Timotheusi inunnik ikiuerusuppoq

Timotheusi angutaavoq inuusuttoq inunnik ikiuiumatooq. Inuit ikiorniarlugit angalaqattaartarpoq. Taamaattumik inuunera pissanganartuuvoq. Timotheusip inuunera pillugu tusagaqarusuppit? —

Timotheusi illoqarfimmi Lystramik taaneqartartumi peroriartorpoq. Timotheusi mikisuunerminiilli aanaminit Loisimit anaanaminillu Eunikemit Jehova pillugu ilinniartinneqarpoq. Timotheusip peroriartorluni inuit allat Jehovamik ilinniarnissaannut ikiorusulerpai.

Timotheusi suli inuusuttuusoq Paulusip nunanut allanut oqaluussiartoqatigerusunneraani aperaa. Timotheusillu ima akivaa: ‘Aap, aallarusuppunga!’ Inunnik allanik ikiuerusukkami aallarnissaminut piareeqqavoq.

Timotheusi Paulusi ilagalugu Grækenlandimut illoqarfimmut Thessalonikamik taaneqartartumut aallarpoq. Thessalonikamut apuunniarlutik sivisuumik pisuttariaqarlutillu umiarsuartariaqarput. Kiisamilu apuukkamik inuppassuit Jehova pillugu ilinniartinniarlugit ikiulerpaat. Thessalonikamiulli ilaasa Paulusikkut kamaallugillu ajortumik piniarsaraat. Taamaattumik Paulusip Timotheusillu illoqarfik qimattariaqarpaat, oqaluussiniarlutillu allamukarput.

Qaammatialuit qaangiummata Paulusip qatanngutit qanoq innersut paaserusukkamiuk Timotheusi Thessalonikamut uteqquaa. Timotheusi illoqarfimmut ulorianar­torsior­figinikuu­saminut utissaguni sapiingaar­tariaqarpoq! Qatanngutilli Thessalonikamiittut qanoq innersut eqqarsaatigi­gamiuk Timotheusi uterpoq. Paasivaa Thessalonikamiittut ajunngingaartut! Timotheusilu Paulusimut uterami tamanna pillugu oqaluttuarpoq.

Timotheusip Paulusi ukiorpassuarni suleqatigaa. Ilaanni Paulusi allappoq ilagiit ikiorniarlugit aallartissin­naasaminit Timotheusi pitsaanerpaasoq. Timotheusi Jehovamik inunnillu asannittuuvoq.

Illimmi, inuit asallugillu Jehovamik ilinniarnissaannut ikiorusuppigit? — Taamaappat Timotheusitut nuannersumik pissanganartumillu inuuneqalersinnaavutit!