Jehovap innuttani sulinissaannut katersorai piginnaas­suseqar­tillugillu

UKIUT hundredil­lit ingerlaneran­ni tunus­sinersuaq nunami tamarmi siuariar­tor­poq. Im­mik­kut up­peqatigiit as­sigiin­ngitsor­pas­suit ilaatigut ajoqersuuteqar­put Bibelimeersunik, amerlaner­tigul­li kinguaariin­ni ajoqersuutigineqar­tuar­tut inuit ajoqersuutigisaat ileq­qul­lu guutipilus­sior­tunit aal­laaveqar­tut maleruarlugit. Kristusip tikiuteq­qin­nis­saanut ilimasun­neq eq­qarsaatigineqar­pian­ngilaq. — Naleq­qiuguk Matîuse 13:24-30, 37-43.

Jesusili oqarsimavoq eq­qumasariaqar­tut tikiuteq­qif­fis­saa ilimageq­qul­lugu! Taamaalior­tut ilaat USA-mi, Pennsylvaniami Al­leghenymiip­put. 1870-ikkut aal­lar­tiler­neran­ni Charles Taze Russellip ikin­ngutimi ilaat ilagalugit Kristusip tikiuteq­qif­fis­saa paasiniarlugu up­peqatigiit im­mik­kut up­perisaat tun­ngaviginagit Bibeli peq­qis­saarluin­nar­tumik atuaq­qis­saar­nialer­paa. Aam­mat­taaq ajoqersuutit tun­ngaviunerusut amerlasuut al­lat Bibelimi qanor­piaq nas­suiar­neqar­nerat paasiniarlugu sal­lusuis­sut ujaler­paat. Jehovap Nalunaajaasuisa ul­lumik­kut suliaasa taman­na aal­laq­qaatigaat. — Matîuse 24:42.

Atuaq­qis­saaqatigiit taak­kua paasiler­paat ajoqersuut Guuti ataasiul­lunilu pingasuusoq Bibelimit tun­ngaveqan­ngitsoq, kisian­nili Jehova kisimi Guutiusoq ajugaqan­ngitsoq Pin­ngor­titsisuul­lunilu, Jesus Kristus pin­ngor­titaasa siul­lersarigaat er­nituarigaalu, anersaarlu iluar­toq kinaas­susiliun­ngitsoq, tas­saasorli Guutip pis­saanera sulis­sutigin­nit­toq takus­saan­ngitsoq. Bibelimik atuaq­qis­saar­nermik­kut paasiler­paat tar­neq toqusuitsuun­ngitsoq toqusin­naasorli, toqusunut neriuutigisaq tas­saasoq makin­nis­saq, ajor­tul­lu iluarsivis­saqan­ngitsut naas­saan­ngitsumik an­niar­titaaneq pin­nagu kisian­ni naas­saan­ngitsumik suujun­naarsitaanis­saq pil­lar­neqaatigis­sagaat.

Paasiler­paat Bibelimi ajoqersuutigineqar­tut tun­ngaviusumik ilagigaat Jesusip inuunini tun­nius­simagaa inuit uter­tin­neqaatis­saan­nik. Siul­lermik angutit ar­nal­lu 144.000-it, ukiut hundredil­lit siul­liit nalaan­nin­ngaan­niil­li uagut nalit­ta tungaanut qinigaasut, nunamit im­mik­koor­til­lugit pisiarineqar­tus­saap­put Naalagaaf­fim­milu qilam­miit­tumi Kristus kingor­nus­seqatigalugu. Tul­liul­lugit inuit arlalin­nik mil­liardil­lit, amerlanersaat makik­kumaar­tus­sat, Jesusip pil­liutaa iluaqutigalugu inut­tut naam­mal­luin­nar­tun­ngorumaar­put Naalagaaf­fiul­lu taas­suma aqutsinerata ataani nunami inuunermik naas­saan­ngitsumik neriugisaqalerlutik.

Russellip ikin­ngutaasalu paasiler­paat Kristus takus­saanani, tas­sa anersaak­kut, tikiuteq­qik­kumaar­toq imaluun­niit najuuk­kumaar­toq. Guutimik nalusut ul­lus­saat, tas­sa ukiut naalak­kersuisut nunamiit­tut kik­kul­luun­niit aq­qutiginagit Guutip kisimi oqar­tus­saal­luni naalagaaf­fii, 1914-imi naasus­saap­put. Taman­na piler­pat, taava Guutip naalagaaf­fia qilam­mi pilersin­neqarumaar­poq. Jehovap Nalunaajaasuisa ajoqersuutit tamak­ku ilisar­naatigaat.

Russellip suleqataasalu ajoqersuutit ilumoor­tut tamak­ku oqalugiar­nik­kut naqitik­katigul­lu an­ner­tuumik tusarliup­paat. 1879-imi julip qaam­mataani Rus­sel­lip atuagas­siaq Zion’s Watch Tower (tassa Napassuliak Alapernaerssuivfik) naqiter­tit­taler­paa. Aalajanger­poq Bibelimik Atuaq­qis­saar­tut nalunaajaanerat kajumin­nermit tunis­sutitigut taamaal­laat ingerlan­neqas­sasoq aningaasanil­lu katersuisitsineqar­neq ajus­sasoq. Kis­saatigaa tusarlius­sap up­per­tut kajumin­nermin­nit akis­sarsiaqaratil­lu sulinerisigut tamanut oqaluuserineqar­nis­saa. Russellip nam­mineq aningaasat tamatuma tungaanut niuer­niar­nermigut iser­titani tunis­sutigai.

Bibelimik Atuaq­qis­saar­tut peqatigiik­kuutaarlutik ataatsimiit­tar­put, taamani ilagiis­saat peqatigiin­nik taaneqarmata. Sapaatip akun­neranut im­maqa pingasoriarlutik ataatsimiit­tar­put, ataatsimiin­ner­nilu oqalugiar­toqar­tar­poq, Bibelimik atuaq­qis­saaqatigiit­tar­put nalunaajaaqatigiit­tarlutil­lu. Taasinik­kut angutit un­neq­qaris­sut utoq­qaaner­tatut toq­qar­tar­paat peqatigiit anersaak­kut sulinis­saat nak­kutigeq­qul­lugu.

1884-imi Zion’s Watch Tower Tract Society naalagaaf­fiup Pennsylvaniap inatsisai naaper­torlugit peqatigiif­fit­tut tamanut iluaqutaasutut al­las­simaf­fis­saminut nalunaarsor­neqar­poq. Peqatigiif­fiup præsidentia ukiut tamaasa qiner­neqar­tar­tus­saavoq. Tamatumuuna inatsisit naaper­torlugit sak­koqaler­put, inum­mut ataasiin­narmut atan­ngitsumik, Bibeli tun­ngavigalugu ilin­niar­titsinis­samik ingerlatitsisin­naasumik. Charles T. Russell præsidentis­satut qinigaavoq, taas­sumalu al­laf­fia Peqatigiif­fiup qul­lersaqarfiatut isigineqar­poq.

Sulinerup nunani al­lani aal­lar­tin­neqar­niar­nis­saa tamaviaarutigingaar­paat. 1880-ikkut aal­lar­tiler­neran­ni Canadamut Englandimul­lu an­ngup­poq. 1891-imi Russell Europami Kangianilu Qiterlermi angalaar­poq sal­lusuis­sutip tas­sani siaruar­neqar­niar­nis­saanut qanoq iliuuseqar­toqar­tuarsin­naanersoq paasiniarlugu. 1900-kkut aal­lar­tiler­neran­ni Peqatigiif­fiup im­mik­koor­tor­taqarfii Englandimi, Tysklandimi Australiamilu pilersin­neqar­put.

1909-mi Vagttårnip peqatigiif­fiata qul­lersaqarfia New Yorkimi Brooklynimut nuun­neqar­poq, oqaluus­sinermik sulias­sap silarsuarmi tamarmi pitsaanerusumik siuarsar­neqar­nis­saa siuner­taralugu. Taava peqatigiif­fik Peqatigiif­fim­mut aal­lar­niisuusumut suleqataasoq naalagaaf­fiup New Yorkip inatsisai naaper­torlugit pilersin­neqar­tariaqaler­poq; taas­suma maan­na taaguutigaa Watchtower Bible and Tract Society of New York, Inc. 1914-imi International Bible Students Association Londonimi peqatigiin­ngor­tin­neqar­poq Bibelimik Atuaq­qis­saar­tut sulinerata nunani tuluit pigisaan­ni siuarsar­neqar­nis­saa siuner­taralugu. Silarsuarmi tamarmi peqatigiif­fiit taamaat­tut Vagttårnip peqatigiif­fiata sulineranik nunani as­sigiin­ngitsuni ingerlatitsisut maan­na 70-it mis­silior­paat. Tamarmik tamanut iluaqutaap­put, kajumin­nermit tunis­sutitigut suleqataasul­lu akis­sarsiaqan­ngitsumik sulineratigut tapersersugaal­lutik.

1916-imi Charles Taze Russell toquvoq, taavalu Joseph Franklin Rutherfordip Vagttårnip peqatigiif­fiata præsidentiatut kingoraar­paa. Sorsun­nersuup siul­liup naaler­nerani Bibelimik Atuaq­qis­saar­tut malersugaanermik­kut sak­kor­tuumik misilin­neqar­put, sak­kor­tuserut­tor­tumil­lu qatan­ngutit angutit arfineq-pingasut Peqatigiif­fiup qul­lersaqarfiani Amerikamiit­tumi akisus­saas­suseqangaar­tumik kif­far­tuutil­lit kuk­kusumik par­naarus­saam­mata. Bibelimik Atuaq­qis­saar­tut suliuar­nis­saat aarleq­qutiginar­tutut ip­poq. Kisian­nili 1919-imi qatan­ngutit taak­ku iperar­neqar­put pin­ngitsuutitaal­lutil­lu, oqaluus­sinermil­lu sulineq an­ner­tuumik siuarsar­neqaler­poq.

Peqatigiif­fiup qul­lersaqarfiatigut kristumiut Bibelimik Atuaq­qis­saar­tut tanitaasut katitigaasut pif­fis­saq eq­qor­toq nal­liut­taraangat anersaak­kut inuus­sutis­sanik pis­saqar­titsiuar­put inuit ataasiak­kaat Kat­tuf­fis­suarmut at­taveqar­tut tamarmik pis­saan­nik. Soorlu kristumiut tanitaasut ilagiis­saat ukiuni 100-linni siul­ler­ni katitigaal­lutik tas­saasut ’inus­siaq ilumoorlunilu silatooq’ Jesusip eq­qar­tugaa, taamatut­taaq Bibelimik Atuaq­qis­saar­tut tun­niul­luin­nar­tut Naalagaaf­fim­mik oqaluus­sis­sutigin­nit­tar­tut tas­saasut ’inus­siaq ilumoorlunilu silatooq’ katitigaq ul­lumik­kut it­toq. Ilagiit misis­soriar­torlugit tikiuk­kami Jesusip katitik­kat taak­ku naapip­pai inuus­sutis­sanik pis­saqar­titsisut il­lumi kif­faasut pis­saan­nik; taava pigisaminut tamanut paarsisun­ngor­tip­paa. — Matîuse 24:45-47, NW; Lúkarse 12:42.

Sorsun­nersuup siul­liup kingunitsian­nguagut erseq­qis­sumik paasineqaler­poq Guutip Kristus Jesus aq­qutigalugu naalagaaf­fia 1914-imi qilam­mi pilersin­neqareersimasoq. Taava Jesusip oqaasii inaarutaasumik eq­quus­sin­naan­nguler­put: „Naalagaaf­fim­mil­lu tusagas­saq nuan­nersoq taman­na oqaluus­sis­sutigineqas­saaq nunarsuarmi inuit najugarisaan­ni tamarsuarmi inuiaqatigiit tamarmik nalujun­naarutis­saan­nik; taavalu naggatis­saq nal­liutis­saaq.“ Joseph F. Rutherfordip suliniar­nermigut Naalagaaf­fim­mik tusarlius­sap inun­nut suli amerlanerusunut tusarliun­neqar­niar­nis­saa sulis­sutigaa. — Matîuse 24:14, NW.

Taamaat­tumik Peqatigiif­fik aalajanger­poq nam­minersorluni naqiterinias­sal­luni angutit tun­niul­luin­nar­tut akis­sarsiaqaratik suliumasut suleqatigalugit, atuagas­sat Bibelilersaarutaasut sapin­ngisamik akikitsut aalajaatsumik saq­qum­mersin­neqar­tarsin­naanis­saat qulak­keerumal­lugu. Bibelimik Atuaq­qis­saar­tut tamarmik kajumis­saar­neqar­put Naalagaaf­fim­mik tusagas­saq nuan­nersoq oqaluus­sis­sutigisaq­qul­lugu. Nunani arlalin­ni Bibeli tun­ngavigalugu oqalugiar­nerit radiok­kut aal­lakaatin­neqar­tar­put.

1918-ip sior­nagut Bibelimik Atuaq­qis­saar­tut paasivaat oqaluus­sinermik­kut siuner­tarigitsik Kristus Jesus qilam­mi ilagis­sal­lugu qinigaasut sin­nerinik katersuinis­sar­tik, silarsuarmiul­lu Guutip eq­qar­tuus­sutaanut naam­mas­sineqarumaar­tus­samut mianersoq­qul­lugit. Pis­sutsit aaq­qis­suus­saanerata ajor­tup naggatis­saani amiak­kuul­lutik inuujumaar­tus­sanik nunami inuujuar­nis­saan­nik katersuiniar­nis­saq taamani eq­qarsaatigineqar­pian­ngilaq. Taavali 1918-imiil­li oqalugiaat „Inuit maan­nak­kut inuusut ilaat mil­lionil­lit im­maqa toqun­ngisaan­nas­sap­put“ an­ner­tuumik oqalugiaatigineqar­taler­poq.

Jesusip savat savaasal­lu pil­lugit as­sersuutaa Matîuse 25:31-46-mi al­las­simasoq atuaq­qis­saaramik­ku, 1923-mi paasiler­paat Harmagedonip nal­liutin­ngin­nerani inuit ajun­ngitsumik isumal­lit Naalagaaf­fim­mut qilam­miit­tumut ilaasus­saan­ngitsut Guutimut iluaritik­kumaar­tut Harmagedonimilu amiak­kuul­lutik inuujumaar­tut. 1935-mi atuaq­qis­saaq­qin­nermik­kut paasiler­paat inuit savanut as­sersuun­neqar­tut taak­ku tas­saasut amerlangaar­tut kisis­saan­ngitsut sarĸúmersitat 7:9-17-imi al­laatigineqar­tut. Taak­ku inuiaqatigiin­nit tamanit katersor­neqar­tus­saap­put, an­nikil­lior­nar­tus­samilu angisuumi amiak­kuul­lutik inuunis­samin­nut nunamilu naas­saan­ngitsumik inuus­suteqar­nis­samin­nut neriuuteqarlutik. Tamatumin­nga paasin­niler­nerup oqaluus­sisar­neq as­sut siuaal­latsip­paa. — Juánase 10:16.

1931-mi Bibelimik Atuaq­qis­saar­tut taaguut Jehovap Nalunaajaasui im­min­nut atuler­paat. Tamatuma sior­natigut taaneqar­tar­put Bibelimik Atuaq­qis­saar­tut, nunani tamalaani Bibelimik Atuaq­qis­saar­tut, ukiut tuusintilerisut aam­ma napasuliaq alaper­naarsuif­filerisut. Al­laal­lu Russellik­kormiut Rutherfordik­kormiullu ateruseraat. Taaguutit taak­kua ilaal­luun­niit eq­qor­tumik kinaas­susersin­neqaatigin­ngilaat. Taaguut „kristumiut“, ukiuni 100-lin­ni siul­ler­ni Guutip siulersuineratigut Jesusip ajoqersugaasa taaguutaat, naleq­qul­luaraluar­poq, aam­mat­taarli up­peqatigiip­pas­suit ajoqersuinerluutinik ajoqersuutigisaqar­tut taan­na taaguutigaat. Taaguutaan­narmik kristumiunit mil­lionilip­pas­suar­nit im­mik­koor­niarlutik, taaguum­mik Kristusip ul­lumik­kut malit­taanut ilumoor­tunut erseq­qis­sumik ilisar­naqutaasumik taaguuteqar­tariaqar­poq.

Bibelimi al­las­simasut misis­soq­qis­saaramik­kik paasiler­paat soorlu Jehovap qanga in­nut­tani Israelik­kut nalunaajaasigigai, taamat­taaq in­nut­tai pis­sutsit aaq­qis­suus­saanerata naalerfiani inuusut, Guutip aq­qanik siuner­taanil­lu nalunaarutigin­nin­nermut tun­niul­luin­nar­tut, tul­luar­tumik taaneqas­sasut Jehovap Nalunaajaasui-nik. Jehovap pal­lorfigin­nit­taasa ilumoor­tut kristumiuusut ul­lumik­kut kristumiuunerar­tunit al­lanit tamanit taaguut taan­na naleq­qut­tumik al­laas­sutigaat. — tugsiaut 83:18; Isaia 43:10-12.

1942-mi, sorsun­nersuup aap­paata nalaani, Joseph F. Rutherford toquvoq, taavalu Nathan H. Knorrip Vagttårnip peqatigiif­fiata præsidentiatut kingoraar­paa. Bibelimi siulit­tuutit misis­soq­qis­saaramik­kik paasiler­paat sorsun­nersuup kingor­nagut pif­fis­saqas­sasoq ilaatigut eq­qis­sisimaarfiusumik kif­faan­ngis­suseqarfiusumil­lu, taman­nalu iluatsil­lugu oqaluus­sisar­neq pis­sutsit aaq­qis­suus­saanerata naggatis­saata nal­liutin­ngin­nerani an­ner­toorujus­suarmik siuarsar­neqarsin­naan­nguler­poq. 1943-mi februarip qaam­mataani Vagttårnip Bibelimik atuarfia Gilead pilersin­neqar­poq al­lamik atorfeqaratik oqaluus­sisar­tut nunani al­lani ajoqersuiar­tor­titaal­lutik sulinis­saan­nut sungiusar­neqar­nis­saat siuner­taralugu. Ukiumi tas­sani kingusin­nerusuk­kut Jehovap Nalunaajaasuisa sapaatip akun­neranut ataatsimiit­tar­nerisa oqaluus­sinermut im­mik­kut ilin­niar­titsineq ilas­sutigaat.

1950-imi Peqatigiif­fiup saq­qum­mersit­taler­paa New World Translation of the Holy Scriptures, tas­saasoq Bibeli tulut­tuun­ngor­titaq ul­lumik­kut oqaatsit atorlugit, oqaatsinit al­las­simaq­qaak­kanit nutsigaasoq. Bibeli eq­qorluar­tumik nutsigaq atuaruminar­toq, Peqatigiif­fiup naqiteriviini akikitsumik sanaaq, oqaluus­sisar­nermut iluaqutaasorujus­suuvoq. Man­na tikil­lugu oqaatsini aq­qanilin­ni, aam­mat­taaq qal­lunaatuun­ngorlugu, 40 millionilin­ngorsimavoq.

1985-ip naajar­tuler­nerani Jehovap Nalunaajaasui 3.000.000-init amerlanerusut nunani qeqer­tanilu 200-nit amerlanerusuni oqaluus­sinermut peqataasar­put. Kristusip toquanik eq­qaaniaanermut, 1985-imi ilagiis­saan­ni 49.716-ini ataatsimiin­nermut amerlaner­paamik najuut­toqarfiusumut, inuit 7.792.109-t najuup­put.

Jehovap Nalunaajaasui Guutip ilumut kif­farigai sak­kugalugil­lu paasineqarsin­naavoq nalunaajaasut Guutimik kif­far­tuus­sinermin­ni aal­lus­sil­luar­neran­nit, silarsuarmi tamarmi ataasius­suseqar­neran­nit, Jehovap aq­qanik akitsisitsil­lutik naalagaaf­fianil­lu oqaluus­sis­sutigin­nil­lutik ilungersor­neran­nit, ileq­qoris­sutsik­kut angusimasaan­nit, Bibelip tamavim­mi Guutip oqaasiatut kuk­kusuitsutut ilas­sin­nin­neran­nit, aam­mat­taaq up­perisapalaaqan­ngin­neran­nit anersaalerinerlu ajor­neran­nit.

Im­mik­koor­tuni tul­liut­tuni takutin­neqas­saaq qanoq ilil­lutit il­lit Gutimik eq­qor­tumik pal­lorfigin­nin­nerup atulerseq­qitsinera iluaqutigisin­naagit.

• Bibelimik Atuaq­qis­saar­tut ilagiin­nit nalingin­nar­nit Bibelimi ajoqersuutigineqar­tut tun­ngaviunerusut suut al­laas­sutigaat?

• 1918-ip tungaanut aaq­qis­suus­saanermik­kut al­lan­ngoriar­tor­nerit suut Bibelimik Atuaq­qis­saar­tut misigaat?

• Suna pil­lugu oqar­toqarsin­naava Bibelimik Atuaq­qis­saar­tut tanitaasut taak­ku katitigaal­lutik tas­saasut ’inus­siaq ilumoorlunilu silatooq’ Matîuse 24:45-47-mi eq­qar­tor­neqar­toq?

• Guutip siuner­taanik sumik paasin­niler­nerup oqaluus­sinermik an­ner­tusaaniar­neq as­sut siuaal­latsip­paa?

• Taaguutip Jehovap Nalunaajaasui-sa suna siuner­taraa?

• Jehovap Nalunaajaasui Guutip ilumut sak­kugigai sutigut up­per­narsar­neqar­pa?

[Qupp. 8-mi assiliartat]

C. T. Russell 1879-imi

1879-imi julimi saq­qum­mersoq

Bibelimik Atuaq­qis­saar­tut siul­liit ilaat, Pittsburghimi

[Qupp. 9-mi assiliartat]

1889-imiit 1909 tikil­lugu qul­lersaqarfik Pittsburghimiittoq

1909-miit 1918 tikil­lugu qul­lersaqarfik Brooklynimiittoq

1909-miit 1926 tikil­lugu qul­lersaqarfim­mi sulisut najugaat Brooklynimiittoq

[Qupp. 10-mi assiliartat]

Jehovap Nalunaajaasuisa silarsuarmi tamarmi qul­lersaqarfiat Brooklynimiittoq, New York, USA

Qul­leq saamerleq: Al­laf­feqarfik

Qul­leq taler­pil­leq: Sulisut najugaat

Al­leq saamerleq: Naqiteriveqarfik

Al­leq taler­pil­leq: Nas­siusisarfik

[Qupp. 11-mi assiliartat]

J. F. Rutherford radiok­kut aal­lakaatitsisoq

Vagttårnip peqatigiif­fiata naqiteriviutaa siul­leq, kajumin­nermin­nit sulisunit ingerlatin­neqar­toq

Bibelimik nutsigaq „New World“, maan­na oqaatsini aq­qanilin­ni naqiter­tin­neqar­toq