inûnerme atugagssatit Gûtip sujumut aulajangerêrsimavai?
INUGPAGSSUIT ĸularíngitdluínarpât inûp atugagssai Gûtip sujumut aulajangerêrsimagai. ĸularnatigdlo isumaĸarput tamána bîbilime ajoĸersûtigineĸartoĸ.
ássersûtigalugit ilaisa Esau Jakobilo uparuásavait. angutit táuko sule arnamik igdliânĩput Gûtip sujumut oĸautigingmago: „angnerdlo kivfáusavoĸ mingnermut.“ (1 Môrsase 25:23) ãmátaoĸ Gûtip sujumut ilisimarêrsimavâ Samson, Jeremias Johannesilo kuississoĸ Gûtimik kivfartũssinermingne sulianik angingârtunik suliaĸarumârtut. (erĸartũssissut 13:3-5; Jerimia 1:5; Lúkarse 1:13-17) imatut pâsissariaĸángínerpa inuit atausiákât táukua nâgssáungitsumik ánangnigssât sujumut aulajangerîgausimassoĸ?
tauvalo Judas Iskariot? táussuma inúngornerata sujunerujugssuatigut bîbilime sujuligtûtine agdlagsimavoĸ Messias kigdlûtigineĸarumârtoĸ. (Tussiaat 41:10; 55:13, 14) agdlâtdlo bîbilime agdlagsimavoĸ Jesus Kristusip ’pilerĸârneranit’ kia pisíkumârâne, tássa kigdlûtigiumârâne, nalúngíkâ. — Juánase 6:64.
taineĸarêrsut erĸarsautigalugit, ivdlit ĸanoĸ oĸásagaluarpit? bîbilime ajoĸersûtigineĸarpa Gûtip sujumut aulajangerêrsimagâ kíkut nâgssáungitsumik ánagtugssaussut kíkutdlo támartugssaussut? ivdlit atugagssatit Gûtip sujumut aulajangerêrsimavai?
sujumut aulajangerîgauneĸ — ĸanoĸ kingunilingmik isumaĸásagaluartoĸ
aperĸutit tamáko akiniartínagit, sujumut aulajangerîgaunerup ĸanoĸ kingunilingmik isumaĸásagaluarnigssâ erĸarsautigilâriartigo. ajoĸersût tamána ilumôraluarpat, isumaĸarnásagaluarpoĸ Gûtip inungmik píngortitsinerme kingunigssai tamavîsa nalúngerêrsimásagai — Adamip Evavdlo nâlángitsuliornerat, sorssungnerit, pinerdlugtuliornerit, kángunartuliornerit, ĸunutitsinerit, sagdlunerit, ilumôrtûssârniarnerit, nápautit. tauva oĸarnermigut „inuliorta“ Gûtip ajússuserssuaĸ tamât piâralune autdlarnertísimásavâ! (1 Môrsase 1:26) taimáisimagaluarpat, tauva Gûtip Adamimut Evamutdlo inûnigssamik nâgssáungitsumik neriorssuinera neriorssuilugsínarnerusimásagaluarpoĸ. bîbilimilo ĸaerĸússut: „piumassuvdlo imeĸ inûnartoĸ akeĸángitsumik piliuk,“ ĸaerĸussilugsínarnerusimásagaluardlune. — sarĸúmersitat 22:17.
bîbilimile agdlagsimavoĸ Jehova Gûtiussoĸ „isumagssuingârtoĸ ilumûngârtordlo“. (2 Môrsase 34:6) sumik túniússiumásángilaĸ nalúngerêruniuk anguneĸarsínáungitsoĸ. Jesus Kristus aperivoĸ: „inûp kialũnît ardlavse ernerme timiussamik ĸínuvigigpane ujarĸamik tunísanerpâ? . . . tauva ilivse nauk ajortuse ĸitornase tuníssutinik ajúngitsunik tunisínaugavsigik, ĸanorme tauva atâtavse ĸilangmiussup ajúngitsunik tunisínautigísavai ingminit ĸinussut!“ (Matîuse 7:9-11) ãmátaoĸ, Gûtip itsarujugssuardle sujumut aulajangerêrsimagpagit kíkut ánagtugssaussut kíkutdlo nâgssáungitsumik aserortugssaussut, sôrme tauva bîbilime agdlagsimava „[Jehovap . . . kamajuitdlune pigâse] támarsimassoĸarĸussíngíname, tamaisale avdlamik isumatârĸuvdlugit“? — 2 Pîtruse 3:9.
taimáitumik sujumut aulajangerîgauneĸ Gûte pivdlugo bîbilime ajoĸersûtigineĸartunut akerdliuvoĸ. ’kisiánile oĸaruvta Gûtip piumârtugssanik ilisimangnigsínaunine kigdlilĩnarmik atortarâ tássáusángínerdlune Gûtip ajugaĸángitsûnera nalikitdlisitdlugo?’ ímaĸa aperiumásautit. nâmerdluínaĸ. Títuse 1:2-me ilíniarparput ’Gûte sagdlusuitsûssoĸ’. tamánale Gûtip ajugaĸángitsûneranut nalikitdlíssutauva? nâgga, Gûtivdle ilumôrssusianut ersserĸigsautauvoĸ.
apustile Paulusip kristumiut sujuligtuisínaunermik pigissaĸartut oĸaorĸigsârpai: „anersâp tuníssutai pruvfîtit pigissait pruvfîtit nâlagkersúsavait. Gûte ularússinermut Gûtiúngingmat, erĸigsinermutdle.“ (1 Korintumiut 14:32, 33, NW) pruvfîtit táukua oĸausigssatik piumatdlerângamik oĸautigísángilait, pruvfîtisutdle tusardliússatik ârĸigssũssautitdlugit avdlanut tusardliútásavdlugit. taimailiúsagunik ingminut nâlagkersortariaĸarput. taimatútaoĸ Gûtip sujumut ilisimangnigsínaunine pissariaĸarsorissane nâpertordlugo atorsínauvâ, atornigssânut píssutigssaĸardluarângat sujunertaĸarângatdlũnît aitsât atortardlugo. — nalerĸiuguk Môrsasip agdlagai sujugdlît 22:1, 12.
Gûtip sujumut ilisimangnigsínaunera
Israelíkut inuiaĸatigĩngordlutik ârĸigssorneĸarnerata ukiut 40-ínait kingornagut Gûtip sujuligtûtigâ ingminut angeruseĸ uniorĸutíkumârât. tamatumíngale sujumut ilisimangnigsimanera túngaveĸángitsũngilaĸ, inuiaĸatigît táuko inerterserêrêrsimangmata nâlángerêrsimangmatalo. taimáitumik Gûte oĸarsínauvoĸ: „nalúngínavkit erĸarsautait mãnákut erĸarsautigissait, nauk nunamut ugpernarsáissutigissavnut sule apûtíngíkíka.“ (5 Môrsase 31:20, 21) sôrdlo igdluliortup píkorigsup ímaĸa sujuligtûtigisínáusagâ igdluliap sanâgssanik pitsáungitsunik igdluliarineĸarsimassup aseruvigdlune úpínigssâ, taimatut inuiaĸatigît sûp tungânut ingerdlalersimanerat Jehovap takuvdluarsínauvâ. kisiánile inuit atausiákât Gûtip pruvfîtiutitaisa ajoĸersûtait sujúnersûtaitdlo ilagsisínauvait, ilumutdlo ilagsivait iluaĸutigalugitdlo. — Jerimia 21:8, 9; Hisĩkiale 33:1-20.
ãmátaoĸ Jesus Kristusip sujuligtûtigâ ugperissarsiornerup tungâtigut pissortat agdlagkanik ilisimassunik farisîarinigdlo taineĸartut támarnigssât. (Matîuse 23:15, 33) imáingilardle farisîarit agdlagkanigdlo ilisimassut tamavingmik Gehennamukartugssaussut. apustile Paulus nangmineĸ farisîariusimavoĸ ilungersortoĸ! — apustilit suliait 26:4, 5.
ilumôrpoĸ Gûtip inuit aulajangersimassut, sôrdlo Jakobip Esauvdlo, ĸanoĸ ingerdlanigssât sujuligtûtigisimagâ. tássáungilardle inûp atugagssainik sujumut aulajangîneĸ. Esau Jakobilo pivdlugit, Gûtip sujumut ilisimáinarpâ inuiaĸatigît táukua kinguâgssait sordlît inuiaĸatimingnut nâlagaulerumârtut. (1 Môrsase 25:23-26) sûvdlũnîtdle takutíngilâ ánagkumârnersut támarumârnersutdlũnît Gûtip sujumut aulajangerêrsimagâ. mêrĸap píssusiata isumákutdlo periausiata ilarssua kinguârît kingornútagáinit aulajangigáunguatsiarpoĸ. imáisínauvoĸ Esaup Jakobivdlo inúngûserissagssait kinguârît kingornútagáinit aulajangigaussut inúngúngíkatdlarneráne Jehovap nautsorssûtigisimagai kiap ilaminut nâlagaunerunigssâ sujumut oĸautiginiaramiuk. — nalerĸiuguk Tussiaat 139:14-16.
taimatútaoĸ Jehovap sujumut ilisimangnigsínaunine atortarpâ Samson, Jeremias tauvalo Johannes kuississoĸ pivdlugit. Gûtivdle sujumut ilisimangningnera táukua toĸumut ilumôrtuarnigssãnut ĸulákêrutigssáungilaĸ. Gûtip sujuligtûtigãtaoĸ Davidip ernerisa ilât Salomonimik atserneĸásassoĸ Salomonilo kivfarineĸásassoĸ nâlagfingmik sanatitsinigssaminut. (1 nalunaerssûtigdlit 22:9, 10) taimáikaluartordle, utorĸalinermine Salomon Jehovamik patdlorfigingningnermit tunússivoĸ. — 1 kúngit 11:4, 9-13.
Judas Iskariotime? Jesusip ajoĸersugaisa ilâta kigdlũssissúngornigssâ ersserĸigsumik sujumut sujuligtûtigineĸarsimángíname? âp, sujuligtûtinile agdlagsimángilaĸ ajoĸersugaĸ sordleĸ kigdlũssissúngúsassoĸ. Jesusip nalúngerêrsimagaluaruniuk Judas kigdlũssissũsassoĸ? taimáisimagaluarpat tauva Jesusip Judasimik apustilíngortitsinermigut kigdlũssissoĸ ajortaisigut peĸatigisimásagaluarpâ. (nalerĸiuguk Timûtiusimut agdlagkat sujugdlît 5:22.) Gûtísaoĸ pissôĸatáusagaluarpoĸ, Jesusip Jehova ilungersortumik ĸínuvigisimangmane Judasimik ĸinersíngínermine. — Lúkarse 6:12-16.
kisiánile Satanip pilerssârusiorneranik Jehova nalussũngilaĸ. (nalerĸiuguk Korintumiunut agdlagkat áipait 2:11.) nalúngilâ Satanip Djævelip sujusingnerussúkut inûp ikíngutingnâva kigdlũssissúngortísimagâ, sôrdlo Davidip ikíngutâ Akitofel kigdlũssissúngortísimangmago. Gûtiúngitsup Satanip „Jûtarse Sîmûp ernera Iskâriôĸ ũmámiulerêrmago [Jesus Kristus] piserĸuvdlugo“, tássa kigdlûterĸuvdlugo. (Juánase 13:2; 2 Sâmuale 15:31) Satanip súnîniarnera akiorniarnago, Judasip ajorte ingminut nâlagaulersípâ. suna Judasip ũmatânĩtoĸ Jesusip súkut ardlâtigut atuarsínaulerpâ tássûnákutdlo kigdlũssiumârnigssâ sujuligtûtigisínaulerdlugo. (Juánase 13:10, 11) taimáitumik Judasip kigdlũssinigssâ Jesusip ’pilerĸârneranit’ nalúngilâ — Judasimik ilisarsserĸârnerminît pínago, Judasivdle kigdlũssissutut periauseĸalerĸârneranît pivdlugo. — Juánase 6:64.
Gûtimit sujumut perĸussauneĸ
imáikame: Gûtip piumârtugssanik sujumut ilisimangnigsínaunine nalerĸutíngitsumik atorniarneĸ ajorpâ. apustile Paulusip kristumioĸatine tanitaussut imáitumik agdlagfigai: „uvagut sujumut perĸussau[vugut] táussuma [tássa: Jehova Gûtip] pilerssârutigiumassane erĸordlugo sunik tamanik súniússissup sujúnersûtâ migssiliordlugo.“ (Evfisumiut 1:11) inûp ajortilíngorneranîtdle Gûtip sujunertarâ atine tusagaunerdlungneranit akitsisíkumârdlugo nâlagauvfine sákugalugo. tamána sujunertaralugo Gûtip piumârtugssanik sujumut ilisimangnigsínaunine ilâtigut atortarpâ. ássersûtigalugo: sujumut perĸussarâ katerssaĸarumârtoĸ Jesus Kristusip nâlagauvfingme kingornússeĸatigssainik, inuitdle atausiákât ilumôrunik aitsât katerssanut táukunúnga ilausínáusassut. — 2 Pîtruse 1:10, 11.
tamatuma bîbilime ersserĸigsumik ĸanoĸ ajoĸersûtigineĸarnera nalujungnaeragko, sujunigssame piumârtugssat perĸingnartumik isumaĸarfigisínaulerpatit. inûnerme atugagssatit Gûtip sujumut aulajangerêrsimángilai. akerdlianigdle, piumassaminik iliorsínauneĸ Jehova Gûtip píngortitanut „ingminik ássilivdlune“ píngortitaussunut túniússâ atorsínauvat. (1 Môrsase 1:27) silatûmik ĸinersisínauvutit Jehovavdlo Gûtip inûnermik nâgssáungitsumik neĸerôrutâ ũmatíkut ilũngardlutit ilagsivdlugo. (wD 15/10 84)
[Qupp. 5-mi assiliartaq]
Gûtip sujumut nalúngerêraluaruniuk Adam Evalo ilumũngitsũsassut, nãkigtaitsuliornerúsa-galuarpoĸ inûnermik nâgssáungitsumik neriûtigssísimangmagit
[Qupp. 6-mi assiliartaq]
Judasip kigdlûtísangmane Jesusip súkut pâsilerpâ?