Naalagaaffik nunarsuarmut tamarmut naalakkersuisussaq

Naalagaaffik sorleq pineqarnersoq eqqoriarsinnaaviuk? — Aap, tassaavoq Guutip naalagaaffia nunarsuarmik paratiisinngortitsiumaartoq. Guutip naalagaaffia pillugu paasisaqarusuppit? —

Naalagaaffinni tamani kunngeqarluniluunnit naalagaqartarpoq nunamini innuttaminut naalakkersuisartumik. Guutip naalagaaffiani kunngi kinaanersoq nalunngiliuk? — Tassaavoq Jiisusi Kristusi qilammi inngiliusoq. Qanittumilu inunnut nunamiittunut tamanut kunngiussaaq! Isumaqarpit Jiisusi nunarsuarmut tamarmut kunnginngorpat pilluassasugut? —

Ilumut, pilluangaassaagut! Paratiisissami inuit kamaattarunnaarlutillu sorsukkunnaassapput. Tamarmik asaqatigiissapput. Napparsimalersoqarnanilu toqusoqartassanngilaq. Tappiitsut isigisinnaalissapput, tusilartut tusaasinnaalissapput pisussinnaanngitsullu arpassinnaalissapput. Aamma inuit tamarmik naammattorsuarnik nerisassaqassapput. Uumasut ikinngutigiissapput, pinnguaqatigisinnaassavavullu. Inuit toqusimasut uummaqqissapput. Aamma angutit arnallu atuariikkatsinni ilisarilersimasatit amerlanerit uummaqqissapput — soorlu Rebekka, Rahabi, Daavi aamma Elia. Taakku uummaqqippata naapikkusuppigit? —

Jehovap asavaatit, pilluassasutillu kissaatigaa. Jehova pillugu ilinniartuaruit taassumunngalu naalattuaruit naassaanngitsumik paratiisimi nuanningaartumi inuusinnaassaatit! Tamanna kissaatigaajuk? —