KAPITALI 9
“Kinguaassiuutitigut assuarnartuliorneq qimarratigisiuk”
“Avatisi nunamiusut toqulersissavasi kinguaassiuutitigut assuarnartuliorneq, minguttuuneq, tiinngartuneq, pilerissuseq ajoqutaasoq, piumatuunerlu, tassa guutipilussiorneq, eqqarsaatigalugit.” — KOL 3:5, NW.
1, 2. Jehovap innuttai ajoquserniarlugit Bileami qanoq ussernartorsiortitsiva?
ANGUT aalisariarfigisartakkaminukarpoq. Neqitaq aalisakkamut pisarerusutaminut atortakkani neqitsiuteriarlugu qissattalerpoq. Kinguninngua aalisaat sukariarmat amualerpoq. Eqqortumik neqitsiussisimanini nuannaarutigalugu qungujuppoq.
2 Aalisartup neqitassaminik aalajangiinera itsaq pisimasumut assersuutaalluarsinnaavoq. Ukiumi 1473-imi kr.in.si. angut Bileamimik atilik Guutip innuttai Moabip narsartaani nunap neriorsuutigisap eqqaani tammaartut qanoq ussernartorsiortissinnaanerlugit pilersaarusiorpoq. Bileami Jehovamut pruffiitiunerarpoq, angutaavorli piumatooq akissarsinissaminik neriorsorneqarluni Israelikkunnik perloqqusiartoqquneqartoq. Jehovalli Bileami Israelikkunnik pilluaqquseqattaartippaa. Bileami akissarserusungaarami eqqarsalerpoq Guuti innuttaminik Israelikkunnik perloqqusitissinnaanerlugu. Taamaattumik Bileamip arnat inuusuttut Moabikkuusut pinnersut aqqutigalugit Israelikkut ingasattumik ajortuliornissaannut ussernartorsiortippai. — 4 Mos 22:1-7; 31:15, 16; Saqq 2:14.
3. Bileamip ussernartorsiortitsinera qanoq iluatsitsigaa?
3 Ussernartorsiortitsinera iluatsippa? Ilaatigut aap. Angutit Israelikkuusut tuusintillit “Moabikkut arnartaat arneriffigalugit kanngunartuliortalerput”. Allaat Moabikkut guutii, ‘Ba’ali-Peori’ atoqateqartarnikkut guutisiorfigineqartartoq ilanngullugu, guutisiorfigilerpaat. Tamatuma kingunerisaanik nunap neriorsuutigisap tiguarneqangajalernerani Israelikkut 24.000-t toqutaapput. Ila alianassusia! — 4 Mos 25:1-9.
4. Sooq Israelikkut tuusintit arlallit kinguaassiuutitigut assuarnartuliulerpat?
4 Sooruna taama ajortigisumik kinguneqartoq? Israelikkut ilarpassui ajortumik uummateqalersimammata. Jehovap Egyptenimit inussiaajunnaarsikkaluaraatik, inoqajuitsumi nerisittaraluaraatik nunallu neriorsuutigisap tungaanut isumannaatsumik ingerlatikkaluaraatik Jehovamit ungasilliartorput. (Hebr 3:12) Moabip narsartaani pisimasoq eqqarsaatigalugu apustili Paulusi ima allappoq: “Kinguaassiuutitigut inuunerloqinata soorlu taakkua ilaat taamaaliortut ullormilu ataatsimi 23.000-t toqutaallutik.”a — 1 Kor 10:8.
5, 6. Sooq Israelikkut Moabip narsartaani ajortuliaannik oqaluttuaq uagutsinnut pingaaruteqarpa?
5 Ullumikkut Guutip innuttaasa, nunamut neriorsuutigisamut pitsaanerungaartumut isingajalersut, Mosesimik allakkat sisamaanni oqaluttuarineqartoq ilinniutigingaarsinnaavaat. (1 Kor 10:11) Assersuutigalugu itsaq Moabikkut isiginnittaasiat assigalugu ullumikkut inuppassuit nunarsuaq tamakkerlugu atoqateqarnermut tunngasunut tiguartivissimapput. Ukiut tamaasa kristumiut tuusintit arlallit, itsaq Israelikkut assigalugit, kinguaassiuutitigut assuarnartuliornermut nakkaannartarput. (2 Kor 2:11) Aamma Zimri Israelikkut tammaarfiannut arnamik Midjanikkuusumik kannguttaalluni tuperminukaassisoq assigalugu ullumikkut Guutip innuttaanik ilagisaqartartut ilaat kristumiut ilagiivinut ileqqussatigut ajortumik sunniisimapput. — 4 Mos 25:6, 14; Jud 4.
6 Silarsuarmi Moabip narsartaani pisimasumut assersuunneqarsinnaasumi inuuvugut! Illit akissarsiassap ungasinngitsukkut piviusunngornissaa — silarsuassami nutaami qangalili utaqqisatsinni inuunissat — takorloorsinnaaviuk? Taamaappat sapinngisat tamaat Guutip asanninneraniittuinnarumallutit Guutip peqqussutaa una maleruartariaqarpat: “Kinguaassiuutitigut assuarnartuliorneq qimarratigisiuk.” — 1 Kor 6:18, NW.
Moabip narsartai
KINGUAASSIUUTITIGUT ASSUARNARTULIORNEQ QANOQ PAASISARIAQARPA?
7, 8. “Kinguaassiuutitigut assuarnartuliorneq” qanoq paasisariaqarpa, qanorlu kinguneqarsinnaava?
7 Biibilimi oqaatsit “kinguaassiuutitigut inuunerlunneq” imaluunniit “kinguaassiuutitigut assuarnartuliorneq” (NW) (grækerisut: porneiʹa) allassimagaangata pineqartarpoq Biibilip katissimasutut inooqatigiinnermut ileqqoreqqusaanik unioqqutitsilluni kinguaassiuutitigut atoqateqarneq. Aamma pineqarpoq allasiorneq, atortittartuuneq, katissimanani atoqatigiinneq, qanikkut itikkullu atoqatigiinneq aamma katissimanngisap kinguaassiuutaanik sattaarineq. Aamma anguteqatigiit arnaqatigiilluunniit iliuutsinik eqqaaneqareersunik iliuuseqarnerat uumasunillu atoqateqarneq ‘kinguaassiuutitigut assuarnartuliorneruvoq’.b
8 Biibilimi tamatumunnga tunngatillugu ajoqersuutigineqartoq paatsorneqarsinnaanngilaq: Kinguaassiuutitigut inuunerluttut kristumiut ilagiivinut ilaajunnaarsinneqartariaqarput, inuunerlu naassaanngitsoq kingornunnavianngilaat. (1 Kor 6:9; Saqq 22:15) Maannakkorpiarlu kingunipiluit — assersuutigalugit imminut ataqqiunnaarneq, tatigineqarunnaarneq, aappariinnermi ajornartorsiuteqarneq, ilerasunneq, kissaatiginngisamik naartulerneq, nappaateqarneq — misigisarpaat, immaqalu allaat toqumik kinguneqarsinnaavoq. (Galatiamiut 6:7, 8 atuakkit). Taama alianartigisunik kinguneqarsinnaasumik iliuuseqalerneq sianiitsuliorneruvoq, ilaa? Ajoraluartumik inuppassuit kinguaassiuutitigut assuarnartuliornissamut aallarniutaakulasartoq eqqarsaatiginngitsoorneq ajorpaat — tassa pornografii.
PORNOGRAFII KINGUAASSIUUTITIGUT ASSUARNARTULIORTITSIGAJUPPOQ
9. Inuit ilaasa pornografii ajoqutaannginnerartarpaat, taamaappali? Nassuiaagit.
9 Pornografii nunani amerlasuuni pisiniarfinni fjernsynimilu takuneqariaannaavoq nipilersuutinilu tusarnaarneqariaannaalluni. Internetilu pornografiimik ulikkaarpoq.c Ilaasa pornografii ajoqutaannginnerartarpaat, taamaappali? Naamik, ajoqutaalluinnarpoq! Pornografiimik isiginnaartartut immaqa imminut inertittarneq ileqquliuttarpaat ‘narrunarsaataasunillu pileritsaassisarlutik’. Tamannalu kinguneqarsinnaavoq atoqatigiinnermut pinngitsuuisinnaajunnaarneq, kanngunartuliornissamik kissaatipiloqalerneq aappariinnermilu ajornartorsiungaalerneq immaqalu allaat avinneq.d (Rom 1:24-27; Ef 4:19) Ilisimatuup atoqateqarnermik pinngitsuuisinnaannginneq kræftimut assersuuppaa. Ima oqarpoq: “Kræftitut siaruaattarpoq. Iliuuseqanngikkaanni katsorsarneqarsinnaanngilaq, katsorsaruminaatsorujussuuvorlu.”
Internetimik taamaallaat inimi ilaqutariit tamarmik isersimaarfigisartagaanni atuineq silatusaarneruvoq
10. Najoqqutassiaq Jaaku 1:14, 15-imiittoq qanoq atorsinnaavarput? (Aamma ungalusaq “Ileqqussatigut minguitsuujuarnissannut qanoq nakussatsinneqartunga” takuuk).
10 Jaakup allagai uku maluginiakkit: “Kinaluunniit usserneqartarpoq nammineq pilerissutsiminit nassataritilluni kajumitsatsitaallunilu; pilerissutsillu ilumileraangami ajorti erniarisarpaa, ajortillu inersimaleraangami toqu erniarisarpaa.” (Jaak 1:14, 15) Taamaattumik pilerissusipiloqaleruit pilerissusipiloqarunnaarniarlutit ingerlaannaq iliuuseqarit! Assersuutigalugu assit tiingasulersaarutit piaarinaatsoornikkut takugukkit allamut qiviapallagit, qarasaasiaq qamiguk, imaluunniit fjernsynip kanalia allamut nuuguk. Kanngunartumik pilerissutsip aqukkuminaallinnginnerani pilerissusipiluk nakkaannarfigiumanagu iliuuserineqartariaqartumik sumilluunniit iliuuseqarit! — Matthæusi 5:29, 30 atuakkit.e
11. Pilerissusipiloqarunnaarniartilluta qanoq Jehovamik tatiginninnerput ersersissinnaavarput?
11 Jehovap uagutsinnit nalunnginnerugamisigut pissutissaqarluarluni ima mianersoqquaatigut: “Avatisi nunamiusut toqulersissavasi kinguaassiuutitigut assuarnartuliorneq, minguttuuneq, tiinngartuneq, pilerissuseq ajoqutaasoq, piumatuunerlu, tassa guutipilussiorneq, eqqarsaatigalugit.” (Kol 3:5, NW) Tamanna unamminiarnarsinnaavoq. Eqqaamajulli Ataatarput qilammiusoq asannittuullunilu utaqqisinnaassuseqartoq ikiortissarsiorfigisinnaagipput. (Tuss 68:20) Taamaattumik eqqarsaatipiloqaleraangavit Jehova saaffigipallattaruk. “Pissaaneq asseqanngitsoq” qinnutigiuk, pinngitsaalillutillu eqqarsaatitit allamut saatsittakkit. — 2 Kor 4:7; 1 Kor 9:27; takuuk ungalusaq “Ileqqupalaara qanoq taamaatissinnaavara?”
12. ‘Uummaterput’ assersuutaasoq suua, aamma sooq paarisariaqarparput?
12 Kunngi Salomo silatooq ima allappoq: “Paarisassannit tamanit annermik uummatit paariuk inuuneq tassannga aallaaveqarmat.” (Uss 4:23) ‘Uummaterput’ tassaavoq ilorlikkut pissuserput, Guutip isaani qanorpiaq ittuunerput. Guutip ‘uummatitsinnik’ naliliinera — inuit uagutsinnut isiginnittaasiat pinnagu — naassaanngitsumik inuussanersugut inuussannginnersugulluunniit aalajangiisuussaaq. Tamanna paasiuminaannanilu pimoorunneqartussaavoq. Jobip, angutip ilumoorfiginnittup, kissaatipiloqarluni arnaq isigiumanagu isini isumaqatigiissuteqarfigai. (Job 31:1) Uagutsinnut maligassiuilluarpoq, ilaa? Tussiaasiortoq Jobitut isiginnittaaseqartoq Guutimut ima qinuvoq: “Isikka alartikkit sallunermit [naleqanngitsunit, NW]!” — Tuss 119:37.
DINA SILATUSAARANI AALAJANGIIVOQ
13. Dina kinaava, aamma sooq ikinngutissaminik toqqaanera silatusaartuliornerunngila?
13 Soorlu kapitali 3-mi sammereeripput ikinngutivut uagutsinnut ajunngitsumik ajortumilluunniit sunniuteqangaarsinnaapput. (Uss 13:20; 1 Korinthimiut 15:33 atuaruk). Ataataanerpaap Jaakup pania, Dina, qanoq misigisaqarnersoq eqqarsaatigeriaruk. Dina perorsagaalluaraluarluni silatusaanngitsumik aalajangerpoq Kana’anikkut arnartaannik ikinnguteqarniarluni. Moabikkut assigalugit Kana’anikkut kinguaassiuutitigut inuunerlunnerat ilisimaneqarluarpoq. (3 Mos 18:6-25) Kana’anikkut angutitaasa, aamma Sikemip ‘ataatami inoqutaanit tamanit ataqqisaanerpaasup’, Dina atoqateqarusussuseqarpasissoraat. — 1 Mos 34:18, 19.
14. Dinap kikkut ikinngutiginiarlugit aalajangiinera qanoq alianartumik kinguneqarpa?
14 Dinap Sikemi takugamiuk kinguaassiuutitigut kanngunartulioqatiginissaa eqqarsaatigigunanngilaa. Sikemili Kana’anikkut angutitaasa amerlanersaasa pissusissamisoorsorisaattut iliuuseqarpoq. Dina pinaasersimasuuppat iluaqutaanavianngilaq, Sikemimmi “tiguaa pinngitsaalillugulu arneriffigalugu”. Kingusinnerusukkut Sikemip Dina asaleraluaraa iliuuserisimasaanut allannguutaanavianngilaq. (1 Mosesi 34:1-4 atuakkit). Aamma tamanna Dinamut kingunipiloqaannarani aammali allanut alianartumik kinguneqarpoq. Dinammi kikkut ikinngutiginiarlugit aalajangiinera pissutigalugu ilaqutaanut tamanut kanngunarsaataasunik pisoqarpoq. — 1 Mos 34:7, 25-31; Gal 6:7, 8.
15, 16. Qanoq Guutimit pisumik ilisimassuseqalersinnaavugut? (Aamma takuuk ungalusaq “Allassimaffiit eqqarsaatigisassat”).
15 Dina alianartumik misigisaqarnermigut immaqa ilikkagaqarpoq. Jehovamilli asannittut ilikkagaqarumallutik alianartumik misigisaqartariaqanngillat. Guutimut naalakkamik ‘ilisimasunik peqateqarumallutik’ aalajangertarput. (Uss 13:20a) Taamaalillutik “aqqutit ajunngitsut tamaasa” paasilersinnaavaat ajornartorsiuterpassuillu alianartorpassuillu pinaveersaarsinnaallugit. — Uss 2:6-9; Tuss 1:1-3.
16 Guutimut qinusarnermikkut aamma ullut tamaasa Guutip oqaasianik Biibililersaarutinillu ‘inussiamit aalajaallunilu silatuumit’ saqqummersinneqartunik atuaqqissaartarnermikkut ilisimassuseqarnerulerumallutik iliuuseqartut tamarmik Guutimit pisumik ilisimassuseqalersinnaapput. (Matt 24:45, NW; Jaak 1:5) Aamma siunnersuutinik Biibilimeersunik maleruaarusussuseqarluni maniguunnissaq pingaaruteqarpoq. (2 Kng 22:18, 19) Assersuutigalugu kristumiup immaqa paasivaa uummatini tatigisassaanngitsuusoq. (Jer 17:9) Silatusaanngitsumilli iliuuseqaruni asannittumik aalajangersimaqqissaartumillu siunnersorneqarnissani maniguulluni akuerissavaa?
17. Ilaqutariinni qanoq pisoqarsinnaasoq oqaluttuariuk, aamma ataataasup panini eqqarsalersinniarlugu qanoq oqaloqatigisinnaagaa nassuiaruk.
17 Assersuuteqariarta. Ataataasup panimmi angutillu kristumiup inuusuttup kisimiinnissaat akuerinavianngilaa. Paniata ataatani ima oqarfigaa: “Ataata, tatiginnginnamma? Ajortuliornavianngilagummi!” Immaqa paniata Jehova asavaa ajunngitsumillu siunertaqarluni, taamaattorli oqartoqarsinnaava ‘ilisimassusermik Guutimeersumik pigisaqarluni inuusoq’? ‘Kinguaassiuutitigut assuarnartuliorneq qimarratigaa’? Imaluunniit silatusaarani uummatini tatigaa? (Uss 28:26) Immaqa najoqqutassiat tamatumunnga tunngasut ataataasup paniatalu oqaloqatigiissutigisinnaasaat amerlanerusut eqqaasinnaavatit. — Uku takukkit: Ussatit 22:3; Matthæusi 6:13; 26:41.
JOSEFIP KINGUAASSIUUTITIGUT ASSUARNARTULIORNEQ QIMARRATIGAA
18, 19. Josefi qanoq ussernartorsiortinneqarpa, qanorlu iliorpa?
18 Josefi, Dinap affarmik qatanngutaa, angutaavoq inuusuttoq Guutimik asannittoq kinguaassiuutitigut assuarnartuliornermik qimarratiginnittoq. (1 Mos 30:20-24) Josefip meeraagallarami aleqami sianiitsuliornerata kingunipiloqarnera nammineq takusimavaa. Qularnanngitsumik Josefip takusimasani namminerlu Guutip asanninneraniittuinnarusunnini illersuutigisimassavai kingusinnerusukkut Egyptenimi naalakkami nuliata “ullut tamaasa” kanngunartulioqatigerusummani. Josefi inussiaagami soorunami soraaginnarluni aallaannarsinnaanngilaq. Pissutsini atukkamini silatusaartuullunilu sapiitsuusariaqarpoq! Taamaaliorpoq Potifarip nulia itigarteqattaaramiuk naggataatigullu taassumannga qimaalluni. — 1 Mosesi 39:7-12 atuakkit.
19 Una eqqarsaatigeriaruk: Josefi arnaq pillugu takorluuisimasuugaluaruni imaluunniit atoqatigiinneq pillugu eqqarsakulasaraluaruni Guutimik ilumoorfiginnittuarsinnaassagaluarpa? Ilimananngilaq. Josefip kanngunartuliornissaq eqqarsaatigiuarnagu Jehovamut attaveqarnini pingaartingaarpaa. Tamanna Potifarip nulianut oqaasiinit ukunannga erserpoq: “[Naalakkama] sumilluunniit erliguutinngilaanga; illit kisivit attoqqunngilaatit; nuliarigamisit. Qanoq taama kanngunartigisumik iliussaanga Guutimut ajortuliorlunga?” — 1 Mos 39:8, 9.
20. Jehova Josefip iluaqutigisaanik qanoq iliuuseqarpa?
20 Takorlooriaruk Josefi inuusuttoq ilaquttaminit najorneqanngikkaluarluni ullut tamaasa aalajaattuartoq takullugu Jehova qanoq nuannaartigisimassasoq. (Uss 27:11) Kingusinnerusukkut Josefip parnaarussaaqqajunnaarnissaa Egyptenimilu ministeriuninngorlunilu nerisassanik nakkutilliisunngornissaa Jehovap isumagaa! (1 Mos 41:39-49) Aap, tussiaasiortup oqaasii uku ilumoorluinnarput: “Ilissi Naalakkamik [Jehovamik, NW] asannittusi ajortoq uumigissavarsi; imminut upperluartut inuunerat paaraa aniguisissallugillu iluaatsunit.” — Tuss 97:10.
21. Qatanngut angut inuusuttuaraq Afrikamiu qanoq aalajaattuarpa?
21 Ullumikkuttaaq Guutip kiffaasa aalajaatsut ‘ajortoq uumigaat ajunngitsorlu nuannaralugu’. (Am 5:15) Afrikami arnap inuusuttuaqqap angut atuaqatini neqeroorfigaa matematikkimik misilitsinnermi ikiorusuppani atoqatigiumallugu. Angut inuusuttuaraq ima oqaluttuarpoq: “Ingerlaannaq itigartipallappara. Jehovamik ilumoorfiginnittuarnikkut imminut ataqqinera, kuultimit sølvimillu naleqangaarnerusoq, pigiuarpara.” Imaassinnaavoq ajortuliorneq sivikitsuinnarmik nuannaarutaasinnaasoq, anniaataasumilli aliasungaarnermillu kinguneqakulasarpoq. (Hebr 11:25) Jehovamullu naalanneq naassaanngitsussamut pilluaataavoq. — Uss 10:22.
GUUTIP NALLITTUISUP IKIUINERA ILUAQUTIGIUK
22, 23. (a) Kristumiu ingasattumik ajortuliortooruni sooq neriuutaarutissanngila? (b) Unioqqutitsisoq qanoq ikiorneqarsinnaava?
22 Naammalluinnanngitsuugatta uinngup pilerigisai nakkaannarfigiumanagit Jehovallu isaani eqqortumik iliorumalluta tamatta ilungersuuteqartarpugut. (Rom 7:21-25) Jehovap tamanna nalunngilaa ‘eqqaamagamiuk pujualaasugut’. (Tuss 103:14) Taamaakkaluartorli kristumiu ingasattumik ajortuliortoorsinnaavoq. Ajortuliortooruni neriuutaarutissava? Naamerluinnaq! Imaassinnaavoq ajortuliortup, soorlu kunngip Daavip pisimaneratut, unioqqutitsinermi kingunipilui naammagalugit atortariaqarai. Taamaakkaluartorli Guuti peqqissimisunik ‘ajortuliaminnillu anngiiaatiginnittunik’ ‘isumakkeerfiginnikkumasarpoq’. — Ussatit 28:13 atuaruk; Tuss 86:5; Jaak 5:16.
23 Aamma Guuti kristumiut ilagiivinut ‘inunnik tunissutaasunik tunisivoq’ (NW) — tassa angutinik piumasaqaatinik eqqortitsisunik ikiuiumasunillu anersaakkut inersimalluartunik paarsisoqarnissaa isumagaa. (Ef 4:8, 12; Jaak 5:14, 15) Paarsisut unioqqutitsisoq Guutimut attaveqarluaqqilernissaanut ingasattumillu ajortulioqqinnginniassammat ‘siuneqarnermik pissarsiassaqalernissaanut’ ikiorusuppaat. — Uss 15:32.
‘SIUNEQARNERMIK PISSARSISARIAQARPUGUT’
24, 25. (a) Angut inuusuttoq Ussatit kapitali 7-imi allaatigineqartoq qanoq ‘sianiitsuua’? (b) Qanoq ‘siuneqarnermik pissarsisinnaavugut’?
24 Biibilimi inuk ‘siuneqarnermik pissarsisoq’ inullu “sianiitsoq” allaatigineqarput. (Uss 7:7) Kristumiu anersaakkut inersimalluanngitsoq Guutimullu kiffartornermini misilittagakitsoq ‘sianiitsuusinnaavoq’, tassa naliliisinnaassuseqarpiaranilu eqqortumik eqqunngitsumillu immikkoortitserpiarsinnaanngilaq. Angutitut inuusuttutut Ussatit 7:6-23-mi allaatigineqartutut ingasattumik ajortulioqqajaasinnaavoq. ‘Siuneqarnermilli pissarsisup’ ullut tamaasa Biibilimik atuaqqissaartarnermigut qinusarnermigullu qamuuna qanoq ittuunini misissoqqissaartarpaa. Naammalluinnanngitsuugaluarluni sapinngisani tamaat eqqarsaatini, kissaatini, misigissutsini inuunerminilu anguniagassani Guutip iluarisaanut naapertuuttunngortinniarsarisarpai. Taamaalilluni “inuunini asavaa”, tassa imminut iluaqutissippoq, ‘pilluaatissarsissallunilu’. — Uss 19:8.
25 Imminut ima aperigit: ‘Guutip najoqqutassiaasa eqqortuunerat qularutiginngilluinnarpara? Najoqqutassianik tamakkuninnga maleruaanerup pilluarnarnerpaanera upperilluinnarpara?’ (Tuss 19:8-11; Es 48:17, 18) Qularuteqalaaginnaruilluunniit iliuuseqapallagit. Guutip inatsisaanik unioqqutitsinerup kingunipilussai eqqarsaatigeqqissaakkit. Aamma sallusuissut naapertorlugu inuunikkut ineriartornartunillu — tassa ilumoortunik, iluartunik, minguitsunik, asanartunik nersornartunillu — eqqarsaatiginnittuarnikkut Jehovap ‘ajunngitsuunera usserlugulu takugiuk’. (Tuss 34:9; Fil 4:8, 9) Taamaaliorneq ilungersuutiginerugukku Guutimik asanninnerulissaatit, Guutillu iluarisai iluarinerulissallugillu taassuma uumigisai uumiginerulissavatit. Josefi uagutsitut ajortiliuvoq. ‘Kinguaassiuutitigulli assuarnartuliornermik qimarratiginnissinnaavoq’ ukiorpassuarni Jehovamit ilusilersortinneqarnermigut ‘siuneqarnermik pissarsigami’. Qanortoq aamma illit Jehovamit ilusilersortikkina. — Es 64:7.
26. Pingaarutilik suna sammissavarput?
26 Pinngortitsisitta kinguaassiuutit pinnguatut pinngortinngilai, inuilli katissimasut atoqatigiinnerminnik nuannaarutiginnissinnaaqqullugit meeqqiorsinnaaqqullugillu pinngortippai. (Uss 5:18) Kapitalini tulliuttuni marlunni Guutip aappariinnermut isiginnittaasia sammineqassaaq.
a Toqutaasut 24.000-t Mosesimik allakkat sisamaanni eqqartorneqartut tassaaginnanngillat Jehovap nammineq toqutai, aammali “inuit qullersaat” eqqartuussisunit toqutaasut ilagigunarpaat. ‘Inuimmi qullersaat’ 1000-usinnaapput. — 4 Mos 25:4, 5.
b “Minguttuuneq” (grækerisut: akatharsiʹa) aamma “kannguttaanneq” (grækerisut: aselʹgeia) qanoq paasisariaqarnersut uani sammineqarpoq: “Spørgsmål fra læserne”, Vagttårnet 15. juuli 2006-imoortoq, Jehovap Nalunaajaasuinit saqqummersinneqartoq.
c Atuakkami matumani “pornografii” allassimagaangat assit, atuakkat nipillu tiingasulersaarutit kinguaassiuutitigut pilerisulersitsinissamik siunertaqartut pineqartarput. Pornografii tassaasinnaavoq asseq inummik tiinganiarpasittumik takutitsisoq, aammali tassaasinnaavoq allaat asseq inunnik arlalinnik kanngunartorujussuarmik atoqatigiittunik takutitsisoq.
d Imminut inertittarneq qanoq ileqqoriunnaarneqarsinnaasoq tapiliussami “Imminut inertittarneq qanoq ileqqoriunnaarneqarsinnaasoq”-mi sammineqarpoq.
e ‘Anniarfik’ versini eqqartorneqartoq allassimaqqaarfiit grækerisuut naapertorlugit tassaavoq “Gehenna”, naassaanngitsumik toqunermut assersuutaasoq.