‘Nunarsuup isorpiaa tikillugu’

1. Kristumiut siulliit Jehovallu Nalunaajaasuisa suut assigiis­sutigaat?

AALLUSSIL­LUARLUTIK oqaluussipput. Anersaamit illernartumit ikiorneqarnertik siulersor­neqarnertillu maniguullutik akueraat. Malersor­neqarnertik unissutigin­ngilaat, Guutimillu pilluaq­quneqangaarput. Oqaaseqatigiinni taakkunani tamani kristumiut siulliit pineqarput, aamma nalitsinni Jehovap Nalunaajaasui pineqarsin­naalluarput.

2, 3. Apustilit Suliaat sooq immikkuul­larissuua?

² Apustilit Suliaat atuagaavoq pissanganartoq immikkuul­larissorlu! Jiisusimmi qilaliarnerata kingorna kristumiut siulliit suliaat Guutimit isumassarsiarititaasumik tassaniinnaq oqaluttuarineqarput. Qularnan­ngitsumik Biibilip atuagartaa taanna qiimmas­saatigalugulu uppernikkut nakussatsis­sutigisimassavat.

³ Apustilit Suliaanni inuit 95-it atii taaneqarput. Taakkulu nunanit 32-neersuupput, illoqarfinnit 54-ineersuupput qeqertanillu qulingiluaneersuullutik. Oqaluttuarineqartut ilagaat inuinnaat, eqqunngitsumik upperisarsiortut makitasuut, politikerit imminut pingaartittut malersuisullu ingasaas­siniartut. Pingaar­nerpaatulli illit uppeqatitit taamani inuusut oqaluttuarineqarput. Taakku nalingin­naasunik ajornar­torsiuteqar­taraluarlutik nutaarsiassanik nuannersunik aallussil­luarlutik oqaluus­sisarput.

4. Sooq misigivugut kristumiut siulliit qanimut attaveqarfigalugit?

⁴ Apustilit aallussil­luartut Petrusi Paulusilu, nakorsaq asasaq Lukkarsi, Barnaba tukkortoq, Steffaanusi qunusuitsoq, Tabitta inussiarnersoq, Lydia inoroorsaartoq oqaluus­sisartullu aalajaatsut allarpassuit ukiut 2.000-ngajaat matuma siorna inuupput. Taamaak­kaluartoq qanimut attaveqarfigalugit misigivugut. Sooq? Taakkunatulli Jiisusimik malinnit­tunngor­titsior­tornissaq suliarigatsigu. (Mat 28:19, 20) Tamatumani peqataasin­naanerput qujamasuutigingaarparput!

5. Kristumiut siulliit aallaqqaammut sumi oqaluussippat?

⁵ Jiisusip malinnitsiminut peqqussutaa una eqqarsaatigiuk: “[Anersaap] illernartup qulangerpasi nukimmik pissaasi, aamma Jerusalemmimi, Judiiami tamarmi, Samaariami nunarsuullu isorpiaa tikillugu uanga pillunga ilisiman­nittutut nassuiaassaasi.” (ApS 1:8) Siullertut, anersaamit illernartumit pissatsin­neqarlutik kristumiut “Jerusalemmimi” oqaluus­sisarput. (ApS 1:1–8:3) Taava anersaamit illernartumit siulersor­neqarlutik ‘Judiiami tamarmi Samaariamilu’ oqaluussipput. (ApS 8:4–13:3) Kiisalu ‘nunarsuup isorpiaa tikillugu’ nutaarsiassanik nuannersunik oqaluus­sisalerput. – ApS 13:4–28:31.

6, 7. Kristumiut siulliit piginngisaat suut nalitsinni oqaluus­sinermi atorsin­naavagut?

⁶ Uppeqativit taamani inuusut Biibilip ilaannaa atuarsin­naasarpaat. Matiusip iivangkiiliua aatsaat ukiup 41-p kingorna allallugu naammas­sineqarpoq. Ukiullu 61-ip missaani Apustilit Suliaat allallugit naammas­sineqarmata Paulusip allagaasa ilaannaat pissarsiarineqarsin­naareerput. Kristumiulli siulliit oqaluus­sinermi atugassaminnik nammineq Biibileqan­ngillat Biibililersaaruteqar­natillu. Kristumiun­ngunngik­kallaramik juutit Hebræerisut Allakkat Illernartut synagogimi atuffas­sissutigineqartut tusarnaar­tarpaat. (Kor 2. 3:14-16) Taakkuli aamma peqqissaarlutik atuaqqis­saartariaqarput, allassimaffiimmi alanngaarlugit issuartariaqaramikkit.

⁷ Nalitsinni amerlanersagut nammineq Biibileqarput Biibililersaaruterpas­suaqarlutillu. Nunani 240-ni allamiutut oqaasilinnut assigiin­ngitsorpas­suarnut nutaarsiassanik nuannersunik oqaluus­sisarpugut.

Anersaamit illernartumit pissatsin­neqarpugut

8, 9. (a) Anersaamit illernartumit pissatsin­neqarlutik Jiisusip ilinniartitai susinnaalerpat? (b) Guutip anersaava ikiortigalugu inussiaq aalajaallunilu silatooq sunik saqqummersitsisarpa?

⁸ Jiisusip ilinniartitani oqaluus­sinermik suliassik­kamigit ima oqarfigai: ‘Anersaap illernartup qulangerpasi nukimmik pissaasi.’ Guutip anersaavanit, tassa nukinganit sulisumit, siulersor­neqarlutik Jiisusip malinnittai nunarsuarmi tamarmi oqaluus­sisussan­ngorput. Anersaamit illernartumit pissatsin­neqarlutik Petrusi Paulusilu napparsimasunik ajorunnaarsitsisarput, anersaapilunnik anisitsisarput allaallu toqusunik makititsisarlutik. Anersaalli illernartup pissatsitsisarnera pingaar­nerusumik siunertaqarpoq. Tamannami iluaqutigalugu apustilit ilinniar­titallu inuit allat naassaan­ngitsumik inuuneqalis­sutigisin­naasaannik eqqoqqis­saartumik paasisimasaqalersitsisin­naapput. – Joh 17:3.

⁹ Ukiumi 33-mi ullormi piinsimi Jiisusip ilinniartitai “anersaamik illernartumik peqangaalerput … oqaatsit assigiin­ngitsut atorlugit oqalulerlutik”. “Guutip pissaalluni suliai pillugit” oqaluussipput. (ApS 2:1-4, 11) Nalitsinni tupinnar­tuliornikkut allamiutut oqalussin­naalerneq ajorpugut. Guutilli anersaava iluaqutigalugu inussiaq aalajaallunilu silatooq oqaatsini assigiin­ngitsorpassuarni Biibililersaarutinik saqqummersitsisarpoq. Assersuutigalugu Napasuliaq Alapernaarsuiffik aamma Iteritsi! millionilik­kuutaan­ngorlugit qaammatit tamaasa naqiter­neqartarput. Nittartak­katsinnilu, jw.org-imi, Biibili pillugu atuagassiat isiginnaagassiallu oqaatsit 1.000-t sinnerlugit saqqummertarput. Tamakku iluaqutigalugit inuit inuiaqatigiinnit, naggueqatigiinnit inuiannillu tamaneersut qanorluunniillu oqaasillit “Guutip pissaalluni suliai pillugit” oqaluus­siffigisin­naavagut. – Saqq 7:9.

10. 1989-imiilli Biibilimik nutserinermut tunngatillugu sumik angusaqarsimavugut?

¹⁰ 1989-imiilli inussiap aalajaallunilu silatuup pingaar­tissimavaa Biibili – Nunarsuup nutaanngor­nissaanik nutsikkap oqaatsinut assigiin­ngitsorpas­suarnut nutserneqarnissaa. Oqaatsinut 300-nit amerlanerusunut nutserneqareersimavoq aamma 240 millioninit amerlanerusun­ngorlugu naqiter­neqareerluni – sulilu amerlanerusun­ngorlugu naqiter­neqarumaarpoq. Taamaallaat Guutimit anersaavanillu ikiorneqaratta taama angusaqar­tigisin­naavugut.

11. Biibililersaarutigut kikkunnit nutserneqartarpat?

¹¹ Nunani 150-init amerlanerusuni nammineq kajumis­sutsiminnik tuusintilinnik nutserisoqarpoq. Tamanna tupigusuutigin­ngilarput, peqatigiis­sortagummi kisiartaallutik anersaamit illernartumit siulersor­neqarput. Taamaattumik nunarsuaq tamakkerlugu Jehova Guuti, kunngi Missiarsiusoq Kunngeqarfillu qilammiittoq pillugit oqaluus­siuarsin­naavugut! – ApS 28:23.

12. Paulusi kristumiullu allat suna iluaqutigalugu oqaluus­sisinnaasimappat?

¹² Paulusi Antiokiami Pisiidiamiittumi juutinut allamiunullu oqaluussimmat “[eqqortumik] pissutiginiagaqarlutik naassaan­ngitsumik inuuneqalerusuttut tamarmik uppertun­ngorput”. (ApS 13:48) Apustilit Suliaasa naaneranni allassimavoq Paulusi ‘sapeeqaluni akornuser­neqarnanilu Guutip kunngeqarfia pillugu oqaluussisoq’. (ApS 28:31) Sumi oqaluussiva? Romami – taamani naalagaaf­fissuup nunarsuarmi pissaaneqar­nerpaasup illoqarfiisa pingaar­nersaani! Oqalugiarnikkut allatigul­luunniit oqaluus­sigaluarunik kristumiut siulliit anersaamit illernartumit siulersor­neqaramik pissatsin­neqaramillu oqaluus­sisinnaapput.

Malersor­neqaraluarluta pinertusaarpugut

13. Sooq malersor­neqarnermi qinusassaagut?

¹³ Kristumiut siulliit malersor­neqaramik sapiissusermik tuneqqullutik Jehovamut qinupput. Qanoq kinguneqarpa? Anersaamit illernartumit sapiissuseqar­tinneqaramik Guutip oqaasia qunusuillutik oqaluus­sissutigaat. (ApS 4:18-31) Uaguttaaq malersor­neqarnermi oqaluus­siuarnias­sagatta ilisimassuseq nakussatsin­neqarnis­sarpullu qinnutigisarpagut. (Jaak 1:2-8) Anersaaq illernartoq aqqutigalugu Jehovamit ikiorneqaratta taassumunnga kiffartor­tuarsin­naavugut. Oqaluus­sinerput unitsin­neqarsin­naanngilaq – allaat akerlilersor­neqangaaraluarutta peqqarniitsumil­luunniit malersor­neqaraluarutta. Malersor­neqarnermi nutaarsiassanik nuannersunik oqaluus­siuarnias­sagatta anersaamik illernartumik, ilisimas­susermik sapiissuseqar­nermillu tuneqqulluta qinusar­nissarput pisariaqar­tipparput. – Luk 11:13.

14, 15. (a) “Steffaanusip toqutaanerata kingorna annikil­liortitaaneq pissutigalugu” qanoq pisoqarpa? (b) Nalitsinni Sibiriamiorpassuit qanoq ilumoortumik Biibilimeersumik ilisimasaqalerpat?

¹⁴ Steffaanusi toqunneqalerami sapiissuseqarluni ilisiman­nittutut nassuiaavoq. (ApS 6:5; 7:54-60) Taamani ‘assut malersugaaleramik’ ilinniartitat tamarmik, apustilit kisimik pinnatik, Judiiamut Samaariamullu tamarmut siammar­titaapput. Taamaak­kaluartoq oqaluussineq uninngilaq. Fiilippi Samaariamukarpoq kinguneqarluar­tumillu ‘Kristusi pillugu oqaluus­silluni’. (ApS 8:1-8, 14, 15, 25) Aamma taamani pisut pillugit ima allassimavoq: “Steffaanusip toqutaanerata kingorna annikil­liortitaaneq pissutigalugu siammar­titaasut allaat Fønikiamut, Cypernimut Antiokiamullu pipput, tusarliussarli juutinuinnaq oqaluus­sissutigaat. Taakkuali ilaasa Cypernimiut Kyrenemiullu Antiokiamut pisut Naalagaq Jiisusi pillugu nutaarsiassat nuannersut grækerisut oqaasilinnut oqaluus­sissutigilerpaat.” (ApS 11:19, 20) Tassa taamanikkut malersor­neqarneq pissutigalugu siammasin­nerusumik oqaluus­sisoqar­talerpoq.

¹⁵ Nalitsinni assingusumik Sovjetunionimi pisoqarsimavoq. Jehovap Nalunaajaasui tuusintillit ingammik 1950-ikkunni Sibiriamut pinngitsaalineqarlutik nuutsin­neqarput. Illoqarfeeqqanut assigiin­ngitsunut siammar­titaammata nutaarsiassat nuannersut nunami isorartoorsuarmi tamatumani oqaluus­sissutigineqalerput. Nalunaajaasut taama amerlatigisut nutaarsiassat nuannersut oqaluus­sissutiginiarlugit 10.000 kilometerit tikillugit angalanis­saminnut akissaqarsimanavian­ngillat! Naalakkersuisunilli nuutsin­neqaramik taamaaliorsin­naanngorput. Qatanngut angut ima oqarpoq: “Oqartussaasut inuit Sibiriamiut eqqortuliorusuttut tuusintillit ilumoortoq Biibilimeersoq pillugu ilisimasaqaler­nissaannik periarfis­sippaat.”

Jehovamit pilluaq­quneqangaarpugut

16, 17. Jehovap oqaluus­sinermik pilluaq­qusisarnera Apustilit Suliaanni qanoq ersersin­neqarpa?

¹⁶ Kristumiut siulliit Jehovamit pilluaq­quneqarnerat erseqqippoq. Paulusi allallu ilumoortumik Biibilimeersumik ikkussuil­lutillu imerteripput, “Guutili naajartor­titsiuarpoq”. (Kor 1. 3:5, 6) Jehovap oqaluus­sinermik pilluaq­qusinera pissutigalugu inuppassuit uppertun­ngornerat Apustilit Suliaanni allaaserineqarpoq. Assersuutigalugu “Guutip oqaasia siammariar­tortuarpoq Jerusalemmimilu ilinniartitat amerliar­tupiloorlutik”. (ApS 6:7) Oqaluus­sinerup siammarnerata kingunerisaanik “Judiiami, Galiliiami Samaariamilu tamarmi ilagiit pissutsit atukkatik eqqissisimanarsimmata ineriar­tulerput. Jehova mianeralugu kiffartorfigaat, anersaamit illernartumit nakussatsin­neqartarput amerliar­tortuarlutillu.” – ApS 9:31.

¹⁷ Antiokiami Syriamiittumi juutit grækerisullu oqaasillit oqaluus­sisartunit sapiitsunit ilumoortoq Biibilimeersoq pillugu tusagaqarput. “Jehovallu tapersersorpai, amerlangaartullu uppertun­ngorlutillu Naalakkamut saapput.” (ApS 11:21) Illoqarfimmiut taakku pillugit aamma ima allassimasoqarpoq: “[Jehovap] oqaasia siammariar­tortuarmat uppertut amerliar­tuinnarput.” (ApS 12:24) Aamma Paulusi allallu juutiun­ngitsunut oqaluus­sisarmata “Jehovap pissaanera pissutigalugu oqaasia siammariar­tortuarlunilu sunniuteqar­nerujar­tortuarpoq”. – ApS 19:20.

18, 19. (a) Qanoq nalunngilarput ‘Jehovamit tapersersor­neqartarluta’? (b) Jehovap innuttaminik ikiuisar­neranik assersuuteqarit.

¹⁸ Aamma nalitsinni ‘Jehovamit tapersersor­neqarpugut’. Tamanna pissutigalugu uppertun­ngorlutik Guutimullu tunniul­luinnarlutik imermut morsutsin­neqartut amerlapput. Aamma aatsaat Guutimit ikiorneqarlutalu pilluaq­quneqaratta akerlilersor­neqangaarnermi – ilaannikkullu malersor­neqangaarnermi – Paulusi kristumiullu siulliit ilaarlugit pinertusaarsin­naavugut oqaluus­siuarsin­naallutalu. (ApS 14:19-21) Jehovap Guutip ikiortuas­savaatigut. Annikil­liornitsinni tamani Jehovap ‘taliisa ittuinnartut’ najummiuas­savaatigut. (Mos 5. 33:27) Aamma eqqaamajuartigu atini naalannangaartoq pissutigalugu Jehovap innuttani imminiin­ngisaan­nassagai. – Sam 1. 12:22; Tuss 94:14.

¹⁹ Jehovap innuttaminik ikiuisar­neranik assersuuteqariarta: Sorsunnersuup kingulliup nalaani qatanngut Harald Abt oqaluus­siuarami nazistinit Sachsenhausenimi tigusanut inissiarsuarmi parnaarus­saatinneqarpoq. 1942-mi maajimi nulia, Elsa, politiit parnaarus­saatippaat paninnguallu allamukaallugu. Elsa tigusanut inissiarsuarnut assigiin­ngitsunut nuutsin­neqartarpoq. Ima oqarpoq: “Nazistit tigusanut inissiarsuaataan­niinnera pingaarutilimmik ilinniarfigaara. Sakkortuumik misilin­neqartilluta Jehovap anersaavanit qanoq nakussatsin­neqartigisin­naanerluta ilikkarpara! Suli parnaarus­saatinnanga qatanngutip arnap allagai atuarnikuuakka, tassanilu allassimavoq sakkortuumik misilin­neqartilluta Jehovap anersaavata immikkut ittumik eqqissisit­taraatigut. Taamani eqqarsarpunga ingattarsertoq. Namminerli sakkortuumik misilin­neqalerama allataasa ilumoornerat paasivara. Ilumuuippormi. Nammineq misiginikuun­ngikkaanni takorlooruminaappoq. Kisianni uanga nammineq misigaara.”

Oqaluus­siuarit!

20. Paulusi illumini parnaarus­saatilluni sua, uppeqatittalu ilaannut tamanna qanoq qiimmas­saataasinnaava?

²⁰ Apustilit Suliaasa naaneranni allassimavoq Paulusi aallussil­luarluni ‘Guutip kunngeqarfia pillugu oqaluus­sisartoq’. (ApS 28:31) Illumini parnaarus­saagami Romami illumiit illumut oqaluus­sisinnaanngilaq. Imminulli orniguttunut tamanut oqaluus­siuarpoq. Nalitsinni uppeqatitta ilaat utoqqalinertik, napparsimanertik innarluuteqar­nertilluunniit pissutigalugu angerlarsimaan­nartuupput – immaqa allaat siniffim­minniit makissin­naanatik – ilaallu utoqqaat illuanniillutik. Jehovamilli asanninnerat nillertis­simanngilaq oqaluus­siuarusuppullu. Taakkuninnga qinnussinitsinni qinnutigisin­naavarput Jehova neriorsuutaalu nuannersut pillugit paasisaqarusuttunut attaveqalissasut.

21. Sooq oqaluus­sinerput nukinginnarpa?

²¹ Amerlanersagut illumiit illumut oqaluus­seriaatsillu allat atorlugit oqaluus­sisinnaapput. Taamaattumik sapinngisatsinnik Kunngeqarfik pillugu oqaluus­siuarta ‘nunarsuup isorpiaa tikillugu’. Suliaq tamanna nukinginnarpoq, Kristusimmi najuunneranut ilisarnaat ersaril­luinnarmat. (Mat 24:3-14) Piffissarput atorluarlugu ‘Naalakkamut kiffartornermi ulapputeqar­tuarpugut’. – Kor 1. 15:58.

22. Jehovap ullussaa utaqqitillugu sunissarput aalajangiusimas­savarput?

²² Jehovap ‘ullussaata angeqisup siooranangaaqisullu’ nalliunnissaa utaqqitillugu sapiilluta aalajaallutalu oqaluus­siuarta. (Joel 3:4) Beruuamiut assigalugit ‘Guutip oqaasianik kajumingaarlutik upperin­nilersut’ suli amerlanerit nassaaris­savagut. (ApS 17:10, 11) Suliatta naammas­sinissaata tungaanut oqaluus­siuarutta ima oqarfigineqas­saagullusooq: “Inussiaq ajunngitsoq aalajaatsorlu, pikkoreqaatit!” (Mat 25:23) Maanna Biibilimik ilinniar­titsineq aallussil­luarluta peqataaf­figiuarutsigu Jehovamullu aalajaat­tuarutta, Guutip kunngeqarfia pillugu nalitsinni oqaluus­siuarsimanerput qaqugorsuarmut nuannaarutigis­savarput!