Jesus qilaliartoq

ULLUT ingerlapput, Jesusilu ajoqersukkaminut arlaleriarluni takutittarpoq. Ilaanni ajoqersukkat 500-t missiliorlugit takuaat. Takutikkaangami Jesusip suna eqqartortaraa nalunngiliuk? Guutip naalagaaffia. Jehovap Jesus nunamut aallartippaa allat naalagaaffimmik ajoqersoqqullugit. Jesusilu taamaaliortuarpoq makinnermi kingornagut allaat.

Guutip naalagaaffia sunaasoq eqqaamaviuk? Naalakkersuineruvoq piviusoq, naalakkersuisut qilammiittut Guutimit pisut, Guutillu Jesus kunngissatut toqqarpaa. Aamma ilinniarparput Jesus kunngiulluarumaarnissaminik qanoq takutitsisoq: kaattut nerisittarpai, napparsimasut ajorunnaarsittarlugit toqusullu allaat makitittarlugit.

Taava Jesus qilammi ukiut tuusintillit kunngitut naalakkersuilerpat nunami pissutsit qanoq issasoraagit? Ilumut, nuna tamarmi paratiisinngorumaarpoq alianaatsoq. Sorsunnerit, pinerluttuliornerit, nappaatit toqulu allaat peqarunnaassapput. Tamanna nalunngilarput Guutip nuna pinngortimmagu tamaat paratiisinngoqqullugu inuit pilluarlutik najugassaat. Taamaattumik aallaqqaataani Edenip naatsiivia pinngortippaa. Guutillu piumasaata pinissaa Jesusip isumagiumaarpaa.

Maanna piffissanngorpoq Jesusip qilammut uternissaanut. Ullut 40-t ajoqersukkaminut takutittarpoq. Taamaattumik uummaqqissimanera qularinngilaat. Qimatsinnagillu oqarfigai: ’Jerusalemimi uninngassaasi anersaamik illernartumik tunineqarnissarsi tikillugu.’ Anersaaq illernartoq tassa Guutip pissaanera sulissutiginnittoq, anoritut pissaanerulluni. Ajoqersukkat tamanna iluaqutigissavaat Guutip piumasaanik naammassinninnissaminnut. Naggasiullugu Jesus oqarpoq: ’Nalunaajaassutigissavassinga nunap isuinut allaat.’

Jesus taama oqareermat tupinnartumik pisoqarpoq. Qilaliarniarluni qangattarpoq, soorlu uani takusinnaagit. Erniinnaq nuissanut aanngarmat ajoqersukkat takusinnaajunnaarpaat. Jesus qilaliarpoq, tassannga ajoqersukkaminut nunamiittunut naalakkersuilerluni.