Samueli eqqortuliortuaannarpoq

Samueli meeraanerminiilli tupermi naapeqatigiittarfimmi najugaqarlunilu sulivoq. Taamani inuit tupermi naapeqatigiittarfimmi Jehova pallorfigisarpaat. Samueli qanoq tassani najugaqalernersoq nalunngiliuk? Samuelip anaanaa pillugu paasisaqaqqaariarta.

Samuelip anaanaa Hannamik ateqarpoq. Taanna meerartaarusungaaraluarluni piffissami sivisuumi naartulersimanngilaq. Taamaattumik Jehovamut ikioqqulluni qinuvoq. Hanna Jehovamut neriorsuivoq ernertaassaguni taanna tupermi naapeqatigiittarfimmi suliniassammat tassani najugaqartikkumallugu. Hannap qinnutaa Jehovap akivaa, Hannalu ernertaarpoq. Samuelimik atserpaa. Hannalu neriorsuinermisut iliorpoq. Samueli pingasunik sisamanilluunniit ukioqartoq Guuti kiffartuunniassammagu Hannap tupermut naapeqatigiittarfimmukaappaa.

Tupermi naapeqatigiittarfimmi Eli palasiuneruvoq. Aamma erneri marluk tassani palasiupput. Soorlu tusareeripput tupermi naapeqatigiittarfimmi inuit Guutimik pallorfiginnittarput, taamaattumillu inuit tassaniittut eqqortumik iliortussaapput. Kisianni Elip erneri ajortorujussuarmik iliortarput. Samuelip taakku ajortuliortartut nalunngilaa. Samueli Elip ernerisut ajortuliortarpa? — Naamik, Samueli angajoqqaaminit ilinniartinneqarnermisut eqqortuliortuaannarpoq.

Elip ernini marluk ajortuliortartut qanoq iliorfigisimassagaluarpai? Qanoq isumaqarpit? — Ilumut, pillarsimassagaluarpai. Guutimik pallorfiginnittarfimmiit anisissimassagaluarpai. Kisianni taamaaliunngilaq. Taamaattumik Jehovap Eli ernerilu marluk kamaappai. Jehovalu aalajangerpoq taakku pillarniarlugit.

Unnuit ilaanni Samueli iterpoq ima oqartoqarpaluttoq: ‘Samueli!’ Arpaannaq Elimukarpoq, kisianni Eli ima oqarpoq: ‘Qaaqqunngilakkit.’ Tamannalu pingasoriarluni pereermat Elip Samueli qaaqquneqaqqissappat ima oqaqquaa: ‘Jehova, oqalugit; tusarnaarpunga.’ Samuelilu qaaqquneqaqqikkami taamatut oqarpoq. Taava Jehovap Samueli ima oqarfigaa: ‘Eli oqarfigiuk ilaqutai ajortuliorsimammata pillassagikka.’ Isumaqarpit Samuelip Eli taamatut oqarfiginissaa sapernartikkaa? — Aap, sapernartissimassavaa. Annilaangagaluarlunili Jehova naalappaa. Jehovap oqarneratut pisoqarpoq. Elip erneri marluk toqutaapput, aamma Eli toquvoq.

Samueli maligassaalluarpoq. Naak inuit ajortuliortut akornanniikkaluarluni Samueli eqqortuliortuaannarpoq. Illimmi, Samueli assigalugu tamatigut eqqortuliorusuppit? Eqqortuliortuaruit Jehova angajoqqaatillu nuannaartissavatit.