Jesusip inuunera ajoqersuineralu

Mattæus qaaqquneqartoq

TUMARTORSIMASUMIK ajorunnaarsitsereernermi kingorna Jesus Kapernaumimit aallarpoq Galilæap tasersuata eqqaanukarluni. Aammattaaq tassani inuppassuarnit orniguffigineqarpoq, ajoqersulerpaalu. Ingerlaqqikkami takulerpaa Mattæus, Levimittaaq taaneqartartoq, akileraaruseriffimmi issiasoq. „Malinnga,“ Jesusip kajumissaarutaa taama nipeqarpoq.

Jesusip ajoqersuutaa qularnanngitsumik Mattæusip ilisimasaqarfigillualereersimavaa, soorluttaaq Peter, Andreas, Jakob aamma Johannes Jesusimik malinneqquneqarnerminni taama issimasut. Mattæusip qaaqquneqarnini ilassigasuarpaa, soorluttaaq allat taamatorluinnaq iliorsimasut. Nikuippoq ilanngaaserisutullu pisussaaffini qimallugit, Jesusilu malilerlugu.

Tamatuma kingorna Mattæus illumini katerisimaarnersuaqartitsivoq, immaqa Jesusimik malinneqqusaanini malunnartinniarlugu. Jesusip ajoqersugaasalu saniatigut aammattaaq Mattæusip suleqatigisimasai najuupput. Angutit taakku juuteqatiminnit iluarisaanngigajuttuupput, Romamiut oqartussaatitaannut uumigineqaqisunut akileraarutaasussanik inunnik akileraartitsisartuummata. Aammalu tamatumunnga pissutaagajuttoq tassaavoq peqquserlullutik akileraarutissaviusumit annerusumik inunnik akileraartitsisarnerat.

Katerisimaarnermi farisæerit takuleramikku Jesusip inuit taama ittut ilagigai, ajoqersugai ima aperaat: „Sooq ajoqersortissi ilanngaaserisut ajortuliortullu nereqatigai?“ Apeqqutaat Jesusip tusaagamiuk ima akivoq: „Peqqissut nakorsamik pisariaqartitsinngillat, kisianni napparsimasut. Matumali isumaa ilinniariartorsiuk: ’Naakkinninneq iluaraara, pilliutilli pinnagit;’ iluartummi pinnagit ajortuliortut qaaqqujartorpakka.“

Mattæusip ilanngaaserisut taakku imminut qaaqqusimavai qularnanngitsumik Jesusimut tusarnaarniassammata anersaakkullu katsorsarneqarniassammata. Tassalu maanna Jesusip ilagai Guutimut ajunnginnerusumik attaveqalernissaannik ikiorniarlugit. Farisæerit imminut iluartuutinniartuusut iliornerattut pinnani Jesusip taakku narruginngilai. Naakkinnillunilu taakkununnga anersaakkut nakorsatut iliorpoq.

Jesusip ajortuliortut naakkinnittumik iliorfigimmagit imaanngilaq ajortuliai sianiginngitsuusaarai, kisianni timikkut napparsimasunut qamuuna misiginneqatiginninnermisulli taakkununnga misiginneqataaneranut tamanna ersiutaavoq. Assersuutigalugu, eqqaamajuk qanoq naakkinnilluni assani tumartorsimasumut isaakkaa attorlugulu ima oqaatigaluni: „Piumavunga. Pupeerugit.“ Taamatuttaaq uagut inuit annikilliortut naakkinnittumik iliorfigalugillu ikiortariaqarpavut, ingammik anersaakkut ikiorlugit. Mattæus 8:3; 9:9-13; Markus 2:13-17; Lukas 5:27-32. (wD 15/5 86)

◆ Sumiilluni Jesusip Mattæus takulerpaa?

◆ Mattæus sumik suliaqarpa, aamma, sooq inuit taama suliaqartut juuteqatiminnit iluarineqarneq ajorpat?

◆ Jesus qanoq avoqqaarineqarpa, qanorlu qisuariarpa?

◆ Sooq Jesusip ajortuliortut ilagisarpai?

[Qupperneq 9-mi tamakkerlugu asseq]