Kristumiut kiffaajunnaarniarneq qanoq isumaqarfigissavaat

KRISTUMIUT „kiffaajunnaarniarlutik“ suleqatigiit oqartussaatitaanermut eqqortumik ingerlanneqartumut assortuisut akerleraat. Suna pillugu? Kiffaajunnaarniarneq taamaattoq kiffaajunnaarsitsineq ajormat — inussiaalersitsimmalli. Paasiuminartumik assersuusiornikkut tamanna takutinneqarsinnaavoq.

Inuusuttuaqqap angajoqqaami oqartussaanerat erloqissutigaa, pujortarnissani imigassartornissanilu inerteqqutigimmatigit. Oqartussaanertik ernermik iluaqutissaanut atoraat paasinnginnamiuk, „kiffaajunnaarsitaanissani“ pileritsaatigaa. Nammineq aalajangiisussanngorami immikkut ineqalereersimalluni, kiffaanngissuseq pilerigiuarsimasani kiisa pivaa. Ukiulli qaangiussortut pujortartorujussuanngorpoq imerajuttunngorsimallunilu. Kiisa nakorsaata oqarfigaa peqqinnissaq pissutigalugu pujortartarunnaartariaqarlunilu imigassartortarunnaartariaqartoq. Tamannali sapingajappaa. Kiffaajunnaarsitaanera uverisimaneranik, inussianngorneranik, kinguneqarpoq.

Guutip oqartussaalluinnarneranit kiffaajunnaarniarneq

Guuti oqartussaalluinnartuuvoq, Pinngortitsisuugami. Taamaattumik pinngortitaminut suut eqqortumik iliornerusut, suut ileqqussaasut suullu ileqqussaanngitsut aalajangertussaavai. Maligassiat tamakku, inuiaat iluaqutissaannut aalajangigaasut, Bibelimi erseqqissumik allaaserineqarput. „Tammaqinasi,“ allassimavoq. „Kinguaassiuutitigut kanngunartuliortulluunniit guutipilussiortulluunniit allasiortulluunniit angutilluunniit pinngortitat pissusiannut akerliusumik atortittut, angutilluunniit anguteqatiminnik atoqatiginnittut, tillittulluunniit piumatuulluunniit imerajuttulluunniit mitaatilliisulluunniit iluanaarniapiluttulluunniit Guutip naalagaaffia kingornussarissanngilaat.“ — 1 Korintumiut 6:9, 10, NW.

Ingammik ukiut 2000-issaanni maanna atuuttuni silap piinik ilisimasunik siuarsimasunillu pingaartitsiffiusuni inuit ileqqussatigut maligassianut taamaattunut kiffaajunnaarniarput. Naalli kiffaanngissusermik taagaluaraat, Guutip ajortimik taasartagaasa kingunipilui ingalassinnaanngilaat. Kiffaajunnaarneq angusimanagu taamaaliortut namminneq kissaatigisatik, pileritsassusertik illigussusertillu inussiaaffigaat, soorlu Jesusip ersseqqissumik takutikkaa, oqarami: ’Ajortimik ileqqulik ajortip inussiaatigaa.’ — Juánase 8:34; aamma takuuk Rûmamiut 6:16.

Oqartussaatitaanermut kiffaajunnaarniarneq allamut naleqqiullugu aatsaat paasisariaqartoq

Naalagaaffimmi atorfillit naalagaaffimmut attuumassuteqartunut, angajoqqaat ilaqutariinnut, ilinniartitsisut atuarfeqarfimmut attuumassuteqartunut utoqqaanertallu kristumiuusut ilagiinnut oqartussaatitaapput. Soorunami taakkua oqartussaatitaanerat allamut naleqqiullugu aatsaat paasisariaqarpoq. Una assersuutigisigu: Jehovap oqartussaalluinnarnera uiusup oqartussaatitaaneranit allamut naleqqiullugu aatsaat paasisariaqartumit pingaarnerutinneqassaaq, uiusup nuliani Guutip oqaasiinik atuaqqunngippagu kristumioqatiminillu naapeqatiginnittaqqunngippagu, massa Jehovap kiffani peqquai taamaalioqqullugit. — apustilit suliait 5:29.

Kisiannili, naalagaaffiup oqartussaatitaanera allamut naleqqiullugu aatsaat paasisariaqartoq akuerigamikku, oqartussaatitaanermik tamatuminnga uppititsiniarlutik kiffaajunnaarniaqatigiit kristumiut iligisinnaanngilaat. Naalakkersuisut naalakkersuinerminni qanoq ilioriaasiat naak isumaqatiginngikkaluarittik, suniaratik assortuisinnaanngillat, aammalu aalajangersimassukkut naalagaaffiup ingerlatitsinera akerlilerniarlugu akileraarutinik akiliiumajunnaaqqusisinnaanatik. ’Naalakkersuisunut akerartortup Guutip peqqusaa [aaqqissuussinera, NW] assortorpaa,’ Paulus oqarsimavoq, oqaatsinilu ima ilavai: ’Assortuisut pillaatissarsissapput.’ — Rûmamiut 13:1-4.

Kisiannili oqarta naalagaaffimmi atorfilik naapertuilluanngitsuusoq oqartussaatitaaninilu atornerlukkaa. Oqarta inuit ataasiakkaat imaluunniit immikkooqatigiit ikinnerussuteqartut nuannarisaanngitsut nakerisarsiorfigisarai. Bibelimi ima unnersuussuseqarpoq: ’Takusaraangakkit piitsut innarlerneqartut, innarluissut naapertuilluarnerlu atorunnaarsitaasut nunat arlaanni, taamaaligaluartoq tupigusuutigissanngilat; qutsissoq qutsinnermik misissorteqartarmat, qulaannilu qutsinnerpaasoqarluni.’ (akugdlîssup oĸausê 5:7) Naammaginngisani immaqa pisortaasunut annerusunut imaluunniit eqqartuussisunut annerusunut suliassanngortissinnaassavaa. Tassuunakkulluunniit naapertuilluartumik pineqarneq anguneqarsinnaanngikkaluarpat, Guutip kiffaasa isumalluutigisinnaavaat ’Jehovap isai angalasartut nuna tamakkerlugu, uummatimikkut ilumoorfigisini pissatsikkumallugit’. — 2 nalunaerssûtigdlit 16:9.

Ilaqutariinnissaaq tamatumunnga assingusumik pissuseqarsinnaavoq. Uiusut ataataasulluunniit oqartussaatitaanertik atornerlukkaluarpassuk, qularissanngilarput Guutip pissutsit tamakku qaquguluunniit aaqqissorumaarai, pissutsinik aaqqissuussinissamini naapertuilluartumi ungasinngitsukkut atuutilersikkumaagassamini naapertuilluanngissuseq qanoq ittorluunniit taamanikkussaq atuuteqqussannginnamiuk. Tamatumali tungaanut arnat meeqqallu kristumiuusut qullersaanermut tunngaviusumik najoqqutaasoq kristumiuni atortuusoq ataqqissavaat, naak ilaatigut atornerlunneqartaraluartoq. Paasivaat tunngaviusumik najoqqutaasup tamatuma siunertarinngikkaa kikkulluunniit nikanarsagaanissaat, kisiannili ilaqutariinni aamma kristumiut ilagiissaanni eqqissinissap ataasiussuseqarnissallu aalajaallisagaanissaat. — 1 Korintumiut 11:3.

Ilagiinni oqartussaatitaanermut kiffaajunnaarniarneq

Kristumiut ilagiissaanni qullersaaneq pillugu Guutip oqaasiani allassimavoq: ’Siulersortisi naalassigit tusartarlugillu, tarnisi piggammatigit aperineqarunik akisussaallutik.’ (Eprîarit 13:17) Utoqqaanertat oqartussaatitaanerat naak allamut naleqqiullugu aatsaat paasisariaqaraluartoq, Guutip anersaamigut illernartukkut oqartussaatitaanermik tunisimavai. Oqartussaatitaanermit allamut naleqqiullugu aatsaat paasisariaqartumit, soorlu naalagaaffimmi atorfilinnut tunniunneqartumit, tamanna toqqarnerusumik tunniunneqarpoq. — apustilit suliait 20:28.

Isumaqartoqarsimavoq Guutip peqatigiissortaasa takussaasut najoqqutassiai unnersuussutaalu killiliivallaartut, inuup ataasiakkaap piumasaminik iliorsinnaatitaanera naqisimavallaaraat. Tamanna pissutigalugu Jehovap Nalunaajaasui attavigiunnaarpaat; tarnaannik piggassisut tusarumajunnaarpaat. Inuit taakku naak immaqa isumaqarsinnaagaluartut kiffaajunnaarsimallutik, „kiffaajunnaarnermikkut“ ajoqersuinerluutit eqqunngitsumillu upperisarsiornikkut ileqqut inussiaaffigeqqippaat.

Kristumiut ilumoortut oqartussaatitaaneq ataqqivaat, Guutip oqartussaalluinnarnera inuillu oqartussaatitaanerat allamut naleqqiullugu aatsaat paasisariaqartoq. Oqartussaatitaaneq eqqortumik isigigamikku kristumiutut kiffaanngissuseq sallusuissummik ilisarsinermikkut pissarsiarisimasartik atornerlunneq ajorpaat. (wD 1/7 86)

[Qupp. 6-mi issuagaq]

Guuti oqartussaalluinnarpoq, Pinngortitsisuugami

[Qupp. 6-mi issuagaq]

Kristumiut naalagaaffiup naalakkersuinermi qanoq ilioriaasia pissutigalugu naalagaaffimmut pikitsitsineq ajorput, Guutimut akisussaammata

[Qupp. 7-mi issuagaq]

Kristumiut ilumoortut oqartussaatitaaneq ataqqivaat, Guutip oqartussaalluinnarnera aamma inuit oqartussaatitaanerat allamut naleqqiullugu aatsaat paasisariaqartoq

[Qupp. 7-mi assiliartat]

Silarsuarmi oqartussaatitaasut pissaannik akilertarpaat

Ilagiinni oqartussaatitaaneq allamut naleqqiullugu aatsaat paasisariaqartoq akueraat

Oqartussaasoq qutsinnerpaaq, Jehova Guuti, pingaartippaat