Ajoqersuisorsuaq allanik kiffartuussisarpoq

NUANNARISARPIUK allanit kiffartuunneqaraangavit? — Ilaa, nuannarisarpat? Allat kiffartuunneqaraangamik aamma nuannarisarpaat. Tamatta nuannarisarparput. Ajoqersuisorsuup aamma tamanna nalunngilaa, allallu kiffartuunniartuaannarlugit. Ima oqarpoq: ‘Tikiutinngilanga kiffartorfigeqqullunga, namminerli kiffartussallunga.’ Allanik kiffartuussineq isumaqarpoq allanut iliuuseqarneq imaluunniit ikiuunneq. — Matthæusi 20:28.

Ajoqersuisorsuaq ilaarusukkutsigu qanoq iliortariaqarpugut? — Allat kiffartuuttariaqarpavut. Ajunngitsumik iliorfigisariaqarpavut. Ilumoorporli inuppassuit taamaaliorneq ajortut. Amerlanerit kiffartuunneqarumanerusarput. Allaammi Jiisusip ajoqersugaasa ilaat taamaalingajapput. Allanit annerorusullutillu pingaarnerpaajorusupput.

Ullut ilaanni Jiisusip ajoqersukkani angalaqatigai. Illoqarfimmut Kapernaumimut, Galilæap Tasersuata eqqaaniittumut, pipput, illumullu iserput. Jiisusillu aperai: “Sunaana aqqutaani oqaluuserigissi?” Akinngillat, kinami arlartik annerunersoq oqallisigigamikku. — Markusi 9:33, 34.

Jiisusip nalunngilaa taamaaliorsimasut. Nalunngilaalu ajoqersukkami ilaata allanit annerujumanera eqqunngitsuliornerusoq. Taava kapitali 1-imi atuariikkatsitut iliorpoq: Meerannguaq tiguaa, ajoqersukkallu akornannut pisippaa oqaluttuullugillu meerannguatut maniguutsigissasut. Kisiannili ilinniarfigerpianngilaat. Jiisusip toqunngitsiarnermini ilinniartitsissutigisimasaminik eqqaasippai puiunngisaannagassaannik. Qanoruna iliortoq? —

Nereqatigiitsillutik Jiisusi nikuippoq qallersaatinilu peerlugu, tassa atisani qalleq. Allarullu qitequsiuppaa errorfillu imermik immerlugu. Ajoqersukkat sulerilersorisimassavaat. Isigitillugit immikkut tamaasa ornippai, seeqqummerlunilu isigai asallugit! Taava isigaat allarummik allarterpai. Kakkaak, takorluulaariaruk! Illit taassaniissimasuuguit qanoq misigissagaluarpit? —

Ajoqersukkat kanngusupput. Nuannarinngilaat Ajoqersuisorsuup kiffartuummatik. Ajoqersukkap Petrusip Jiisusimut isikkani asaqqunngikkaluarpai, Jiisusilli oqarfigaa taamaaliornissani pingaaruteqartoq.

Ullumikkut nalinginnaasumik inersimasut allat isigaat asanneq ajorpavut. Kisianni taamani Jiisusi nunami inuugallarmat taamaaliortarput. Nalunngiliuk sooq? — Nunami tassani Jiisusip ajoqersukkallu inuuffigisaanni aloqutaannaasaramik. Pisuttuarsimagaanni isikkat pujorallertaqaat ipertittarlutillu. Taamaattumik ilorraallannartarpoq pulaarfimmi isikkat asalaarlugit.

Unnulli taanna Jiisusip ajoqersugaasa arlaannaalluunniit allat isigannik asaanissamut neqeruunngilaq. Massakkulli Jiisusi nammineq taamaaliorpoq. Taamaalilluni pingaarutilimmik ilinniartippai. Tamanna ilinniarfigisariaqarpaat, uaguttaarlu tamanna ilinniarfigisariaqarparput.

Suunersoq nalunngiliuk? — Jiisusip qallersaatini atereeramiuk inissereerlunilu nassuiaatilerpai: “Qanoq iliorfigigissi paasivisiuk? Taasarpassinga Ajoqersuisumik Naalakkamillu, taamalu oqartarnersi eqqorpoq, taannaagama. Uanga ilissinnut Naalagaallungalu Ajoqersuisuusunga isikkasi asakkakkit, taava ilissi aamma pisussaavusi isikkassinnik asaaqatigiissallusi.” — Johannesi 13:2-14.

Tassani Ajoqersuisorsuup takutippaa ajoqersukkani imminnut kiffartuuteqatigiissasut. Imminuinnaq eqqarsaatigisussaanngillat. Isumaqassanngillat ima pingaaruteqartigalutik allaninngaanniik kiffartuunneqassallutik. Allanilli kiffartuussiumassuseqartariaqarput.

Ilinniarfissaalluangaarami, ilaa? — Apeqqutaaginnalerpoq uagut Ajoqersuisorsuartut ikkusunnersugut allanillu kiffartuussiumasarluta. Qanoq isumaqarpit? — Tamatta allat kiffartuuttarsinnaavavut. Nuannaarutigissavaat. Tamanilli pingaarnerpaavoq Jiisusip Ataataatalu tamatuminnga nuannaarutiginninnerat.

Allanut kiffartuussineq ajornanngilaq. Tamanna eqqumaffigigukku paasilissavat allat sorpassuarnik ikiorsinnaallugit. Anaanat ikiorniarlugu arlaannik iliuuseqarsinnaavit? Nalunngilammi anaanavit illit ilaquttatillu sorpassuarnik ikiortaraasi. Arlaannik ikiorsinnaviuk? — Misilillugu apereriaruk.

Immaqa nerriviliulerpat ikiorsinnaavat. Imaluunniit nerrivimmiittut atornikuusasi piiarsinnaavatit. Meeqqat ilaasa ullut tamaasa eqqaavik igikkiartortarpaat. Illit taamaaliortaruit allanik kiffartuussinermut peqataassaatit, soorlu Jiisusi taamaaliortoq.

Nukarlernik ikiorsinnaasannik qatannguteqarpit? Eqqaamajuk Jiisusip Ajoqersuisorsuup ajoqersukkani kiffartuummagit. Nukarliit qatanngutitit ikiortarukkit assigissavat. Taakku qanoq ikiorsinnaavigit? — Immaqa ikiorsinnaavatit ilinniartillugit pinnguareeraangamik pinngussat qanoq inaannut ilisassagaat. Imaluunniit atisalersulerpata ikiorsinnaavatit. Imaluunniit siniffik iluarsilerpassuk ikiorsinnaavatit. Allanilluunniit ikiorsinnaanerlugit eqqaasaqarsinnaavit? — Nuannarilissavaatsit ikiortarukkit, soorlu ajoqersukkat Jiisusi nuannarigaat.

Aamma atuarfimmiikkaangavit atuaqatitit imaluunniit ilinniartitsisutit ikiorsinnaavatit. Arlaata atuagaq nakkaappagu inussiarnisaassaatit atuagaq nakkaasaa tunniukkukku. Imaluunniit allattarfissuaq salikkumasinnaavat arlaannilluunniit ilinniartitsisoq ikiorumallugu. Inussiarnisaartoqarsinnaavoq iserniartoq aniniartorluunniit matumik ammaatiinnarlugu.

Imaassinnaavoq ikiukkatta ilaasa qujaffigineq ajoraatigut. Taava ikiuisarunnaassaagut? — Naamik! Jiisusip ikiugarpassui qujaneq ajorput. Taamaakkaluartorli ikiuiuarpoq.

Taamaammat tunuarsimaanngisaannassaagut ikiuinissamut. Eqqaamajuartigu Ajoqersuisorsuaq, Jiisusi, maligassiaalu malinniarlugu.