Jesusip inuunera ajoqersuineralu

Apeqqut iisinnginniarnermut tunngasoq

UKIUMI 30-mi Jesusip poorskisiorneranit ukioq ataasingajak qaangiussimavoq. Johannes Kuisisoq qaammatini arlalinni maanna parnaarussaaqqasimavoq. Taassuma kissaatigisimavaa ajoqersukkami Jesusimut ilanngunnissaat, tamakkeratilli taamaaliorsimapput.

Johannesip parnaarussaaqqasup ajoqersugaasa ilaat maanna Jesusimukarput imalu aperalugu: „Sooq uagut farisiiarillu qassiinik iisinnginniartarpugut, ajoqersukkatilli iisinnginniarnatik?“ Farisiiarit sapaatip-akunneranut marloriarlutik upperisarsiornerminnut atatillugu iisinnginniartarput, immaqalu Johannesip ajoqersugai tamatumunnga assingusumik ileqqoqarput. Aammattaarli imaassinnaavoq Johannesip parnaarussaaqqaneranik aliasuutiginninnertik ersersinniarlugu iisinnginniartarsimasut, tupigusuutigalugulu sooq Jesusip ajoqersugai taamatut aliasunnermik ersersitsinnginnersut.

Jesusip ima akivai: „Katittussanut qaaqqusat aliasussinnaappat uissaq najortillugu? Ullulli nalliukkumaarput uissap taakkunannga aallarunneqarfissai, taavalu iisinnginniarumaarput.“

Tamatuma Johannesip ajoqersugai eqqaasittariaqaraluarpai siornatigut Johannesip nammineerluni Jesus uissatut eqqartorsimammagu. Taamaattumillu Jesus maanna takkussimalermat Johannesip iisinnginniarnissaq naleqqussorinavianngilaa. Aammattaaq Jesusip ajoqersugai taamatut isumaqarput. Kingusinnerusukkut, Jesus toqummat, taassuma ajoqersugai aliasullutillu iisinnginniarput. Makititaallunili qilaliarmat aliasuttariaarullutillu iisinnginniartariaarupput.

Taava Jesus ima assersuusiorpoq: „Annoraatoqaq ilaartortarinngilaat annoraaminermik tasinneqanngitsumik, ilaartornerminit annoraaq aleqqikkumaarmat alinneralu ajornerulerluni. Viinnilu nutaaq poorusisoqqanut immiuttarinngilaat, poorutsit qaassammagit, viinni kuilussinnarluni poorutsillu aserorlutik; kisianni viinni nutaaq poorusisaanut immiuttarpaat.“ Assersuusiat tamakku iisinnginniarneq pillugu apeqqummut qanoq attuumassuteqarpat?

Johannesip ajoqersugai Jesusip paasitinniarpai nammineq ajoqersukkami juutit najoqqutassatoqaannut, soorlu iisinnginniarnermut najoqqutassamut, maleruaanissaat kimilluunniit piumasarineqarsinnaanngimmat. Pallorfiginninnermik aaqqissuussaanitoqaq atortussaajunnaarsimasoq igitassaannanngorsimasorlu ilaartoriartorlugu Jesus tikiussimanngilaq. Kristumiussuseq taamanikkut juutiussutsimut, inuit namminneq piliaannik ajoqersuutigisalimmut, naapertuuttunngorsarneqartussaasimanngilaq. Aap, annoraaminertut nutaatut annoraaminitoqqamut ilaartuutaasutut imaluunniit viinnitut nutaatut poorusisoqqamiittutut issanngilaq. Mattæus 9:14-17; Markus 2:18-22; Lukas 5:33-39; Johannes 3:27-29. (wD 1/6 86)

◆ Kikkut iisinnginniartarsimappat, aammalu sooq taamaaliortarsimappat?

◆ Sooq Jesusip ajoqersugai taassumannga najorneqarnerminni iisinnginniartarsimanngillat, aammalu qanoq ililluni toqunerata kingorna iisinnginniarnissaq pisariaaruppa?

◆ Jesus qanoq assersuusiorpa, qanorlu isumaqartippai?

[Qupperneq 12-mi tamakkerlugu asseq]