„Peqqusersuitsumik“ isigisunik iseqarpit?
„Taamaattumik peqqusersuitsumik isigisunik iseqaruit, timit tamarmi qaamasormiussaaq.“ — Matîuse 6:22, NW.
1. Suna pillugu oqartoqarsinnaava isi mianerisariaqartumik assersuutaasoq silassorissusillup pinngortitsinerata tupinnartuanut?
MISIGISSUTINI tamani isigisinnaassuseq pingaarnerpaasorineqartarpoq — ingammillu isigisinnaassuseeruttut taamatut isumaqartarput. Ilisimatuut oqaluttuuppaatigut sekundit tamaasa qaamanimerngit qulinik billionillit isit ammarnisigoortartut isillu ameraasaasa ilorlersaannut tuttartut, tassanilu cellit ajaappissatut ilusillit kaaviffittullu ilusillit hundredinik millionillit tigusaraat. Qaamanermit sunnerneqarlutik cellit sianiutaasut taakku nalunaarutinik elektriskiusunik qaratsamut aallakaatitsisarput. Neuronit hundredinik milliardillit qaratsamiittut ilarpassuisa nalunaarutit tiguneqaqqammersut paasinialerpaat qanorlu ittumik periaaseqarniarnissaq aalajangerniarlugu. Tamanna tamarmi sekundip ilamininnguani sukkasoorujussuarmik pisarpoq. Ilumut, isi mianerisariaqartumik assersuutaavoq silassorissusillup pinngortitsinerata tupinnaannartuanut. — Tussiaat 139:14.
2. Isigisinnaassusermut tunngasoq suna ilisimatuut suli paaqartinngilaat?
2 Isip qaratsallu pinngortitaassusertik naapertorlugu qanoq sulinerat pillugu ilisimatuut naak ilisimasaqangaatsiaraluarlutik, isigisavut qanorpiaq ililluta sorpiaallu pissutigalugit taamatut periarfigisarivut pillugit ilisimasakipput. Assersuutigalugu: Paasineqarluanngilaq suna pissutiginerlugu arlaata aappaluttoq tungujortumit nuannarinerugaa, arlaatali tungujortoq aappaluttumit nuannarinerugaa, paasineqarluarnanilu suna pissutigalugu qalipaatit assigiinngitsut assigiinngitsumik sunnertaraatigut. Isiginninnerup qisuariarnermut sunniuteqarnera suli paaqartinneqanngilaq. Kisiannili Jehovap, isimik Pinngortitsisup, erneratalu suleqatigisaatalu, Jesusip Kristusip, timip isaata assigiinngitsorpassuarnik katitigaanera paasiuminaatsortaalu ilisimasaqarfigilluarpaat, aammattaaq isitta qanoq iliornitsinnut inuunitsinnullu sunniuteqarsinnaaneri nalunngilluinnarpaat.
’Timip qaammaqqutaa’
3. Timip isi qaammaqqutigigaa qanoq paasisariaqarpa?
3 Ilaanni Jesus oqarsimavoq: ’Isi timip qaammaqqutigaa.’ (Matîuse 6:22) Qaammaqqutip siunertaraa taartup qaammarsagaanissaa, sumiiffipput, qanoq ilioriarnissarput, sumut ingerlanissarput, ilaallu ilanngullugit, uatsinnut takusinnaaqqullugit. Isivut qaammaqqutitut ipput ilorlerput qaammarsartaramikku. Isivut ikiortigalugit avatitsinniittut atassuteqarfigiuarsinnaavavut silatusaartumillu siunertaqarluartumillu qisuariartarsinnaalluta, satsilluta ingerlanata, naallutalu immaqalu annerluta.
4. Isip pissusianit qanoq sunnerneqartarpugut?
4 Isilli timimut qaammaqqutaasinnaassusiata annertussusia eqqarsaatigalugu isip pissusia apeqqutaanerussaaq. Tamanna pissutigalugu Jesusip oqaatsini imatut ilavai: ’Taamaattumik isit peqqusersuippat [peqqusersuitsumik isigisunik iseqaruit, NW], timit tamarmi qaamasormiussaaq; isilli ajorpat, timit tamarmi taarmiussaaq. Qaamasorli ilunniittoq taarpat, taartoq qanormi taava atsigissava?’ (Matîuse 6:22, 23) Tamatumannga paasineqarsinnaavoq isitta inooriaatsitsinnut tamarsuarmut ajunngitsumilluunniit ajortumilluunniit sunniuteqarnissaa.
Isip sunniuteqarnera
5. Evap Satanimit usserneqarnerani isai qanoq annertutigisumik atorneqarpat?
5 Arnaq siulleq, Eva, eqqarsaatigeriaruk. Taassuma isaata qanoq-iliornerinut qanoq sakkortutigisumik sunniinera Evap Salloqittaasumik, Satanimik Diaavulumik, naammattoorinerata Bibelimi oqaluttuarineqarneranit paasineqarsinnaavoq. (2 Korintumiut 11:3; 1 Timûtiuse 2:14) Satan oqatsiarpoq ’isai uisitaajumaartut’ Guutip inassutaa sumiginnarpagu ’orpiullu ajunngitsumik ajortumillu sianinartup’ paarnai neriffigalugit. Arnaq qanoq qisuariarpa? Bibelip oqaluttuuppaatigut: ’Arnallu orpik isigilerpaa neriffigiuminartoq isigiuminartorlu, orpik pitsaaqqajartoq sianinarmat.’ Isini inerteqqutaasumut isiginnaartippai. Taamaaliornera isimik piaaraluneerluni atornerluineruvoq. Suna kinguneraa? Tigusivorlu paarmaasa ilaanik, nerillunilu.’ — 1 Môrsase 2:17; 3:4-6.
6. Isitta qanoq ilillugit iliuutsivut sunnertarpaat?
6 Taamanerpiaq Evap ’orpik ajunngitsumik ajortumillu sianinartoq’ paarnaaluunniit takoqqaarnavianngilai. Taamaalineranili takunninneragut allamik pisoqalersimavoq. Taamaalinerani ’isigiuminarpoq’ isinullu pilerinarluni. Pilerissuseq piumassuserlu isip pissuserinngikkaluarpai, uummatilli pissuserai. Isilli isigisaasa uummatip pilerissusia piumassusialu sakkortusisittarpaat, ima sakkortutigisumik iliornermik kinguneqarsinnaalersillugu. Taamani Evap iliornera namminermut uianullu Adamimut, aammattaaq kinguaassaannut tamanut, uatsinnullu ullumikkut inuusunut, ajorluinnartumik kinguneqarpoq. — Rûmamiut 5:12; Jâko 1:14, 15.
7. Satanip Jesus pingajussaanik tammartinniarmagu, isi qanoq atorneqarpa, sunalu kinguneralugu?
7 Jesusilli maligassiaa eqqarsaatigigutsigu paasissavarput isip isigisaanit ajortuliornissamut sunnerneqarneq akiorluarsinnaagipput. Taamaalineranissaaq Satan ussiisuuvoq. Jesus Guutip peqqusaanik iliornissaanit tunuartinniarsaralugu pingajussaanik misiliinermini, Diaavulup Jesus ’aallaruppaa qaqqarsuarmut kingittorsuarmut, silamiullu naalagaaffii tamaasa pingaartorsuussutaallu taassumunnga qimerloortippai’. Malugeriaruk Satanip oqaannarluni Jesus neqeroorfiginngikkaa silarsuarmi pissaanermik naalannassusermillu tamanik pallorfigissagaluarpani. Tamakku tamaasa Jesusimut ’qimerloortippai’, isip sakkortuumik sunniisinnaassusia atorniarlugu. Ussernartumilli neqeroorfigineqaraluarnerminit Jesus allamut saatsinneqannginnami, Ataataminulli qilammiusumut, Jehovamut, pissutsi aalajaatsumik isigiuaramiuk, Satanip nakutitseriaannikkut peqqusersusaarnera maangaannartilluarsinnaasimavaa. — Matîuse 4:8-10.
8. Evamut Jesusimullu pisimasut uagut sumik ilinniarfigisinnaavavut?
8 Misigisimasat tamakku sumik ilinniarfigisinnaavavut? Siullermik: Sivisuumik isigisatta uummatitta pilerigisaat ajunngitsuugaluarpata ajortuugaluarpataluunniit sakkortusarsinnaagaat. Tamatuma iliuuseqalersissinnaavaatigut uatsinnut allanuttaaq pilluaqqussutissaasumik ajunaarutissaasumilluunniit kinguneqartussamik. Aappassaanik: Erseqqippoq isit isigisallu sakkuginerullugit Satan periaaseqartartoq salloqittarniakkani salloqittarniarlugit. Inuiannik tammartitsiniarsarinermini Satanip ’isumaliornerinit’ tamanit, isinut pilerinartitsinera sunniuteqarnerpaagunarpoq. — 2 Korintumiut 2:11.
9. Ullumikkut Satanip ’isinut pilerinartut’ qanoq ilillugit salliutinniartarpai?
9 Ullumikkut inuit tamaasa Guutip peqqusaanik iliorunnaarsinniarsaralugit peqqusersusaarnermigut Satanip periaatsit taamatorluinnaq ittut periaaseriuartarpai. Silarsuup inuisa alutorisaat pinnarisaallu asuliinnaliuutaagaluartut sakkugalugit Satanip ’uinimmut pilerinartut isinullu pilerinartut usorsitsaarutillu inuunerup matuma pii’ salliutinniarpai. (1 Juánase 2:16) Niuertarfiutillit nioqqutissiaminnik ussassaareriaasiisigut tamanna ersseqqissumik takuneqarsinnaavoq. Imaannginnerpa ussassaarutit kinguneqarluarnerpaat tassaasut isiginikkut takusanik misigisanillu tunngaveqartinniarneqartut? Ussassaarutit ivertitat qaammartittakkallu qalipaatigissaartut kisissaanngitsut, atuagassiani aviisinilu assilissat titartakkallu ingasattumik pinnersaagaasut, filmitigut nioqqutinik pilerisaarutiginninniutit aliikkutanngortitaasut — nioqqutissallu pilerisaarutigineqarnerinut aningaasartuutit amerlasupiloorujussuit atorneqartartut — tamarmik katillutik uppernarsarpaat nioqqutinik pilerisaarutiginninnerup siunertariinnaraa atuisartut isaasa pilerissusii sakkortusarniarlugit.
10. Niuertarfiutillit sunarpiaq ussassaarutiginiarpaat?
10 Suut ussassaarutigineqartut erseqqilluinnartarput. Isertornerusukkulli nioqqutissat piinnarnagit aammattaarli inooriaaseq aalajangersimasoq ussassaarutigineqartarpoq. Amerlanertigut nioqqutissat pilerisaarutigineqarnermikkut inunnit pigissaarnerusunit, piginnaanertuunit, pilluarnerusunit pinnernerusunillu atorneqartarlutik takutinneqartarput. Siunertarineqarporlu atuisartut ataasiakkaat isumaqalersinniarlugit nioqqutissat taakkuusut atorunikkik inuttut ussassaarutini takutitaasutut nuannertigisumik pissuseqalerumaartut. Nioqqutinik pilerisaarutiginnittartut nalunngilaat inuit inooriaaseq aalajangersimasoq inooriaaserilereersimagunikku, kimigiiserfigineqaqqajaassasut nioqqutissanik allanillu inooriaatsimut tassunga tulluartuusunik atuisarnissaminnut. Tamanna eqqarsaatigalugu silatusaarnerussaaq kristumiut Guutimut tunniulluinnarsimasut unnersuussut Eprîarinut agdlagkane 13:5-imi allassimasoq maleruarniarpassuk! Tassani allassimavoq: ’Inuugitsi aningaaserituunasi pigisasi naammagalugit.’
„Peqqusersuitsumik isigisunik,“ ’ajortuunngitsunik’, iseqarniarneq
11. Oqaatsit ’peqqusersuitsumik isigisoq’ aamma ’ajortoq’ Jesusip isi pillugu oqaaseqaataani atorneqarnerat naapertorlugu nassuiakkit.
11 Ullut tamaasa isinut pilerinartut allanut saasaarisinnaasut taama amerlatigisut takusassaajuarmata, erseqqinnerusumik paasivarput suna pissutigalugu Jesus Kristusip oqaaqqissaaraatigut ’peqqusersuitsumik isigisunik, ajortuunngitsunik, iseqarniaqqulluta’. (Matîuse 6:22, 23) Tamanna qanorpiaq isumaqarpa? Grækerit oqaasiat tamaani atorneqartoq, haplousʹ, tunngaviusumik isumaqarpoq aalajangersimasumik siunertarisaqarneq imaluunniit ataasiinnarmik anguniagaqarneq. ’Ajortoq’ grækerisoorlugu tassa ponērosʹ, isumaqarlunilu-piluk, iluaatsoq. Taamaattumik ’peqqusersuitsumik isigisunik isilik’ ataasiinnarmik tamaviaaruteqassaaq, pisartunut suugaluartunulluunniit saatsinneqarneq ajorluni. Tamatumali akerlianik ajortumik isilik tatigisassaanngilaq, peqqusersuuvoq, piumatuullunilu; isertortut taartumiittullu kajungerisarpai.
12. Oqaatsit Jesusip oqaasiisa attavigisaat pingaarnersiorlugit nassuiakkit.
12 Timili tamarmi qaamasormiussappat suut nakkullugit isigineqassappat? Oqaatsit versip tamatuma attavigisai misissorutsigik akissutissarsisinnaassaagut. Versip taassuma siuliini Jesusip ’nunami pequutit’ aamma ’qilammi pequutit’ oqaluutigai. Oqarsimavoq ’uummatissi pequutisi najortaraat’. Taava, isi oqaluutigereerlugu, ataasiinnaq pingaarnerutillugu siunertaqarniarneq erseqqissarpaa oqarluni: ’Naalakkanut marlunnut,’ tassa Guutimut pisuussutinullu, ’kiffartorsinnaasoqanngilaq.’ Versip taassuma kinguliini unnersuussuteqarpoq ullormut pisariaqartut qanoq isigissagivut oqaaqqissaarullu una naggasiutigalugu: ’Guutilli naalagaaffia iluarnerlu taassuma pia piniaqqaartuaannarsigik, taava tamakku tamaasa ilanngullugit piumaarpasi.’ — Matîuse 6:19-34.
13. ’Timerput tamarmi qaamasormiussappat’ suna nakkutigiuaannartariaqarparput?
13 Tamakku tamaasa sumik ilinniarfigisinnaavavut? Jesusip inuunermi anguniakkat oqaluutigai, nunap piinik piniarnerup siunertarisaqanngissusia uparuarlugu, anersaap piinik soqutiginninniarnerup pilluarnartortai erseqqissarlugit. Erseqqissumik paasitinniarpaatigut Naalagaaffimmut pingaartitaanerusut kisiisa nakkutigigutsigik ’timerput tamarmi qaamasormiussasoq’. Suna pillugu? Guutip peqqusaanik naammassinninniarneq inuunitsinni anguniagarigutsigu, tusagassaq nuannersoq alutornangaartoq inuunitsinnut tunngasuni tamani ersersinniartassavarput. Siunissamik qaamasumik ilimagisaqaannarnata aammattaarli taartut isertortullu namminissarsiortumik anguniagaqarluni inuunerup nassatai anigorsinnaavavut. — 2 Korintumiut 4:1-6.
14. Nunap piinik pisuunngorniarneq nakkutigiuaannarlugu qanoq ilillugu ’taartumik’ kinguneqarsinnaava?
14 Apustili Paulusip Jesusip oqaasii sakkortusarpai nassuiaagami: ’Pisuunngorumasulli usserneqarlutillu napititaasarput silaqanngitsorpallattunillu ajoqutaasunillu pilerigisarpassuaqalersarlutik; tamakkua inuit aserornermut tammarnermullu kiviartortittarpaat.’ (1 Timûtiuse 6:9) Oqaatsit taakkua ila tangeqassusii! Nutaarsiassalersaarutitigut nalunaarutigineqartaqattaarput nunap inuinit qinigaasut, eqqartuussisut, aningaaserisut, niuertarfiutillit atorfikkaat allallu peqquserluttuliorlutik aningaasanillu paarisaminnik tillissimallutik paasineqartut, nalunaarutit ilaat naapertussagaanni USA-innarmi „ukiut tamaasa dollarit 200 milliardit [koruunit 2 billionit] salloqittaallutik iluanaarutigisaraat“. Pisuunngorusunneq usserneqaatigigamikku inuppassuit ileqqorissuusimagaluartut napititaasimapput inatsisinillu unioqqutitsisunnguutigalugu. Uagut ’aserornermut tammarnermullu kiviartortik’kumanngivippugut, ’taartorlu’ Jesusip sioorasaarutigisaa atorumanngivillugu. — Takuuk ússatit 23:4, 5.
15, 16. (a) ’Isinut pilerinartut’ allat suut nigortariaqarpavut? (b) ússatit 27:20-mi allassimasoq tamatumuuna pineqartunut illit qanoq isumaqartinniassaviuk?
15 Pisuunngorusuttuinnaalli taartumi angalalernissaminnut aarlerinartorsiorpat? Naagga, ’isinut pilerinartut’ assigiinngitsorpassuugamik. Jesusip oqaasii Matîuse 5:28-mi allassimasut eqqaaniakkit: „Pileritsaallugu arnamut isigiuaannartup uummammigut allasiorfigereerpaa.“ (NW) Soorunami mianersoqqussut tamanna tunngatinneqarsinnaavortaaq isigisassanik kanngunartumik illigutsannartussanik pileritsannartussanillu isiginnaartarnermut.
16 Taava nerisassanik, imigassanik atisanillu isumakulunneq Jesusip eqqartugaa sammineqarsinnaalerpoq. (Matîuse 6:25-32) Tamakku naak pisariaqaraluartut, nutaanerpaaq, akisunerpaaq, piumaneqarnerpaaq perusullugit ingasattumik piumassuseqarnerup isumarput uummaterpullu inussiarilersinnaavai. (Rûmamiut 16:18; Filípimiut 3:19) Sukisaarsaarnerit, aliikkusersornerit, timersornerit allalluunniit asuli nuannariinnarlugit iliornerit eqqarsaatigalugit, tulluartumik oqimaaqatigiinniartariaqarpugut, silarsuup inuisa ingasaassinerinit isumassarsiaannillu asuliinnaasunit tigutinnaveersaarluta. Tamakkununnga tamanut tunngasutigut silatusaarnerussaaq oqaatsit silatuut ússatit 27:20-miittut eqqarsaatigisarlugit: ’Uneriffik aserorsimaffillu naammassinavianngillat, taamattaaq inuit isaat naammassinavianngillat.’ Aap, immitsinnut naalakkersorniartariaqarpugut, isitta piumasaat naammassiniarlugu anersaakkut navianartorsiornaveersaarluta.
’Peqqusersuitsumik isigiuarnerup’ pilluarnartortai
17. ’Peqqusersuitsumik isigiuaramik’ inuit ilaasa Naalagaaffimmut pingaartitaanerusut qanoq inuunerminni salliutittuarsinnaasimavaat?
17 ’Peqqusersuitsumik isigiuartut’ Guutillu neriorsuutaanik naalagaaffianut atasunik nakkutiginnittuartut Jehovamit amerlasuunik pilluaqqusaasarput. Inuit silarsuarmi sumiikkaluarunilluunniit qanoq atorfeqaraluarunilluunniit misigisimasaannit tamanna takutinneqarluarsinnaavoq. Uku eqqarsaatigeriakkit:
„Colombiami, Amerika Kujallermi, oqaluussisartunik amigaateqarfiunerusumi kiffartuussigallarama, qaammammut aningaasarsiakka dollarit 100-t missiliorlugit [koruunit 1000-it] taamaallaat inuussutigaakka. Oqaluussisartutut atorfinitsitaallunga aallartikkaluarpunga, qaammatilli aallartilernerani orluvunga singernera napillugu. Tamatuma kingunerisaanik nakorsartinninnut aningaasartuutit aningaasaataarutingajassutigaakka, qaammatillu naalernissaani aatsaat aningaasarseqqittussaavunga. Rigssalimi tapersiullugu tunissutigisartagara nakkartittariaqalerpara, nakkartikkaluarukkuli sapaatip akunneranut tulliuttumut nerisassarsiutissaarutissagaluarpunga. Tamanna ullorpaaluit eqqarsaatigereersimallugu, paasilerakku rigssalip attartorneranut akiliut pinngitsoornak akilerneqartariaqarmat, aalajangerpunga nakkartittagara nakkartissallugu. Aqaguani ullaakkut qatanngut arnaq USA-mi najugalik Colombiami uannut tikeraarsimasoq allagarsiffigaara. Colombiamiut aningaasaat tikeraarsimanerminit sinneqartoorutigisani ilanngussimavai. Aningaasat nakkartitama taakku naligilluinnarpaat.“
Marlunngornerup ualiani kiattumi Ki, Taechunimi Koreami, passutitittarfimmik ingerlassisoq, suleqatimi ilaannit pingasunit sissamukaqquneqarpoq. Naak sissamukarnissaq ussernaraluartoq, Kip nalunngilaa tassunnassagaluaruni unnukkut ilagiit atuakkamik atuaqqissaaqatigiinnerat inortussagini. Taamaattumik qujaannarpoq. Minuttit arlalialuit qaangiummata suleqatai pingasut taakku passutitittarfimmut eqqunneqarput — toqusimallutik! Passutitittarfimmit aninermik kinguneralannguagut aqqusinikkut angalallutik ajunaarput. Soorunami Kip pisimasoq tamanna aliasuutigaa, nuannaarporli nammineq inuunini erligineqarmat ileqquni ajunngitsoq ukiut ingerlaneranni ileqquliussimasani aalajangiukkamiuk. — Eprîarit 10:24, 25.
18. Meeqqat qanoq ilinniartinneqarsinnaappat ’peqqusersuitsumik isigiuaqqullugit’?
18 Meeqqat allaat ilinniartinneqarsinnaapput Naalagaaffimmut pingaartitaanerusut nakkutigiuaannaqqullugit, soorlu misigisimasamit USA-mi pisimasumit matuma kinguliini oqaluttuarineqartumit paasineqarsinnaasoq:
„Uatsinnut tikeraat marluk oqaluttuummatigut Filippinerini ilagiit pingasut tamarmik immikkut dollarinik 1000-inik [koruunit 10.000-it] — tassanimiut akissaateqarnerannut naleqqiullugu aningaasat amerlangaatsiartut — tunissuteqartariaqartut rigssaliata ikuallalluni nungussimasup sanaqqinneqarnissaanut, uigalu aalajangerpugut tuniseqataajumalluta. Meeqqavummi sisamaasut, sisamanik qaammatilimmit arfinilinnik ukiulimmut? Sapaatit akunneri tamaasa akissarsisaraangami uima meeqqat tamaasa immikkut dollarimik sølviusumik pisissuttarpai. Uima aningaasat agguarpai meeqqat tamaasa pigisaminnik takunnissinnaaqqullugit. Aningaasaatitillu akissaatigalugit pisiariumasaraluisa ilaat taagorpavut. Ataasiinnarmilli akissuteqartarput — aningaasaatitik qatanngutinut tunniukkumavaat.“ Tunissutiminnut dollarit 99-inut ilanngullugu meeqqat allakkanik pilimanianngitsunik oqaasertalinnik nassiussipput. Filippinerini qatanngutit asanninneq tunisiumatussuserlu ima killinneqaatigitigigamikkik, allakkat atuarneqarmata ilarpassui qullilipput.
19. Suna nakkutigiuaannarutsigu aatsaat qaamasumik siunissaqarnissarput qularutigissanngivipparput?
19 ’Isitit siumuinnaq isigisarlit, qimerissatillu nalinnut iluarsinnarlit.’ (ússatit 4:25) Silatussusissaa siunnersuut tamanna maleruarutsigu, tamalaanut qinertarnata tammarfissamullu sangutinnata! Paulus imaattumik siunnersuuteqarpoq: ’Mianersoqqissaaritsi saqilluarniarlusi, ilisimaatsutut pinnasi ilisimatuutulli; ullullu piginnaaffiusut asiutinnaveersigik, ullut ajormata.’ Aammalu oqaaqqissaarivoq: ’Jehovap peqqusaa sunaasoq sianiginiarsiuk.’ (Evfisumiut 5:15-17) Taamaaliorutta qularutiginngivissinnaavarput ’peqqusersuitsumik isigiuarniarnitsinni’ iluatsikkumaarluta, isumalluarlutalu qilanaarisinnaavarput siunissaq qaamasoq — inuunissaq naassaanngitsoq Guutip pissutsinik aaqqissuussinissaani nutaassami neriorsuutigisaani. — Naleqqiuguk Korintumiunut agdlagkat áipait 4:17, 18. (wD 1/5 86)
Makku nassuiarsinnaavigit?
□ Timip isi qaammaqqutigigaa qanoq paasisariaqarpa?
□ Isitta qanoq ilillugit iliuutsivut sunnertarpaat, soorlu Evamut Jesusimullu pisimasunit naluneqanngitsoq?
□ Ullumikkut Satanip ’isinut pilerinartut’ qanoq ilillugit salliutinniartarpai?
□ Uagut qanoq iliortariaqarpugut ’peqqusersuitsumik isigiuarumalluta’?
□ Maannakkut suna nakkutigiuartariaqarparput?
[Qupp. 12-mi assiliartaq]
Nakkutigiuaannakkatta uummatitta kissaatigisai sakkortusarsinnaavaat