Inimi qullermi

SISAMANNGORNERMI unnuppoq, ullut marluk qaangiussimapput. Jesus apustiliilu aqqaneq-marluusut uani inersuarmi qullermiipput poorskisiummik nereqatigiillutik. Angut anilersoq takusat tassaavoq Judas Iskariot. Palasit oqarfigiartorniarpai qanoq ilillutik Jesus tigusarisinnaagaat.

Ippassaammat Judasip palasit ornissimavai aperalugillu: ’Jesus tigusariniarlugu ikiorussi sumik akilissavisinga?’ Oqarput: ’Aningaasat siilvit 30-t.’ Maanna Judasip angutit taakku ornippai Jesusimut ingerlanniarlugit. Ajussusia, ilaa?

Poorskisiummik nereqatigiinneq inerpoq. Taavali Jesusip nereqatigiinneq alla immikkut ittoq pilersippaa. Apustilini iffiamik tunivai oqarlunilu: ’Una nerissavarsi, tassaammat timiga ilissi pillusi tunniunneqartussaq.’ Taava imertarfimmik viinnimik imalimmik tunivai oqarlunilu: ’Una imersiuk, tassaammat aaga ilissi pillusi kuineqartussaq.’ Tamanna Biibilimi taaneqartarpoq ’Naalakkap unnukkorsiortitsinera’ imaluunniit ’Naalakkap nerliiassiaa’.

Israelikkut poorskisiortarsimapput eqqaaniarlugu Guutip inngiliata Egyptenimi illuminnik qaangiinnaalluni asattuussisimanera, Egyptenimiulli illuini angajulliliat toqullugit. Jesusilli maanna ajoqersukkani imminik eqqaamanneqquai, taakkulu pillugit inuunerminik tunniussinerminik eqqaaniaaqqullugit. Taamaattumik oqarfigai unnukkorsiorneq immikkut ittoq tamanna ukiumoortumik nalliuttorsiutigisaqqullugu.

Unnukkorsiortitsinermi kingornagut Jesusip apustilini oqarfigai qunusuissasut uppernikkullu nukittussasut. Naggataatigut Guutimut tussiarput anillutillu. Unnoqaaq, immaqa unnuap-qeqqa qaangerpaa. Sumukartut takoriartigu.