Inuusuttusi — salloqittartinnaveeritsi
’Satan nammineq qaamasup inngiliatut pissuseqartuusaartarpoq.’ — 2 KORINTUMIUT 11:14.
1. (a) Ilarpassuavut qanoq salloqittagaasimappat? (b) Kikkut salloqittagaagajunnerusarpat?
QULARNANNGITSUMIK tamatta qangaluunniit salloqittagaasimavugut. Immaqa arsaallutit akerarisannit salloqittagaagavit nikittoorputit, tamannalu iluatsillugu taanna arsamik isertitsisinnaanngorpoq ajugaassutissamik. Immaqaluunniit kusanarpasittumik atisarsisimavutit, kisiannili sivisunngitsumik atoreerakku errorsimallugulu paasinarsisimavoq pitsaalluartuunngitsoq. Kikkunuku amerlanertigut sallogittagaasut imaluunniit nakutitaasut? Tassaannginnerpat misilittagakinnerusut? Amerlasuutigut arsaannikkut ajorsarnerinnarmit imaluunniit pitsaanngitsumik pisisoornerinnarmit alianarnerusumik kinguneqartarpoq.
2. Inuusuttut ilaat qanoq tammartitaappat?
2 Assersuutigisigu Julie: Ukiut aappassaa ilinniarnertuunngorniarluni atuarpoq, oqarlunilu „atuartut angutit pinnernersaat tamanillu nuannarisaanersaat ajuutigigini“. Oqaluttuarpoq: „Oqarfigaara pilerigisaa uanga naammassiumanngikkiga; oqartuaannarporli assut asagaminga, ersissutissaqanngitsorlu. Uanga naaggaartuaannarama, taava oqaasissani pikkunarnersiorlugit sassarpoq. Oqarpoq: ’Assut asavakkit, isumaqaraluarlungalu asagimma. Asannissutsit takutikkumanngikkukku, pitsaanerussaaq naapeqatigiittarunnaarutta.’“ Tamanna tusaramiuk Julie akuersiinnarpoq kanngunartuliorlunilu. Aqaguani paasileramiuk „ikinngummi“ „ajugaanini“ usorsitsaarutigigaa, paasilerpaa salloqittagaalluinnarluni. Nalunngissimasussaagaluarpaa „ikinngummi“ ilumut asasimagaluarunini piliariumanngisaminut pinngitsaaliniarsimanavianngikkaani.
3. (a) Suna pissutigalugu kinguaassiuutitigut kanngunartuliorneq taama sualutsigisumik ajortuliaava? (b) Satanip Diaavulup suna anguniagaraa?
3 Juliep salloqittagaalluni iliornera Guutip inatsisaanik unioqqutitsineruvoq sualuttoq. Bibelimi oqaaqqissaarneqarpugut: „Kanngunartuliornaveeritsi.“ Erseqqilluinnartumillu allassimavoq: ’Kinaluunniit kanngunartuliortorluunniit . . . Messiasip Guutillu naalagaaffianni kingornussassaqanngilaq.’ (1 Korintumiut 6:18, NW; Evfisumiut 5:5) Arsaannikkut ajugaanersutit ajorsarnersutilluunniit, imaluunniit pitsaasunik pitsaanngitsunilluunniit piliaqarnersutit Satanip Diaavulup soqutiginavianngilaa, Guutilli inatsisaanik unioqqutitsisinniarsaralutit soqutigilluinnarpaa. Bibelimi imannak mianersoqqussuteqarpoq: ’Akerartortersi Diaavulu liivertut uiannisaartutut angalasarpoq iisassarsiorluni.’ (1 Pîtruse 5:8) Nakutitseriarsinnaassutsi tamaat atorlugu peqqusersiortarpoq, allaallu ilaatigut qaamasup inngiliatut pissuseqartuusaartarluni, Jehova Guutimik kiffartuussiunnaarsinniarlusi! Ila eqqarsaqqissaartariaqassusia! — 2 Korintumiut 11:14.
Evap misigisai ilinniarfigikkit
4. Suna pillugu ingammik inuusuttut Satanip tammartinniarpai?
4 Ilissinnulli inuusuttunut, eqqarsaat una suli eqqarsaatigisariaqarneruvoq: Satanip ilissi immikkut soqutigaasi. Suna pillugu? Inuusuttuugassi ilikkakkasi ikinnerupput silatusaarsinnaanersilu annikinnerulluni, Satanillu misilittagakinnerusut immikkut soqutigisarpai. Naalanngitsunngornerminiilli taamaaliortalerpoq. Eqqaamajuk Edenip naatsiiviani Eva saaffigigaa, uia Adam siusinnerusukkut pinngortitaasoq saaffigeqqaarnagu. Taamani Satan iluatsitsivoq. Eva inuusunnerusoq misilittagakinnerusorlu salloqittarpaa, allaasaarluni nakutippaa. Bibelimi imannak nassuiarneqarpoq: ’Adam siulliulluni inuliaavoq, Eva tulliulluni. Aammattaaq Adam salloqittagaanngilaq, arnarli salloqittagaalluni unioqqutitsisunngorpoq.’ — 1 Timûtiuse 2:13, 14.
5. (a) Immitsinnut tatiginermit qanoq isumaqarnaveerniassaagut? (b) Apustilip Paulusip suna isumakuluutigaa, sunalu pillugu tamatuminnga isumakulunnera naleqqulluarpa?
5 Imminut tatiginermit isumaqarnaveerit Satanip periaasii ilinnut sunniuteqarnavianngitsut, Guutip inatsisaanik unioqqutitsilersinnavianngikkaatit. Guutip mianersoqqussutaa una eqqaaniaruk: ’Satan nammineq qaamasup inngiliatut pissuseqartuusaartarpoq.’ (2 Korintumiut 11:14) Apustili Paulusip tunngaveqarluartumik isumakuluutigaa Paulusip kristumioqataanik misilittagakinnerusunik nakutitsiniarnermigut Salloqittaasorsuaq immaqa iluatsitsissasoq. Paulus imannak allappoq: ’Ernumavungali, soorlu pulateriaarsuup peqqusersuulluni Eva salloqittaraa [tammartikkaa, NW], taamattaaq ilissi eqqarsaatisi aserussasoralugit Kristusimut peqqusersuikkunnaarsillusi.’ — 2 Korintumiut 11:3.
6. Tammartitaaneq qanoq isumaqarpa?
6 Malugiuk Eva salloqittagaaginnanngitsoq nakutitaaginnanngitsorlu; aammattaarli tammartitaavoq. Tamanna isumaqarpoq ussassaarneqarluni pileritsatsinneqarluniluunniit tammarfissamut uanneqartoq. Tammartitsineq isumaqarsinnaavoq ileqqussaasunit killormut saasaarineq imaluunniit saatsitsineq; tammalersitsineq; salloqittaaneq; kanngunartuliortunngortitsineq, soorlu arnap angummit attorneqarsimanngitsup atoqateqaqqaarnerminut kimigiiserfigineqarnerani. Satanip Evamik tammartitseriaasia (naak taamani kinguaassiuutitigut kanngunartuliortitsinerunngikkaluartoq) misissorutsigu assut ilinniarfigisinnaavarput, ullumikkullu periaaserisartagai tamatumunnga assingusut malugigutsigit mianersuutiginiarsinnaavavut.
7, 8. (a) Satanip Evamut apeqquteqarnermigut suna siunertaraa? (b) Orpimmit nerinissaq kajungernartinniarlugu Satan qanoq oqarpa?
7 Saaffiginneqqaarami Satanip peqqusersuumik pulateriaarsuk sakkugaa Eva Guutip inatsisaanik qulakujuttutut isumaqarfiginnilersinniarlugu. Qulartitsiniarluni pasinnilersitsiniarlunilu oqaasissiullaqqilluni oqarpoq: ’Ilumut Guuti oqaraluarnersoq: Naatsiiviup orpii nalinginnaat neriffigissanngilasi?’ Pasinapiluttumik apeqquteqarnermigut Satan oqarniarporlusooq Eva nersunaqisoq naatsiiviup orpii tamaasa neriffigisinnaannginnamigit. Imaannerarpaali orpik neriffigeqqusaanngitsoq Evap neriffigigaluaruniuk iluaqutigissagaa, toqussanngitsorlu, naak Guuti taama oqaraluartoq. ’Guuti nalunngilaq neriffigigaluarussiuk isisi uisitaajumaartut, Guutisullu ilerumaartusi, ajunngitsorlu ajortorlu sianigilerlugu,’ Satanip qularunnarsinniarlugu oqarfigaa. — 1 Môrsase 3:1-5.
8 Satanip peqqusersullaqqissusia tassuuna isumaqalersitsiniarami ilisimasanik Evap iluaqutigisinnaasassaraluinik Guutip Eva pitsaaliorniaraa! Satanip oqaasia naapertorlugu, Guuti toqunissamik asuliinnaasumik sioorasaarilluni allaat Eva nammineq aalajangiisinnaassusianik atuitsaaliniarpaa. ’Uumaak, pinngitsuugaqalerputit!’ Evamut oqarporlusooq. ’Toqussanngilatit. Guutip nammineq pigisaanik pissarsisinnaavutit. Illit nammineq suna ajortuusoq sunalu ajunngitsuusoq aalajangersinnaavatit.’ Kimulluunniit akisussaanani nammineq aalajangiisinnaanissani Evap pileritsaatigilerpaa.
9. Soorlu Jâkup agdlagaine 1:14, 15-imi takutinneqartoq, pisimasut tulleriiartut suut Evap ajortuliorneranik kiisalu toquneranik kinguneqarpat?
9 Tamatuma kingunerisaanik, Evap piumatsalluni orpik isigilerpaa. ’Arnallu orpik isigilerpaa neriffigiuminartoq isigiuminartorlu, orpik pitsaaqqajartoq sianinarmat; tigusivorlu paarmaasa ilaanik, nerillunilu.’ (1 Môrsase 3:6) Kingornatigulli, paasileramiuk neriorsuutigisamik pinngitsoorluni, Eva oqarpoq: ’Pulateriaarsuup salloqittarpaanga.’ (1 Môrsase 3:13) Salloqittaannanngilaa, aammattaarli tammartippaa, aalajangersimasoq ussassaarutigalugu pilersaarutigalugulu uallugu, kiisalu namminissarsiorluni pileritsannerminit Eva ajortuliortinneqarpoq, tamatumalu kingunerisaanik kiisa toqulluni. — Jâko 1:14, 15.
Satanip nakutitseriaasarneri mianersuutigikkit
10. Suna pillugu Satanip isumaliornerinik nalusuusariaqanngilagut, silatusaarlutalu unnersuussutit suut maleruassavavut?
10 Ullumikkut tamatumunnga assingusut periaaseralugit Satan peqqusersiortarpoq inuusuttut salloqittarniarlugit tammartinniarlugillu. Kisiannili Satanip salloqittaariaasii ukiorpassuit ingerlanerisigut periaaserisartagai Bibelimi erseqqilluinnartumik oqaluttuarineqarmata, isumaliornerinik nalusuusariaqanngilagut. (2 Korintumiut 2:11) Ililli silatusaartariaqarputit mianersoqqussutit unnersuussutillu Jehova Guutip oqaatsimigut peqatigiissortamigullu tunniuttagai sianigissallugit. — ússatit 2:1-6; 3:1-7, 11, 12; 4:1, 2, 20-27; 7:1-4.
11. Qanoq ilillugit Satanip inuusuttut eqqunngitsuliornissaannut uattarpai ussertarlugillu?
11 Qanoq ilillugit Satan inuusuttut eqqunngitsuliornissaannut uattarpai ussertarlugillu? Guutip ajorneragai, iliuutsit Guutimut iluarisaajunnaarnartut, kajungernartutut aammattaarli ajoqutaanngitsutut isumaqarfigineqalersinniartarpai — soorlu Evap orpiup paarmaa isigigaa. Aamma, soorlu Eva isumaqalersinniarini, illit isumaqalersinniarsarissavaatit nuannersumik pinngitsuugaqartutit pisariaqanngikkaluartumik. Jehovap oqaasianik, aammalu angajoqqaavit Guutimik mianerinnittuusut unnersuussutaannik Guutillu peqatigiissortaanik illit ataqqinninnerit Satanip peqqusersiorluni salloqittaagajullunilu nalikillisinniarsarissavaa. Taamaattumik pissutissaqarluartumik Bibelimi oqaaqqissaarneqarpugut: ’Diaavulup qoqassiniaraangasi aalajaanniaritsi.’ — Evfisumiut 6:11.
12. (a) Satan pillugu piviusoq suna tamatta ilumoortutut isigisariaqarparput, sunalu pillugu? (b) Juánasip agdlagaine sujugdlerne 2:15-imi aamma Jâko 4:4-mi allassimasut illit qanoq isumaqarfigaagit? (c) Satanip salloqittarlutit qanoq isumaqalersikkusukkaluarpaatit?
12 Nalunanngitsumik Eva sianiilliorpoq Satanip salluliuutaa upperigamiuk. Imaannginnerpali ullumikkut inuusuttorpassuit mianersoqqussutit Jehovap oqaasiani atuagassaasut imaluunniit angajoqqaamik kristumiunilu utoqqaanertat oqaatigisartagaat sumiginnartaraat? Illimmi? Eqqarsaat una assersuutigisigu: Satanip Diaavulup silarsuarmut matumunnga naalagaanera aamma pissutsinik aaqqissuussinerup matuma guutigimmani inuit isumaannik tappiillisitsisuunera piviusutut isigaajuk? (1 Juánase 5:19; Juánase 12:31; 14:30; 16:11; 2 Korintumiut 4:4) Guutip inassutaa una peqqissaarlutit maleruarniarpiuk: ’Silarsuarluunniit silarsuulluunniit pii asaqinasigit’? (1 Juánase 2:15) Imminut aperigit: ’Bibelimi oqaaseqaat una: ’Silap piinik asannikkumaannartoq Guutimut akerartortigitittaraaq,’ upperilluinnarnerpara?’ (Jâko 4:4) Satanip salloqittarlutit isumaqalersikkusuppaatit silarsuaq navianartorsiortitsineq ajortoq, qanoq-iliornerit silarsuarmiut tungaanningaanniit siuarsagaasut ajoqutaanngitsuusut. Mianersorit! Salloqittartinnaveerit!
Ullumikkut nakkarfissat salloqittaataasut
13. Suna nunani amerlasuuni ileqquulersimava, tamannalu pillugu Satanip qanoq isumaqartikkusukkaluarpaatigut?
13 Guutip inatsisaanik unioqqutitsisitsiniarnermigut ileqqut ajunngitsuusaartut imaluunniit Bibelimi toqqartumik ajorneragaanngitsut Satanip ussassaarutigisarpai. Una assersuutigisigu: Aappariit amerlanersaat aappassiariinnermik nalaaniit ajunngitsuinnarnik eqqaamasaqarput; kisiannili asasariit naapeqatigiikkaangamik allanik najuuttoqanngippat navianartorsiorsinnaapput. Asasariit naapeqatigiittarneri ukiuni nutaanerusuni aatsaat ileqquulersimavoq, sorsunnersuup siulliup pereerneratigut aatsaat nunani amerlasuuni ileqqorineqalersimalluni. Satanip isumaqalersinniaraluarpaatit tamanna nuannaarutaannaasoq navianaateqanngitsoq, tamannalu periarfissaralugu inuusuttut angutit arnat, arnallu angutit, marlukkuutaarlutik imminnut ilisarilersinnaasut. Eqqortumilli oqaatigissagaanni, ileqqoq tamanna navianartorujussuusinnaavoq.
14. (a) Asasariit naapeqatigiittarnerinik ileqqoq qanoq nalilerneqarsinnaava? (b) Asasariit naapeqatigiillutik kisimiikkaangamik qanoq ilillutik pileritsattarpat?
14 Kristumiut utoqqaanerusut inersimalluartullu, misilittagaqarnerugamik, navianaatit tamakku sianiginerusarpaat taamaattumillu iluaqutaasumik siunnersuisinnaallutik. (ússatit 27:12) Immaqali isumaqarputit asasariit naapeqatigiittarneri kanngunartuliornertaqanngitsut, angajoqqaavillu taamaalioqqunngimmatsit killiliivallaartut, nuannaarnissamik arsaarniaraatsit. Imaapporli: Soorlu inuit inerititaminnit nalilerneqarsinnaasut, ileqquttaaq kingunerisaminnit nalilerneqarsinnaapput. (ússatit 20:11; Matîuse 7:16) Soorlu arnaq 18-inik ukiulik, ikinngutiminik naapeqatiginnittartoq kiisalu naartulersoortoq, oqartoq: „Inuusuttut tuusintilippassuit assigalugit uanga isumaqaraluarpunga ajortoornaviarnanga.“ Miserratiginngilaa ikinngutini arlaleriarluni naapeqatigisareersimallugu „tasiorluni kunissuullunilu avaanngunarsisimasoq“. Arnaq 17-inik ukiulik, ikinngutiminik naapeqatiginnittarsimagaluartoq, oqarpoq: „Kunissuunnermit attuuarujoornermillu ima pileritsatsigisarpunga peeqqannit innaanneqarnissara pilerigilluinnartarlugu.“ Taamatut misigisaqarluni qaqutigoorpa? Naaggarluinnaq.
15. Asasariit naapeqatigiittarneri kingunipilunnut sunut annertungaatsiartumik pissutaatinneqarpat?
15 Inuusuttut imminnut kajungertut kisimiikkaangamik, soorlu asasariit naapeqatigiikkaangamik taamaaliortartut, kinguaassiuutitigut ima illigutsatsigisaramik inuusuttut kanngunartuliorusunngikkaluartut allaat Guutip inatsisaanik unioqqutitsisoortarput. Eqqarsaatigiuk ukiut tamaasa USA-innarmi arnat inuusuttut 19-it inorlugit ukiullit ataatsimik millionillit sinnerlugit naartusartut, taakkualu ilaat hundredinik tuusintillit naartuersittartut imaluunniit suli katissimanatik meerartaartartut. Ajoraluartumik, arnat inuusuttut taakku, aamma angutit ikinngutaat, Jehovap Nalunaajaasuisa qitornaannik ilaqartarput. Asasariit naapeqatigiittarnerat ileqquuvoq kingunipilunnut tamakkununnga annertungaatsiartumik pissutaasoq, aammalu ukiut tamaasa kinguaassiuutitigut aatsornartuusartunit napparsimasut ilaannut, immaqa arlalinnik millioniusunut, pissutaalluni.
16. (a) Kinguaassiuutitigut illigussuseq suup iluani aatsaat naammassineqartussaava? (b) Guutip innuttaasa ilarpassuinut suna pisimava?
16 Guutip siunertaraa kinguaassiuutitigut illigussuseq aappariinnerup iluani naammassineqartassasoq, aappariit asaqatigiinneratigut peqqinnartumik nuannaarnarnerugami naammaginnissutaallunilu. (Eprîarit 13:4; ússatit 5:15-19) Satanilli peqqusersiungaarluni Guutip tunissutaa tamanna sakkugisarpaa inuit tammartinniarsaralugit, atoqatigiinneq atornerloqqullugu kanngunartulioqqullugillu. Itsarsuaq, ullormi ataatsimi Israelikkut ilaat 24.000-it toqutaapput taamaalillutik Guutimut ajortulioramik, ullumikkullu inuit tuusintikkuutaat kristumiut ilagiissaannut ilaasortaajunnaarsitaasarput kanngunartuliornertik patsisigalugu. Silatusaarniarit. Unnersuussutit siunnersuutillu naalattakkit. Salloqittartinnaveerit. — 4 Môrsase 25:1-9, 16-18; 31:16.
17. (a) Timersornerit, nipilersornerit qitillu taamaaqataallu pillugit isuma salloqittaataasoq suna Satanip siuarsarpaa? (b) Suna pillugu silarsuarmi aliikkutat aliikkusersuinerillu Guutip innuttaanut navianaataappat?
17 Satanip peqqusersiorneri allat aamma mianersuutigikkit. Satanip silarsuaani timersornerit, nipilersornerit qitillu annertuumik aliikkutarineqartarput. Tamakku tamarmik immikkut ajunngikkaluarput nuannaarutaalluarsinnaallutillu iluaqutaasinnaallutik. (1 Timûtiuse 4:8; Saggaria 8:5; Lúkarse 15:25) Satanili salloqittaajumatuulluni isumassiivoq aliikkutat taamaattut navianaateqanngivissut, allaat inuit silamiorpaluttut aliikkusersoqatigisaraluarutsigit. Guutilli oqaasiani imaattumik mianersoqqussuteqarpoq: ’Tammarnaveeritsi; ajortut ikinngutigalugit ileqqut ajunngitsut aserortarput.’ (1 Korintumiut 15:33) Una eqqarsaatigeriaruk: Satanip aaqqissuussinerata upperisarsiornerit naalakkersuinermillu ingerlatitsinerit ilagimmatigit, sianiitsuliornerussannginnerpa isumaqassalluni aliikkusersuinerit silarsuup tungaaninngaaniit siuarsagaasut Satanimit sunnigaanngitsuusut? Mianersortuaannartariaqarpugut ’silarsuup inuisa avatitsinniittut iliortarnerisut pissusilersoqqunata’. — Rûmamiut 12:2, The New Testament in Modern English, J. B. Phillipsip nutsigaa.
Inuusuttunut illersuutissiat
18. Suna pillugu angajoqqaatit ilinnik ajoqersuisartut unnersuussisartullu pingaartittariaqarpigit?
18 Jehova Guuti asannittumik periarfissiorsimavoq ilissi inuusuttusi salloqittagaatsaaliorumallusi. Siullermik pingaarnerusumillu, angajoqqaanik tunisimavaasi ilissinnik ajoqersuussisunik unnersuussisunillu. Qujanaqaarli taamaaliortarmata. Arnaq 18-inik ukiulik aliasuttoq, katissimanani naartusoq, naammagittaalliorluni oqarpoq tamanna pisimanavianngikkaluartoq „angajoqqaakka angajoqqaajulluartutut iliorsimagaluarpata, nassuiaassimagaluarlungalu peeraqarnerup navianaataanik, aalajaatsumillu angummik ikinnguteqaqqunngikkaluarpannga“. Taava, illit Guutimik mianerinnittunik angajoqqaaqaruit qujamasuutigikkit. Ingasattumik killiliiffiginianngilaatsit, nuannaarnermillu tamanik arsaarniarnatit. Kisiannili asavaatsit, sernissorumallutillu. Misilittagaqarneri ilisimatussusiallu iluaqutiginiakkit angajoqqaatit siunersiortarlugit.
19. Inuusuttut illersornissaannut ikiortissiisut allat suut pissarsiarineqarpat?
19 Taakkua saniatigut Jehova nunami peqatigiiffiliorsimavoq inuusuttut ikiortissaannik. Qallunaatut atuarsinnaasut ilinniutigisinnaavaat Vågn op!-imi ilanngutassiat nangeqattaartut qulequtallit „Unge spørger“ (Inuusuttut aperipput), Jehovap najoqqutassiaasa ingasattumik imaqannginnerannik takutitsisut. Atuagaaraq Skolen og Jehovas Vidner (Atuarfeqarfik aamma Jehovap Nalunaajaasui) pilersinneqarpoq ikiorumallusi atuarfimmi Guutip inatsisaanik najoqqutassiaanillu maleruaasinnaaqqullusi. Aammattaaq Napasuliaq Alapernaarsuiffik-mi, ilagiit ataatsimiititsinerini ataatsimeersuarnernilu kajumissaarinerit unnersuussinerillu sammineqartarput. Ilanngutassiaq mannarpiaq, „Inuusuttusi — salloqittartinnaveeritsi“, ataatsimeersuarnermi ungasinngitsukkut pisimasumi oqalugiaatigineqartut ilagaat aammattaaq oqaluussinermut tunngasumik ataatsimiinnerit ilaanni saqqummiussaalluni.
20. (a) Suna siunertaralugu inuusuttut assigiinngitsorpassuarnik ikiorniarneqarpat? (b) Qanoq isumaqaruit aatsaat Satanip ilinnik salloqittaaniarsarineri akiorniarsinnaassavigit?
20 Isumaqassanngilasi tamakku samminiarivut ikioqatigiinniapilukkumalluta nuannaarnermik tamanik arsaarniarlusi. Naagga, Guutilli peqatigiissortaasa asavaasi, tassuunakkullu allagaasut oqaluuserineqartullu tamarmik siunertaraat sernissorumallusi — annaanniarlusi! Tamakkuninnga pingaartitsineq sungiunniarsiuk. Peqatigiiffiup atuakkiai ilinniutigalugit Bibelimik atuaqqissaartarneq ileqquliunniarsiuk; sallusuissut qiimmatsaatigisiuk. Arnaq 18-inik ukiulik, inuusuttunut unnersuussutit erseqqilluinnartut eqqarsaatigeqqissaareerlugit, imannak allappoq: „Tusakkama paasitippaannga uagut inuusuttugut qanoq usornartigisugut, sallusuissummiikkatta! Nunami allanik peqatigiiffeqanngilaq inuusuttortaminnik taama asannitsigisunik isumassuitigisunillu!“ Qanortoq ilississaaq taama isumaqaritsi! Ataqatigiissa Diaavulullu salloqittarniarsaraluta ilungersorneri assortorlugit, peqqusersiornerinik nalusuunnginnatta! (wD 1/8 86)
Apeqqutit uteqqitassat
□ Suna pillugu Satanip ingammik inuusuttut tammartinniagarai?
□ Qanoq ilillugu Satanip Eva ajortuliornissaanut tammartippaa?
□ Ullumikkut, qanoq ilillugit Satanip inuusuttut ajortuliornissaannut tammartinniartarpai?
□ Inuusuttut illersornissaannut qanoq iliortoqarpa?
[Qupp. 11-mi assiliartaq]
Soorlu Satanip Eva, Adamimit misilittagaqannginnerusoq, tammartinniaraa, aamma Satanip ingammik inuusuttut tammartinniagarai
[Qupp. 14-mi assiliartaq]
Inuusuttut marlukkuutaarlutik kisimiikkaangamik, kinguaassiuutitigut pileritsattarput, Guutip inatsisaanik unioqqutitsissutaasumik