jesabelilu igalaaniittoq takuleramiuk angutit illussaarsuarmiittut suaarpai: ’Silammut ajassiuk!’ Angutit naalappaat, soorlu assilissami takusinnaagit. Ajappaat, toquvorlu. Dronningi ajortoq Jesabel taamaalilluni toquvoq.