Jiisusi naalattuaannarpoq

Ilaannikkut angajoqqaannut naalannissat sapernartittarpiuk? — Tamanna ilaannikkut sapernarsinnaavoq. Nalunngiliuk Jiisusi Jehovamut aamma angajoqqaaminut naalattoq? — Angajoqqaannut naalannissat sapernartittarukku Jiisusip maligassiaa iluaqutigisinnaavat. Tamanna sammeriartigu.

Jiisusip nunarsuarmukannginnermini Ataatani, Jehova, qilammeeqatigaa. Kisianni Jiisusi maani nunarsuarmi aamma angajoqqaaqarpoq. Taakku Josefimik Mariamillu ateqarput. Qanoq Jiisusimut angajoqqaanngornersut nalunngiliuk? —

Soorlu naalungiarsuk anaanami naavani allisartoq taamatuttaaq Jehovap tupinnartuliornikkut Mariap naavani Jiisusi allitippaa. Qaammatit qulingiluat qaangiummata Jiisusi maani nunarsuarmi inunngorpoq. Josefi Marialu Jiisusimut taamatut angajoqqaanngorput.

Jiisusi aqqaneq-marlunnik ukioqarluni Ataataminik, Jehovamik, asanningaarnerminik ersersitsisumik iliuuseqarpoq. Tamanna pivoq Jiisusi ilaquttanilu Jehova pallorfiginiarlugu Jerusalemimut angalammata. Angerlarnerminni Josefip Mariallu Jiisusi tammaavaat. Sumiinnersoq nalunngiliuk? —

Jiisusi ujarniarlugu Josefi Marialu Jerusalemimut utipallapput. Nanisinnaannginnamikku annilaangalerput. Ullulli pingasut qaangiummata naalaffimmi nanivaat! Sooq Jiisusi naalaffimmiittoq nalunngiliuk? — Tassani Ataatani, Jehova, pillugu ilinniarsinnaagami. Jehova asavaa, paaserusuppaalu qanoq nuannaartissinnaallugu. Jiisusi inersimasunngorami suli Jehovamut naalattuarpoq. Tamanna sapernartikkaluarlugu naalliutsitaagaluarlunilu Jiisusi naalattuaannarpoq. Jiisusip aamma Josefi Marialu naalattarpai? — Aap, Biibilimi allassimavoq naalattartoq.

Jiisusi qanoq ilinniarfigisinnaaviuk? — Sapernartikkaluarlugu angajoqqaatit naalattariaqarpatit. Naalakkusuppigit? —