Matukkut parnaarsimasukkut

PETER Johannesilu ilivermit Jesusip timaata ilineqarfigisaanit qimagummata Maria kiserngoruppoq. Qissaserpoq iliverlu alakkarlugu, soorlu assilissap kingulliup takutikkaa. Tassani inngilit marluk takulerpai! Aperaat: ’Sooq qiavit?’

Maria akivoq: ’Naalagara aallarussimammassuk, sumut aallarussimagaat nalugakku.’ Tunummut qiviarami angut takulerpaa. Taassuma aperaa: ’Kina ujarpiuk?’

Mariap naatsiivilerisuusoraa, taassumunngalu timaa aallarussimasoralugu. Taamaattumik oqarpoq: ’Illit aallarussimagukku sumut iligit oqarfiginnga.’ Tassaliuna Jesus. Timi Mariap ilisarisinnaanngisaa atorlugu takutippoq. Atermigulli taammani ilisaraa tassaasoq Jesus. Mariap ajoqersukkat arpalluni ornippai oqarlunilu: ’Naalagaq takugakku!’

Ullormi tassani kingusinnerusukkut ajoqersukkat marluk nunaqarfeeqqamut Emmausimik atilimmukartillugit angutip ingerlaqatigilerpai. Ajoqersukkat aliasupput Jesus toqunneqarsimammat. Ingerlatillugilli angutip amerlasuunik Biibilimeersunik tuppallersaatigisaannik oqaluttuuppai. Neriniarlutik unikkamik paasilerpaat Jesusiusoq. Taava Jesus takussaajunnaarpoq, ajoqersukkallu marluk Jerusalemimut utipallapput misigisaminnik apustilit oqaluttuukkiartorlugit.

Taama pisoqartillugu Jesus aamma Peterimut takutippoq. Allat tamanna tusaramikku qiimmattaatigaat. Taava ajoqersukkat marluk Jerusalemimut tikipput apustilillu nanillugit. Jesus aamma imminut aqqutaani takutittoq oqaluttuuppaat. Taakkulu oqaluttuartillugit qanoq pisoqartoq nalunngiliuk? Tupinnarluinnartumik pisoqarpoq.

Assiliaq takuuk. Jesus inimi taakkununnga takutippoq naak matu parnaarsimagaluartoq. Ajoqersukkat nuannaajallaqaat! Ullup pissanganassusia, ilaa? Jesusip manna tikillugu ajoqersukkaminut takutittarneri qassiusut kisissinnaavigit? Takutinneri tallimat taasinnaavigit?

Jesus taakkununnga takutimmat apustili Tomas peqanngilaq. Ajoqersukkat oqarfigaat: ’Naalagaq takugatsigu!’ Tomasili oqarpoq Jesus nammineerluni takuguniuk aatsaat upperilissallugu. Ullut arfineq-pingasut qaangiummata ajoqersukkat inimi parnaarsimasumi katersuuteqqipput, Tomasilu ilagaat. Tassanngaannaq Jesus inimi takussaalerpoq. Taava Tomasip upperilerpaa.