Siulersuisoqatigiinnit allakkat

Asasagut uppeqatigut!

Jehovamut kiffartor­tuusugut oqaasia, Biibili, nuannaraarput. Upperil­luinnarparput Biibilimi oqaluttuarineqartut ilumut pisimasuusut, Biibilimi inuunitsinnut pitsaasunik siunnersuuteqartoq aamma Jehovap inunnik asannin­neranut uppernarsaateqartoq. (Tussiaat 119:105; Lukkarsi 1:3; Johannesimit 1. 4:19) Guutip oqaasiani ilumoortut pingaarutillit inunnut allanut tusartin­nissaat kissaatigingaarparput. Taamaat­tumillu nuannaarutigingaarparput atuagaq una, Biibilimi oqaluttuat ilinniutigikkit, saqqummersis­sinnaagatsigu. Tamanna oqaluttuarilaarusupparput.

Atuagaq meeqqat eqqarsaatiginerullugit allataavoq. Taamaak­kaluartorli inersimasut Biibili pillugu paasisaqar­nerorusuttut iluaqutigisin­naavaat. Aammami Biibili inunnut tamanut allataagami qularnan­ngitsumik imarisai tamatta pillualivin­nissatsinnut iluaqutigisin­naavagut.

Atuakkami inuit oqaluttuarisaanerat Guutip pinngor­titsiler­neraniilli oqaluttuarineqarpoq. Biibilimi oqaluttuat ersarissumik paasiuminar­tumillu allanneqar­nissaat siunertaasimavoq, sapinngisamillu qanga pisimanerat najoqqutaralugu tulleriiaar­neqarlutik.

Kisianni atuakkami Biibilimi pisunik oqaluttuareq­qiiginnanngilaq. Allanneqarnera assitaalu suliaril­luagaapput Biibilimi oqaluttuat inuillu misigissusaat takorlooruminar­nerulersillugit.

Atuakkami paasitin­neqarpugut Biibili atuagaasoq inunnut tunngasoq – tassa Jehovamut naalattut Jehovamullu naalanngitsut. Taakkulu uagutsinnut ilinniutaasin­naapput. (Romamiut 15:4; Korintimiunut 1. 10:6) Atuagaq 14-inik immikkoor­toqarpoq. Immikkoortut tamarmik ilinniutigisin­naasatsinnik naatsumik aallarniuteqarput.

Angajoq­qaajuguit meeqqat kapitalimik atuaqatigisinnaavat assitaalu eqqartorlugit. Taava marluullusi Biibilimi atuagassat innersuus­sutigineqartut atuarsin­naavasi. Oqaluttuami ilinniutis­sartaasa Biibilimik tunngaveqar­nerannik paasitin­nissaanik ikioruk. Aamma inersimasoq Biibilip oqariar­tuutaanik paasisaqar­nerorusuttoq taamatut ikiorneqarsinnaavoq.

Neriuutigaarput atuagaq atorlugu eqqortuliorusuttut tamarmik – meeraagaluarunik utoqqaagaluarunil­luunniit – Biibili ilinniarfigissagaat ilinniutis­sartaalu inuunerminni atorlugit. Taamaaliorunik taakkuttaaq Jehovap asasaatut guutisioqataalersin­naalissapput.