Jesusip inuunera ajoqersuineralu

Nikodemus ajoqersorneqartoq

UKIUMI 30-mi poorskisiortilluni Jesus maluginiarnartunik nalunaaqqutinik tupinnartulianilluunniit arlalinnik suliaqarpoq. Tamanna amerlasuut taassumunnga uppertunnguutigaat. Nikodemus, juutit eqqartuusseqatigiivisa qullersaannut, sanhedrin-imut, ilaasortaasoq, aamma tupigusuppoq paasisaqarnerorusullunilu. Taamaattumik, takuneqaruni juutit siulersuisuisa akornanni tusaamanerlugaalernissi ersissutigigunarlugu, unnuaannarsuaq tarrup ataani Jesus naapinniarlugu ujarpaa.

„Rabbi!“ oqarpoq, „ilisimavatsigit ajoqersuisuusutit Guutimit pisoq, ilittut nalunaaqqutiliortoqarsinnaanngimmat Guutip najunngippani.“ Akilluni Jesusip oqarfigaa kinaluunniit Guutip naalagaaffianut isernavianngitsoq „kisianni ernioqqissimaguni“.

Kisianni inuk qanoq-ililluni ’ernioqqissinnaagami’? „Aappassaanik arnami timaata iluanut pisinnaava erniullunilu?“ Nikodemus akerliliilluni aperivoq.

Naamik, oqaaseq ’ernioqqissitaaneq’ taamatut paasineqassanngilaq. „Inuk Guutip naalagaaffianut pisinnaanngilaq, kisianni imermit Anersaamillu erniusimaguni,“ Jesus nassuiaavoq. Jesus kuisikkami anersaamillu iluartumik pilluni, taava ’imermit anersaamillu’ erniuvoq. Taamani Guuti nipini qilammit tutsiutsippaa oqarluni: „Tassa ernera . . . iluarisara.“ (NV) Taamaalilluni Guutip nalunaajaatigaa anersaakkut ittumik erneqalernini naalagaaffimmi qilammiittumiilersussamik. Kingorna, tassa piinsip ulluani ukiumi 33-mi, kuisittut allat anersaamik iluartumik pipput, taamaalillutillu Guutip anersaakkut ernerisut ’ernioqqissitaallutik’.

Guutilli ernera taannarpiaq immikkut ittumik inuunermut pisariaqartumik pingaaruteqarpoq. „Soorlulu Mosesip puilasuitsumi pulateriaarsuup assinga qangattaraa,“ Jesusip Nikodemus nassuiaappaa, „taamattaaq Inuup Ernera qangattartittariaqarpoq, kinaluunniit uppertoq taassumani naassaanngitsumik inuussuteqaqqullugu.“ Aap, soorlu Israelikkut pulateriaarsummik toqunartulimmik kiitissimasut annassagunik pulateriaarsuk kanngussammik sanaaq isigisariaqarsimagaat, taamattaaq inuk kinaluunniit Guutip erneranut uppissuseqartariaqarpoq toqujartornermiit annaanneqassaguni.

Guutip asanninnerata tamatumani pingaaruteqarnera erseqqissarniarlugu taava Jesus Nikodemusimut oqarpoq: „Silamiummi Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.“ Kiffartorluni aallartinnerminit qaammatit arfinillit qaangiutiinnartut, maani Jerusalemimi, taamaalilluni ersersippaa tassaalluni Guutip inunnik annaassisissaa.

Johannes 2:23-miit 3:21 ilanngullugu; Mattæus 3:16, 17; Apustilit suliaat 2:1-4; 4 Môrsase 21:9. (wD 1/12 85)

◆ Sumit killinneqarluni Nikodemusip Jesus pulaarpaa, aamma sooq unnuami taamaaliorpa?

◆ ’Ernioqqissitaaneq’ qanoq paasisariaqarpa?

◆ Qanoq ililluni Jesusip inuit annannissaannut pingaaruteqarnini paasinarsaasersorpaa?