Qanoq ililluta ’tumai peqqissaartumik atuarsinnaavavut’?

„JESUSITUT naammalluinnartigisinnaanngivippunga, qanorluunniit qinutigigaluaruma ilungersortigigaluarlungalu.“ Atuagassiakkut U.S. Catholic-ikkut isumasiorneqartut 89 procentii taama isumaqarput. Ilumut, Kristusip tumaanik atuaaniarsinnaanissamik eqqarsaat sapernarluinnartutut isumaqarnarsinnaavoq — ingammik ilagiit nalinginnaat Kristusip qanoq ittuussusianik nassuiaasarnerat eqqarsaatigigaanni. Angut katuuliusoq oqarsimavoq: „Pingaarnertigut Jesus naakkittartutut, asannittutut, isumassuisartutut akaarinnittutut uannullu piumasaqarpallaanngitsuusutut pissuseqartittarpara. Naalagiaraangamali paasisarpara Jesus ima piuaatsigisumik akitsisitaasutut pissuseqartitaammat tammarsimasutut misigisarpunga, naammalluinnanngissuseralu nikanarsaatigalugu.“

Kisiannili iivangkiiliumik allakkani Jesus ’taama piuaatsigisumik akitsisitaasutut pissuseqartitaa’nngilaq. Iivangkiiliumik allakkat takutippaat Jesus akimarnit pinnagit kisianni sulisartut ilaqutarigai. Angutisiaa Josef sanasuuvoq. Jesusip meeraanerani pisimasut ilisimaneqarpianngillat, pisimasorli ataaseq soqutiginaqisumik paasissutissiivoq. Jesus aqqaneq-marlunnik ukioqarmat, angajoqqaavisa ilagaat ukiumoortumik poorskisioriartorlutik Jerusalemiliaramik. Taamani Bibelimut tunngasumik oqaloqatigineqarnini ima isumaliutigitigigamiuk ilaquttaminit qimagaavoq. Ullut pingasut qaangiummata Josefip Mariallu, soorunami isumaalullutik, naalaffimmi nanivaat ’ajoqersuisut akornanni issiasoq, tusarnaarlugillu apersortarai’. Aamma ’tusartaasa tamarmik sianissusiagut akisarnerisigullu tupigingaarpaat’. Tamanna eqqarsaatigeriaruk: Aqqaneq-marluinnarnik ukioqarami apeqqutit anersaap piinut tunngasut eqqarsaatissarsinartullu apeqqutigiinnarnagit aammattaarli silatuunik akissuteqartarsimavoq. Qularutissaanngilaq angajoqqaaminit perorsagaanini iluaqutigisimagaa! — Lúkarse 2:41-50.

Illit inuusuttuuguit, Kristusip maligassiaa malinniarsinnaassaviuk? Malinniarsinnaassavat! Kristusimmi nammineq ’maligassaqartippaasi tumini peqqissaartumik atuaqqullugit’. — 1 Pîtruse 2:21, NW.

Inuusuttuulluni piffissaalluarpoq Guuti tunngaviusumik ilisariniassallugu oqaasialu ilinniassallugu. Immaqa ilisarisimasavit ilaasa piffissaq sivisooq asiutittarpaat titartakkat oqaluttuatut tulleriiaakkat atuarlugit TV-lu isiginnaarlugu. Illilli Jesus malinniarsinnaavat, nukappiaraagamimi Jehovamik ilisarsiniarnini nuannaarutigisarpaa. Anersaamut tunngasunik nuannarisaqarami ’Jesus alliartorpoq ilisimassutsimigut’. (Lúkarse 2:52) Illittaaq taamaaliorsinnaavutit.

Una assersuutigisigu: Atuarfimmi Afrika Kujallermiittumi ilinniartitsisoq aperineqarpoq Bibelip ilumoortuussusia uppernarsarsinnaaneraa. Miserratiginagu oqarpoq saperluni. Nukappiaraq, Jehovamik Nalunaajaasoq, nakimaalluni oqarpoq: „Uanga Bibelip ilumoortuussusia uppernarsarluarsinnaavara!“ Qanoq ililluni? Napasuliaq Alapernaarsuiffik-mi ungasinngitsukkut saqqummersimasumi atuaqqissaakkani eqqaavai. Akuerineqariarami siulittuut Dânialip agdlagaine, kapitalit aappaanni, allaaserineqartoq nassuiarpaa. Atuaqataasa tupigusuutigeqaat silarsuarmi naalagaaffissuit tulleriiaartut pissaaninikkiartorneri pissaaneerukkiartornerilu kiisalu Guutip naalagaaffianit suujunnaarsinneqarnissaat qanoq siulittuutigineqarsimasut nassuiarmagit. Tamatuma kingunerisaanik soqutiginaqisumik oqaloqatigiinneqarpoq, atuartullu apeqquterpassui akissallugit periarfissaqarpoq.

Guutip piumasaa naammassiartorlugu

Inuusuttuunermini Bibelimik ilisarsinini ilisimasaqarninilu killinneqaatigalugu Jesus kingusinnerusukkut pingaaruteqaqisumik iliuuseqarpoq. ’Jesus Jordanimut piartorpoq Johannesimut, taassumunnga kueqqulluni.’ Guutip oqaasianik kiffartuuteqartutut akisussaassutsi eqqortittariaqalerpaa. Kuisinnermigut sassarpoq Guutip piumasaa naammassiumallugu. — Matîuse 3:13-15.

Aammattaaq kristumiut piumaffigineqarput Kristus malinniassallugu kuisillutik. Kuisinneq assersuutaavoq illernartoq, tunniulluinnarsimanermut takussaasumik nalunaaqqutaalluni. Sulisitsisoq niuerniaqatigiilluunniit suliffigissallugit angerutta, piumasarineqartut pinngitsooranilu naammasseqqusaasut paasiniartarpavut taavalu immaqa isumaqatigiissut atsiorlugu. Atsiorneqarsimanngitsorli isumaqatigiissut atortuunngilaq. Aamma kuisinneq taamatut isigineqarsinnaavoq — Guutimut tunniulluinnarsimanerput kuisinnikkut atortuulersitaassaaq. Imatut oqaatigineqarsinnaavoq: Jesusitut oqarpugut: ’Tassa aggerpunga, peqqusat, Guuti-aa, naammassiartorlugu.’ (Eprîarit 10:7) Tassuuna Guutip kiffarilerpaatigut, oqaasianik kiffartuuteqalerluta! — 2 Korintumiut 3:5, 6.

Soorunami, Jesus malillugu Guuti tunngaviunerusumik ilisariniaqqaartariaqassavat. Jehovap Nalunaajaasuisa illit qitornatillu ikiorsinnaavaasi piuminarsagaasumik Bibelimik atuaqqissaaqatigiinnikkut.

Oqaluussineq salliutinneqassaaq

Kuisereerami Jesusip iisinnginniarneq, eqqissisimalluni eqqarsaqqissaarneq qinunerlu aallullugit ullut arlallit atorpai. Qularnanngitsumik tassuuna usserniarneqarnissaminut piareersarpoq. Satanip Diaavulup ’silamiut naalagaaffiinut tamanut’ naalagaassusermik neqeroorfigaa. Diaavulup neqeroorutaa ilassisimagaluaruniuk Jesusip ila periarfissaqarluarsimassusissaralua! Kisiannili Kristusip nalunngilaa iluatsikkiartorniaraluarneq tamanna sivikitsuinnarmik kinguneqassasoq. Diaavulu ingerlaannaq itigartippaa, ’taamanernilli aallarnerluni oqaluussisalerpoq oqarluni: Allamik isumataaritsi, qilammiup naalagaaffia qanillimmat’. (Matîuse 4:2, 8-10, 17) Nunami inuunermi sinnera Kristus allamik atorfeqarani Guutip naalagaaffianik oqaluussinermik kiffartuuteqarpoq.

Aamma ullumikkut kristumio Satanip silarsuaanit usserneqatsaalissaaq suliffiit akissarsinarnerusut atorfimmilu iluatsikkiartorsinnaanissaq inuunermi pingaarnerpaatinniassallugit. Jesusip ajoqersukkani siulliit qaaqqummagit, ’taava qassutitik erniinnaq qimappaat malillugulu’. (Mákorse 1:17-21) Taava silatusaarnerussava anguniakkanit silamiorpaluttunit qassutitut ittunit napititaassalluni? Ullumikkut Jesusip malitsigisani peqquai ’naalagaaffimmik tusagassaq nuannersoq oqaluussissutigeqqullugu’. (Matîuse 24:14, NW) Immaqa ilaquttannik pilersuisuuvutit, imaluunniit allanik akisussaaffeqarputit isumagisartakkannik. Jehovap Nalunaajaasuisa ilarpassuisa unnukkut ullunilu sulinngiffimminni oqaluussisaramik kristumiutut akisussaaffitsik eqqortittarpaat. Ilaat naak ilaquttaminnik pilersuisuugaluarlutik allamik atorfeqaratik oqaluussisartuusinnaapput!

Afrika Kujallermi angutip inuusuttup pilersaarutigigaluarpaa atuartuujunnaarnermigut universitetimi ilinniartuuniassalluni. Kisianni, Jehovamut tunniulluinnarnini kuisinnermigut takutereersimallugu, misigivoq allatut ajornartumik allamik atorfeqarani oqaluussisartunngortussaalluni. Ataataata Nalunaajaasuunngitsup siullermik tamanna ajoraa. Sivisuumilli oqaloqatigiissutigereerlugu ernermi Jehovap Nalunaajaasuisa immikkoortortaqarfianni Afrika Kujallermiittumi kiffartuuteqalernissaa kiisa akuersissutigaa.

Ukiuni qulingiluani pilluarnarfiusuni tassani sulereersimalluni, aappanippoq, nulianilu ilagalugu allamik atorfeqarani oqaluussisartunngorluni. Kingornagut meerartaarput. Taamaakkaluartorli Jehova qinnuigaat ikioqqullutik allamik atorfeqaratik oqaluussisartuujuarniaramik. Jesusip neriorsuutaa eqqaamavaat, oqarmat Guutip naalagaaffia piniaqqaarutsigu, ’tamakku [timip pisariaqartitai] tamaasa ilanngullugit piumaarivut’. (Matîuse 6:33) Tamanna eqquutinneqarpoq. „Ukiuni makkunani ileqqaarluta inuusimavugut,“ ataataq oqarpoq, „panippulli alianaatsumik angerlarsimaffeqartipparput timikkullu pisariaqartitai tamaasa isumagisarlugit.“

’Qanilaartoq uummammigullu makitajuitsoq’

’Ornissinga tamassi erloqisusi nanertugaasusilu,’ Jesus oqarsimavoq, ’qasuersissavassi. Nammaatara ilissinnut pisissiuk ilinniarfigalungalu, qanilaarama uummatikkullu makitajuikkama; taava tarnissinnut qasuerfissarsiumaarpusi. Nammaatarami iluaqaaq, nammakkiussaralu oqeqaluni.’ — Matîuse 11:28-30.

Tupinnartulioraangami, soorlu inngilipilunnik anisitsigaangami, Jesusip nammineq nersugaassutiginiarneq ajorpaa, saqqumisumilli oqarpoq ’Guutip anersaava ikiortigalugu’ taamaaliortarluni. (Matîuse 12:28) Aamma tusarnaartorpassuit naak tusarnaaqqissaartissinnaagaluarlugit ima killinnartigisumik ’ajoqersuutaa tupaallaatigigaat’, nammineq naalannaatiginiarneq ajorpaa. (Lúkarse 4:32) Kisiannili oqarpoq: ’Ajoqersuutiga uanga piginngilara, aallartitsisimali pigaa.’ — Juánase 7:16.

Ullumikkut kristumiut ilumoortut ilungersortarput taamatut nikanartinniarlutik. Inunnik allanik ajoqersuigaangamik imminnut alapernaaqqusaarneq ajorput. Akerlianilli tusarliussaq Guutip oqaasianeersoq allanut nassuiassallugu piginnaassuseqarnerminnik Jehova taassumalu peqatigiissortai qutsavissaatikkasuartarpaat. ’Suna pigaajuk tunniussatut pisaarinngisat?’ apustili Paulus aperivoq. — 1 Korintumiut 4:7.

Jesusip nikanartinnera takutinneqarportaaq oqaluussisartutut angalasartutut kilometerit tuusintilippassuit angalaffigimmagit, qamutinik angalanani, pisuinnarlunili. Ilaanni ajoqersukkanilu ima qasutigigamik ’qasuersaallatsiar’tariaqarput. Inuppassuilli takkummata, anersaakkut tuppallersarneqarusoqalutik, Jesusip qasoqqanini puiorpaa ’amerlasuunillu ajoqersulerlugit’. — Mákorse 6:31-34.

Lesothomi Afrikamiittumi Jehovap Nalunaajaasuisa nakkutilliisuutitaasa angalasartut ilaat (ilageeqatigiinnut nakkutilliisuusoq) suleqatini marluk ilagalugit ungasinngitsukkut taamatungajak iliuuseqarput. Nalunaaquttap akunneri 22-t atorlugit nunap ilaa qaqqartooq pisuttuarfigaat kristumioqatitik ikittut avinngarusimasumi najugaqartut tikeraarfigiartorlugit. Angalasimanermit qasungaarami ilageeqatigiinnut nakkutilliisoq aalajangerpoq aqaguani qasuersaassalluni. Inuilli ima amerlatigisut ilassiartormanni aperiartorlutillu, naak nukeerussimagaluarluni makippoq Naalagaaffillu pillugu tusagassamik nuannersumik ajoqersulerlugit. Ilassineqarluaramik angalasut qasoqqasut misigipput tamaviaarsimanerminnut akiligaalluarlutik.

Taanna malinniarsiuk!

Apustilip Paulusip kajumissaarpaatigut ’uppernitsinnik akunnermiliuttoq pingaarneq inerititsisorlu Jesus aarlorfigiuaannaqqullugu’. (Eprîarit 12:2, NW) Taamaaliorsinnaavugut iivangkiiliumik allakkat atuartarlugit eqqarsaatigeqqissaarlugulu qanoq Kristus malinniarsinnaaneripput. Jesus ersisuitsuuvoq upperisarsiornermut tunngasutigut pisortat ilumoortuusaarnerat imminullu iluarinerat ajornerartaraangamigit, naak nalunngikkaluarlugu uumigigaanni toqukkumaaraannilu. (Matîuse 23:1-36; 26:3, 4) Saassunneqartaraangami eqqissisimallunilu imminut naalakkersorsimavoq. (1 Pîtruse 2:23) Ajoqersuinermigut inuit pissusiinik paasinnilluarnini ersersittarpaa, ajoqersuutillu itisuut oqaatsit paasiuminartut atorlugit nassuiarsinnaallugit.

Jesusillu piginnaaffiisa annersaraat asanninnera. ’Asanninneq tamanit anneq tassa ikinngutini pillugit inuunini iperaraanni.’ (Juánase 15:13) Oqaatsillu taakkua isumatussusiat ilavaa oqarami akerartortivut asassagivut. — Matîuse 5:43-48.

Jesusip uatsinnut maligassaassusiata ila nalissaqanngissusia! Taanna malinniarlugu ajornaatsuunngilaq, ilaatigullu immaqa naattassaagut. Kisiannili taamaatinnaveerisa! (Galâsiamiut 6:9) Inuimmi arlalinnik millionillit Jesus malinniarlugu iluatsitsipput. Uffa, atuagassiamik uuminnga ilinnut aatsisoq immaqa taakkua ilagaat, taassumalu nuannaarutigeqalugu ikiorumassavaatit Jesusip tumai PEQQISSAARTUMIK atuaqqullugit! (wD 1/9 86)

[Qupp. 5-mi issuagaq]

Inuusuttuugallarami allaat Jesus anersaamut tunngasunik soqutiginningaarpoq. Tamatumuuna illit malinniarpiuk?

[Qupp. 6-mi issuagaq]

Jesusip silamiorpaluttumik iluatsikkiartorsinnaanissani naaggaarpaa oqaluussisarnissaq pingaarnerutikkamiuk