Missiarsi tikiuppoq

JEHOVAP inuit Missiarsip neriorsuutigisap kinaaneranik paasinninnissaannut ikiussavai? Aap. Qanoq taamaaliornersoq misissoriartigu. Allakkat Hebræerisuut naammassineqarneranniit ukiut 400-t missiliorlugit qaangiutereerput. Illoqarfimmi Nazaretimi Galilæamiittumi arnaq inuusuttoq Mariamik atilik tupaallannarnerpaamik pulaartoqarpoq. Inngilip Gabrielimik atillip saqqummerfigaa oqaluttuullugulu Guutip nukini sulisoq, anersaani illernartoq, atorlugu naartulersissagaa ernertaassasorlu, angummik ilaqarsimanngikkaluartoq. Erneq taanna tassaalissaaq kunngi qanganiilli neriorsuutigisaq naassaanngitsumik naalakkersuisussaq! Meeraq taanna Guutip nammineq ernerissavaa, inuunera qilammit Mariap illiaanut nuullugu.

Maria imminut suliassiissutigineqartumut pingaaruteqarluinnartumut maniguulluni akuersivoq. Uissaata, sanasup Josefimik atillip, Mariap qanoq naartulersimaneranik inngili aqqutigalugu Guutimit uppernarsaavigineqarnermi kingorna katippaa. Missiarsimmi Betlehemimi inunngornissaa pillugu siulittuut? (Mika 5:1) Illoqarfeerarmi taanna 140 kilometerit sinnerlugit ungasitsigaaq!

Naalakkersuisoq Romamiu peqqusivoq inuit kisinneqassasut illoqarfimmilu inunngorfigisaminni allatsissasut. Josefi Marialu marluullutik Betlehemimit kingoqqisuugunarput, Josefillu nuliani naartusoq Betlehemiliaqatigaa. (Lukasi 2:3) Maria nersutaasivinnguami ernivoq, naalungiarsullu nersutaatit nerisarfiannut ilivaa. Taava Guutip inngilerpassuit savanik paarsisorpaalunnut narsaammiittunut nalunaariartortippai meeraq inoorlaaq tassaasoq Missiarsi, imaluunniit Kristusi, neriorsuutigisaq.

Kingusinnerusukkut aamma allanit uppernarsarneqartussaavoq Jiisusi tassaasoq Missiarsi neriorsuutigisaq. Pruffiitip Esajap siulittuutigisimavaa angut Missiarsip suliassaanut pingaarutilimmut aqqutissiuussisussaq saqqummerumaartoq. (Esaja 40:3) Aqqutissiuussisussaq taanna tassaavoq Johannesi Kuisisoq. Taassuma inuk Jiisusi takugamiuk ima nillerpoq: “Aajuna Guutip savaaraa silarsuup ajortaanik nammattoq.” Johannesip ajoqersugaasa ilaasa ingerlaannaq Jiisusi malilerpaat. Taakkualu ilaat ima oqarpoq: “Missiarsi naapipparput.” — Johannesi 1:29, 36, 41.

Suli allanik takussutissaqarpoq. Johannesip Jiisusi kuimmagu Jehova qilammit oqaluppoq. Anersaaq illernartoq iluaqutigalugu Jiisusi Missiarsitut toqqarpaa imalu oqarluni: “Tassa ernera asasara, nuannarisara.” (Matthæusi 3:16, 17) Missiarsi qangaaniilli neriorsuutigisaq tikiuppoq!

Qanga tamanna piva? Ukiumi 29-mi, ukiut 483-it Danielip siulittuutigisai qaangiuttullu. Aap, tamanna Jiisusip Missiarsiuneranut, imaluunniit Kristusiuneranut, uppernarsaaterpassuit ilagaat. Nunarsuarmiinnerminili tusarliussaq suna oqaluussissutigissavaa?

— Tunngavigineqartut: Matthæusi kapitalit 1-3; Markusi kapitali 1; Lukasi kapitali 2; Johannesi kapitali 1.