Qimussersut Saqqummersitani eqqartorneqartut — qimusserneri qanoq ilillutik ilinnut sunniuteqarnersut

ATAASINNGORNEQ aprilip aallaqqaataa 1985, Torontomi Canadamiittumi inunnut amerlasuunut tamanut assartuutinut ilaasartunut, ullunit allanit allaaneroqaaq. Qimuttuitsut aqqutaat nunap i luatigoortoq qaartinniarlugu sioorasaarisoqarsimavoq. Sooq? Aap, taamaaliornermikkut inunnut tamanut ukiorpassuit matuma siornagut Tyrkiami pisimasoq, Armeniamiunik nungutitseriaraluarnertut taasartik Tyrkiamiulli naalakkersuisuinit eqqunnginnerarneqartuarsimasoq, eqqaasitsissutiginiarpaat.

Qularnanngitsumik angalasut taakkua amerlanersaasa pisimasoq tamanna ukiunik arlalinnik pisoqaassuseqartoq annikitsuinnarmik ilisimasaqarfigaat ilisimasaqarfiginngivilluguluunniit. Taamaakkaluartorli erloqinartunik siooranartunillu nassataqarpoq. Akuttunngitsumik ilisimasaqarfigilaaginnakkatsinnit kalluarneqartarpugut.

Taamaalillutik pisimasut pingaaruteqartut arajutsineqarsinnaanngitsumik Bibelimi sarĸúmersitat 6:1-8-mi siulittuutigineqartunik eqquutitsillutik ukiut 2000-issaata ukiuisa qulillit aappassaanni aallartipput. Apustili Johannesimut saqqummersinneqartutut ulluni kingullerni hestersartut arlalialuit hestersussaasimapput. Naak inuit millionilikkuutaat tamanna ilisimanngikkaluaraat, taakkua hesternerisa nunarsuarmi kikkut tamaasa kalluarpaat. Aamma illit tamatumannga kalluarneqarputit. Kisianni qanoq? Tamanna paasilissavat hestersartut taakku tamaasa ataasiakkaarlugit misissorukkit.

Qimuttuarsuk aappaluttoq

Qimuttuarsuit Johannesip takusaasa ilaat aappaluttuuvoq, ’qaanilu issiasoq tunineqarpoq nunamiut eqqissivissaaruteqqullugit toqoraateqatigiissaqqullugillu; panamillu angisuumik tunineqarpoq’. — sarĸúmersitat 6:4.

’Panamik angisuumik’ tunineqarnera sorsunnermik ingerlatsinermut assersuutaavoq. Tamanna naapertorlugu 1914-imiit sorsunnersuarni marlunni inuit 69 millionit missaanniittut toqutaasimapput. Ilumut aammik kueraanersuaq! Uillarnerit ataataarunnikullu amerlangaartut uppernarsarsinnaavaat qimuttuarsummik aappaluttumik qimussersoq silarsuaq tamakkerlugu sorsunnermik ingerlatsinermut assersuutigineqartoq toqqaannartumik inuunerminni sunniuteqarsimasoq.

Sorsunnerit sorsunneqarnissaanillu sioorasaarutit kinguaariit inuusunnerusut aammattaaq sakkortuumik naqisimavaat. Nunani ammasumik isumaqatigiinnginneqarfioqisuni pikitsitsinerit amerlanertigut inuusuttuaqqanit ingerlanneqartarput. Sorsunnerit inuusuttunut sunniinerat pillugu apeqqummi uani, inuit pisinnaatitaaffii pillugit suliniaqatigiiffimmi siulittaasumit saqqummiunneqarsimasumi, eqikkarneqarpoq: „Qanoq ilillutik inuttut pissusissamisoortutut isummamikkullu oqimaaqatigiissutut perussappat?“

Nunani amerlasuuni inuusuttut sorsunnermit toqqaannartumik kalluarneqartut piffissap nalunaaquttap akunnerinik ullunillu naatsorsornissaa ilikkarsimavaat, qaammatinik ukiunillu naatsorsuinermut taarsiullugu. Aperipput: „Siunissaq, kina siunissaq pillugu ernumava? Kia neriorsuutigisinnaavaa iniga unnukkut siniffigitillugu qaartartumik miloriuttakkamik eqqorneqassanngitsoq?“

Nunani sorsuffiunngitsuni meeqqat qanoq ippat? Aamma taakku sorsunnerup hestersuata sunniutaanik malugisaqarpat? Aap, atominik sakkussiat atorlugit sorsunneqaratarsinnaaneq aarlerinartorsiortitsisoq meeqqanut tarnimut tunngasutigut sakkortuumik sunniuteqarsimavoq. Ilinniartitsisoq ilinniartitami oqaasii isumatsappaluttut malugisimallugit oqarpoq: „Oqaasii tusarakkit nalorningaalerpunga. Meeqqat taakku isumatsangaarsimapput uanga misigerusunngilluinnakkannik.“ Dr. Richard Logan Canadami Quebecimeersoq oqarpoq: „Sapilersimaneq qanorlu iliorsinnaajunnaarneq tassaapput tarnip pissusiisa tungaanit isigalugu isumatsangaarnermut ersiutaasut. Tassaavorlu tamannarpiaq inuusuttuni amerlasuuni takusarput.“

Kisianni illit nunami sorsuffiunngitsumi najugaqaraluartutit imaluunniit ajornartorsiummit tamatumannga misigissutsikkut kalluarneqarsimanngitsutut misigisimagaluartutit, taamaattoq aappaluttumik hestersoq inuuninnut sunniuteqarpoq. Silarsuaq tamakkerlugu koruunit 12 millionit minuttimut toqqaannartumik sakkussianut atorneqartarput — ukiumut koruunit 6,3 billionit. Kina tamakkununnga akileeqataava? Illit! Tassa sumiluunniit najugaqaraluaruit aappaluttumik hestersoq inuuninni sunniuteqarpoq.

Qimuttuarsuk qernertoq

Johannesip takorluukkamini qimuttuarsuk alla imatut oqaluttuaraa: ’Takunnikkamalu, ata, qimuttuarsuk qernertoq, qaanilu issiasup uuttuutit illugiit tigumiarai. Nipilu tusarpara uumasut taakkua sisamat akornanni oqartoq: Qajuusiassat uuttuutip imai dinaarimik akeqassasut, suaasiassallu uuttuutit pingasut imaat dinaarimik akeqassasut; uulialu viinnilu ajoqusernaveerigit.’ — sarĸúmersitat 6:5, 6.

Perlilerpit? Inuit millionilippassuit perlilerput. Qimuttuarsummik qernertumik qimussersumit, kaannersuarmut assersuutaasumit, toqqaannartumik kalluarneqarsimapput. Minuttimut meeqqat 30-t toqusarput nerisassanik imaluunniit nakorsaatinik amigaateqarnertik pissutigalugu — tassa imaappoq ukiumut 15 millionit! Inuit hundredinik millionillit pissutsini ajuvissuni inuupput. Verdensbankimut præsidentiusimasup, Robert McNamarap, oqarnera naapertorlugu „nerisassakilliorneq, nappaatit, inoorlaat toqorarnerat, atuarsinnaannginnerlu allassinnaannginneq aammalu toqujaaratarsinnaaneq ima sakkortutigisumik akornutaapput, inuit siuaasaminnit kingornutatik inunnguuserisatik tunngavigalugit pisinnaasarigaluatik pisinnaanagit“.

Qaammatini kingullerni tusaatini nutaarsiassani Afrikamiut angutit, arnat meeqqallu kaappaloqisut asserpassui saqqummersinneqartarput. Naalliuutit taamaattut pillugit FN-ip generalsekretæria Javier Pérez de Cuéllar mianersoqquserpaluttumik oqarsimavoq: „Afrikami nunani Saharap kujataaniittuni inuit toqusut inunnit sorsunnersuaq kingulleq tamaat toqusunit qularnanngitsumik amerlanerupput. Inuillu aniguisut qularnanngitsumik inuunermik sinnera timimikkut sianissutsimikkulluunniit sanngiitsuussapput.“ Taakku toqqaannartumik qimuttuarsummik qernertumik qimussersup qimusserneranit kalluarneqarsimapput.

Illit immaqa perlilinngilatit, kisianni kaattut pillugit tusartakkannit imaluunniit atuartakkannit tamakkunannga attorneqannginnerputit? Atuagassiami The New York Times-imi pingaarnersatut 20. maji 1985-imi allaatigineqarsimasoq naapertorlugu dollarsit milliardit sinnerlugit kaattunut ikiuutissatut tunniunneqarsimapput. Immaqa illit nammineq toqqaannartumik tunniussaqarsimanngikkaluarputit, kisianni naalakkersuisorpassuit akileraarutit ilaannit kaattunut tunniussaqarsimapput. Aap, qimuttuarsummik qernertumik qimussersup qimussernera toqqaannartumik toqqaannanngitsumillu nunarsuup inuinut tamanut sunniuteqarsimavoq.

Qimuttuarsuk sungaarpalaartoq

Johannesip takorluukkani nangippaa eqqartorlugit qimuttuarsuk aamma alla taassuminngalu qimussersoq: ’Takunnikkamalu, ata, qimuttuarsuk sungaarpalaartoq, qaanilu issiasoq toqumik ateqartoq, toqusullu inaata malikkaa. Piginnaassuseqartitaappullu nunap aggornerisa sisamaannut panamik kaannermillu toqorarnermillu nunallu nersutaasigut toqoraassallutik.’ — sarĸúmersitat 6:8.

Qimuttuarsummik sungaarpalaartumik toqu qimusserpoq, hestersullu taassuma hesterneragut nappaalanersuaq allallu assigiinngitsut inuit inuunerinik akeqartarput. Ilisimatuussutsikkut nakorsaanermut tunngasutigut naak ukiuni nutaanerusuni pikkorissiartorsimagaluartut, silarsuarmiut tamaginni nappaatit akiorniartuartariaqarpaat. Ullumikkut naak nappaalanersuaqanngikkaluartoq Spaniamiut nappaataattut sorsunnersuup siulliup kingornatigut atuuttutut annertutigisumik, taamaattoq kræfti, uummatilunneq nappaatillu allarpassuit inuit amerlasoorujussuit inuunerinik akeqartarput. Assersuutigalugu Silarsuarmi peqqinnissamik isumaginneqatigiit (WHO) tungaanninngaanniit missiliuunneqarpoq ukiut tamaasa inuit 5,9 millionit kræfti nappaatigilersaraat. Kuussuarmit tappingerneq, malaria, siuteqqumit qanimanartoqarneq, kolera nappaaterpassuillu allat nappaalanersuartut ipput inuit suli naalliuutigisartagaat.

Immaqali oqarumassaatit: ’Uanga tamakkua arlaannik nappaateqanngilanga.’ Taamaakkaluartorli qimuttuarsummik sungaarpalaartumik qimussersup qimussernera ilinnut sunniuteqarpoq. Napparsimmavimmi nakorsagaaneq nakorsaatillu akisoorujussuupput. Taamaammat inuppassuit napparsimanissamut sillimmasiisarput. Nunat ilarpassuini naalakkersuisutigoortumik napparsimanissamut sillimmasiinermik aaqqissuussineqarpoq, inuinnaallu akileraarutitigut tamanna akilertarpaat. Eqqarsaatigeriarullu napparsimaneq pissutigalugu suliartunngitsoornermut atatillugit aningaasartuutit qutsingaartut, naggataatigummi akitsuutitigut illit akilertarpatit. Aap, qimuttuarsummik sungaarpalaartumik qimussersup qimussernera ilinnut sunniuteqarpoq.

Qimuttuarsuup qaqortup suna nassarpaa?

Qimuttuarsunnik taakkuninnga qimussersut qimussernerisa sunniineri misissoreerlugit, qimuttuarsuk qaqortoq taassumalu qaani issiasoq, allat sioraanniittut, pillugit Johannesip oqarnera malugissallugu qiimmaallannassaaq. Apustili oqarpoq: ’Takunnikkamalu, ata, qimuttuarsuk qaqortoq, qaanilu issiasoq pisisseqartoq; niaqorummillu tunineqarpoq, aallarporlu ajugaalluni ajugaassallunilu.’ — sarĸúmersitat 6:2.

Jesus Kristus qimuttuarsuup qaqortup qaani issiavoq. (sarĸúmersitat 19:11) Qilammi naalagaanera 1914-imi aallartippoq pisimasut pissanganartut ingiaqatigalugit. Qilammi sorsunnerup kinguneraa Diaavulup inngiliisalu nunamut igitaanerat. Taava nipi qilammit tutsiuppoq: ’Eqqanaq nuna imarlu, Diaavulu ilissinnut aqqarmat kamattorsuulluni, piffissakissutsi nalunnginnamiuk.’ Qimuttuarsunnik qimussersut qimussernerata tamanna aallaqqaatigaa. — sarĸúmersitat 12:7-12.

Kisiannili, Jesusip Kristusip qimussernera ilinnut sumik sunniuteqarpa? Naalagaanerminut atatillugu Jesus imatut siulittuivoq: „Naalagaaffimmillu tusagassaq nuannersoq tamanna oqaluussissutigineqassaaq nunarsuarmi inuit najugarisaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliutissaaq.“ (Matîuse 24:14, NW) Ullumikkut, nunani qeqertanilu 200-nit amerlanerusuni Jehovap Nalunaajaasuisa Kristusip naalagaaffia pilersitaareersoq tusarliuttarpaat. Ilinnut aggersimappat? Taamaappat, taava qimuttuarsummik qimussersup taassuma qimussernera ilinnut sunniuteqarsimavoq.

Inuit naalagaanerminit sunniivigineqarnissaat siumut oqaatigigamiuk, Jesus siulittuilluni oqarsimavoq: „Inuup ernera naalannassutsi atisimallugu tikiukkuni, inngilillu tamaasa ilagalugit, taava issiavissaarsuarminut naalannassutsimi pianut ingissaaq. Inuiaqatigiillu tamarsuarmik saanut katersorneqassapput, inuillu avissaartissavai, soorlu savanik paarsisup savat savaasanit avissaartittarai. Savallu talerpimmi tungaanut pisissavai, savaasalli saamimmi tungaanut.“ — Matîuse 25:31-33, NW.

Avissaartitsinermik suliap, Jesusip qimuttuarsummik qaqortumik qimussernerata ingerlanerani sulissutigineqartup, tamatuma kinguneranik, inuiaat tamarmik paasineqarput ’savatut’ imaluunniit ’savaasatut’ innersut. Inernissaa malugiuk: „Savaasat“ „aallarumaarput naassaanngitsumik uternaveersitaassallutik iluartulli [„savat“] naassaanngitsumik inuussallutik“. (Matîuse 25:46, NW) Taamaattumik Naalagaaffik pillugu tusarliussap oqaluussissutigineqarneranut illit qanoq periaaseqarnerit inuujuarnissannik toqunissannilluunniit kinguneqarumaarpoq.

Qimuttuarsuit Saqqummersitani eqqartorneqartut qimunneri qanoq ilillutik ilinnut sunniuteqarnersut immaqa siornatigut eqqarsaatigisimanngikkaluarit, kajumissaarpatsigit tusarliussaq nuannersoq qimunneri ungasinngitsukkut qaangiukkumaartut ilasseqqullugu. Tamatuma kingornagut, Jesusip, qimuttuarsummik qaqortumik qimussersup, naalagaanerata ataani nunap tassanilu najugaqartut pilluaqqussutissat amerlasuut atorumaarpaat. Taakkua ilaat Bibelimi siulittuutigineqarlutik imatut allaatigineqarput: „Naapertuilluarneq ulluini inerilluarsimassaaq, pigissaarnerlu [eqqissinerlu, NW] angeqisoq atugaassaaq [qimuttuarsuk aappaluttoq peerummat] qaammat peqarunnaarserlugu. [Qimuttuarsuk qernertoq peerummat] karrit naammangaartut nunami naasimassapput, qaqqat qaanni aalataarumaarput.“ — Tussiaat 72:7, 16.

Nunamiikkallarami Jesusip Kristusip nappaatinut amiilaarnartunut toqumullu allanullu pissaaneq Guutimit pisani takutittarpaa. Kunngisut naalagaaguni pissaaneq taamaattoq annertunerungaartumik takutikkumaarpaa, nappaalanersuillu, kaannersuit sorsunnerillu tamaasa nunamit piiarumaarlugit. Tassuuna qimuttuarsummik qaqortumik qimussersup qimuttuarsunnik Saqqummersitani eqqartorneqartunik allanik qimusserneri soraarsikkumaarpai. (wD 15/1 86)

[Qupp. 3-mi ungalusaq]

QIMUTTUARSUIT SUNUT ASSERSUUTAASUT

Qimuttuarsuk qaqortoq: Jesus Kristus qilammi kunngisut niaqorusigaaqqammersutut qimuttuarsummik taassuminnga qimusserpoq. 1914-imi kunngisut ivertinneqarnerminiilli ajugaasutut iluartutut aallartoq takutinneqarpoq.

Qimuttuarsuk aappaluttoq: Qimuttuarsummik taassuminnga qimussersoq sorsunnermik ingerlatsinermut assersuutaavoq. Nunamiut eqqissivissaarutinneqarput, soorlu takutinneqartoq silarsuaq tamakkerlugu sorsunneq aallartimmat.

Qimuttuarsuk qernertoq: Qimuttuarsummik qernertumik qimussersoq nerisassaaleqineqarnermut kaannersuarmullu assersuutaavoq. Naak inuit millionikkuutaat perlileraluartut, allat suli nerisassanik inuulluarniutaanerusunik pisisinnaasarput.

Qimuttuarsuk sungaarpalaartoq: Toqu qimuttuarsummik taassuminnga qimusserpoq. Tamatuma kinguneranik inupparujussuit nappaalanersuit allallu toqujaarutigaat.