Jesus nersutaatit inaanni

MEERANNGUAQ una kinaasoq nalunngiliuk? Aap, tassaavoq Jesus. Aatsaannguummat nersutaatit inaanni erniuvoq. Nersutaatit inaat tassaavoq ini uumasut siniffigisartagaat neriffigisartagaallu. Mariap Jesus nersutaatit nerriviannut ilivaa, taanna tassaavoq siutituunut uumasunullu allanut nerisassanik ilitsiviusartoq. Sunali pillugu Maria Josefilu uumasut akornanniippat? Meerartaarfissatut naleqqutinngitsigisoq, ilaa?

Aap. Sunali pissutaasoq tusariaruk. Augustus, Romap kaasaria, inatsisiliorsimavoq inuit tamaasa nunaqarfimmut inunngorfimminnut aallaqqullugit, aqqi allattorneqassammata. Josef maani Betlehemimi inunngorsimavoq. Kisianni Marialu tikikkamik, siniffissaqanngillat. Taamaattumik uumasut akornanniittariaqarput. Ullorlu taanna Mariap Jesus ernertaaraa. Soorluli takusinnaagit ajoquteqanngilaq.

Savanik paarsisut Jesusimut pulaariartortut takusinnaavigit? Narsamiissimapput unnuakkut savaatitik paaralugit, tassanngaannarlu qaamanersuup qaammarfigisimavai. Sunaaffa inngilip! Ersilersimapput, inngilili oqarsimavoq: ’Erseqinasi! Tipaatsunnartumik tusarlissavassi. Ullumi Kristus, Naalagaq, Betlehemimi erniuvoq. Inuiaat annaakkumaarpai! Naniumaarparsi immussimasoq nersutaatillu nerrivianni innangasoq.’ Tassanngaannaq inngilerpassuit takussaalersimapput Guutimik unnersiutiginnittut. Savanik paarsisut aallarasuarsimapput Jesus ujariartorlugu, maannalu nanivaat.

Suna pillugu Jesus immikkut pingaaruteqartoq nalunngiliuk? Kinaassusivia nalunngiliuk? Aap, eqqaamajuk atuakkami uani oqaluttuami siullermi Guutip ernera siulleq oqaluttuarigatsigu. Ernerup taassuma Jehova suleqatigisimavaa qilak nunalu allallu tamarmik pinngortinneqarmata. Taannaavorlu Jesus!

Aap, Jehovap ernermi inuunera qilammit tiguaa Mariamullu nuutsillugu. Taava meerannguaq taassumani ineriartulerpoq, soorlu meeqqat allat tamarmik anaanaminni ineriartortartut. Meerarli taanna Guutip erneraa. Kiisalu Jesus Betlehemimi nersutaatit inaanni maani inunngorpoq. Maanna paasilerpiuk sooq inngilit taama nuannaartigisut Jesus inunngortoq oqaluttuarisinnaaleramikku?