Daavi ersilinngilaq

Ersileraangavit qanoq iliortarpit? — Immaqa ikioqqullutit anaanat ataatallu ornittarpatit. Kisianni aamma allap ikiorsinnaavaatit. Taanna allanit tamanit pissaaneqarnerpaajuvoq. Nalunngiliuk kinaanersoq? — Aap, tassa Jehova. Angut inuusuttoq Daavimik atilik Biibilimi oqaluttuarineqarpoq. Taanna ilinniarfigisigu. Daavi ersinngilaq nalunnginnamiuk tamatigut Jehovap ikiorumaaraani.

Daavi naalungiarsuusorli angajoqqaavisa Jehovamik asannittuunissaanik ilinniartippaat. Ilinniartinneqarninilu ersilinnginnissaminut iluaqutigisarpaa ersinartunik pisoqaraluarpalluunniit. Daavip Jehova ikinngutigigamiuk nalunngilaa Jehovamit ikiorneqarumaarluni. Ullut ilaanni Daavi savanik paarsitillugu løverujussuaq aggerpoq, savalu ataaseq uniarlugu aallaruppaa. Taava Daavi qanoq iliornersoq nalunngiliuk? Løveq malersorpaa assaannarminillu toqullugu! Ullorlu alla nanoq savanik saassussimmat Daavip aamma taanna toquppaa! Daavi kimit ikiorneqarsoraajuk? — Aap, Jehovamit ikiorneqarpoq.

Aamma pisumi allami Daavi sapiitsuliorpoq. Israelikkut inuiaallu filisterinik taaneqartut imminnut sorsuupput. Filisterit sakkutuuisa ilaat inorujussuuvoq angisoorujussuaq! Goliatimik ateqarpoq. Goliatip Israelikkut sakkutuui aamma Jehova illaruaatigai sakkutuullu unammillerlugit. Israelikkulli tamarmik Goliati qunugigamikku iliuuseqanngillat. Daavip tamanna tusaramiuk Goliati ima oqarfigaa: ‘Uanga akiussavakkit! Jehovap ikiorumaarmanga ajugaaffigissavakkit!’ Daavi sapiippa? — Aap, sapiitsorujussuuvoq. Taava qanoq pisoqarnersoq tusarusuppiuk?

Daavip illusaatini ujaqqallu manissut tallimat tigoriarlugit inorujussuaq ornippaa. Goliatip Daavi qanoq inuusutsigisoq takugamiuk illaruaatigaa. Daavilli oqarfigaa: ‘Illit ornipparma panaqarlutit, kisianni uanga ornippakkit Jehovap aqqani!’ Taava illusaatiminut ujaqqamik ikiseriarluni Goliatip tungaanut arpaatigaluni tamaviannguat illusariarpaa. Daavillu Goliati isaata qulaatigut toqqutigisaanik eqqorpaa! Filisterit ersingaaleramik tamarmik qimarrapput. Daavip taama inuusutsigaluni inorujussuaq qanoq ajugaaffigisinnaavaa? — Jehovamit ikiorneqarami, Jehovalu inorujussuarmiit pissaaneqarnerungaarpoq!

Daavi pillugu oqaluttuaq qanoq ilinniarfigisinnaaviuk? — Jehova kikkunnit tamanit pissaaneqarnerpaajuvoq. Jehovalu illit ikinngutigivat. Taamaattumik tulliani ersileruit eqqaamajuk Jehovap sapiillinissannut ikiorsinnaagaatit!