Jesusip inuunera ajoqersuineralu

Johannes aqqutissiuivoq

JESUSIP 12-inik ukioqarluni naalaffimmi ajoqersuisunik apersuineraniit ukiut 17-it ingerlareersimapput. Upernaajuvoq ukiumi 29-mi, inuillu tamarmik Jesusip illua, Johannes, Jordanip kuussuata eqqaani tamani angalalluni nalunaajaasoq, oqallisiginnguatsiarpaat.

Johannesip isikkua oqaluusialu inuit killinneqaatigaat. Atisaa qatigattuup meqquinik sanaajuvoq, amermillu qiteruteqarluni. Nerisaraalu pillertat igutsaallu sukkuussuat. Sunami oqariartuut nalunaajaatigaa? „Allamik isumataaritsi, qilammiup naalagaaffia qanillimmat.“

Oqariartuut tusarnaartuinut sakkortuumik sunniuteqarpoq. Amerlasuut paasivaat isumataartariaqarlutik, tassa isumartik allanngortittariaqarlugu, inooriaaserigaluartillu taamaatsillugu, pissutigalugu pissusissamisuunngimmat. Taamaattumik Jordanip eqqaanit tamanit, allaallu Jerusalemimit, inuit amerlasuukkaat Johannes ornigarpaat. Taassumalu Jordanip imartaanut morsutsillugit kuisarpai. Sooq?

Inuit Guutip angeruseq tunngavigalugu inatsisaanut ajortuliaminnik peqqissimissuteqangaarnerannut ilisarnaatitut Johannesip kuisarpai. Farisiiarit satusiiarillu guutisiornermik pingaartitsiniaqisut Jordanimut pimmata, Johannesip assuarai. „Taatuuku pulateriaarsuit piaraat,“ oqarfigai. „Allamik isumataarnermut naapertuuttunik inerititaqaritsi.“

Johannes tamanit sammineqalermat farisiiarit palasit Levikkullu taassumunngartippaat. Aperippullu: „Kinaavimmi? Uatsinnik aallartitsisut qanoq akissavavut? Imminik qanoq oqaatigaat?“

Johannes oqarpoq: „Uanga tassa puilasuitsumi torlulasup nipaa: [Jehovap] aqqutissaa nalimmatsersiuk; soorlu pruffiiti Esajas oqartoq.“ Inuit Messiasimik, kunnginngortussamik, uummatimikkut akuerinnississinnaalernerisigut Johannes aqqutissiuuppai. Messias pillugu Johannes oqarpoq: „Kingunikkut pissasoq; taassuma singii qilerussaassallugit qinngaqquteqaanga.“

Johannes oqarpoq: „Qilammiup naalagaaffia qanilli“voq, inuit tamarmik paasiniassammassuk Jesusip, Jehovap Kunngitut toqqagaata, suliani aallartingajaleraa. Johannes 1:6-8, 15-28; Mattæus 3:1-12; Lukas 3:1-18; Apustilit Suliaat 19:4. (wD 1/9 85)

◆ Suna Johannesimi malugineqarpa?

◆ Sooq Johannesip inuit kuisarpai?

◆ Sooq Johannes oqarsinnaava Naalagaaffik qanillisoq?

[Qupperneq 8-mi tamakkerlugu asseq]