Nâlagauvfik pâratîsimik pilersitsiumârtugssak

nunamĩkatdlarame Jesusip ajoĸersugkane ajoĸersorpai Gûtip nâlagauvfia ĸínutigísagât: „nâlagauvfît tikiutdle; perĸussat ĸilangmisut nunamísaoĸ pile.“ (Matîuse 6:9, 10) oĸalûseriuáinarpâlo ’nâlagauvfingmik îvangkîlio’, tássa tusagagssaĸ nuánersoĸ. (Matîuse 4:23) imáikame: sunitdlũnît avdlanit nâlagauvfik oĸalûserineruvâ. suna pivdlugo? nâlagauvfik Gûtip sákugísagamiuk ajornartorsiutit uvdlumíkut inûnermik erdloĸinartitsissut anigortísavdlugit. nâlagauvfik avĸutigalugo Gûtip sorssungnerit, kângneĸ, nápautit, pinerdlungneritdlo ungasíngitsúkut taimaititíkumârpai, atausiússuserdlo erĸigsinerdlo pilersíkumârdlugit.

silarssuarme taimatut píssusilingme ivdlit inôrusugpit? taimaigpat, tauva atuagâraĸ una atuartariaĸarpat. atuagârĸame uvane ilíniásavat nâlagauvfik táuna nâlagkersuissûssoĸ, nâlagkersuissunitdle inuiangnut nâlagaussarsimassunit pitsauneruvdlune. pâsilísavátaoĸ ĸanoĸ Gûtip písanganartumik kivfane navsuiáukiartuârai nâlagauvfik pivdlugo sujunertarissaminik. ãmátaoĸ ilíniásavat ĸanoĸ nâlagauvfiup uvdlumíkut agdlât ikiorsínaugâtit.

mássame, mãnákorpiaĸ Gûtip nâlagauvfianut ínugtángorsínauvutit. aulajangertínagdle, sule ãma ilíniarĸigtariaĸásavat. taimáitumik kãmagtorpavtigit atuagâraĸ una misigssorĸigsârĸuvdlugo. nâlagauvfik pivdlugo uvane agdlagsimassut tamarmik bîbilimêrsũput.

sujugdlermik, pâsiniariartigo suna píssutigalugo nâlagauvfik taima atorfigssaĸartitsigigigput.

inuiait oĸalugtuarissaunerata pilerĸârnerane, Gûtip inuk píngortípâ nãmagdluínartúngortitdlugo pâratîsimutdlo inigssitdlugo. taimane nâlagauvfik atorfigssaĸartíneĸángilaĸ.

Adamivdle Evavdlo, sujuaissavta sujugdlît, Satan, íngilit ilât pikigtitsissoĸ, nâlagpât. Gûte sagdluliûtigalugo oĸalugtũpai Gûtimutdlo nâlagserîtsúngortitdlugit. taimáitumik toĸussugssángorput, „ajortivme akigssarsiarititâ tássa toĸo“. — Rûmamiut 6:23.

inuk nãmagdluínángitsoĸ, ajortilik, nãmagdluínartunik ĸitorniorsínáungilaĸ. taimáitumik Adamip mêraisa tamarmik nãmagdluínángíssuseĸ, ajorte toĸujartornerdlo inúngûserait. — Rûmamiut 5:12.

taimanernîtdle inuit Gûtip nâlagauvfia atorfigssaĸartilerpât ajortip toĸuvdlo perdlorĸússutauneránit aniguisínáusagunik. ãmátaoĸ Gûtip arĸata Satanip sagdluliâtigut pasigdlerneĸarnerane píngitsûnera nâlagauvfiup ugpernarsarumârpâ.

Jehova Gûte neriorssuivoĸ „kinguâgssaĸ“ ingmíkut ítoĸ inúngorumârtoĸ inuiangnik ajortimit aniguisitsiumârtugssaĸ. (1 Môrsase 3:15) „kinguâgssaĸ“ táuna Gûtip nâlagauvfiane kúngiúsaoĸ.

táuna kináusava?

ukiut 2000-it migssiliordlugit Adamip ajortuliornerata kingornagut, angut ilumôrdluínartoĸ Abrahamimik atilik inûvoĸ. Jehovap Abraham perĸuvâ igdloĸarfingminit autdlarĸuvdlugo Palæstinamilo tupermiorĸuvdlugo.

Jehovap perĸussai tamaisa Abrahamip nãmagsivai, ãmátaoĸ artornartorujugssuaĸ. Jehovap oĸarfigâ ernera Isak tunissivingme pigdliutigerĸuvdlugo.

inûp pigdliutigineĸarnigssâ Jehovap piumángíkaluarpâ. Abrahamivdle ĸanoĸ agtigissumik asagâne Jehovap pâserusugpâ. Abrahamip Isak toĸúnialerâlo Jehovap unigtípâ.

Abrahamip ugperdluarnera píssutigalugo Jehova neriorssuivoĸ Palæstinap nunâ Abrahamip kinguâgssainut túniúkumârdlugo, oĸardlunilo kinguâgssaĸ neriorssûtigissaĸ kinguâgssaisigut erneratalo Isakip kinguâgssaisigut tikiúkumârtoĸ. — 1 Môrsase 22:17, 18; 26:4, 5.

Isak mardlulíssanik ernertârpoĸ, tássa Esau Jakobilo. Jehova oĸarpoĸ kinguâgssaĸ neriorssûtigissaĸ Jakobíkúne tikiúkumârtoĸ. — 1 Môrsase 28:13-15.

Jakob, Jehovap Israelimik atsigâ, arĸaneĸ mardlungnik erneĸarpoĸ, tamarmigdlo ĸitorniorput. taimailivdlutik Abrahamip kinguâve amerdlilerput. — 1 Môrsase 46:8-27.

nuname tássane kângnerssuaĸalermat, Jakob ilaĸutailo Ægyptenimut nûgput, Faraop, Ægyptenime nâlagkersuissup, ĸaerĸussineragut. — 1 Môrsase 45:16-20.

Ægyptenime sarĸúmersíneĸarpoĸ kinguâgssaĸ neriorssûtigissaĸ Jakobip ernerata Judap kinguâvisa ilagísagât. — 1 Môrsase 49:10.

tauva Jakob toĸuvoĸ, kinguâvilo amerdliartorput inuiaĸatigĩngordlutik. tauva ægyptenimiunit ersigineĸalerput inugsiautigineĸalerdlutigdlo. — 2 Môrsase 1:7-14.

kîsa Jehovap Moses, angut ilumôrdluínartoĸ, autdlartípâ Farao taimaníkut nâlagaussoĸ piumavfigerĸuvdlugo Israelíkut kinguâvisa aniguisíneĸarnigssãnik. — 2 Môrsase 6:10, 11.

Farao akuerssiumángilaĸ, taimáitumik Jehovap ægyptenimiut perdlungnik ĸulinik atugaĸartípai. perdluit kingugdliátut toĸup íngilia autdlartípâ ægyptenimiut ernere angajugdliliaussut tamaisa toĸúkiartorĸuvdlugit. — 2 Môrsase, kapitalit 7-imît 12 ilángutdlugo.

Gûtip Israelíkut oĸarfigai savârĸamik únúkorsiutigssamingnik toĸutsigpata auatalo ilâ igdlumik matserfînut tarnutdlugo, tauva toĸup íngiliata táukua igdlue ĸângísagai. taimailivdlutik Israelíkut angajugdliliait ánagput. — 2 Môrsase 12:1-35.

taimáitumik Faraop Israelíkut perĸuvai Ægyptenimit autdlarĸuvdlugit. kingornagutdle isúmane avdlángortípâ malerssordlugitdlo utertíniardlugit.

Jehova aniguivfigssaliorpoĸ Israelíkut Ímákut Augpalârtúkut aniguivfigssãnik. maligkaluardlugitdlo Farao sákutôrpagssuilo ipíput. — 2 Môrsase 15:5-21.

Israelip kinguâve ĸáĸamut puilassuitsumĩtumut Sinajimik taigûtilingmut Jehovap ingerdlatípai. tássane inatsisiminik tunivai oĸardlunilo maleruarpatigik palaseĸatigĩngorumârtut kúngiuvfiussut inuiángordlutigdlo iluartut. taimáitumik Israelíkut periarfigssaĸarput Gûtip nâlagauvfianut pingârtumik ilaujumârnigssamingnik. — 2 Môrsase 19:6; 24:3-8.

ukioĸ atauseĸ migssiliordlugo Sinajip ĸáĸâta erĸânêrêrmata, Jehovap Israelíkut ingerdlatípai Palæstinamut, nunamut sujuaissãnut Abrahamimut neriorssûtigisimassaminut.

Palæstiname kingusingnerussúkut Gûtip Israelíkut kúnginit nâlagkersorneĸartípai. taimáitumik taimane Gûte nuname nâlagauvfeĸarpoĸ.

Israelime kúnge sujugdliup tugdlia tássauvoĸ David, Judap kinguâvisa ilât. Israelip akerai tamaisa Davidip ajugauvfigai, ãmalo Jerusalem nâlagauvfingme igdloĸarfingnut pingârnerssángortitdlugo.

ukiune Davidip nâlagkersuivfîne pisimassut takutípât kúnge Jehovamit igdlersorneĸarângame, nuname nâlagkersuissumit kimitdlũnît ajugauvfigineĸarsínáungitsoĸ.

Jehova oĸarpoĸ kinguâgssaĸ neriorssûtigissaĸ Davidip kinguâvisa ilagísagât. — 1 nalunaerssûtigdlit 17:7, 11, 14.

Davidip ernine Salomon kingorârtigâ. kúngiuvoĸ silatôĸ, táunalo nâlagkersuissûtitdlugo Israel sujuariarpoĸ.

ãmátaoĸ Salomonip Jerusalemime Jehovamut nâlagfik torragdlatamik sanatípâ. Salomon nâlagkersuissûtitdlugo píssutsit Israelime atũtut pivdluarĸússutigssanik Gûtip nâlagauvfiata tikiúkumârtugssap inuiangnut atûtilersíkumâgagssaisa iláinik pâsitípãtigut. — 1 kúngit 4:24, 25.

Salomonivdle kingornagut kúngit ilarpagssue agsut ilumũngitdlat.

Davidivdle kinguâve sule Jerusalemime nâlagkersuissûtitdlugit, Jehovap pruvfîtine Esajas avĸutigalugo sujuligtûtigâ Davidip kinguâgssâ tikiúkumârtoĸ nunarssuarmut tamarmut ilumôrtumik nâlagkersuiumârtugssaĸ. tássaussoĸ kinguâgssaĸ neriorssûtigissaĸ. — Isaia 9:6, 7.

pruvfîtip Esajasip sujuligtûtigâ táussuma nâlagáussusia Salomonip nâlagáussusianit alutornarnerungãsassoĸ. — Isaia, kapitalit 11 ãma 65.

Gûtip kivfaisa sule ãma erĸarsautigât „kinguâgssaĸ“ táuna kináusassoĸ.

kinguâgssavdle tikiutíngíkatdlarnerane, Israelime kúngit ima ajortúngortigingmata ukiume 607-ime u.n.m.a.s. Jehovap akuerâ inuiaĸatigît babylonimiunit ajugauvfigineĸarnerat, inuisalo amerdlanerssait Babylonimut autdlarúneĸarput. Gûtivdle neriorssûtine puiorsimángilâ. kinguâgssaĸ Davidip kinguâvine tikiúkumârpoĸ. — Hisĩkiale 21:30-32.

Israelime pisimassut takutípât inuk kúngiussoĸ silatûvdlunilo ilumôrtoĸ iluaĸutaussunik atûtilersitsisínaugaluartoĸ, kisiánile iluaĸutaussut kigdleĸartartut. inuit ilumôrtut toĸussarput kingorârtaitdlo ímaĸa ilumôrtaríngitdlat. suna ârĸĩssutigssauva? „kinguâgssaĸ“ neriorssûtigissaĸ.

kîsame, ukiut tûsintigdlit ĸângiungmata, „kinguâgssaĸ“ sarĸúmerpoĸ. kinauva?

íngilip Gûtimêrsup tamána Israelíkut arnartaisa ilãnut uveĸángitsumut Mariamik atilingmut nalunarungnaersípâ. oĸarfigâ ernertârumârtoĸ Jesusimik ateĸartugssamik. âjuko íngilip oĸausê:

„táuna angísavoĸ, ĸutsingneruvsârtuvdlo erneranik taineĸásavoĸ; Gûtivdlo [Jehovap] tuniumârpâ sujuaissâta Dâvip igsiavíssârssuanik; . . . kúngiúsavoĸ.“ — Lúkarse 1:32, 33.

tássame, Jesus kinguâgssauvoĸ neriorssûtigissaĸ kîsalo Gûtip nâlagauvfiane kúngiúsavdlune. sunale píssutigalugo Jesus inungnit ilumôrtunit sujuliminit avdlauva?

Jesus tupingnartuliákut inúngorpoĸ. arnâ angúmit agtorneĸarsimángilaĸ, Jesusilo inugtut atâtaĸángilaĸ. Jesus sujornatigut ĸilangmĩsimavoĸ, Gûtivdlo anersâvata ivdlernartup, tássa píssaunerata sulíssutigingnigtup, Jesusip inũssutâ ĸilangmíngãnît Mariap igdliânut nûgtípâ. taimaingmat Adamimit ajortisiaĸángilaĸ. inûnermigut tamatigut Jesus ajortuliúngilaĸ. — 1 Pîtruse 2:22.

30-nik ukioĸardlune Jesus kuisípoĸ.

inuit Gûtip nâlagauvfianik oĸalugtũtarpai kîsalo nâlagauvfingme tássane kúngitut ilisarititdlune. — Matîuse 4:23; 21:4-11.

ãmátaoĸ tupingnartuliortarpoĸ.

náparsimassut ajorungnaersítarpai. — Matîuse 9:35.

kâgtut tupingnartuliordlune nerisípai. — Matîuse 14:14-22.

agdlâtdlo toĸussunik makititsivoĸ. — Juánase 11:38-44.

Gûtip nâlagauvfiane kúngiugune Jesusip inuiait ĸanoĸ iliorfigiumârai tupingnartuliat táukua takutípât.

erĸaimaviuk ĸanoĸ ilivdlune kúnge Davidip Jerusalem nâlagauvfingmine igdloĸarfingnut pingârnerssángortíkâ? Jesus navsuiaivoĸ Gûtip nâlagauvfia nunamĩsángitsoĸ, ĸilangmĩsassordle. (Juánase 18:36) tamána píssutigalugo nâlagauvfik taineĸarpoĸ „Jerusalât ĸilangmĩtoĸ“. — Eprîarit 12:22, 28.

inatsisit nâlagauvfingmut ínugtaussut nâlagtariaĸagait Jesusip pingârnersiorpai. inatsisit táuko bîbilimĩput. inatsisit pingârnerssarait inuit Gûte inoĸatitigdlo asásagait. — Matîuse 22:37-39.

Jesusip sarĸúmersípãtaoĸ nâlagauvfingme nâlagkersuinermine kisimĩsanane. inuit akornánit ĸinigaĸarumârporôĸ ĸilaliartugssanik ilagalune nâlagkersuissugssanik. (Lúkarse 12:32; Juánase 14:3) ĸavsiúsápat? sarĸúmersitat 14:1-ime akíssut imáipoĸ: 144.000-it.

144.000-ĩnait ĸilaliásagpata Jesus ilagalugo nâlagkersuísavdlutik, inuiait avdlat sumik neriugissaĸarpat?

bîbilime agdlagsimavoĸ: „iluartut nuna kingornússarísavât, nâgssáungitsumigdlo nunagísavât.“ — tugsiaut 37:29.

nuname nâgssáungitsumik inûjumârtugssat taineĸarput ’savat avdlat’. — Juánase 10:16.

mardlungnik neriûtigssaĸarpoĸ. 144.000-it Jehova Gûtimit ĸilangmut ĸaerĸussáuput Jesus Kristus ilagalugo nâlagkersuinigssamingnut. inuitdlo avdlat milliûniligparujugssuit ĸularnaitsumik neriugissaĸarput nuname nâgssáungitsumik inûnigssamik nâlagauvfianut ínugtauvdlutik. — sarĸúmersitat 5:10.

Satanip Jesus ûmigâ agssortordlugulo. Jesus ukiut sisamagssât ĸiterĸutdlugo oĸalũssissarêrmat, Satanip tigussaritípâ nápagkamutdlo kikiagtugauníkut toĸutitdlugo. suna pivdlugo Gûtip tamána akuerâ?

erĸaimásavat, Adam sujuaissarigavtigo, tamavta ajortiliuvugut toĸussugssauvdlutalo. — Rûmamiut 6:23.

erĸaimásavátaoĸ tupingnartumik inúngornine píssutigalugo Jesus nãmagdluínartûssoĸ ajortiliunane toĸussugssaunanilo. Satanivdle Jesus toĸutíkâ ’kingmianik aserorterineragut’ Gûtip akuerâ. Gûtivdle ũmartípâ anersãngorterĸigdlugulo toĸusuitsoĸ. inugtut nãmagdluínartutut inûssugssáussutse sule pigigamiuk, tamána atorsínaulerpâ uvagut inuit ajortimit utertísavdluta. — 1 Môrsase 3:15; Rûmamiut 5:12, 21; Matîuse 20:28.

Jesusip pigdliutâta pingârtortânik pâsititdluarniardluta, bîbilime íssuagagssatigut sujuligtûtaussutigut erĸartorneĸartarpoĸ.

sôrdlo imáitoĸ: erĸaimaviuk ĸanoĸ Jehovap Abraham perĸugâ ernera pigdliutigerĸuvdlugo, ĸanoĸ asatiginerâne pâsiniardlugo misilingneĸarnigssânut?

tássauvoĸ Jesusip pigdliutigineĸarnigssânut íssuagagssaĸ sujuligtûtaussoĸ. erssersípâ Jehovap inuiangnik asangningnera ima angitigingmat ernine, Jesus, uvagut pivdluta toĸutíkâ inûtísínauvdluta. — Juánase 3:16.

erĸaimaviuk ĸanoĸ Jehovap Israelíkut Ægyptenimit aniguisíkai angajugdliliaitdlo ánagtíkai toĸup íngilianut táuko ĸângerterĸuneragut? — 2 Môrsase 12:12, 13.

tássauvoĸ íssuagagssaĸ sujuligtûtaussoĸ. sôrdlo savârĸap aua Israelíkut angajugdliliaisa inũssutigigât, taimatútaoĸ Jesusip aua kuissoĸ ugperfigissaisa inũssutigísavât. ãmátaoĸ sôrdlo únungme tássane pisimassut Israelíkut aniguíssutigigait, taimatútaoĸ Jesusip toĸua inuiait ajortimit toĸumitdlo aniguíssutigât.

tamána pivdlugo Jesus taigorneĸarpoĸ „Gûtip savârâ silamiut ajortáinik pêrsitsissoĸ“. — Juánase 1:29, NW.

nunamĩkatdlaramile Jesus ajoĸersugkanik katerssortitsivoĸ sungiusardlugitdlo nâlagauvfingmik tusagagssamik nuánersumik oĸalũssíssutigingningnigssãnut, agdlât toĸorêrnerme kingorna. — Matîuse 10:5; Lúkarse 10:1.

tássáuput inuit Gûtip ĸinerĸâgai Jesus ilagalugo nâlagauvfingmine nâlagkersuiumârtugssat. — Lúkarse 12:32.

erĸaimaviuk Gûtip jûtit neriorssorai inatsisit maleruaruníkik ’palaseĸatigĩngorumârtut kúngiuvfiussut’? mãna periarfigssaĸalerput Gûtip nâlagauvfianut ilaujumârnigssamingnik ĸilangmilo palasitut kivfartûteĸarnigssamingnik Jesus ilagsigaluaruníko. amerdlanerssaisale Jesus itigartípât.

taimáitumik taimanernîtdle jûtit inuiaĸatigîgtut Gûtip ĸinigariungnaerpai; Palæstina nunatut neriorssûtigissatut issigineĸarungnaerpoĸ. — Matîuse 21:43; 23:37, 38.

Jesusip nalâníngãnît nalivta tungânut, Jehovap inuit Jesus ilagalugo ĸilangme nâlagaujumârtugssat katerssoriartorpai. ilait tûsintiligpâluit sule nunamĩput. táukulo taissarpavut sivnerútut tanitaussut. — sarĸúmersitat 12:17.

Gûtip nâlagauvfiata sũssusia pâsineĸalerpoĸ. ĸilangme nâlagkersuissûvoĸ, kúngia tássauvoĸ Jesus Kristus, táussumalo ilagiumârpai 144.000-it nunamêrsut. inuit ilumôrtut nunamĩtut nâlagauvfigiumârpai pigínauneĸásavdlunilo erĸigsineĸ nuname atulersísínáusavdlugo.

toĸunerme kingornagut Jesus makípoĸ ĸilaliardlunilo. tássanĩpoĸ Gûtip oĸarnigssâ, pivfigssángortoĸ Gûtip nâlagauvfianut kúngitut nâlagaulernigssamut, utarĸivdlugo. (tugsiaut 110:1) ĸaĸugume-tauva?

ilâtigut Jehovap inuit singnagtugkanik singnagtortítarpai nâlagauvfine pivdlugo ilisimatíkumavdlugit.

Danielip nalâne Jehovap Nebukadnezar, Babylonip kúngia, taima ítumik singnagtortípâ. orpigssuaĸ pineĸarpoĸ. — Dâniale 4:10-37.

orpik kipineĸarpoĸ, kanârtâlo ukiut arfineĸ mardluk ĸilerssorneĸardlune.

orpik Nebukadnezarimut ássersûtauvoĸ. sôrdlo orpiup kanârtâ ukiut arfineĸ mardluk ĸilerssorneĸartoĸ, Nebukadnezar ukiut arfineĸ mardluk silángajârpoĸ. tauva silamigut ajorungnaerpoĸ.

pisimassut tamáko tamarmik íssuagagssáuput sujuligtûtaussut. Nebukadnezar ássersûtauvoĸ Jehovap silarssuarmut tamarmut nâlagáussusianut. tamána Jerusalemime kúnge Davidip kinguâvisigut erssersíneĸarĸârpoĸ. ukiume 607-ime u.n.m.a.s. Babylonip Jerusalem ajugauvfigingmago, kúngit táukua kinguârîngnerat kipititaugatdlarput. Davidip kinguârîgsaine kúngeĸarĸísángilaĸ „kisiáne pigingnigtugssaĸ tikiugpat“. (Hisĩkiale 21:32) tássauvoĸ Jesus Kristus.

607-imîtdle u.n.m.a.s. Jesusip nâlagaulernigssâta tungânut ĸanoĸ sivisutigísava? ukiut sujuligtûtaussut arfineĸ mardluk. tássáuput ukiut 2520-t. (sarĸúmersitat 12:6, 14) ukiordlo 607-imíngãnît u.n.m.a.s. sujumut ukiut 2520-t kisitsigáine 1914-imut u.n.m.a.n. tikísaugut.

tássa 1914-ime Jesus ĸilangme nâlagkersuilerpoĸ. tamatuma suna kingunerâ?

suna pisimassoĸ takordlûgkerssârutíkut Johannesip takussâgut bîbilime oĸalugtuarineĸarpoĸ.

takuvâ arnaĸ ĸilangmĩtoĸ ernertârtoĸ. — sarĸúmersitat 12:1-12.

arnaĸ táuna ássersûtauvoĸ Gûtip ĸilangme peĸatigîgfianut, Gûtip kivfai íngiliussut ĸilangmĩtut tamaisa atautsimut katitdlugit. ernera Gûtip nâlagauvfianut ássersûtauvoĸ. táuna 1914-ime erniuvoĸ.

tauva? kúngíngorame Jesusip sujugdlermik Satan íngilitdlo pikigtitseĸatigissai ĸilangmit nunamut igípai. — sarĸúmersitat 12:9.

inernera bîbilime oĸalugtuarineĸarpoĸ: „ĸilait táukunanilo ineĸartuse ukorsê, tipaitsugitse. erĸanaĸ nuna imardlo, Diâvulo ilivsínut arĸarmat kamagtorssûvdlune, pivfigssakíssutse nalúngínamiuk.“ — sarĸúmersitat 12:12.

tauva Jesusip ĸilangme nâlagaulerneragut, akerai nuname ulapingâlerput. sôrdlo bîbilime sujuligtûtigineĸartoĸ, ĸíngarssortimine nâlagaulerpoĸ. — tugsiaut 110:1, 2.

tamána inuiangnut sumik kinguneĸásava?

Jesusip oĸalugtũpâtigut: sorssungnerit, nerissagssaileĸinerit, nápautit, nunavdlo sajugtarnere. — Matîuse 24:7, 8; Lúkarse 21:10, 11.

tamákua 1914-imîtdle nagdliútarnerat uvagut takussarpavut, ãmátaoĸ tamána píssutigalugo nalúngilarput nâlagauvfik taimane aĸutsilersoĸ.

ãmátaoĸ „inuiaĸatigît ĸugsalavdlutigdlo ernumangãsáput . . . inuit ersinermit tumángug“dlutik. (Lúkarse 21:25, 26) tamánátaoĸ 1914-imîtdle takuvarput.

nangitdlune apustile Paulus oĸarpoĸ „inuit inûjumârmata ingmingnik asassut, aningausseritût, . . . angajorĸâmingnut nâlángitsut, . . . sáimajuitsut, mamardlîssut, [ingmingnut nâlagkersorsínáungitsut]“. — 2 Timûtiuse 3:1-5.

tamáko nalúngíkáine nalunángilaĸ suna píssutigalugo uvdlumíkut inûneĸ taima erdloĸinartigissoĸ. Satan ulapeĸaoĸ. ãmátaordle Gûtip nâlagauvfia suliaĸalerêrsimavoĸ.

Jesus ilagalugo ĸilangme nâlagaunigssamik neriugissaĸartut sivnerisa nâlagauvfiup pilersíneĸarsimaneranik tusagagssaĸ nuánersoĸ 1914-ip kingunitsiánguagut oĸalûserilerpât. tamána nunarssuarme tamarme oĸalũssíssutigineĸarêrpoĸ, sôrdlo Jesus oĸartoĸ taimáisassoĸ. — Matîuse 24:14.

oĸalũssissarnerup tamatuma suna sujunertarâ?

sujugdlermik sujunertarâ inuit Gûtip nâlagauvfianik nalujungnaersíneĸarnigssât.

áipagssânik sujunertarâ inuit ikiorniardlugit aulajangernigssãnut nâlagauvfingmut ínugtaujumanerdlutik.

Jesus oĸarpoĸ uvagut uvdluvtíne inuit tamarmik avigsârtíneĸásassut, savatut ítut savaussatutdlo ítut ingmíkôrtitdlugit. — Matîuse 25:31-46, NW.

„savat“ tássáusáput Jesusimik ĸatángutainigdlo asangnigtut. „savaussat“ tássáusáput asangníngitsut.

„savat“ inûneĸ nâgssáungitsoĸ piumârpât, „savaussat“dle písángilât.

avigsârtitsineĸ tamána nâlagauvfik pivdlugo tusagagssamik nuánersumik oĸalũssíssutigingningníkut nãmagsineĸariartorpoĸ.

âjuna sujuligtût pruvfîtip Esajasip oĸalûtigissâ.

„piumârpoĸ uvdlugssane kingugdlerne, tauva [Jehovap] igdluata ĸáĸâ aulajangersitáusavoĸ ĸáĸasingnerssauvdlune, ĸáĸánguanit ĸutsingneruvdlune, akimángitsutdlo [tássa: inuiaĸatigît] tamarmik tássunga ĸerdlerautilerumârput.“ — Isaia 2:2.

inuiait mãna „uvdlugssane kingugdlerne“ inũput.

Jehovap „igdlua“, tássa patdlorfigineĸarnera, erĸúngitsumik ugperissarsiornernit ĸutsingneruvoĸ.

„aggerumârputdlo inuiaĸatigît amerdlasût oĸardlutik: ĸâ, majuarta [Jehovap] ĸáĸânut, Jãkup Gûtiata igdluanut, avĸutigerĸussaminik ajoĸersorĸuvdluta, avĸusernisigutdlo ingerdlarĸuvdluta.“ — Isaia 2:3.

tássa, inugpagssuit inuiaĸatigîngnit tamanêrsut aggerput Jehova patdlorfigiartordlugo inoĸatitigdlo ilaorĸuvdlugit. Jehovap piumassâ nâpertordlugo ĸanoĸ iliûseĸásavdlutik ilíniarput.

„tauva panatik káukumârpait ivssumut sîtsisíngordlugit, ĸalugiussatigdlo ivigkanut kivdlûtigssángordlugit; panamik silugfigeĸatigĩsángitdlat inuiait, sorssungnermigdlo ilíniásángitdlat kingorna.“ — Isaia 2:4.

Jehovamik patdlorfigingnigtut atausiússuseĸardlutigdlo ĸanilârtũput.

Gûtip nâlagauvfiata sulinerata tamatuma kingunerâ mãna nunarssuarme tamarme inuit 3 milliûnit patdligdlugit nâlagauvfingmut ínugtángorêrsimanerat.

avatangerpait sivnerútut, tássa Kristus ilagalugo ĸilangme nâlagkersuinigssamik neriugissaĸartut sivnere.

Gûtip peĸatigîgfiatigut anersãkut inũssutigssarsissarput. — Matîuse 24:45-47.

ĸatángutigîgtut peĸatigîúput kristumiûssut nunanit tamalânêrsut asaĸatigîgdluínartut. — Juánase 13:35.

isúmamíkut erĸigsisimârput, sujunigssamut neriugissaĸardlutik. — Filípimiut 4:7.

ungasíngitsúkut tusagagssaĸ nuánersoĸ nãmagtumik oĸalũssíssutigineĸarsimásaoĸ. „savat“ katerssorneĸarsimásáput. tauva nâlagauvfik ĸanoĸ iliúsava?

erĸaimaviuk kúngip ilumôrtup Davidip artorssartíkai Gûtip ínugtaisa akerait tamaisa? kúnge Jesus ãma taimailiorumârpoĸ.

ĸanga kúnge Nebukadnezarip singnagtorâ inûssaliarssuaĸ taimanernîtdle uvagut uvdluvta tungânut nâlagauvfigssuarnut silarssuarme píssauneĸangârtunut tamanut ássersûtaussoĸ.

tauva takuvâ ujarak ĸáĸamit ũkartoĸ, táussumalo inûssaliarssuaĸ seĸumisípâ. ujarak Gûtip nâlagauvfianut ássersûtauvoĸ.

taimailivdlugo píssutsit ârĸigssũssaunerat ajortoĸ mãnákut atũtoĸ sûjungnaersíneĸarumârpoĸ. — Dâniale 2:44.

ukũput nâlagauvfiup úpititagssaisa ilait.

erĸúngitsumik ugperissarsiornerit piunêrutísáput, sôrdlo aserorteriviup ujarâ ímamut igíneĸartoĸ. — sarĸúmersitat 18:21.

tamána píssutigalugo Gûtimik asangnigtut tamarmik kajumigsârneĸarput MÃNÁKUT erĸúngitsumik ugperissarsiornermit anerĸuvdlutik. — sarĸúmersitat 18:4.

tauva kúngip Jesusip „inuiaĸatigît panásagai; pârísavailo saviussumik ilitsersûteĸardlune“. — sarĸúmersitat 19:15.

taimáisangmat, Jehovap nalunaiaissue, nauk akilerârtaraluardlutik inatsisinutdlo nâlagtaraluardlutik, politikilerinermut akuliúneĸ ajorput.

kîsalo Satan nangmineĸ, ’pulateriârssugssuaĸ’ itinerssuarmut igíneĸásaoĸ. — sarĸúmersitat 20:2, 3.

„savat“, tássa Jesusimut kúngiussumut nâlagtut, kisimik angnikitdliornartugssame tamatumane aniguiumârput. — Matîuse 25:31-34, 41, 46.

apustile Johannes takordlûgkerssârpoĸ „savat“ angnikitdliornartugssame amiákûvdlutik inûssut pivdlugit.

„takungnigkama, ata, amerdlangârtut kisíneĸarsínáungitsut, inuiaĸatigît ingmíkutdlo nagguveĸatigîgsut ingmíkutdlo inuiaussut ingmíkutdlo oĸausigdlit tamarmik ilait, igsiavíssârssûp sâne savârĸavdlo sâne ĸeĸartut, takisûnik ĸaĸortunik atissaĸartut, palmitdlo avaleĸutáinik tigumiaĸartut.“ — sarĸúmersitat 7:9.

„amerdlangârtut“ tássáuput tusagagssamik nuánersumik oĸalũssíssutigingningnermik ilagsingnigtut tamarmik.

„angnikitdliornartumit angisûmit“ aniguiumârput. — sarĸúmersitat 7:14.

’palmit avaleĸutáinik tigumiaĸar’nermíkut takutípât Jesus kúngigiumavdlugo ilagsigigtik.

„takisûnik ĸaĸortunik atissaĸar“nermíkut takutípât Jesusip pigdliutâ ugperfigigigtik.

„savâraĸ“ tássauvoĸ Jesus Kristus.

tauva pivdluarĸússutigssat sût písavait? erĸaimaviuk Israelime inuit ĸanoĸ pivdluartigissut kúnge ilumôrtoĸ Salomon kúngiutitdlugo? tamatuma takutitsiarpâ pivdluarnássusigssaĸ nunarssuarme Jesusip kúngiuvfigssâne.

inuiait akornáne piviussumik erĸigsineĸásaoĸ, ãmátaoĸ inuit ûmassutdlo akornáne, sôrdlo Esajasip sujuligtûtigigâ. — tugsiaut 46:10; Isaia 11:6-9.

sôrdlo Jesus nunamĩkatdlarame náparsimassunik ajorungnaersitsissartoĸ, taimatut nápautit tamaisa inuiangnit pêrsíkumârpai. — Isaia 33:24.

sôrdlo inugpagssuit nerisítarai, taimatut inuit akornáne nerissagssaileĸinerit atũkungnaersíkumârpai. — tugsiaut 72:16.

sôrdlo toĸussunik makititsissoĸ, taimatut toĸungasimassut Gûtip nâlagauvfianut ínugtaunigssamut periarfigssaĸardluarsimángíkaluartut makitíkumârpai. — Juánase 5:28, 29.

nãmagdluínássuseĸ Adamip ánaissâ inuiangnut atûtilerserĸigkiartuârumârpâ.

ila, sujunigssap nuáníssusigssâ! ivdlit misigerusugpiuk? tássanĩkusugkuvit iliûseĸarit Gûtip nâlagauvfianut mãnákut nâlagtigitíniardlutit „sava“nutdlo ilauniardlutit.

bîbile atuarĸigsârtaruk Jehovalo Jesusilo Kristus ilisaralugit. — Juánase 17:3.

inuit avdlat nâlagauvfingmut ínugtaussut nâpeĸatigissákit. — Eprîarit 10:25.

nâlagauvfiup inatsisai ilíniákit nâlagdlugitdlo. — Isaia 2:3, 4.

inûnerit Jehovamut túniutdluínaruk táuna kivfartũkumavdlugo, tauvalo kuisitdlutit. — Matîuse 28:19, 20.

ajortut, sôrdlo tigdlingneĸ, sagdluneĸ, kángunartuliorneĸ, aulakôrnerdlo, Jehova Gûtip iluaríngisai, ingalangniákit. — 1 Korintumiut 6:9-11.

nâlagauvfik pivdlugo tusagagssamik nuánersumik oĸalũssíssutigingneĸataugit. — Matîuse 24:14.

tauva Gûtip ikiuineratigut takujumârpat pâratîse Adamip kinguâminut ánaissâ pilerserĸingneĸartoĸ, neriorssûtivdlo matuma erĸûtitaunigssâ takujumârdlugo: „nipilo angingârtoĸ tusarpara ĸilangmit oĸartoĸ: takúsagigse Gûtip ineĸarfia inungnĩtoĸ, táukunanilo ineĸarumârpoĸ ínugtariumârdlugitdlo Gûtivdlo nangmineĸ najorumârpai; ĸuvdlîtdlo tamaisa issáinit atdlarterumârpai, toĸulo peĸarungnáisavoĸ, aliasugtoĸarungnaerdlunilo nivdliassoĸarungnaerdlunilo ániartoĸarungnáisavoĸ, sujugdlît pêrmata.“ — sarĸúmersitat 21:3, 4.

[Qupp. 20-mi nalunaarsugaq]

(Allassimasut qanoq inissisimanersut naqitami takuneqarsinnaavoq)

607 u.n.m.a.s. 1914 u.n.m.a.n.

u.n.m.a.s. | u.n.m.a.n.

500 1000 1500 2000 2520

[Qupp. 11-mi assiliartat]

Abraham

Isak

Jakob

Juda

David

[Qupp. 14-mi assiliartaq]

144.000-it

[Qupp. 16-mi assiliartat]

Adam

Jesus