Ilaqutariittut Jehova pallorfigisiuk

Quppersakkami matumani paasivat Biibilimi ilinnut ilaquttannullu iluaqutaasunik najoqqutassiarpassuaqartoq. Jehovap pilluartuunissat kissaatigaa. Neriorsorpaatillu imminik pallorfiginninneq salliutikkukku allat ‘tamarmik ilanngullugit ilissinnut tunniukkumaarini’. (Matthæusi 6:33) Ikinngutigerusungaarpaatit. Guutimik ikinnguteqarneq pisinnaatitaaffiuvoq annerpaaq, ineriartortinniarlugulu periarfissarsiortuarit. — Matthæusi 22:37, 38.

1 JEHOVAMUT ATTAVEQARNERIT NAKUSSATSIGUK

BIIBILIMI QANOQ ALLASSIMASOQARTOQ: “Ilissinnut ataataajumavunga, uangalu erneralusilu panigissavassi,” oqarpoq Jehova. (2 Korinthimiut 6:18) Guutip kissaatigaa imminut qanimut ikinngutaassasutit, tamannalu qinusarnikkut angusinnaavat. Jehovap qinujuartaqqullutit kajumissaarpaatit. (1 Thessalonikamiut 5:17) Uummammiutit nanertuutitillu tusarusungaarpai. (Filippimiut 4:6) Ilaquttatit Guutimut qinoqatigisarukkit taakku paasissavaat Guuti ilinnut qanoq piviusuutigisoq.

Aamma illit Guuti tusarnaartariaqarpat. Taamaaliorsinnaavutit Biibilimik Biibililersaarutinillu atuaqqissaartarnikkut. (Tussiaat 1:1, 2) Ilikkakkatit eqqarsaatigeqqissaartakkit. (Tussiaat 77:12, 13) Aamma Guuti tusaaniarukku kristumiut ataatsimiinnerinut najuuttuartariaqarputit. — Tussiaat 122:1-4.

Aamma Jehova pillugu allanut oqaluussisarneq taassumunnga attaveqarninnik nakussatsitsissutaavoq pingaarutilik. Oqaluussinermi iliuuseqarnerujartortillutit Jehovamut qanillinerulissaatit. — Matthæusi 28:19, 20.

SIUNNERSUUTIT:

• Ullut tamaasa Biibilimik atuartarnissannut qinusarnissannullu piffissamik immikkoortitsisarit

• Aliikkutassianit eqqissisimaarnissaminngarnillu ilaqutariiullusi anersaakkut sammisaqartarnissarsi salliutittarsiuk

2 ILAQUTARIITTUT GUUTI PALLORFIGISIUK

BIIBILIMI QANOQ ALLASSIMASOQARTOQ: “Guuti qaninniarsiuk, taava taanna ilissinnut qanillissaaq.” (Jaaku 4:8) Ilaqutariittut anersaakkut sammisassanik sapaatip-akunneranut najoqqutassiorit malillugulu.a (1 Mosesi 18:19) Aammali Guuti ullut tamaasa eqqarsaatissinniittuartariaqarpoq. Ilaquttavit Guutimut attaveqarnerat nakussatsinniartaruk Guuti pillugu eqqartuisarnikkut “angerlarsimatillutit issiasaraangavit, angalaartaraangavit, innartaraangavit makittaraangavillu”. (5 Mosesi 6:6, 7) Josva ilaarlugu una aalajangiusimajuk: “Uanga inoqutimalu Naalagaq [Jehova, NW] kiffartuukkumavarput.” — Josva 24:15.

SIUNNERSUUTIT:

• Ilaqutariinni ataasiakkaat pisariaqartitaat naapertorlugu aalajangersimasumik ilinniutissamik suliniutissamillu malittarisassiorit