Guutip silarsuassaani nutaami eqqissisimaffiusumi inuulersinnaavutit

GUUTIP Adami Evalu paratiisimik najugassaannik tunivai. Soorlu tusareeripput, Guutimut naalanngikkamik Paratiisi annaavaat toqullutillu. Guutilli taakkua kinguaavi, ilaatigut uagut, paratiisissami naassaanngitsumik inuulersinnaanissamut periarfissippai. Biibilimi ima neriorsorneqarpugut: ‘Iluartut nuna pigilissavaat, naassaanngitsumillu tassani najugaqassallutik.’ — Tussiaat 37:29.

Biibilimi “qilak nutaaq nunalu nutaaq” eqqartorneqarput. (Esaja 65:17; 2 Petrusi 3:13) “Qilak” maanna atuuttoq tassa ullumikkut inuit nunami naalakkersuinerat. Jiisusili Kristusi qilammilu naalakkersueqatai tassaapput “qilak nutaaq”. Tassa Guutip naalagaaffia naapertuilluartoq eqqissinermik atulersitsisussaq. Nuannissaqaaq qilak nutaaq nunamut tamarmut naalakkersuilerpat!

Sunaavami ‘nuna nutaaq’? — Nuna nutaaq tassa inuit ajunngitsut Jehovamik asannittut. Biibilimi ‘nuna’ eqqartorneqaraangami isumaqarsinnaasarpoq inuit nunami najugallit nunarsuaq pineqarani. (1 Mosesi 11:1; Tussiaat 66:4; 96:1) Inuit tamakkerlutik nunamik nutaamik taaneqartut tassaapput maani nunami inuusussat.

Taamanikkussamut silarsuaq ajortoq ullumi atuuttoq peerutissaaq. Eqqaamajuk Noap nalaani ulersuup silarsuaq tamaat piuneerutsikkaa. Soorlu paasereeripput, silarsuaq ajortoq ullumi atuuttoq Harmagedonimi peerutissaaq. Maanna takussavarput Harmagedonereerpat Guutip silarsuassaani nutaami inuuneq qanoq issanersoq.

Silarsuassami nutaami paratiisimi alianaatsumi eqqissinartumilu naassaanngitsumik inoorusuppit? — Ullumikkut nakorsaqanngilaq nakorsaateqaranilu naassaanngitsumik inuunermik tunisisinnaasunik. Taamaallaat Guuti ikinngutigilerutsigu inuuneq naassaanngitsoq pisinnaavarput. Ajoqersuisorsuullu paasitippaatigut tamanna qanoq angusinnaagipput.

Biibili tigoriartigu Johannesillu iivangkiiliua, kapitali 17, versi 3 qupperlugu. Tassani Ajoqersuisorsuup oqaasiinik allassimasoqarpoq: ‘Inuuneq naassaanngitsoq tassaavoq ilinnik, ilumut kisimi Guutiusumik aallartitannillu Jiisusimik Kristusimik, ilisimanninneq.’

Uani Jiisusip qanoq ilioqquaatigut Guutimut ikinngutaalissagutta naassaanngitsumillu inuulissagutta? — Siullerpaamik Ataatarput qilammiusoq, Jehova, ilisarisimalertariaqarparput. Aamma ernera, Jiisusi, uagut pilluta inuunerminik pilliutiginnittoq ilisarisimalertariaqarparput. Taamaaliussagutta Biibilimi qanoq allassimasoqartoq paasiniartariaqarparput. Atuagaq una, Ajoqersuisorsuaq ilinniarfigiuk, tamatumunnga iluaqutigisinnaavarput.

Jehovamik ilisarisimanninneq naassaanngitsumik inuulernissamut qanoq iluaqutigisinnaavarput? — Nalunngilat ullut tamaasa nerisariaqartugut. Tamanna pinngitsoorsinnaanngilarput. Aammattaaq ullut tamaasa Jehovamik ilinniarneq pinngitsoorsinnaanngilarput. Biibilimi ima allassimavoq: “Inuup timiusaannaq inuussutissarinngilaa, oqaaserli sunaluunniit Guutip qarnanit anisoq.” — Matthæusi 4:4.

Jiisusi Kristusi pillugu aamma ilinniartariaqarpugut Guutimit aallartitaammat ajortitsinnik peersisussatut. Biibilimi ima allassimavoq: ‘Allamik annaffissaqanngilaq’. Aamma allassimavoq: “Ernermut uppertoq naassaanngitsumik inuuneqarpoq.” (Apustilit Suliaat 4:12, 1936; Johannesi 3:36) Tamanna qanoq paasisariaqarpa? ‘Erneq’, tassa Jiisusi Kristusi, upperinngikkutsigu naassaanngitsumik inuusinnaanngilagut. Tamanna paasigutsigu taava Ajoqersuisorsuaq ullut tamaasa ilinniarfigiuarumassavarput, oqaasiilu naalattuaannassavavut.

Ajoqersuisorsuaq ilinniarfigissagutsigu iluaqutaassaaq atuakkap matuma arlaleriarlugu atuarnera, assiliartaasa isiginnaartarnerat eqqarsaatigeqqissaartarnerallu. Aammattaaq misileriaruk assiliartaanut apeqqutit akisinnaaneritit. Anaanat ataatallu ilagalugit taamaaliorsinnaavutit. Peqanngippata inersimasut allat meeqqallu allat ilagalugit taamaaliorsinnaavutit. Allat Ajoqersuisorsuarmik ilinniartinnissaannut ikiorsinnaagukkit nuannissaaq, ilaa? — Taamaalioruit taakkua paasissavaat qanoq Guutip silarsuassaani nutaami naassaanngitsumik inuulersinnaallutik.

Biibilimi paasitinneqarpugut ‘silarsuaq nungussasoq’. Paasitinneqarpuguttaaq qanoq Guutip silarsuassaani nutaami naassaanngitsumik inuulersinnaasugut. Ima allassimavoq: ‘Guutip piumasaanik iliortoq naassaanngitsumik atassaaq.’ (1 Johannesi 2:17) Qanormi ililluta Jehovap Guutip silarsuassaani nutaami inuulersinnaavugut? — Tassa Jehova erneralu asasaa Jiisusi Kristusi pillugit ilinniarnitsigut. Aammali ilinniakkavut malillugit inuusariaqarpugut. Neriuppugut atuagaq manna taamaaliornissannut iluaqutigissagit.