KAPITALI 20
Akerlilersuisoqaraluartoq ‘Jehovap oqaasia siammariartortuarpoq’
Qanoq Apulusip Paulusillu nutaarsiassat nuannersut inunnut amerlanerusunut paasitikkaat
Apustilit Suliaat 18:23–19:41 tunngavigalugit
1, 2. (a) Paulusikkut Efesossimi qanoq ulorianartorsiorpat? (b) Kapitalimi matumani suna sammissavarput?
EFESOSSIMIUT suaartaatigalutik aqqusinerni arpapput. Inuppassuit kamattut katersuussimapput, eqqissiviilliortoqalerporlu! Paulusip angalaqataasa ilaat marluk uniakalaaginnarlugit aallarunneqarput. Aqqusinersuaq pisiniarfeqarfiusoq inuerutipallappoq, tassaniittorpassuimmi inuppassuarnit kamaqisunit orninneqaramik tamarmiullutik isiginnaartitsivimmukarput – taanna ima angitigaaq inunnik 25.000-nik isiginnaartoqarsinnaalluni. Inuit katersorsimasut amerlanersaasa naluaat katersuunnerminnut suna pissutaanersoq. Isummerpulli guutisiorfitsik guutilu arnaq Artemissi ataqqingaagartik ajoquserneqariaannaasoq. Taamaattumik ima suaartaapput: “Efesossimiut Artemissiat pissaavoq!” – ApS 19:34.
2 Taamaalilluni Saatanip inuppassuit kamaqisut atorlugit nutaarsiassanik nuannersunik oqaluussineq unitsinniarsareqqippaa. Unitsikkumallugu nakuusernerup saniatigut aamma allanik periaaseqartarpoq. Kristumiut siulliit oqaluussinerannik ataasiussuseqarnerannillu akornusiiniarnermini Saatanip periaasiisa ilaat kapitalimi matumani sammissavagut. Pingaarnertut paasissavarput periaasiisa arlaannaalluunniit iluatsinngitsoq, “[Jehovammi] pissaanera pissutigalugu oqaasia siammariartortuarlunilu sunniuteqarnerujartortuarpoq”. (ApS 19:20) Taamani kristumiut qanoq suliartik ingerlattuarsinnaasimavaat? Jehovamit ikiorneqaramik. Soorlu nalitsinni taama ikiorneqartaratta oqaluussiuarsinnaallutalu ataasiussuseqartuarsinnaasugut. Kisianni kristumiut siulliit ilaarlugit uagut nammineerluta sapinngisatsinnik iliuuseqartariaqarpugut. Jehovap anersaavanit ikiorneqarluta pissuserineqartussanik oqaluussiuarnissatsinnut iluaqutigisinnaasatsinnik ineriartortitsisinnaavugut. Maanna Apulusip maligassiaa sammeriartigu.
“Allakkat Illernartut ilisimalluarpai” (ApS 18:24-28)
3, 4. Akviilap Priskiilallu Apulusi pillugu suna maluginiarpaat, aamma qanoq ikiorpaat?
3 Paulusi pingajussaanik oqaluussisartutut angalanermini Efesossiliartillugu juuteq Apulusimik atilik illoqarfimmut tassunga tikippoq. Taanna Egyptenimi illoqarfimmit ilisimaneqarluartumit Alexandriameersuuvoq. Apulusi immikkuullarissunik piginnaaneqarpoq. Oqallorissuuvoq ‘Allakkallu Illernartut ilisimalluarlugit’. Aamma ‘anersaamit illernartumit sunnerneqangaartarpoq’. Apulusip aallussilluarluni juutit synagogimiittut nakimaalluni oqaluussiffigisarpai. – ApS 18:24, 25.
4 Akviilap Priskiilallu Apulusi synagogimi oqaluttoq tusaavaat. Qularnanngitsumik nuannaarutigingaarpaat ‘Jiisusi pillugu eqqortumik oqalullunilu ilinniartitsisarmat’. Kisianni aappariit taakkua paasilerpaat Apulusi pingaarutilimmik paasinngitsuugaqarsimasoq. “[Imermut] morsutsitaaneq Johannesip oqaluussissutigisaa taamaallaat ilisimavaa.” Aappariit tupiliortartut maniguuttut Apulusip oqallorissuunera ilinniagaqarluarneralu iliuuseqarnissaminnut nangaassutigilinngilaat. Taanna “ilaliuppaat Guutillu aqqutigeqqusaanik eqqornerusumik nassuiaallugu”. (ApS 18:25, 26) Apulusi qanoq qisuariarpa? Tulliullugu iliuuserisaanit paasisinnaavarput kristumiup pissuserisinnaasaasa pingaarnerpaat ilaat pissuserigaa – tassa maniguuttuuvoq.
5, 6. Apulusip Jehovamit atorneqarluarnissaminut suna iluaqutigaa, taannalu qanoq ilinniarfigisinnaavarput?
5 Akviilap Priskiilallu ikiuinerat Apulusip akuerigamiuk Jehovamit atorneqarluarnerulerpoq. Akaarjamukarpoq tassanilu ilagiinnut ‘iluaqutaangaalerluni’. Juutit Jiisusip Missiarsiuneranik upperinninngitsut oqaluussiffigilluartarpai. Lukkarsi ima allappoq: “Juutit kukkunerat kikkut tamaasa tusaatillugit aalajangersimalluni uppernarsaqqissaartarpaa Allakkallu Illernartut atorlugit Jiisusip Kristusiuneranik paasitittarlugit.” (ApS 18:27, 28) Paasinarluarpoq sooq ilagiinnut taama iluaqutaatigisoq! ‘Jehovap oqaasiata’ siammariartortuarneranut siuarsaaqataavoq. Apulusi qanoq ilinniarfigisinnaavarput?
6 Maniguuttuuneq kristumiunut pingaaruteqarluinnarpoq. Tamatta assigiinngitsunik piginnaaneqarpugut – piginnaanerit ilaat inunnguuseraagut, allat ilinniartarpagut aamma aalajangersimasut pillugit ilisimasaqarsinnaalluta. Maniguuttuunerpulli piginnaasatsinnit allanit tamanit malunnarnerusariaqarpoq. Mianersunngikkutta makitasuunngorsinnaavugut, nukittuffigisagullu sanngiiffinngorsinnaapput. (Kor 1. 4:7; Jaak 4:6) Maniguuttuuguttali inoqatigut uagutsinnit pingaarnerusutut sapinngisatsinnik isiginiarsarissavagut. (Flp 2:3) Oqaaqqissaarneqarnerput ajuallaatigissanngilarput allaniilluunniit ilinniartinneqarnissaq itigartissanagu. Anersaap illernartup peqatigiiffipput aqqutigalugu allaanerusumik paasitippatigut nammineq isumarput aalajangiusimaniarsarissanngilarput. Maniguuttuujuarnissarput sulissutigigutsigu Jehovap erneratalu atortuarsinnaassavaatigut. – Luk 1:51, 52.
7. Paulusi Apulusilu maniguunnermi qanoq maligassaalluarpat?
7 Maniguukkutta allat sinngagissanngilagut. Takorloorsinnaavarput kristumiut siulliit avissaartuunnissaat Saatanip kissaatigingaaraa. Nuannaarutigingaassagaluarpaalu Apulusi Paulusilu, marluullutik sunniuteqarluartumik ilinniartitsillaqqissuusut, imminnut sinngagilerlutik ilagiinni sunniuteqarneruniukkaluarpata! Taamaattoqariaannaavorlu. Korintimimi qatanngutit ima oqartarput: “Uanga Paulusip ilinniartitaraanga.” Allallu oqarlutik: “Uanga Apulusip.” Paulusi Apulusilu avissaartuunnissamut kajumissaarisarpat? Naamik! Paulusip maniguulluni Apulusi suliassittarpaa oqaluussineralu pillugu nersualaartarlugu. Apulusilu Paulusimit ilitsersorneqarnermisut iliortarpoq. (Kor 1. 1:10-12; 3:6, 9; Tit 3:12, 13) Tassa Paulusi Apulusilu maniguullutik suleqatigiilluartaramik uagutsinnut maligassaalluarput!
“Guutip kunngeqarfia pillugu … qularunnaarnartumik tunngavilersuisarpoq” (ApS 18:23; 19:1-10)
8. Paulusi Efesossimut uternermini sukkoorpa, aamma sooq?
8 Paulusip Efesossimut uternissani neriorsuutigisimavaa, taamaaliorporlu.a (ApS 18:20, 21) Maluginiarulli sukkoornersoq. Kingullermik eqqartoratsigu Syriami Antiokiamiippoq. Aqqutissani naannersiorlugu ungasinngitsumiittumut Seluukiamukariarluni umiarsuarluni toqqaannartumik Efesossimukarsinnaagaluarpoq. Taamaaliornanili ‘nunap timaatigoorpoq’. Apustilit Suliaat 18:23 aamma 19:1 naapertorlugit Paulusip 1.600 kilometerit missaat angalasimasinnaavai! Sooq angalaffigiuminarnerusukkoorsimanngila? ‘Ilinniartitat tamaasa nakussatsittarnissaat’ siunertarigamiuk. (ApS 18:23) Siornatigut ilungersorsimanermisulli angalanermi pingajussaani ilungersussaaq. Kinguneqarluarnissaali ilimagigamiuk taamaaliornissaminut kajumissuseqarpoq. Nalitsinni ilagiinnik nakkutilliisut nuliaallu assingusumik isiginnittaaseqarput. Imminut pilliutigeriaannaallutik asanninnerat qujamasuutigeqaarput.
9. Sooq ilinniartitat ilaat imermut morsutsinneqaqqittariaqarpat, aamma tamatumannga suna ilikkarparput?
9 Paulusi Efesossimut tikikkami Johannesip imermut morsutsitsisartup ilinniartitaanik aqqaneq-marlunnik naapitsivoq. Johannesip imermut morsutsitsisartup ilinniartitsissutaa atuukkunnaarsimasoq tunngavigalugu imermut morsutsinneqarsimapput. Aamma anersaaq illernartoq pillugu paasisimasaqanngillat. Paulusip ilinniartitsissutit nutaanerpaat pillugit nassuiaappai, Apulusitullu maniguullutik ilinniarusussuseqarput. Jiisusip aqqani imermut morsutsitaareerlutik anersaamik illernartumik tunineqarput tupinnartuliornikkullu immikkut ittunik piginnaaneqalerlutik. Ersarippoq Jehovap peqatigiissortaasa ilitsersuussutaannik nutaanik maleruaarusuttut pilluaqquneqartartut. – ApS 19:1-7.
10. Sooq Paulusi synagogimi oqaluussisarunnaarluni ilinniarfiup inersuaani oqaluussisalerpa, uagullu oqaluussinitsinni qanoq ilaarsinnaavarput?
10 Taava siumukarnermik kinguneqartumik pisoqaqqippoq. Paulusi aallussilluarluni synagogimi qaammatini pingasuni oqaluussisarpoq. ‘Guutip kunngeqarfia pillugu qularunnaarnartumik tunngavilersuisaraluartoq’ ilaasa tusaajumanagu akerlilersulerpaat. “Aqqut narrunarsarlugu” oqaluttut piffissaajaatiginagit Paulusi ilinniarfiup inersuaani oqalugiartalerpoq. (ApS 19:8, 9) Taamaattumik anersaakkut siumukarusuttut synagogimiikkunnaarlutik ilinniarfiup inersuaanut tusarnaariartortariaqartarput. Uaguttaaq tusarnaarumanngitsunik oqqassaariniaannartunillu naapitaqaraangatta Paulusitulli oqaloqatigiunnaartarpagut. Inuit maniguuttut tusarliussassatsinnik qiimmaallannartumik tusarnaarnissaminnik pisariaqartitsisut oqaluussiffigerusunneruagut!
11, 12. (a) Paulusi eqiasuitsuunikkut naleqqusarsinnaassuseqarnikkullu qanoq maligassaalluarpa? (b) Uagut oqaluussinitsinni qanoq eqiasuillutalu naleqqussarsinnaassuseqartarpugut?
11 Imaassinnaavoq Paulusi ullut tamaasa aqqanerniit sisamat tungaanut ilinniarfiup inersuaani oqalugiartarsimasoq. (ApS 19:9; takuuk studienote qallunaatuuaniittoq, nwtsty-D). Ullup taamaalinerani kiannerpaaffiusarmat inuit amerlasuut suliunnaarlutik nerillutillu eqqissisimaartarput. Ukiuni marlunni taama sivisutigisumik Paulusi ullut tamaasa oqaluussisarsimaguni nalunaaquttap-akunneri 3.000-t sinnerlugit, tassa qaammammut akunnerit 125-t, oqaluussisarsimassaaq.b Tassa Jehovap oqaasiata siammariartortuarneranut pissutaaqataasoq tassaavoq Paulusip eqiasuilluni naleqqussarsinnaanera. Inuit amerlanerpaat ikiorumallugit taakkununnga piffissaalluarnerusukkut aamma sumiiffimmi allami oqaluussiumavoq. Qanoq kinguneqarpa? “Aasiamiut tamarmik, juutit grækerillu, Naalakkap oqaasia tusarpaat.” (ApS 19:10) Ilisimannittutut nassuiaallaqqissusia!
Inuit sumiikkaluartulluunniit sapinngisatsinnik oqaluussiffiginiartarpagut
12 Uagut aamma eqiasuitsuullutalu naleqqussarsinnaassuseqartarpugut. Inuit sumiikkaluartulluunniit qaqugukkulluunniillu sapinngisatsinnik naapinniartarpagut. Aqqusinerni, pisiniarfeqarfinni inoqarfiusunilu allani oqaluussisarpugut. Aamma inuit telefonikkut allakkatigullu tusarlerniartarpagut. Illumiillu illumut oqaluussinitsinni inuit angerlarsimanissaasa ilimanarnerpaaffianni naapinniartarpagut.
Anersaapiloqaraluartoq ‘Jehovap oqaasia siammariartortuarlunilu sunniuteqarnerujartortuarpoq’ (ApS 19:11-22)
13, 14. (a) Jehovap Paulusi susinnaanngortippaa? (b) Siivap ernerisa suna kukkussutigaat, aamma nalitsinni kristumiuunerartut amerlasuut assingusumik suna kukkussutigisarpaat?
13 Apustilit Suliaanni tulliulluni allassimavoq Paulusi aqqutigalugu Jehova ‘imaannaanngitsunik tupinnartuliortartoq’. Allaat annoraamerngit saaliaqutillu Paulusip atortarsimasai napparsimasunukaanneqaraangata taakku ajorunnaartarput. Aamma taamaaliornikkut anersaapilunnik anisitsisoqartarpoq.c (ApS 19:11, 12) Anersaapiluit anisinneqarnerat inuppassuit tupigusuutigaat, ilaasali nuannarinngilaat.
14 Juutit “angalallutik anersaapilunnik anisitsisartut ilaasa” Paulusip tupinnartuliai ilaarniarsarisarpaat. Jiisusip Paulusillu aqqi atorlugit anersaapilunnik anisitsiniartarput. Juutip palasip nuimasup Siivamik atillip erneri arfineq-marluk taamaaliortut ilagaat. Anersaapiluulli oqarfigai: “Jiisusi ilisarisimallugulu Paulusi nalunngilara, ilissili kikkuugassi?” Taamaalisorlu angutip anersaapilullip ilumoortuusaartut taakku uumasut nujuartat saassussisarnerattut saassullugit artorsartippai, tamarmillu atisaqaratik aqqunartitersimallutillu qimaapput. (ApS 19:13-16) Tamanna pissutigalugu kikkut tamarmik paasivaat Jehovap Paulusi pissaaneqartissimagaa, angutilli eqqunngitsumik upperisarsiortut taakku pissaaneqartinngikkai. Aamma nalitsinni inuit millionillit kukkullutik isumaqarput Jiisusip aqqa atorunikku kristumiuunerarunilluunniit Guutimit iluarisaasinnaallutik. Jiisusilli oqaasii naapertorlugit Jehovap piumasaanik iliortut kisimik siunissamut piviusumik neriuuteqarsinnaapput. – Mat 7:21-23.
15. Anersaarsiornermut tunngasumik pigisaqarluta paasigutsigu qanoq Efesossimiut ilaarsinnaavagut?
15 Paasinarsimmat Siivap erneri pissaaneeruttut inuppassuit kristumiunngorput anersaarsiorunnaarlutillu. Efesossimiut amerlasuut angakkuartartuupput. Serraneq, aarnussat atuakkallu angakkuarnermut tunngasut nalinginnaapput. Efesossimiorpassuit uppertunngorsimasut taakkua atuagaatitik angakkuarnermut tunngasut akisoorujussuugaluartut kikkut tamaasa isigitillugit ikuallappaat.d Nangilluni ima allassimavoq: “Jehovap pissaanera pissutigalugu oqaasia siammariartortuarlunilu sunniuteqarnerujartortuarpoq.” (ApS 19:17-20) Jehova guutisiortullu ilumoortut eqqunngitsumik upperisarsiortunut anersaapilussiortunullu ajugaarujussuarput! Inuit upperluartut taakku uagutsinnut maligassaalluarput. Aamma nalitsinni anersaarsiorneq nalinginnaavoq. Paasigutsigu anersaarsiornermut tunngasumik pigisaqarluta Efesossimiut ilaarlugit ingerlaannaq piuneerutissavarput! Qanorluunniit ajornakusoortigissagaluarpat ileqqut maajunnartut anersaarsiornermut tunngasut ingalassimaniartigit.
“Assut eqqissiviilliortoqalerpoq” (ApS 19:23-41)
“Angutit, nalunngilarsi tamakkuninnga nioqquteqarnerput pissutigalugu pigissaartugut.” – Apustilit Suliaat 19:25
16, 17. (a) Demetriusi Efesossimi qanoq eqqissiviilliortitsilersoq oqaluttuariuk. (b) Efesossimiut upperisarsiornikkut ingasaassinerat qanoq erserpa?
16 Oqaluttuami Saatanip inuppassuit kamattut qanoq atorsimanerai pillugu paasisaqalerpugut. Lukkarsi ima allappoq: “Aqqut pillugu assut eqqissiviilliortoqalerpoq.” Ingattarsinngilarlu.e (ApS 19:23) Sølvinik saffiooq Demetriusimik atilik eqqissiviilliortitsilerpoq. Suleqatini eqqaasippai aningaasarsiussagunik guutilianik pisisoqartariaqartoq. Taava oqarpoq Paulusip oqaluussissutigisaa aningaasatigut ajunaarutigissagaat, kristumiut guutilianik atuineq ajormata. Naggataatigut tusarnaartimi illoqarfimminnik nunaminnillu tulluusimaarutiginninnerat atorlugu oqarfigai inuit Paulusimut tusarnaarpata guutertik Artemissi guutisiorfillu taassumunnga pigititaq ‘suunngitsutut isigineqalersinnaasut’. – ApS 19:24-27.
17 Demetriusip oqaasii sunniuteqangaarput. Sølvinik saffiuut ima suaartalerput: “Efesossimiut Artemissiat pissaavoq!” Illoqarfimmiullu tamarmik paatsiveerupput, kapitalillu matuma aallaqqaataani allassimasutut pisoqarpoq.f Paulusi imminut pilliutigeriaannaalluni isiginnaartitsisarfimmut iserniaraluarpoq inuppassuit oqaluunniarlugit. Ulorianartorsiunnginniassammalli ilinniartitat nangartarpaat. Juutip Alexanderimik atillip inuppassuit taakku oqaluunniaraluarpai. Imaassinnaavoq juutit kristumiullu assigiinngissutaat nassuiarusukkaluaraa. Inuppassuilli tusarnaarumanngillat. Juutiunera paasigamikku akunnerni marlungajanni ima suaartaapput: “Efesossimiut Artemissiat pissaavoq!” Aamma nalitsinni taakkunatulli upperisarsiornikkut ingasaassisoqartarpoq. – ApS 19:28-34.
18, 19. (a) Efesossimi oqartussaassuseqarnerpaap inuppassuit kamattut qanoq eqqissisippai? (b) Oqartussaassusilinnit qanoq illersorneqartarsimavugut, aamma illersorneqarumalluta susinnaavugut?
18 Illoqarfimmi oqartussaassuseqarnerpaaq silatusaarluni inuppassuarnik eqqissisaavoq. Inuppassuit kamattut oqarfigai guutisiorfiannut guutiannullu arnamut kristumiut ajoqutaanavianngitsut. Aamma oqarpoq Paulusikkut guutisiorfimmut Artemissimut pigititamut pinerluttuliorsimanngitsut. Nangilluni eqqaasippai Paulusikkut iliuusii nuannarinngikkunikkit oqartussaasunut nalunaarutigeriaannaagaat. Tulliullugit oqaasii sunniuteqarnerpaagunarput, oqarfigaami Romamiut inatsisaat naapertorlugit pikitsitsinissaq siunertaralugu taamatut katersuuttoqaqqusaanngitsoq. Taama oqareerluni katersorsimasut qimagutitippai. Oqaasii paasiuminartut pissutigalugit inuppassuit kamaleriataarsimasut eqqissipallapput. – ApS 19:35-41.
19 Pisimasoq tamanna sioqqullugu inuit oqartussaassusillit silatusaartut Jiisusip ilinniartitaanik illersuisarsimapput, taamatullu ulluni kingullerni pisoqaqqittassaaq. Apustilimmi Johannesip takorluuisinneqarnikkut takuaa Jiisusip ilinniartitaanik Saatanip malersuisitsinera kuussuartut ittoq nunarsuup – tassa naalakkersuisut inatsisitigulluunniit oqartussaassusillit – iigaa. (Saqq 12:15, 16) Taamatullu pisoqarsimavoq. Eqqartuussisut ingasaassinianngitsut Jehovap Nalunaajaasuisa guutisioqatigiinniarlutik katersuussinnaatitaanerat nutaarsiassanillu nuannersunik allanut oqaluussisinnaatitaanerat illersortarsimavaat. Soorunami pissuserittuunissarput pingaaruteqarpoq. Paulusip pissuserinnera pissutigigunarlugu Efesossimi oqartussaassusillit ilaasa ataqqivaat isumannaatsuutikkusullugulu. (ApS 19:31) Uaguttaaq neriuutigisarparput unneqqarissuunerput pissuserinnerpullu pissutigalugit allanit ataqqineqartassasugut. Tamannami kinguneqarluarsinnaavoq.
20. (a) Jehovap oqaasiata kristumiut siulliit nalaanni nalitsinnilu siammariartortuarnera paasisaqarfigigaangakku qanoq misigisarpit? (b) Sunissat aalajangiusimaviuk?
20 Kristumiut siulliit nalaanni ‘Jehovap oqaasiata siammariartortuarlunilu sunniuteqarnerujartortuarsimanera’ paasisaqarfigalugu pissanganarpoq! Aamma nalitsinni Jehova ikiortigalugu assingusumik pisoqartarnera takullugu pissanganarpoq. Illit tamakkununnga siuarsaaqataarusussinnaavit? Taava maligassiuilluartut sammeriikkagut ilinniarfigisakkit. Maniguuttuujuarit, Jehovap peqatigiissortai siumukartuartut malinnaaffigikkit, eqiasuitsuugit, anersaarsiorneq ingalassimasaruk inuillu allat Jehovap innuttaanut ajunngitsumik isiginnittaaseqarniassammata sapinngisannik unneqqarissuugit ataqqinnittuullutillu.
a Takuuk ungalusaq “Efesossi – Aasiami illoqarfiit pingaarnersaat”.
b Paulusi Efesossimiitilluni Korintimiunut allakkani siulliit aamma allappai.
c Annoraamerngit eqqaaneqartut tassaasimasinnaapput Paulusip kiagulluni isimigut kuuffigitikkumanani qaaminut nermuttarsimasai. Aamma saaliaquteqartarneranit erserpoq Paulusi oqaluussinngikkaangami, immaqa ullaap tungaani, tupiliortutut sulisarsimagunartoq. – ApS 20:34, 35.
d Lukkarsi allappoq atuakkat taakku aningaasanik sølvinik 50.000-nik naleqartut. Denaari pineqarpat inuup ataatsip ulluni 50.000-ni, tassa ukiuni 137-ngajanni, ullut tamaasa suliguni akissarsiaanik naleqarput.
e Isumaqartoqarpoq Paulusip pisimasoq taanna eqqarsaatigigaa Korintimiut allaffigigamigit ‘toqunissani qulariunnaaraluarlugu’. (Kor 2. 1:8) Aammali imaassinnaavoq pisoq alla ulorianarnerusimasoq eqqarsaatigigaa. Paulusi allammat ‘Efesossimi uumasunik nujuartanik akiuisimalluni’ imaassinnaavoq isiginnaartitsivimmi uumasunik akiugaqarsimasoq. (Kor 1. 15:32) Kisianni aamma imaassinnaavoq inuit sakkortuumik akerlilersuisut pigai. Tassa naluarput sorleq pisimaneraa.
f Sulisartut peqatigiiffii imaluunniit kattuffii taamaattut sunniuteqangaartarput. Assersuutigalugu taamatut pisoqarneraniit ukiut 100-t missaat qaangiuttut Efesossimi iffiortut peqatigiiffiat assingusumik eqqissiviilliortitsivoq.