Jesus naatsiivimmi

INI qulleq qimakkamikku Jesus apustiliilu naatsiivimmukarput Getseʹmanemik taaneqartumut. Tamaaniikulasarput. Taava Jesusip oqarfigai eqqumassasut qinussasullu. Taava qimallatsiarpai, seeqqumiarlunilu sikillunilu qinuvoq.

Kingornagut Jesus apustiliminut uterpoq. Sunersut nalunngiliuk? Sinipput! Pingasoriarlugit Jesusip oqarfigisarpai eqqumassasut, uteraangamili takusarpai sinittut. ’Sooq siniinnarpisi?’ Kingullermik uterami Jesus oqarpoq. ’Akeqqama assaannut pisitaanissara qanillivoq.’

Inuaqerpalussuaq tutsiuppoq. Takuuk! Angutit panalisartut anaatalisartullu tikiupput! Nanerussanillu qaammaqquteqarput. Palligukkamik inuppassuit ilaat sassarpoq Jesus tikivillugu. Kunippaa, soorlu uani takusinnaagit. Tassaana Judas Iskariot! Suna pillugu Jesus kunippaa?

Jesusip aperaa: ’Judas-iaa, kunimmik killuutigivinga?’ Aap, kunik tamatumunnga nalunaaqqutaavoq. Angutit ilagisani Judasip paasitippai tassaasoq Jesus tigusariniagaat. Taava Jesusip akerai palligupput tigusariniarlugu. Peterilli akersuunnertaqanngitsumik Jesus tigusaaqqunngilaa. Pana nassatani amuaa angullu eqqaminiittoq panarlugu. Angutip niaqua panap attoqqajarpaa siutaalu talerpilleq katatsillugu. Angulli siutaagut Jesusip attorpaa ajorunnaarsillugulu.

Jesusip Peter oqarfigaa: ’Panat inaanut mangunniaruk. Isumaqarnerpit ataataga qinnuigisinnaanngikkiga inngilinik tuusintilinnik aallartitsivigeqqullunga annaateqqullunga?’ Aap, taamaaliorsinnaavoq! Jesusilli Guuti qinnuiginngilaa inngilinik aallartitsivigeqqulluni, nalunnginnamiuk akeqqaminit tigusarineqarnissaminut piffissanngortoq. Taava aallarutitiinnarpoq. Taava Jesus qanoq pineqartoq tusariartigu.