Juubi kinaava?

Nunami Usimi anguteqarpoq Jehovamik guutisiortumik. Taanna Juubimik ateqarpoq. Pisoorsuuvoq meerarpas­suaqarlunilu. Angutaavoq pitsaasoq. Juubip piitsut, arnat uiminnik annaasaqarnikut meeqqallu angajoq­qaaqanngitsut ikiortarpai. Imaappa Juubi ajunngitsulior­tuartarami ajornar­torsiun­ngisaannartoq?

Juubip nalusaminik Saatanimit Diaavulumit nakkutigineqarpoq. Jehovap Saatani oqarfigaa: ‘Kiffara Juubi maluginiarpiuk? Nunarsuarmi tamanit assigineqanngilaq. Tusarnaar­tarpaanga eqqortulior­tarlunilu.’ Saatani akivoq: ‘Soorunami Juubip naalattarpaatit. Illersor­tarpammi pilluaq­qusarlugulu. Uumasorpas­suarnik nunarujus­suarmillu tuninikuuat. Tamakkuninnga arsaaraluarukku kiffartorfigiun­naassavaatit.’ Jehova oqarpoq: ‘Juubi misilis­sinnaavat, kisianni toqussanngilat.’ Sooq Juubi Saatanimit misilin­neqarnissaa Jehovap akueraa? Nalunnginnamiuk Juubip sapernavian­ngikkaa.

Taava Saatanip Juubi misilin­niarlugu ajortorpas­suarnik aqqusaagaqar­tilerpaa. Siullermik Sabamiut nersussuaatai siutituujutaalu tillinnias­sammatigit Juubimukartippai. Taamaalinerani Juubip savaatai tamaasa Saatanip toqorar­neqartippai. Aamma inuiaat allat, Kaldeamiut, qatigajut­tuujutaanik tillipput. Juubillu uumasunik paarsisui toqutaapput. Taava ajornerpaamik pisoqarpoq. Juubip meerai nuannatileruttortut illu uppippoq, tamarmillu nanerneqarlutik toqupput. Juubi aliasoqaaq, Jehovamulli kiffartor­tuarpoq.

Saatanip Juubi suli ajornerusumik misigisaqar­tikkusukkamiuk timaani angisuunik ammasunik ikeqalersippaa. Juubi anniaqaaq. Naluaa sooq tamakkuninnga tamanik aqqusaagaqar­tinneqar­nerluni. Taamaak­kaluartoq suli Jehova guutisiorfigiuarpaa. Jehovap suna tamaat maluginiarpaa Juubilu tulluusimaarutigalugu.

Taava Saatanip angutit pingasut Juubimukartippai. Juubilu oqarfigaat: ‘Ajortuliorsimassaatit oqaatigerusun­ngisannik. Guutimuna pillaraatit.’ Juubi akivoq: ‘Ajortulior­nikuunngilanga.’ Taavali eqqarsalerpoq Jehova ajornar­torsiutiminut tamanut pisuusimassasoq oqarlunilu Jehovamit naapertuil­luanngitsumik pineqarluni.

Angutip inuusuttup Elihumik atillip oqaloqatigiittut tusarnaaq­qissaarsimavai. Oqarporlu: ‘Oqaatsisi eqqunngillat. Jehova takorloorsin­naasatsinniit annerujussuuvoq. Ajortumik iliunngisaannarpoq. Suna tamaat takusinnaavaa inuillu ajornar­torsiutaannik ikiortarlugit.’

Taava Jehova Juubimut oqalulerpoq: ‘Qilak nunarsuarlu pinngor­tikkakkit illit sumiippit? Sooq naapertuil­luan­ngitsuunerarpinga? Pisut ilisimasaqarfiginagit oqaaseqarfigaatit.’ Juubi nassuerpoq kukkusumik isumaqalersimalluni oqarlunilu: ‘Kukkusimavunga. Illit pillutit tusagaqaan­narnikuuvunga, maannali paasivara ilumut qanoq ittuusutit. Ilinnut ajornar­toqanngilaq. Oqaatsikka ajuusaarutigaakka, utoqqatserpunga.’

Misilin­neqarnera naammassimmat Jehovap Juubi ajorunnaarsippaa siornatigullu pigisimasaanit annerungaartumik tunillugu. Juubi sivisoorujus­suarmik pilluarluni inuuvoq. Ajornar­torsioraluarluni Jehovamut naalattuarami pilluaq­quneqarpoq. Illit Juubi assigalugu qanorluunniit pisoqaraluarpat Jehovamut naalattuaan­narusuppit?